PEMUYAN 26:20 - Kenyah New Testament

²⁰ Ading ketai heʹ badaʹ denga ina palaʹ lepoʹ Damsik, uʹo ina tai heʹ palaʹ lepoʹ Yerusalim, uʹo ina pelaʹa tai heʹ pa tipo tanaʹ Yudia nuʹo. Ngan palaʹ dulu diaʹ tahaʹ awang Yahudi pe ketai heʹ badaʹ a, apan nte nesen ngan nyepuleʹ kimet de, ngan pupa palaʹ Tuhan Allah, ngan uyan puyan tiga iaʹ ke badaʹ diseʹ ban nte nesen ngan nyepuleʹ kimet de.

PEMUYAN 26:20 Iomraidhean Croise

MATIUS 3:2

Un dau Yaya: “Nyepuleʹ ne kimet cem cen penyalaʹ kem. Abeʹ e majan laʹa kenai luhaʹ ne puyan pengaren Tuhan Allah ke ngaren ilu kelunan.”

MATIUS 3:8

Uyan ne pemuyan iaʹ ke badaʹ ban ncem lepa nyepuleʹ kimet cem cen penyalaʹ kem.

MATIUS 4:17

Cen dalau ina Yesus nading ke penco badaʹ katuk ke, pekini dau ue: “Nyepuleʹ ne kimet cem cen penyalaʹ kem, ban abeʹ majan laʹa kenai luhaʹ ne puyan pengaren Tuhan Allah ke ngaren ilu kelunan.”

MATIUS 9:13

Tai ne mita sen dau kitap ini: ‘Abeʹ keʹ ubaʹ liwa. Pengelesau iaʹ akeʹ ubaʹ.’ Abeʹ keʹ nai mengin kelunan diaʹ kuma ida lepa teneng, di lareʹ akeʹ nai ke mengin kelunan diaʹ dulu kuma jaʹat.”

MARKUS 6:12

Sulo tai re penco katuk ke payo kimet kelunan, apan nte ke nyepuleʹ kimet de cen penyalaʹ de.

LUKAS 1:16

Ngan kadoʹ lepoʹ Israil ia ke ngkin uleʹ palaʹ Tuhan, ina Tuhan Allah re.

LUKAS 13:3

Abeʹ e pekina. Lan dau heʹ mikem, buk kem abeʹ un nyepuleʹ kimet cen penyalaʹ kem, ngan nai bayaʹ Allah, atek kem mung ke matai pekina ʹo.

LUKAS 13:5

Abeʹ e pekina. Lan dau heʹ mikem, buk kem abeʹ un nyepuleʹ kimet cen penyalaʹ kem, ngan nai bayaʹ Allah, atek kem mung ke matai pekina ʹo.”

LUKAS 15:10

Un dau Yesus laʹa: “Dau heʹ mikem, pekina lete bangen laleʹ diaʹ melikat Allah, moʹ ban kuʹun ca le usa kelunan penyalaʹ iaʹ nesen ngan nyepuleʹ kimet te.”

LUKAS 15:7

Un dau Yesus laʹa: “Dau heʹ mikem, pekina lete bangen laleʹ kaʹ surga te, moʹ ban kuʹun ca usa kelunan penyalaʹ iaʹ nesen, ngan nyepuleʹ kimet te. Lapa tekaʹ bangen ne neng ʹo piʹen puloʹ piʹen usa kelunan iaʹ teneng, iaʹ are titin nesen ngan nyepuleʹ kimet de.”

PEMUYAN 11:18

Uʹo re kenahan dau Peterus pekina, tai benaʹa ne ida, penco tai re pempau Allah, mentung dau re: “Buk pekina, seʹ Allah mawang ca janan me dulu diaʹ tahaʹ awang Yahudi, ukoʹ de nesen ngan nyepuleʹ kimet de, iaʹ tai palaʹ udip dalem Tuhan.”

PEMUYAN 15:19

Sulo dau Yakup pelaʹa: “Pekini tekaʹ kimet ceʹ, ayen pemiat dulu tahaʹ awang Yahudi diaʹ ban nyileʹ palaʹ Tuhan Allah.

PEMUYAN 17:30

Toʹ ngajan kelunan turan mudip are, abeʹ Allah un situk kidi. Un sepuʹo, naʹkini Allah cuk mung kelunan kempi kempi ke nesen ngan nyepuleʹ kimet de cen puyan jaʹat de.

PEMUYAN 2:38

Un dau Peterus neng ida: “Nesen ne, ngan nyepuleʹ kimet cem cen penyalaʹ kem singket usa hem te, ngan tai alaʹ batis neng ngadan Yesus Keristus. Ina janan ke sau penyalaʹ kem, idi hem alaʹ pengencai Allah, atek Berua Buheʹ ina.

PEMUYAN 20:21

Palaʹ lepoʹ Yahudi, pekina pe palaʹ lepoʹ Gerika, akeʹ nyebelang badaʹ ngan tugen dau neng puyan nyepuleʹ cen penyalaʹ tai palaʹ Allah, ngan puyan ngelan Tuhan le Yesus.

