Yunapi 1:9 - Godokono Wade Tabo

⁹ ega꞉walo a꞉ma꞉ kuba tanalo osiyodiloma꞉ ubia꞉noma꞉ eba eda꞉nalo, wadewade tanalo kapiya osiyodilolema꞉ ubi kawonomamo iyatinata. Me mabuma꞉ potele a꞉imano Godoma꞉ deda꞉na, ebe Kawodawate me opo epo epetapi uwatea꞉no a꞉ma꞉ kapiya elawiyata, iyo, ebete kalakala tanalo kawonomo a꞉ma꞉ unamo adipaniya, a꞉ma꞉le ebe kalakalago Kawo Elawodawano okoli bailo kokoliawitama꞉.”

Godokono Hido Tabo

⁹ ba꞉gala ama꞉ kuba komo ododima꞉ ubiha꞉ma꞉ ba eda꞉na, hidohido komo kapiya ododilima꞉ ubi konomamo ihatenata. Ba꞉moe ba꞉be mabuma꞉ pote amia꞉no Godoma꞉ deda꞉na, ba꞉be Kodawate komo hopo habanapi uwateheno ama꞉ kapiya belawiya꞉ta, iyo, ebete konomo kalakala ama꞉ hunamo a꞉haminuya꞉, ama꞉le ba꞉be kalakalago Ko Gawadubu emede bahilo kolutama꞉.”

Yunapi 1:9 Iomraidhean Croise

Luku 4:18

“Godokono Uliyanate nagodolo bokolina, mabu ebete na elaweniya, nale nigologololo dilukuliona ebe epatamo Godokono Wade Tabo katama꞉. “Ebete na apaliboniya idoko motolo dilukuliona ebe epatamo, ebema꞉ nale ibi ka꞉kiyawaolaemamo, tete ebe na꞉pe ibi idoko motone kowagailima꞉, ega꞉walo na balidi tamiolame epo kanalemamo, ibino balidi ka꞉meleoma꞉. “Iyo, nale mibomibago dowapata꞉lamena ebe epo tutunomoma꞉ ka꞉midilimamo,

Yone 1:41

Ebene duiyanomolo A꞉ndulute tote ebeno naniwi Saimonoko da꞉numiya ebe nananiya, “A Mesayako nanitabonomolo uima꞉!” Buka ka꞉la꞉mioledawa, modobola a꞉ma꞉ me tanalo niyatawa, Yu epate Godokono Alibodawa Kelisoko ibino tabamo Mesayama꞉ ka꞉minaka.

Yone 10:17

“Numa꞉la꞉, naimano kalakala bitana naimano igilo iyabaiamo iyatima꞉, ebema꞉ Nabiwite nilakapolo na nemalagidilonena. Ega꞉walo me tanalo idila, nale naimano igilo iyabaiamo diyatimo, nale nanitabolo walo ka꞉kelaemamo.

Yone 20:17

Ya꞉sute ebetamo negiya, “Na nani akolawenitala꞉ mabu na naimano Nabiwitamo odoloa꞉nola. Modobola a꞉ma꞉ toawete naimano ekaki nananala꞉, ‘Na Ya꞉sute gemo, naimano Nabiwi ebe la꞉imano Nabiwila, iyo, naimano Godo ebe la꞉imano Godola. Tete tatalila na ebetamo walo ka꞉ka꞉tomamo.’”

Yone 3:34

Nanitabola, Godote dapalibiya ebe Kawodawate Godokono nani tabo kiyawaonako, mabu Godote ebeno Uliyanano elawo kawonomo ebetamo iyalo ikamiya,

Oelamepino Ododili Komokomo 4:26

Iyo, me opolo kawokawo elawodubate ebetamo kuba osiyodiloma꞉ lamota꞉oniya, ega꞉walo watowatopi dubate aladabutiya, iba꞉te Kawodawa Godoko ega꞉walo ebeno Alibodawa Kelisoko iba꞉tamo gowelao tanalo kosiyodiloma꞉.’”

Oelamepino Ododili Komokomo 4:27

Ebene nanitabokobi midipiate towetowe tabo gela magumulo walo na꞉kegeliya, “O Godo, nanitabola, a꞉imano Wade-talena Wokodawa Ya꞉suko a꞉ma꞉le a꞉imano Alibodawa Kelisoma꞉ iyalo a꞉midiyata, wiyasiya Kawo Elawodubu Elodiko ega꞉walo Poniyase Paeleteko, iba꞉te me Yelusalema duliyomololo nanitabokobi midia꞉pi epetapi ega꞉walo Isalaela epago aladabutiya eba꞉go ka꞉gowelaoma꞉.

Loma 12:9

Ebema꞉ modobola la꞉ nanitabokobi midipiate lumagi kapiya idi masigia꞉no epo epetapi bilibilinomatamo nilakapo nawokaliminakiyala꞉, ega꞉walo kuba osiyodilole tanaloma꞉ kawonomamo ubia꞉noma꞉ eba eda꞉onalo wade osiyodilo tanalo kodakodalo natila꞉niyala꞉.

