KƆLƆ́SE 3:10 - Kɛ́lɛ Niinaí

¹⁰ Wálaa nátii kɛ sífaa, wá lɔ́ náá ngáá nuu níína. Wú bátɛ mɔ́i Ngalá tɔɔ kɛ ngáá háwu wú ɣɛ́ kílii í ɣɛ́ nɔ́ɔ kélei ngáá kíya laá Ngalá kpútei í na. Aá lɔɔ ná ɣɛ́ h̃íí ná kɛinɔɔ́ í kɛ́ ngáá háwu wú ɣɛ́ kɔ́lɔ ngáá ele gíte waa ngáá laá.

KƆLƆ́SE 3:10 Iomraidhean Croise

NJƆÚ 17:3

Kúnafɔ lɛ́ɛ́h̃ui va tɔ ngáá sí ngáá nungáitii ti ɣɛ́ kɔlɔ́ ele wáá ngáá i ye, yɛ́i yí ngáá tɔɔỹaá Yála ngiláá kpéngi ɛ́ɣɛ Jísu Kílisitii lɛ́i yí tɔvengɔ́.

LÓÓMI 12:2

Wálaa ɣɛ́ ngáá sítii kɛ kíli táa Ngalá faaw̃a ngeleí sí wú, kɛ́ áá ɣéle, a lokohéi mbu ngáá Ngalá ngí wú gísiyaitii kpɛ́lɛɛ máálovi. Ná ná áá ɣɛ́, wáá ɣɛ́ náá kɔlɔ́ sí Ngala ndóngɔ la ná wáá ngáá, kíya wáá fáitii kɛ ngáá pangɔ́ tɔmbéma w̃áá fíli ɛ́i ɣɛ ti wa ngáá taá Ngála ndiilá.

LÓÓMI 13:12

Maa hái gúlangɔɔ lé ngáá kpindíí h̃uu híyangɔɔ lé náá kíli, suu áá mɔ́ɔ́ ngelewondái wa. A mu bé fáitii kɛ́ma ngáá kíya kpéi kpíndi h̃úú yélaa taa ɣɛ́ na, kɛ́ aá ɣéle a mu ɣɛ kíli í ɣɛ́ ngáá nungáá ti w̃ááhei wóngɔ í ɣɛ́ la kɔɔ́ wɔ́ fááw̃a ngelewo sú.

LÓÓMI 13:14

Wú w̃aahéi wóngɔ í ɣɛ́ la ngáá Ndemɔí Jísu Kílisitii gɔ́ɔ́ wɔ́ nyaakáitii, ná ná áá ɣɛ́, wɔ́i mɔ́ɔ́ ɣɛ́ nɔ́ɔ wáá faa ỹɔ́i sítii kɛ taa ɣɛ́ ngáá wú líívo fáitii.

LÓÓMI 6:4

Faalɔ, ngúyai a mú mááhɔlɔni kɛ kpɔ́lui wúl̃a tí mbóni ngáá mu ye a maá láa. Ná ná ɣɛ́ngɔ, kɛ i ɣɛ́ngɔ nɔ́ɔ ngáá a mú hááni a maá láa ngáá kɛinɔɔ́ kíya nɔ́ɔ Kɛɛɣɛ́i Ngálangi gááma yakpangí í kɛ́ni ngáá háwu Kílisitii í yóóɣeni sái h̃u a muỹá bɛ́lɛ nɔ a mú lɛɛh̃úi h̃uuhíya péle niiná h̃u.

LÓÓMI 8:29

Ná wɔ́lɔ pá i suuwɔ́lɔ nɔ́ɔ ngáá elení tɔ í lókolonga tí wa i ti ɣɛ́ ngáá ngi ndá léélaa. I kpatɛngɔ́ gí ma ngáá ti ɣɛ́ ngáá ngi H̃íỹɛndou Loí ɣɛ́ kílii ngáá kɛinɔɔ́ ngi H̃íỹɛndou Loí í ɣɛ́ ngáá hésendaa Loí ndoú bíh̃i bíh̃ingaa h̃u taa ɣɛ́ ngeyá.

KƆ́L̃E GƆ́LƆI HELE KÉLEI 3:18

A muỹɛ́i maa hái gúlangɔ ngáá kulaí ná í híɣenga mu gi maitii nda, nungáitii taá Ndemɔí Ngalá ngí háá w̃áánɛɛnɛngi tá lɔ mu h̃u aáva maá ɣɛ nɔ́ɔ maa ɣɛ́ ngáá kɛ kíli kélei kélei. Ndemɔí Ngalá lɛ́i í ngáá Hɛ́ɛ́ma Ỹínangi aá lɔ áá sí ɣɛ.

KƆ́L̃E GƆ́LƆI HELE KÉLEI 4:16

Faalɔ, a mu líí ɛ́i ỹááni kɛ kíya bɛ́lɛ mu luwú w̃áá véle a muỹá lɔɔ ỹááni. Kɛ́ ná fíli su, mu h̃uuyáfuw̃angi w̃áá véle w̃a, muỹá lɔ́ɔ lóóla foló yíla ngíla fíli ma.

KƆ́L̃E GƆ́LƆI HELE KÉLEI 4:6

Ngalangí sí í ndéni ngáá bɛ́lɛ folo hólongi í hólo kpindíí h̃u, láa lɔ nɔ́ɔ múl̃ɔ áá ndé ngáá maa hólo folongí í hólo ni liítii su, í vá ngáá kele ɣelé ní yɛ kɔwɔ́ato Ngalángi yákpa maanɛ́ɛ́nɛɛngɔi wa nuu áá tɔ Kílisitii h̃u.

