FAA YÁKƐ KƆ́LƆI 21:8 - Kɛ́lɛ Niinaí

⁸ Kɛ́ sítii nduwá ndúwa ngáá ɣɛ́ tí h̃u Ngala fáá ɣɛndái h̃u, sítii taa lá ngáá Ngalá kɛ́ tɛ́i ndí ngu ma taa sítii taa híɣe Ngala péle giteí wa í báha sítii mba ti ngáá nuu váá mbélaa ɛ́ɣɛ kɔlɔsiyá mbélaa taa súkɛ yélaitii ɛ́ɣɛ kɔɔ kɔɔ́ ŋani hɛ́li mbélaitii taá ndɛ́ɛ yélai ti kpɛ́lɛɛ ti lííw̃ai waá ngáá ngɔmbu hó ngwálai h̃u ngɛ́i w̃ááku nyɔu ỹɔungí áá w̃ɔ́ ngwala kíya fukú í na i su. Saí helé kélei wómai va mil̃á.”

FAA YÁKƐ KƆ́LƆI 21:8 Iomraidhean Croise

MÁFIYU 10:28

A waa lúwa sítiini mba taá nuu búsai váá, kɛ́ tɛ́i hómbo tɔɔ́ wú h̃úúyafuw̃angi váá. Kɛ́ wá ɣéle, a lúwa Ngalá mba, lɛ́i áá wú h̃úúyafuw̃angini ngaa wú búsai ỹááni pɔ́lɛɣɛ pɔlɛɣɛ njahááma.

MÁFIYU 25:25

Faalɔ, ngí ɣɛ́i ngáá lúwa, náá hááw̃a, ngí líi ngí ndówai wɔ, ngí í gápangi lɔ́ɔ́wu su. Faalɔ, í gápangi lɔ.’

MÁFIYU 8:26

Jísu i ti woo yápoteni, i ɣɛ ti w̃a, “Ndeénii le wáá lúwa ngwala? Wú lángi h̃uu gulo kw̃ɛ́ɛ́ngɔɔ lé!” Kɛ i wuyoɣénga, í ndé ngáá ngakpá fɛfɛ ngakpangɔ́i ɛ́ɣɛ njɛ lákpa lákpangi w̃a ngáá ti ya njéi. Kɛ tí ya njénga, naa vá ngí ɣɛ́ málo málo.

Keela woó vándai Máa í pɔ́nɛni kɔwɔ́ato Jísu Kílisitii wa MÁI 9:44

‘Kpelií ɛ́i há kúnafɔ naa lɔ áá nungái mɛ na. Ngɔmbuí va áá tí w̃ɔ ɛi ha kúnafɔ.’]

NJƆÚ 8:44

Wá lɔ wú kɛ́ɛ́ɣɛ ndá gákai w̃a lɛ́i í ngáá Ngutuwɔ́ Ỹína Nyɔí, laáva wú lóngɔɔ lé wú híya ngáá ndiivó fái. I séi tɔkula heimai, aa lɔ wɔ́lɔ kélei ngáá nuu váá mɔ́ɔ́. Aa loni tɔɔỹaá vele w̃a sífaa tɔɔỹaá fíli aa laá su. Ná áá ndɛí gɔ́ɔ́la kɛ i bɔwɔ́ híí woí kái káingi lénga sífaa aá lɔ ngáá ndɛɛ w̃ɔ́ɔ́, laá vá tɔ í ngáá kɛɛɣɛí ndɛí kpɛ́lɛɛ fááw̃a.

TƐSALÓNIKA GƆ́LƆI HELE KÉLEI 2:9

Nyaama ỹáni walaí sí áá vá Setána yákpangi h̃ú, aa káámaa haa bih̃i bih̃i kɛ taá kíndaa víli fááni kɛ́ tí kpɛ́lɛɛ taá ɣɛ́ nɔ́ɔ ngáá ngakpolówa fáa lee léé.

TÍMOTI HESENDAA GƆLƆÍ 4:2

Ngakpolówa kálambo táálii sítii pa taá gúla sítii ngéya taa Ngála fái la yaah̃ú, kɛ́ ɛ́i ɣɛ ti lií h̃u. Maa lɛ́ɛ́ galambo mbélai sítii pa faa ỹɔ́u ɣɛ́ndaa áá mɔ́ɔ ti yaah̃ú ngáá faa fíli.

