Lumwekesho 4:4 - KNTP

⁴ Kabiji ku jitanda kwazhokolokele bipona makumi abiji ne bina, kabiji pa byobya bipona namwene bakulumpe makumi abiji ne bana, kasa baikala bavwala bivwalo bitoka, ne pa mitwe yabo pajinga minchinya ya ngolode.

Lumwekesho 4:4 Iomraidhean Croise

Mateo 19:28

Kumvwa Yesu wibambijile amba, “Kine nemwambila namba, anweba ba kundondela, mu ntanda ipya byo akekala Mwana Muntu pa jitanda janji ja lukumo, ne anweba mukekala pa bipona jikumi na bibiji, na kwiichibila mambo mikoka jikumi na ibiji ya bena Isalela.

Luka 22:30

Namba mukaje ne kutoma ku tebulu wami mu bufumu bwami; kabiji mukekala pa matanda na kuchiba mambo a mikoka jikumi na ibiji ya bena Isalela.”

2 Timoti 4:8

Pano bantujila kala munchinya wa bololoke, yeakampa mu joja juba aye Nkambo, mutonyi waoloka, kabiji kechi amiwa yenkatu ne, pakuba ne bonse batemwa kumweka kwanji.

Lumwekesho 11:16

Ponkapo aba bakulumpe makumi abiji na bana, bekala ku meso a Lesa pa bipona byabo, baponene panshi ne kupopwela Lesa,

Lumwekesho 14:3

Kabiji baimbilenga lwimbo mupya ku meso a jitanda, ne ku meso a aba bomi bana ne aba bakulumpe, kafwako muntu nangwa umo wakonsheshe kufunda awa lwimbo ne poso aba ba 144,000, bakujilwe pano pantanda.

Lumwekesho 19:14

Ne mazhita a mwiulu amulondejilenga pa bambili batoka, kasa bavwala kisapi kya linenyi kyalamba, kyatokesha ne kuwama.

Lumwekesho 19:4

Ponkapo abo bakulumpe makumi abiji na bana ne aba bomi bana balambile panshi ne kupopwela Lesa waikala pa jitanda amba, “Amena! Aleluya!”

Lumwekesho 2:10

Kechi wakamwe byo waya umaname ne. Umvwai! Aye Diabola waya emutaye anweba bamo mu kaleya amba mwesekwe, kabiji mukamona bya malwa moba jikumi. Wikale wakishinka kufika ne ku lufu, ne amiwa nkakupa munchinya wa bumi.”

Lumwekesho 20:4

Kabiji namwene matanda, ne baikajilepo bo bapele luusa lwa kuchiba mambo. Kabiji namwene myeo ya boba batapilwe na mambo a bukamonyi bwa Yesu, ne na mambo a mambo a Lesa. Ne abo babujile kupopwela awa lukinyama, nangwa kipashang'ano kyanji, ne kutambula kayukilo pa kilungi nangwa pa kuboko ne. Baikajile na bumi jibiji ne kwikala na bufumu pamo ne Kilishitu myaka 1,000.

Lumwekesho 3:18

Nakubuula namba, upote kwi amiwa ngolode yasungululwa mu mujilo, namba wikale ke munonshi, upote ne bivwalo bitoka namba wivwike, bumvu bwa bwamba bobe kechi bumweke ne, ne muchi wa kushinga pa meso obe umonenga.

Lumwekesho 4:10

aba bakulumpe makumi abiji ne bana baponena mu kyenyi kya yewa waikala pa jitanda, kabiji bamupopwela aye wikala myaka ne myaka, ne kutaya minchinya yabo ku meso a jitanda amba,

Lumwekesho 4:6

Kabiji ku meso a jitanda, kwamwekele nobe kalunga ka kilola, kyapasha jibwe ja kilishitala. Ne ku jitanda kwazhokolokele bomi bana bakumbana meso, kulutwe ne kunyuma.

Lumwekesho 5:11

Kabiji namwene, ne kumvwa naumvwine jiwi ja bamalaika bavula bingi! Bazhokolokele jitanda ne aba bomi ne aba bakulumpe. Kabiji pa kwibabala bajinga jibumba jikatampe ja kukankalwa kubala,

Lumwekesho 5:14

Ne aba bomi bana ba ambile amba, “Amena!” Ponkapo ne aba bakulumpe baponene panshi na kupopwela.

Lumwekesho 5:6

Kabiji namwene jitanda ne aba bomi bana, ne aba bakulumpe ne mwana mukooko kasa aimana mukachi, wamweka nobe waipayilwe, wajinga na nsengo itanu na ibiji, ne meso nao atanu na abiji, yo mipashi itanu na ibiji ya Lesa, yatumwa pano pantanda ponse.

Lumwekesho 5:8

Kabiji byo atambwile awa buku, ponkapo aba bomi bana ne aba bakulumpe makumi abiji ne bana, baponene mu kyenyi kya aye mwana mukooko, bonse kasa baji na byansa pa muntu pa muntu, ne michiba ya ngolode yayula byakufutumuna, yo milombelo ya bazhijikwa.

Lumwekesho 6:11

Ponkapo bebapele bonse bivwalo bitoka, kabiji bebambijile amba, mukikokoloke kakimye, poso nambala ikafikile ya bakwenu ba mu mwingilo ne balongo benu bakepayiwe pamo nobe anweba.

Lumwekesho 7:11

Ne bamalaika bonse kasa baimana, bazhokolokele jitanda, ne aba bakulumpe ne aba bomi bana. Kabiji baponene panshi kinkuvumene ku meso a jitanda, ke bapopwele Lesa,

Lumwekesho 7:9

Pakupita bibye, ponkapo namwene jibumba jikatampe, jo babula kukonsha kubala nangwa ku muntu umo ne! Bafuma mu mikoka yonse ne mu bisaka byonse ne mu mitundu yonse ne njimi yonse ya bantu, kasa baimana ku meso a jitanda ne ku meso a Mwana Mukooko, kasa bavwala bivwalo bitoka, ne mapambo a bisonga mu maboko abo.

Lumwekesho 9:7

Aya nzhiye ya mwekelenga nobe bambili bo banengezha kuya ku nkondo; ne pa mitwe yayo pajinga minchinya nobe ya ngolode, ne bilungi byayo bya mwekelenga nobe bilungi bya bantu.