Yunapi 4:1 - Godokono Hido Tabo

¹ Ba꞉bema꞉ numa꞉la꞉, Godote dopamo aeno iniwala꞉tamo kebe tabo hibilo da꞉goiya꞉, ba꞉be tabote ka꞉lo aeno komoma꞉ bitana, iyo, ale ebeno Hido Hawela Ami Hopamo kona꞉pa꞉la꞉hama꞉ ebete modobo gabo atamo ikaa꞉miya꞉. Ba꞉be mabuma꞉ wadiyala aeno iniwalino komo ba emalagidolo ale tole komo lawete hidonomamo kemedenama꞉nema꞉, la꞉ ipuwalo etate ba꞉be Hido Hawela Ami Hopamo na꞉pa꞉gama꞉ hibo gabo ududikapoma꞉.

Godokono Wade Tabo

¹ Ebema꞉ numa꞉la꞉, Godote dopamo aimano ewoniatamo kebe tabo nanitabolo kegiyale, ebe tabo ka꞉lo aimano tanaloma꞉ bitana, iyo, ale ebeno Wade Ela Ami opamo ka꞉nopila꞉oma꞉ ebete modobo gabo atamo ikaeamiya. Ebe mabuma꞉ modobola aimano ewonino tanalo eba malagidilolo ale tole tanalo lawete wadenomamo kilukulinamalema꞉, la꞉ magumulo idite ebe Wade Ela Ami Opamo nopegama꞉ ele gabo odidikapoma꞉.

Yunapi 4:1 Iomraidhean Croise

Ma꞉tiyu 24:48

“Huiyatiya ba꞉be okodawate kuba ukui lawete ebeno tepo ipuwalo ba꞉ma ka꞉na da꞉goemene, ‘Naeno namutudawate tete ga꞉ga꞉dopolo nemedena, tiyolo kapenaha꞉,’

Oelamepino Ododili Komokomo 3:19

Ba꞉bema꞉ wadiyala la꞉ la꞉eno tepo ipuwoeno ukui hiya꞉ma꞉ midiliti Godotamo nohobila꞉la꞉, ba꞉bene ebete la꞉eno kuba egebolelamete kadodoholelamema꞉na꞉ta.

Loma 11:20

Ba꞉bema꞉ nale ba꞉be lumagitamo kohuiyama꞉nemo, “Amia꞉no tabo ba꞉ hibila, huiyatiya hidamo! Ama꞉ Godoko tolemelo ama꞉ ha꞉kiya akawagahala꞉, mabu puya꞉te dopamo hibima꞉ midiha꞉ma꞉ deda꞉hanama꞉ ebete ibi dito iya꞉hiliya꞉, ba꞉bene ama꞉ amia꞉no hibima꞉ midi komo kapiyado ibino habalo la꞉nata.

Loma 3:23

mabu hopo habanapi hiliyonomate kuba komokomo ododiliti ibino hibo gabo ududi komodo Godokono holoholo hapuni muhulunomamo a꞉tolamiya꞉.

1 Kolini 10:12

ba꞉bema꞉ pote ba꞉ma ka꞉na demalagidolona, “Na naeno heloamo modobolo la꞉namo,” ebe hidamo! Diyala, tete tatalila ebete kuba ododi ipuwamo da꞉ negamene.

2 Kolini 6:1

Ba꞉bema꞉ la꞉ nonolata, a Godokono hibi okopa꞉te eba꞉go oko ba owatina, ale la꞉ ba꞉ma ka꞉na toelamehola꞉ta, Godote hopo habanapa꞉tamo da꞉hawakalimiya꞉ la꞉ puya꞉te ba꞉be malemale komo da꞉lawima, la꞉ hidamo! Modoboha꞉ ba꞉be malemale komote la꞉ ipuwalo hibi oko owatihino la꞉ ipuwane hidohido gaote ba꞉bema꞉ a꞉kikulihamena꞉.

Galesiya 5:4

A꞉iye! La꞉ puya꞉te Godokono Tutumu Tabamo papamila꞉ha komodo ebeno tuputupupima꞉ eda꞉hama꞉ dewagelenama, la꞉ ha꞉kiya la꞉ Kelisogodone ya꞉lo iya꞉hilimata, iyo, la꞉ ba꞉ Godokono malemalelo dito ikaa꞉me komone ohobila꞉huimata.

