Yunapi 13:1 - Godokono Hido Tabo

¹ Ba꞉bema꞉ wadiyala la꞉ hibima꞉ midipa꞉te kapiya badininipala ekaki huiyama꞉ ba eda꞉hana, la꞉ ipuwalo etate eta malemalelo nemalagidolohuinala꞉.

Godokono Wade Tabo

¹ Ebema꞉ modobola la꞉ nanitabokobi midipiate kapiya alailame ekaki keba kunula꞉ka꞉ ebako epoma꞉ eba eda꞉onalo, la꞉ magumulo idite idi nilakapolo nemalagidilowinala꞉.

Yunapi 13:1 Iomraidhean Croise

Yone 15:17

Ba꞉moe ba꞉ naeno ko tutumu tabola la꞉tamo, la꞉ ipuwalo etate eta malemalelo nemalagidolohuiniya꞉la꞉.”

Oelamepino Ododili Komokomo 2:1

Ba꞉bene Pentekose Poko Hegela duluhukuya꞉, ba꞉ba tetelo Ya꞉suku hibima꞉ midipi hiliyonomate kapiya genamamo pekapiyuimiya꞉.

Oelamepino Ododili Komokomo 4:32

Ba꞉ba tetelo hibima꞉ midipi hiliyonomoeno tepo ipuwoeno komo ba꞉gala ukui komo kapiyanomoma꞉ eda꞉halamiya꞉, ba꞉bema꞉ ibi ipuwalo etate ebeno ilina ebenonomoma꞉ kagoenakuiha꞉, huiyatiya ibino ilina hiliyonomo kapiyama꞉ midiliti, ba꞉bi ilinamo etate eta owalubinakui, etate eta akowalubinakui, ba꞉ba ka꞉na ewagelenama꞉.

Galesiya 5:13

Naeno hibima꞉ midipi ekaka꞉la꞉, hibila, Godote la꞉ ebeno tutu emede komamo a꞉ka꞉lamia꞉ta. Huiyatiya la꞉ hidamo, ebeno tutu emede komo ipuwalo ba emedena, ba꞉be komone la꞉le la꞉eno kateneno kuba ubi komamo papamila꞉halema꞉ modoboma꞉ akaga꞉lala꞉. Wadiyala la꞉ huiyatiya la꞉ ipuwalo etapa꞉te etapi malemalelo ba emalagidolena nowalubihuinakuya꞉la꞉, huiyaha꞉ okopa꞉te ibino namutuluba꞉tamo oko keba ka꞉na kowatihona ba꞉ba ka꞉na.

Galesiya 5:22

Huiyatiya lumagino emede ipuwalo Godokono Gobogoboeno gaote duluhukuna, ba꞉be gaote golanomoma꞉ ba eda꞉na ebe ipuwalo hidohido komate ba꞉pola꞉namena꞉. Ba꞉bi komokomo ba꞉ komopi malemalelo emalagidole komo, tepo ipuwoeno kalakala komo, hete komo, temeteme ipuwalo kodakodalo la꞉mota꞉hana komo, awaepa꞉tamo malemale hawakalimi komo, komopi dito owalubili komo, hibidawama꞉ eda꞉ komo,

Galesiya 5:6

Ba꞉bema꞉ hibila, a Ya꞉su Kelisoko ipuwalo ba emedena, ale Yunapino tama itamida kukala ya꞉lo da꞉lawiya꞉ma꞉ ebe ko komoha꞉, ba꞉gala ale laweha꞉pima꞉ deda꞉hanama꞉ ba꞉be komo atumu ko komoma꞉ keda꞉naha꞉. Numa꞉la꞉, kapiyanomo komote koma꞉ eda꞉na, ba꞉be komo ba꞉ aeno hibima꞉ midi komote aeno malemale hawakalimi komodo oko dowatina ba꞉be komola.

Epesese 4:3

Numa꞉la꞉, Godokono Gobogobote la꞉eno tepo ipuwamo dihatelamena ba꞉be hetete la꞉ kapiya tawakalubima꞉ midilinata, ba꞉bema꞉ la꞉eno ukuilo la꞉le kapiyama꞉ eda꞉ komo hidonomo komoma꞉ ba ga꞉lana, la꞉eno ododili komo hiliyonomo ipuwalo gabo hidonomamo numinakuya꞉la꞉ ba꞉be komote la꞉godolo hibilo kitanama꞉.

Epesese 5:2

Numa꞉la꞉, Kelisote hoe ipuwalo ebeno ape hawa꞉goeno ilina huiyama꞉ miditi ebeno ka꞉ka꞉ a mabuma꞉ Godotamo dikamiya꞉, Godote ba꞉be komo hido nibo ilina ikame komoma꞉ goiya꞉. Ba꞉be mabuma꞉ Kelisote atamo ebeno konomo malemale keba ka꞉na ka꞉hawakalimiya꞉, wadiyala la꞉ ba꞉ ba꞉ba ka꞉na atu malemale ipuwalo nemedenala꞉.