KƆ́L̃E GƆ́LƆI HELE KÉLEI 5:17

Ná nuu fíli áá báha Kílisitii wá, kɛ maa w̃ɔ́i ná lɔ́ náá ngáá nuu níína aáva tuva velé vɔ́lɔi aa ɣɛ náa lɔvéni, ngi níínai lɔ náá áá ɣɛ́ su.

GALÉSIYA 3:27

Nguyaí wú kpɛ́lɛɛ wú maahɔ́lɔngɔ í wú báhaa Kílisitii wa. Laáva wá lɔ́ naa ngáá Kílisitii ɣɛ́ kíli.

GALÉSIYA 6:15

Faalɔ, tí nuú lɔ́vei pɛlɛ́ vólu ɔɔ taá nuu lɔ́vei pɛlɛ́ vólu aa ngáá faa fíli. Kɛ́ sí í ngáá faí, aá wáá ngáá Ngala ngí nuu ɣɛ́ ngáá nuu níína ɣɛ́ kíli.

Ɛ́FƐSƆ 2:10

Ngalá tɔ́ í mú bátɛngɔ kíya a mú na. I mu bátɛngɔ ngáá niina kpahaí wá mú su Jísu Kílisitii wa ngáá a mú ngenge pándai sítii mbo sí í suubátɛnga náa kílii ngáá a mú tí wo.

Ɛ́FƐSƆ 2:15

I Júsuai tí hávaitii ngi háá bɛni nga í ɣɛ́i na í ɣɛ́i áá nungái nguto kɛinɔɔ́ Júsuai ɛ́ɣɛ sítii taa ngáá Júsua ti ɣɛ́ ngáá nuu yílaa, tí báhangɔ í ɣɛ́ la su Jísu wa. Ná lɔ í kɛ́nga ndiihéi í híí félengɔi sítii ndówa h̃u.

KƆLƆ́SE 3:12

Ngalá ndongɔ́ɔ́ lé ngáá wú ye, aáva í lókolonga wú wá ngáá ngi vóngaa. Faalɔ, a waayaa nungáá yaah̃ú w̃ááw̃aanu hóu, wú ɣɛ́ wáá faa bɔ́wɔ ɣɛ, wálaa ɣɛ́ ngáá suuwɔɔlɔ́ yélaa, ná vólu, wú ɣɛ́ lúúỹaa, wú líílɔlɔngɔ í ɣɛ́ la ỹɔw̃ɔ́ ỹɔ́w̃ɔ háitii nga.

KƆLƆ́SE 3:14

A sítii kpɛ́lɛɛ kɛ́ ngí yépɛnga ti wa, kɛ́ ngi bíkpingi waa ngáá a ló ngáá ỹɔw̃ɔ́ ỹɔ́w̃ɔ. Ndongí wáá ɣɛ́ su ngáá ỹɔw̃ɔ́ ỹɔ́w̃ɔ, aa kɛ ngáá háwu wú kpɛ́lɛɛ wú ɣɛ́ ngáá nuu yílaa kpé.

FELÉMO 1:6

Ní Yála fɛ́li ngói í hááw̃a aá waa ngáá, mu lángi í su yíla í kɛ́ ngáá háwu yí ɣɛ́ kulasuunúmai kpɛ́lɛɛ kɔ́lɔ í mu haáw̃a ɛ́ɣɛ yí ngátɔ ti wa kɛinɔɔ́ yí hómbo yí yénge Kílisitii yɛ.

HÍBULU 6:6

Ná taa gúla Ngala fái h̃u, ɛi ɣɛ ngáá solowo fáá ngáá tɔɔ mɔ́ɔ́ yangáima sú bɔw̃álale, sí taa ɣɛ́ kɛ́i kulangɔ́ aa ɣɛ nɔ́ɔ la ngáá kíya nɔ́ɔ taa ɣɛ́a Ngalángi H̃íỹɛndou Loí bakpá múl̃ɔ kulɔ́sii w̃a ngáá niina. Ná ná áá ɣɛ, kɛ ngangufé ngwála wul̃á taa ɣɛ́a njeí ma kpɔ́ ndííwaa.

NJƆÚ HESENDAA GƆLƆÍ 2:3

Ná a maa gólo Ngalángi hávaitiini mbu, kɛ mu gi mái aa ɣɛ kpál̃au, mú ɣɛ́ kɔ́lɔ ngáá ele gíte waa ngáá Ngalá.

NJƆÚ HESENDAA GƆLƆÍ 2:5

Kɛ́ ná a maa gólo Ngalángi gééla woí wu, Ngalángi lóngi áá ɣɛ́ mú h̃u, kɛ aa gɛɛlɛngɔ́ pele h̃u. Ná vá tɔ áá ngákɛ ngáá a mu háá í ɣɛ́a su yíla a maá Ngála.

FAA YÁKƐ KƆ́LƆI 21:5

Kɛ Ngalá lɛ́i í héini masa ngwálai bɔ́kpɔngi ya, i ɣɛa ta, “Nyá ngáá ŋani kpɛ́lɛɛ kpátɛ ngáá ngi níína.” Kɛ i ɣɛ́a má, “Ngoí sítii ngáá nde ti vɔ́nɛ bɔw̃álale tiyá lɔ́ ngáá tɔɔỹaá ɛ́ɣɛ tókola ma wóó.”