Loma 15:13

Nanitabola, Godote elawo nanitabokobi midipiatamo ikalamiya iba꞉te ibino igilo mula꞉ tanalo nanitabolo laema꞉ olowiolo kilukulionama꞉. Ebema꞉ modobola ebete la꞉ Yua꞉pino nanitabokobi midi tanalodo la꞉imano tepo magumu kawo kalakala tanalamo ega꞉walo milo tanalamo netabokailaemene, ebene la꞉le ebeno Uliyanano elawamo olowiolo okoli tanalo magumulo kawonomamo kapepeomamota.

2 Kolini 11:31

Nanitabola, aimano Kawodawa Ya꞉sukono Nabiwi ebe Godotela, ebema꞉ modobola epate ebe uwomua꞉ uwomua꞉ tetelo unamo nadipatenakoma꞉na꞉, iyo, ebete naimano tepo magumuno tanalo iyatawala, nale da꞉kiyawautamo ebe tabo a꞉da꞉ taboa꞉.

Galesiya 5:22

Wiyasiya lumagino okoli magumulo Godokono Uliyanano da꞉imite demaigana, ebe da꞉imite golanomoma꞉ eba eda꞉nalo ebe magumulo wadewade tanalate ba꞉pola꞉nama꞉na꞉. Ebe iyaiya tanalo ebe epetapi nilakapolo malagidilole tanalo, tepo magumuno kalakala tanalo, milo tanalo, temeteme magumulo kodakodalo lamota꞉ona tanalo, nigologolopiatamo nilakapo awokalimi tanalo, epetapi gito walubili tanalo, nanidawama꞉ eda꞉ tanalo,

Epesese 1:3

Numa꞉la꞉, aimano Kawodawa Ya꞉su Kelisokono Nabiwi ebe Godotela, ebene ale Kelisoko magumulo dilukulinama꞉, ebete ebe tanalodo a wadenomamo kowalubinama꞉ ebeno Unu Duliyomololo kebe wadewade tanalate da꞉pola꞉na ebe tanalo bilibilinomo ebete atamo gito ikaeamena. Me mabuma꞉ modobola ale ebe kemoiomalema꞉!

Pilipai 2:9

Me mabuma꞉ Godote ebe ununomamo adipatete wade mailonomo idi ebetamo ebo ikamiya, ebe mailono elawote mailo epetapi bilibilinomono elawo nodoilina,

Yunapi 2:9

A wiyasiya wade tanalo idi numinama꞉, ebe tanalo ebe Ya꞉sukono Kawo Elawodawano tanalola. Nanitabola, ebete me opamo da꞉piwisigiya, tete da꞉pesolo Godokono nopopino umi magumulo eba pokolinalo, ebete Godokono nilakapo tanalodo epo bilibilinomono kuba osiyodilole mabuma꞉ ebo a꞉iya, iyo, ebete a꞉e magumulo kawokawo temeteme duwatiya, ebe mabuma꞉ Godote ebe unamo adipatiya ebete ebeno kawo alonomo magumulo kokolinama꞉.

Yunapi 7:26

Ebema꞉ kalakala kawonomola, me tetelo Ya꞉sute Godotamo kalimagono ikameopino Unu Watodawanomoma꞉ eda꞉na, iyo, ebe a꞉ka꞉tuwa꞉ aimano modoboa꞉ tanalo bilibilinomo magumulo a wadenomamo owalubinako. Nanitabola, ebete Godoko kalakalakobi midima꞉ tuputupunomoma꞉ eba eda꞉nalo, kuba osiyodilo tanalo idi ebegodolo kitana꞉, puliyanomola. Ebe mabuma꞉ piyate me opolo kuba tanalo dosiyodilolenaka, Godote Ya꞉suko ibi bilibilinomo magumune iyabaiamo watiamidate ebe unamo ebo adipatiya ebete Unu Duliyomololo kokolinama꞉.

1 Pita 1:3

Modobola a kalakala tabo aimano Kawodawa Ya꞉su Kelisokono Nabiwitamo kadipatemalema꞉, mabu ebe nani Godotela. Numa꞉la꞉, ebete ebeno kawo nilakapo tanalonomo ma kunu awokalimiya, ebete Ya꞉su Kelisoko a꞉e magumune igilamo dadipatiya ebe tanalodo oli igilo atamo ikaeamiya. Ebe mabuma꞉ ale ebeno pe tanaloma꞉ olowiolo kalakalago ebe makopelenama꞉,

1 Yone 1:3

Ebema꞉ mabu keleka꞉ ale ulamete dolowiyama꞉ ebe tanalo la꞉tamo da꞉kiyawautama꞉? Mabu bitana a ubila la꞉ olowiopiate ago kapiyama꞉ eda꞉oma꞉, ale Nabiwi Godago ega꞉walo ebeno Gudu Ya꞉su Kelisago kapiyama꞉ keba kunu keda꞉onama꞉ eba kunu,

Awokalilame Tanalo 2:15

Ega꞉walo la꞉imano kuba tanalo idi ma kunula, la꞉ epetapi Nikolayasikono kuba iyatulame gabodo wapata꞉lamenamata.