2.Betero 1:4 - Te B'aib'ara

⁴ ake E anganira iai taeka n akoi ake a kakawaki ma ni moa ni kakannato, b'a kam aonga ni biri nako man te kaib'ab'aru ae kamamate ae i aon te aba, ao kam riki b'a taani buokanib'ai n te aro n Atua.

2.Betero 1:4 Iomraidhean Croise

I-Rom 9:4

ake Iteraera, ake a tabekaki iroun te Atua b'a natina, ake E kaota mimitongina nakoia, ao E karaoi taiani boraraoi ma ngaiia; E anganiia te Tua, ao e reke i rouia te aro n taromauri ni koaua, ma taeka n akoi,

2.I-Korinto 1:20

B'a boni Ngaia te “Eng” nakon ana taeka n akoi ni kabane te Atua; ao i Rouna naba te “Amen” are ti neboa iai te Atua.

2.I-Korinto 3:18

Ao ngaira ni bane ma matara aika aki rabunaki, aika ti nora mimitongin te UEA kanga n te tirotaam, ti tabe n onikaki nakoni katotongana man te mimitong teuana nakon teuana; ao e riki aei mairoun te UEA ae te Tamnei.

2.I-Korinto 6:17

Ao E kangai naba te UEA: “Ma ngaia ae kam na m'awa mai buakoia, kam na kaokoroingkami; Kam na aki riinga te bae kam'ara, Ao N na butim'aingkami;

I-Karatia 3:16

A atongaki taian taeka n akoi nakon Aberaam ao nakon ana kariki, ni kaotia b'a e aki nanonaki iai aomata aika bati, ma e kaangai, ao nakon am kariki, ni kaotia b'a ti temanna ae nanonaki iai, b'a Kristo.

I-Karatia 6:8

B'a ane ira nanon rab'atana ao e na anaa mwina ae te mate man te rab'ata; ao ane ira nanon te Tamnei are Raoiroi, ao e na anaa mwina ae te maiu are aki toki mairoun te Tamnei are Raoiroi.

I-Ebeto 4:13

ao n tokina b'a ti na bane n roko n te onimaki ae ti teuana ao n ataakin Natin te Atua; ti na riki b'a kanga te aomata ae e a ikawai, n ai aroni Kristo; ao ti na riki n ai arona ni koaua:

I-Korote 3:10

ao kam a tia ni karina i aomi te aomata ae boou, are e teimatoa arona ni kakabouaki iroun Teuare karikia b'a katotongana, b'a kam aonga n ataia raoi.

Ebera 12:10

A reireiniira ni kaeti arora tamara aika taman rab'atara i nanon tabe bong n ai aron are a taku b'a e raoiroi i roura; ma te Atua E reireiniira b'a e bongana i bukira, b'a ti aonga ni buokanib'ai ni maiuna ae itiaki man te bure.

Ebera 9:15

I bukin aei ngkanne, ao Kristo boni Ngaia ae buoka reken te boraraoi ae boou, are a kona iai te koraki ake a weteaki iroun te Atua ni kab'aib'aiaki n te kab'aia ae akea tokina, are E a tia te Atua n taekinna n ana taeka n akoi. E kona ni karaoaki aei i bukina b'a iai te mate are kainaomataia aomata man taiani bure ake a karaoi ngke bon iai te moa ni boraraoi.

Iakobo 1:27

Aio te Aro ae itiaki ae aki kam'ara i matan te Atua ae te Tama: bon tararuaia akana a mate tamaia ma aine aika a mate buia ni kain nanoia; ao te kawakinna te aomata b'a e na aki baareka ni b'ain aon te aba.

2.Betero 1:1

Mairoun Timon Betero, ae ana toro ma ana tia tuatua Iesu Kristo, nakoia akana reke i rouia te onimaki ae kakawaki ae ti te arona ma ara onimaki, ae reke n ana raoiroi Atuara ma ara Tia Kamaiu are Iesu Kristo.

2.Betero 3:13

Ma n ai aron ana taeka n akoi, ti a tiku ni kaantaningai karawa aika boou ma te aonnaba ae boou, ike e mena iai karaoan nanon te Atua.

2.Betero 3:9

E aki baenikai te Uea ni karaoa nanon ana taeka n akoi, n ai aron are a taku tem'angina n aia iango; ma E taotaona nanona nakoimi i bukina b'a E aki tangira temanna i buakomi b'a e na mate, ma E tangiriia aomata ni kabaneia b'a a na rairi nanoia.

1.Ioane 2:25

Ao aio te taeka n akoi are E tuangiira: b'a ti na maiu n aki toki.

1.Ioane 3:2

Ngkami aika kam tangiraki, bon natin te Atua ngaira ngkai; ao e tuai ni kaotaki b'a terana arora rimwi. Ti ataia, b'a ngkana E a manga oki Kristo, ao ti na katotonga arona, i bukina b'a ti na nora arona ni koaua.