2 Tesalonaika 1:3

Aeno hibima꞉ midipi ekaka꞉la꞉, wadiyala hiliyonomo tetelo ale la꞉ mabuma꞉ Godotamo kalakala tabo ba꞉wadiya꞉paa꞉latelenakoma꞉. Iyo, ale ba꞉ba ka꞉na kewagelenama꞉ ba꞉moe ba꞉ hido komola, mabu la꞉eno hibima꞉ midi komote ba apepehona, la꞉ ipuwalo etapa꞉te etapi malemalelo demalagidolenama ba꞉be komote atumu koma꞉ neda꞉na.

Yunapi 10:24

Ba꞉gala wadiyala a ipuwalo etate etoeno komo emalagidololo bowalubihuinakoma꞉, ale komopa꞉tamo hidohido komo ba ododili Godokono malemale komo ba꞉bo kohawakaliminama꞉.

1 Pita 1:22

Numa꞉la꞉, la꞉ Godokono hibi komamo ba papamila꞉ha la꞉eno tepo ipuwa ukulaliya꞉mata la꞉le la꞉eno hibima꞉ midipi ekaki malemalelo hibilo kemalagidolenama꞉. Ba꞉bema꞉ wadiyala la꞉ ipuwalo etate eta kemalagidolo, etate eta kemalagidolo, la꞉ ba꞉ba ka꞉na ba ewagelena la꞉eno tepo ipuwoeno konomo malemala꞉mo komopi nemalagidolenala꞉.

1 Pita 2:17

Ba꞉ ba꞉ba ka꞉na la꞉le komo hibima꞉ midipi hiliyonomo malemalelo ba emalagidole Godoko kapiya na꞉tolemenala꞉. Ba꞉gala ba꞉moe hopo konomolo heloma꞉ deda꞉na, ba꞉be Lomanapino Konomo Gawadubuino komoma꞉ la꞉le la꞉eno tepo ipuwalo kuba tabo ga꞉laheno ebeno tutumamo na꞉papamila꞉hanakuya꞉la꞉. Iyo, wadiyala la꞉ ha꞉kiya la꞉ hopamo ba miya꞉te, komo tawakalubi hiliyonomoeno komoma꞉ la꞉eno tepo ipuwoeno ukuilo ibi hunamo na꞉wadiya꞉paa꞉latelenakuya꞉la꞉.

1 Pita 3:8

Ba꞉bema꞉ la꞉ hibima꞉ midipino emede komoma꞉, na Pitate kuititi tabo ba꞉ma ka꞉na goemo. Wadiyala la꞉ hiliyonomate ukui kapiyama꞉ eda꞉hate tatabalo nemedenala꞉, ba꞉ma ka꞉na awagaha komote la꞉tamo akapa꞉la꞉, ba꞉gala la꞉ hibima꞉ midipi malemalelo ba emalagidolena, ibino temeteme komoma꞉ la꞉eno tepo ipuwa akakodakoduilama꞉la꞉.

1 Pita 4:8

Ba꞉bema꞉ la꞉eno hiliyonomo ododili komokomo ipuwalo ba꞉moe komo ba꞉ ko komonomola. Wadiyala la꞉eno emede ipuwalo etate eta malemalelo nemalagidolonala꞉, mabu keba tetelo la꞉ malemale ipuwalo demedenama, ba꞉ba tetelo etate etoeno kuba ododili komokomo koamo emalagidolemeheno tiyolo kegebolemema꞉nemata.

2 Pita 1:7

Ba꞉bene Godotamo hibilo ba papamila꞉hana, la꞉ komo hibima꞉ midipa꞉tamo malemale hawakalimi komo na꞉lawiya꞉la꞉. Ba꞉bene la꞉ hibima꞉ midipa꞉tamo malemale ba hawakalimina, wadiyala Godokono malemale emalagidolo komote hopo habanapi hiliyonomatamo la꞉ ipuwalo konomoma꞉ neda꞉mene.

1 Yone 3:23

Hibila, ba꞉moe ba꞉ Godokono konomo tutumu tabola, ale ebeno Gudu Ya꞉su Kelisokono mahilo hibima꞉ ba midina, a ipuwalo etate eta malemalelo bemalagidolonama꞉, Ya꞉suti a dopamo keba ka꞉na kiya꞉tua꞉miya꞉ ba꞉ba ka꞉na.

1 Yone 4:20

Ba꞉bema꞉ kebe lumagiti ebeno ekawitamo maubalo ba꞉ma ka꞉na da꞉goemene, “Nale Godoko malemalelo nemalagidolonamo huiyatiya ama꞉ kemalagidolonaha꞉,” ba꞉be lumagi ba꞉ ha꞉da amihodawala. A꞉iye! Ebete ba꞉moe hopolo ba emedena kebe lumagi ebeno baida꞉mo dumina ba꞉be ekawi malemalelo emalagidoloheno, ebete umiha꞉ma꞉ deda꞉na ba꞉be Godo malemalelo keba ka꞉na na꞉kemalagidolonamene? Gabo puliyanomola, a꞉kitanamene!

Awokalilame Tanalo 2:4

Na huiyatiya la꞉godolo ba꞉moe kapiya modoboha꞉ komo buminamo, la꞉le dopamo tetelo etate eta malemalelo konomamo keba ka꞉na kemalagidolonakuima, la꞉ ba꞉be komo a꞉miya꞉puimata.