TÁITƆ 1:16

Maa yélai taá ɣɛ taa ndé ngáá ti Ngalá kɔlɔ, kɛ́ tí lúva veléitii táá ngákɛ ngáá nuu í ɣɛ́ kɔ́lɔ ngáá kɛ táá ngáá Ngalá kɔ́lɔ mbélaa. Ngala ngáá loi ngáá tí lúva vélei kulo bɛ́lɛ ɛ́ɣɛ tí gólo lálangɔ aáva tɛí hómbo tɔ́ɔ́ faa vánda fíli kɛ́.

HÍBULU 12:24

Wú váánga náá Jísu yelé lɛ́i í kɛ́lɛ niinaí Ngala ngí ngeɣéngɔ tí lówah̃u taá ngi vóngaitii í kɛ́ kíli batɛngɔ́. Saáɣa haí sí Jísu Kílisitii í mbóni aa faa yakɛ́ ngáá mu ye ngáá pángɔ í lɔ́ve sái wá Éébɛ í mbóni.

HÍBULU 13:4

Kɛmbɛheí í ɣɛ́ ngáá ngufema háá wu kpɛ́lɛɛ ngéya. Siỹɛngáitii taá tí ỹáh̃aitii ti lɔwɔ́baɣangɔ í ɣɛ́i la ỹɔw̃ɔ́ ỹɔ́w̃ɔ yáá. Sítii tɛ́i ɣɛ́ kɛmbɛheí h̃u ɛ́ɣɛ sítii taa ɣɛ́ kɛmbɛhéi h̃u tálaa kɔlɔsiyá mbó sífaa, Ngalá tɔɔ vá ti waalévema ngáá taá véleni.

NJƆÚ HESENDAA GƆLƆÍ 2:22

Kɛ ele lɔ hɔ́ɔ́ í ngáá ndɛɛ gɔ́ɔ́la mɔ́i? Ndɛɛ gɔ́ɔ́la mɔ́i waa ngáá nuí sí áá nde ngáá Jísu aa ngáá nuí síí w̃ɔ́i taa ɣɛ́ ma Kílisitii ná wáá ngáá Ngalángi Lókolo Mbá W̃ɔ́i. Maa w̃ɔ́i ná lɔ́ í ngáá Jísu Kílisitii waahílima w̃ɔ́i. Maa w̃ɔ́i ɛi lokohéi Jísu Kílisitii wú lɛí í ngáá Ngalángi H̃íỹɛndou Loí kɛlaa Ngalá kítei lɛí í ngáá Kɛɛɣɛí.

NJƆÚ HESENDAA GƆLƆÍ 3:15

Nuí fíli áá ɣɛ́ hílii ngáá ngí mbála Yalá fɛ́li mbélaitii, kɛ maa w̃ɔ́i lɔ ngáá nuu váá mɔ́ɔ, aáva wú suuwɔ́lɔ nɔ́ɔ ngáá nuu váá mɔ́ɔ ɛi ɣɛ kúnafɔ lɛ́ɛ́h̃ui h̃u.

NJƆÚ HESENDAA GƆLƆÍ 5:10

Nuí fíli áá ɣɛ laí ngáá Ngalángi H̃íỹɛndou Loí, kɛ maa w̃ɔ́i langɔ́ɔ́ lé ngáá hééle woí sí. Kɛ́ nuí fíli ɛ́i ɣɛ́ lái la, kɛ i Ngalá kɛ́nga ngáá ndɛɛ w̃ɔ́ɔ́ bɔw̃álale maa w̃ɔ́i ɛi ɣɛ laí ngáá hééle woí sí Ngalá ngáá nde kɔwɔ́ato ngi H̃íỹɛndou Loí wa.

FAA YÁKƐ KƆ́LƆI 14:10

Ngalangí lííyaw̃al̃ai áá foló ma. Ndiiyaw̃ál̃a wálai ná kulangɔ́ ngáá ndɔɔ yakpangɔ́ wála maa w̃ɔ́i aa kpɛ́lɛɛ kpɔ́le. Sítii kínɛi taa sítii kɛ, tiyá lɔ́ taa maanɔw̃ɔ́ wálai sí yeɣé ngɔmbu hóngi sí yá ɛ́ɣɛ ngɛi w̃ááku nyɔu ỹɔungí áá w̃ɔ́ ngwála kíya nɔ́ɔ fukú i ná hɛ́ɛ́ma w̃álekaitii ɛ́ɣɛ Mbaalaí yaah̃ú w̃a.