PEMUYAN 26:17

Akeʹ ke ngelidung ngkoʹ neng puyan lepoʹ Israil, pekina pe neng puyan lepoʹ diaʹ ca pe, moʹ akeʹ iaʹ cuk ikoʹ ketai palaʹ ida.

PEMUYAN 26:19

Sulo dau Paulus laʹa: “Ahaʹ amai heʹ Laja Ageripa, abeʹ keʹ muau neng penaʹat ceʹ iaʹ tengangan nai luhaʹ cen surga ina.

PEMUYAN 3:19

Moʹ ina, nesen ne, ngan nyepuleʹ kimet cem palaʹ Allah, idi ie ke musoʹ sau penyalaʹ kem. Laʹa idi hem ke un ca iaʹ ke nyengim udip kem, iaʹ ban nai cen juma Tuhan.

PEMUYAN 9:15

Kun dau Tuhan neng Ananias: “Tai ne ikoʹ sedeʹ. Lepa ne akeʹ lemileʹ Saul ina, ke uyan ia ca senganan man ke pedenga ngadan nceʹ palaʹ dulu diaʹ tahaʹ awang Israil, palaʹ diaʹ paren pe, ngan pekina pe palaʹ lepoʹ Israil.

PEMUYAN 9:35

Mung dulu diaʹ kaʹ lepoʹ Lida ngan kaʹ tanaʹ Sarun ina taʹan seʹ aget Inias, penco re mayo bayaʹ Tuhan.

RUM 2:4

Pamoʹ pe ikem pesingo neng pengelesau iaʹ Allah lebang naʹ milu, ngan dadoʹ saheʹ e, ngan denaʹ tawai ie. Tekep kem tisen inu ukoʹ Allah ban lesau ikem, moʹ o ten ke ngkin ikem nyepuleʹ kimet cem cen penyalaʹ kem.

2 KURINTUS 3:16

Un sepuʹo tai ie pesau buk ke koʹ baʹan dau Kitap iaʹ kuma ha: “Apeʹ kep silung Musa tai pesau dalau ue pupa sileʹ tahaʹ Tuhan.”

2 KURINTUS 7:10

Moʹ pengebampa iaʹ Allah kanan senteng uyan kimet le tai pekaliu, sulo ngkin ilu palaʹ udip dalem Tuhan. Abeʹ le nesen kuʹun puyan ina. Di lareʹ puyan pengebampa kusun tanaʹ ini iaʹ ngkin kelunan palaʹ patai.

IPESUS 4:17

Ina ukoʹ keʹ pisiu ikem dalem ngadan Tuhan, ngan tengayet kaʹ keʹ ke mulen ikem mudip koʹ baʹan diseʹ diaʹ muau Tuhan, diaʹ abeʹ un tuman tuman kimet de,

1 TESALUNIKA 1:9

Mung kelunan dina badaʹ kumpin puyan ncem nyelama alaʹ ameʹ dalau tai meʹ menoʹ ikem cen naʹaʹ are. Ngan pekina pe ida badaʹ kumpin puyan ncem nyepuleʹ kimet cem cen uyat, ngan sileʹ palaʹ Tuhan Allah, sulo tunuk palaʹ Allah iaʹ lan ngan iaʹ mudip.

PUYAN LUHA’ 16:11

Mentung dau re nunoʹ Allah kaʹ surga uban tuyen tekaʹ de sakit tukoʹ ina. Naʹ pia pekina, abeʹ pe ida nyepuleʹ kimet de cen puyan jaʹat de ne.

PUYAN LUHA’ 2:21

Lepa ne akeʹ naʹ ca awang mia apan ne senteng ke nesen ngan nyepuleʹ kimet te cen penyalaʹ a. Ia iaʹ, abeʹ e ubaʹ ke kelap cen puyan pemung nyelem me ne.

PUYAN LUHA’ 2:5

Moʹ ina, petawai hem kudaʹcoʹ ban ncem lepa laboʹ idai. Nesen ne, nyepuleʹ kimet cem cen penyalaʹ kem. Bayaʹ ne puyan iaʹ ikem lepa ban ti cen kena are. Buk kem are nesen ngan nyepuleʹ kimet cem cen penyalaʹ, atek keʹ kenai palaʹ ikem ngan alaʹ teken peritaʹ kem ne, cen ukoʹ o ne.

PUYAN LUHA’ 3:3

Ina ukoʹ kem petawai ne katuk, ngan kumpin puyan ncem kenahan ne ading nte are. Ngimet ne bayaʹ dau ue, ngan nesen ne, ngan nyepuleʹ kimet cem cen penyalaʹ. Buk kem abeʹ un ke beteʹ uʹo, kenai heʹ ukoʹ baʹan ca kelunan bekelau are. Nyahut cem abeʹ un tisen ne tegoʹ jakaʹ keʹ nai ʹo.