2 Timoti 2:13

Huiyatiya kalakala bada konomola꞉ka꞉, mabu keba tetelo ale ebe hibilo ta꞉mataheno, ba꞉ba tetelo ebete Hibidawanomoma꞉ ba eda꞉na a dito a꞉kamiya꞉poa꞉mene, iyo, ebete a kowalubima꞉ dopamo hibilo da꞉goiya꞉, ebete ba꞉be tabo tama꞉mo ihate modoboha꞉!”

Yunapi 12:15

Ba꞉gala Godokono malemale komodo duluhukuna, modoboha꞉ la꞉ ipuwalo etate ba꞉be ka꞉ka꞉ mula꞉ komone ga. Numa꞉la꞉, kakanomo ilinate lumagino palilo apete, ba꞉bene ebete iya꞉tawaheno lawete ebeno guguda꞉te nahama꞉ iba꞉tamo dikalamemene, diyala, ebeno genamalo olalati konomote uluhukuti ebeno gugudi ipuwalo komo hiliyonomate da꞉ ha꞉lahamena꞉. A꞉iye, la꞉ hidamo! La꞉ ipuwalo etate ebeno tepo ipuwoeno mauba komodo ba꞉bako kaka ilinama꞉ eda꞉ modoboha꞉!

Yunapi 12:25

Ba꞉bema꞉ la꞉ hidamo, ba꞉ma tetelo pote la꞉tamo dolamagina ba꞉be Kodawoeno tabo ulihoma꞉ ubiha꞉ma꞉ akeda꞉hala꞉. Numa꞉la꞉, dopamo ba꞉moe hopo habalo ebeno tabote Moseseko ipuwado duluhukuya꞉, ba꞉ba tetelo puya꞉te ibino galo da꞉muhilameholiya꞉ iba꞉te ebeno helo ipuwane alahutihoma꞉ gabo nipo ohowadiya꞉. Ba꞉be mabuma꞉ ebete a tetelo Hunu Habane tabo gala ba kolamagina, ale ubiha꞉ma꞉ eda꞉hate ebegodone dohobila꞉hama꞉, gabo keka꞉ ale ebeno helo ipuwane alahutihoma꞉? Gabo puliyanomola, a kuba huiya konomamo kuwatema꞉nema꞉!

Yunapi 13:7

Ba꞉gala eta komo. Dopamo tetelo puya꞉te la꞉eno watowatopima꞉ ba eda꞉ha Godokono tabo la꞉tamo dolamagiminakui, wadiyala la꞉ ibino emede komo nemalagidolala꞉, iyo, kebe hidohido gaote iba꞉godolo dikulihonakui, ba꞉bako atu gaote la꞉godolo kikulihonama꞉, wadiyala la꞉ ibi hibima꞉ midi komodo nibamilateleniya꞉la꞉.

Yunapi 3:11

Ba꞉bema꞉ naeno mauba ipuwalo hibi tabonomo ba꞉ma ka꞉na goiya꞉mo, ‘Nale iba꞉tamo kebe hopo ikalamema꞉ dopamo demalagidoluya꞉mo, na ukui hiya꞉ma꞉ miditi, ba꞉bene emedena emedena tetelo iba꞉te naeno Hido Hawela Ami Hopamo a꞉kana꞉pa꞉la꞉hamena꞉!’”

Yunapi 4:11

Ba꞉bema꞉ wadiyala a hibima꞉ midipa꞉te oko owati ipuwalo helonomoma꞉ keda꞉hama꞉nema꞉, ale ba꞉be Hawela Ami Hopamo hibilo kona꞉pa꞉la꞉hama꞉, mabu puya꞉te Godokono tabo dopamo dulihuya꞉, iba꞉te ibino hibima꞉ midiha꞉ komodo hibo gabo keba ka꞉na ka꞉nududiya꞉, a hiliyonomo ipuwalo eta kapiyate ba꞉ba ka꞉na nega modoboha꞉.

Yunapi 4:9

Ba꞉be mabuma꞉ a ba꞉moe komo iya꞉tawahala, eta hibi hawela ami komote Godogodolo bitana ebete ebeno tawakaluba꞉tamo kikalamema꞉, iyo, ebete sa꞉ba꞉ni hegelalo ebeno oko owati komone hawela keba ka꞉na kamitiya꞉, ale ba꞉ba ka꞉na ba꞉be atu hawela ami ipuwamo kona꞉pa꞉la꞉hama꞉nema꞉.