FAA YÁKƐ KƆ́LƆI 19:20

Ngakpa súwai sí ɛ́ɣɛ ndɛɛ yála ndaa háá lé mɔ́i sí i káámaa haa bih̃íw̃aa ɣɛ́ni ngakpa súwai yɛ, tí tí hóuni ngáá pelésina. Káámaa hái sítii ndɛɛ yála ndaa haá lé mɔ́i í kɛ́ni, aá lɔ́ í nungáitii ngakpólowani lá ngáá tí ngakpa súwai sí lókovongi vú w̃a. Aá lɔ́ nɔ́ɔ múl̃ɔ í kɛ́i tí pɛ́lɛ kɔɔ kɔɔ́ ŋáni hɛ́li má ti kpátɛi kulangɔ́ ngáá ngakpa súwai sí. Ngakpa súwai sí ɛ́ɣɛ ndɛɛ yála ndaa háá lé mɔ́i ndɛɛh̃ú í lói tí h̃u tí tí víli ngɔmbu hó ngwálai ya ngɛi w̃ááku nyɔ́u ỹɔ́ungi ná áá w̃ɔ́ ngwala kíya fukú í na í su.

FAA YÁKƐ KƆ́LƆI 2:11

Nuí faá ỹɛ́ni ngói áá ɣɛ́ í wú mbá, kɛ wólilo sí w̃á Hɛ́ɛ́ma Ỹínangi áá ndé Ngala fɛ́li mbélaitii ma! Wɛ́i wú ndái áa ndoma, sái hele kélei ɛi mɔɔ wú w̃áále ná wáá ngáá, tɛí mɔ́ɔ lo wú vílima ngɔmbu hó ngwalaí ya.’ ”

FAA YÁKƐ KƆ́LƆI 2:2

Ngí súúwɔlɔ sí kpɛ́lɛɛ wú kɛ́a. Ngí súúwɔlɔ kíya wú yéngenga ɛ́ɣɛ ndiibángi sí kínɛi wú ngéɣenga. Ngí súúwɔlɔ ngáá kɛ wɛ́i ló nyaama yélaa volu. Aáva wú sítii suugɔvɔ́nga táa ɣɛ́ ta tiyá lɔ́ ngáá Ngalángi géélaa kɛ́ aa ngáá tɔɔỹáá, aáva wú ɣɛ́a náa súuwɔlɔ ngáá kɛ tiyá lɔ́ ngáá ndɛɛ yélaa.

FAA YÁKƐ KƆ́LƆI 21:27

Sí fíli faa ỹɔ́u vóngi í mba, ɛi li taa walái ná h̃u. Ngufe tála haa ɣɛ́ mbélaa ɛ́ɣɛ ndɛɛ gɔ́ɔ́la mbélaa tɛ́i li taa walái ná h̃u. Sítii nɔ́ɔ léi táá vá liimá taa walái ná h̃u, aa ɣɛ ngáá sítii tí laahéingi vɔ́nɛngɔ kúnafɔ lɛ́ɛh̃u gɔ́lɔi h̃u í Mbáálai hááw̃a.

FAA YÁKƐ KƆ́LƆI 22:15

Kɛ́ sítii ti ngáá nyaama yélaitii ɛ́ɣɛ súkɛ gúla mbélaitii taa kɔlɔsiyá mbélaitii ɛ́ɣɛ nuu váa mbélaitii ɛ́ɣɛ sítii taá kɔɔ kɔɔ́ ŋániitii fɛ́li ɛ́ɣɛ sítii ti longɔ ngáá ndɛɛ gɔ́ɔ́landai, tɛí lí taa walái ná h̃u kúnafɔ.

FAA YÁKƐ KƆ́LƆI 9:17

Ná ngí ɣɛ́i keluí h̃u, ngí soítii tɔ́ni taá tí híya mbélaitii. Tí gaka h̃úi vɛ́lɛngɔ i ɣɛi lá ngáá ŋáni tá naa w̃ááh̃u belé fááw̃a kpiỹángɔ kíya nɔ́ɔ ngɔmbu mbuú bóólengɔ ɛ́ɣɛ maa báhingɔ. Soí nátii ti wungí gúlangɔ í ɣɛi lá ngáá njala wú ɣɛ́ kíli. Ngɔmbuí, nduulí ɛ́ɣɛ ŋani tá áa w̃ɔ́ ngwála kíya nɔ́ɔ fukúi í ná maakungí ỹɔ́ungɔ táa gúla ti la.

FAA YÁKƐ KƆ́LƆI 9:21

Táa gahéi tɔɔ́ vólu yáfe nuu váándai wa, súkɛ gúlandai, kɔlɔsiyá mbóndai ɛ́ɣɛ ŋúỹa wóndai.