Byubilo 10:22 - KNTP

²² Kumvwa abo ba mwambijile amba, Koneleusa, mukulumpe wa bashilikale, muntu waoloka, wa akamwa Lesa, watelwa bulongo ku mukoka yense wa Bayudea, ba mwambijile kwi malaika wazhila wa Lesa, kwimulonda anweba ne kwimutwala ku nzubo yanji, amba omvwe byambo kwi anweba.

Byubilo 10:22 Iomraidhean Croise

Mateo 1:19

Kabiji Yosefwa mwata wanji byo ajinga waoloka, kechi wasakile kumulengesha bumvu ku meso a bantu bonse ne, wafuukwile amba, akamukaine kumbaji.

Mateo 2:12

Kabiji byo bebajimwine kwi Lesa mu kiloto amba, “Kechi mubwele kwi Heloda ne,” babwelele kwabo mu jishinda jikwabo.

Mako 6:20

Aye Heloda wamuchiinenga Yoano, byo ayukile amba wajinga muntu waoloka ne wazhila, wa mulamine bulongo. Kabiji Heloda watemenwe kuteleka byambo bya kwa Yoano na lusekelo nangwa wakatazhiwe bingi mu muchima wanji, pa kumumvwa.

Mako 8:38

Mambo aye ukangubila bumvu amiwa ne mambo ami mu kino kisemi kya bukende ne kya bundengamambo, ne Mwana Muntu naye ukamubila bumvu byo akeya mu lukumo lwa Shanji na bamalaika bazhila.”

Luka 2:25

Kabiji kwajinga muntu mu Yelusalema, jizhina janji Shimeona, ne uno muntu wajinga waoloka kabiji wa akamwa Lesa, kasa apembelela lutekenesho lwa bena Isalela, ne Mupashi Wazhila wajinga pe aye.

Luka 23:50

Pano kwajinga muntu umo jizhina janji Yosefwa, membala wa mukije, muntu wawama ne koloka,

Luka 9:26

Mambo yense ukangubila bumvu amiwa ne mambo ami, aye naye Mwana Muntu ukamubila bumvu byo akeya mu lukumo lwanji ne mu lukumo lwa Shanji ne lwa bamalaika bazhila.

Yoano 13:20

Kine, kine, ne mwambila namba, watambula ye ntuma amiwa wantambula amiwa, kabiji wantambula amiwa watambula ne aye wantuma.”

Yoano 17:20

“Kabiji kechi nebalombelela abo bonka ne, pakuba ne abo bakangitabila amiwa na byambo byabo.

Yoano 17:8

Mambo nebapele byambo byo mwampele, kabiji bebitambula, ne kuyuka bayuka kine byo nafumine kwenu, kabiji baitaba amba, yenu mwantumine.

Yoano 5:24

“Kine, kine nemwambila namba, aye waumvwa mambo ami, ne kumwitabila aye wantuma uji na bumi bwa myaka, kechi ukeya mukije ne, pakuba mu lufu wafumamo, wapitaila ku bumi.

Yoano 6:63

Ye Mupashi upana bumi, buntunshi bo bwatu. Byambo byo nemwambila byo bya mupashi, kabiji byo bya bumi.

Yoano 6:68

Kumvwa Shimona Petelo wamwambijile amba, “Nkambo, tukaya kwi ng'anyi? Byambo bya bumi bwa myaka muji nabyo anweba.

Byubilo 10:2

Aye wanemekanga ne kumwakamwa Lesa pamo naba mukisemi kyanji bonse, kabiji wapainenga bya bukwasho byavula ku bakajilwa, ne kulomba kwi Lesa moba onse.

Byubilo 10:21

Ponkapo Petelo waikijile, waiya ku bantu ne kwibambila amba, “Amiwa uno ye musaka. Ng'anyi mambo o mwaendela?”

Byubilo 10:30

Kumvwa aye Koneleusa wa ambile amba, “Ke moba ana apitapo, kabiji pa kyonka kino kimye, byo nalombelenga mu nzubo yami mu kimye kya milombelo po pa kulemba juba, kabiji ponkapo muntu waimene kwi amiwa kasa avwala byabembela,

Byubilo 10:33

Onkao mambo natumine bantu ponkapotu kuji anweba; ne anweba mwauba bulongo byo mwaiya. Byonkabyo pano atweba bonsetu tuji kuno ku meso a Lesa, namba tumvwe byonse byo bemukambizha kwi Nkambo.”

Byubilo 10:6

Wafikila kwi Shimona sendwe wa biseba, nzubo yanji iji ku mukulo wa kalunga ka mema.”

Byubilo 11:14

Ye ukakubula byambo byo ukapulukilamo, obewa ne bonse ba munzubo yobe pamo.’

Byubilo 22:12

“Kabiji muntu umo wa jizhina ja Ananyasa, watekanya mwayila Mizhilo, watelelwe bulongo ku Bayudea bonse baikajile momwa.

Byubilo 24:15

Naikala na luketekelo lumo mwi Lesa, lo baitaba abo bene amba, kukekala lusanguko lwa baoloka ne babula koloka.

Byubilo 6:3

Onkao mambo anweba bakwetu, monaimo mwi anweba banabalume batanu ne babiji, batelwa bulongo ku bonse, bayula na Mupashi ne maana, twibatongwele uno mwingilo.

Loma 1:17

Mambo mo mumwekela bololoke bwa Lesa bwa mu lwitabilo ku lwitabilo, monka mo kyanembelwa amba, “Mololoke ukamwena bumi ku lwitabilo.”

2 kolinda 5:18

Kabiji bino byonse bifuma kwi Lesa, ye witupwainye ne aye mwine mwi Kilishitu, kabiji witupele mwingilo wa lupwaino.

1 Timoti 3:7

Kabiji wafwainwa kuteelwa bulongo ku bapangye ya kipwilo, kuchiina amba wakaponena mu myendeleko ne mu kakose ka Diabola.

Bahebelu 10:38

Bino mololoke wami ukamwena bumi mu lwitabilo; kabiji umvwe wabwela mu nyuma, muchima wami kechi ukamwenamo lusekelo mwi aye ne.”

Bahebelu 11:2

Mambo mo monka mo bashimwijilwe bulongo bashakulu baakala.

Bahebelu 12:23

Ne ku kukonkana kwa bonse ne ku kipwilo kya babeji banembwa mwiulu. Ne kwi Lesa uchiba mambo a bonse ne ku mipashi ya bantu baoloka balumbululwa.

2 Petelo 3:2

Namba muvulukenga byambo byaambilwe kala ku bangauzhi bazhila, ne mukambizho wa Nkambo Mupulushi kupichila mu batumwa benu.

3 Yoano 1:12

Bonse bantu bamushimuna bulongo Demeteliusa, bukine bwine bumushimuna nabo. Ne atweba tumushimuna pamo, ne anweba mwayuka amba kushimuna kwetu ko kwa kine.

Lumwekesho 14:10

aye naye ukatoma ku binyu bya bukaji bwa Lesa, byo baitulwila jimo byo babula kuvwangakanya na bikwabo mu katomeno ka bukaji bwanji! Ne aye ukamanyikwa na mujilo ne kibiliki ku meso a bamalaika bazhila, ne ku meso a Mwana Mukooko.