JIMISÍ 3:17 - Kɛ́lɛ Niinaí

¹⁷ Nungái sítii taa kéle ɣelengí na w̃aahɔ́lɔ áá gúla Ngalá ngéya, tiyá lɔ́ tɔmbema w̃áá fíli ɛ́i ɣɛ́ ti wa. Tiyá lɔ́ nuu haa ỹɔu ɛ́i ɣɛ́ ti gi ma ɛ́ɣɛ ti ɣɛngɔ́ lúúỹaa, ti ngáá kisiya faa h̃ú yélaa. Ná vólu, ti h̃úúlaahengɔ ngáá ngaah̃u w̃aaw̃aanúmai ɛ́ɣɛ faa bɔ́wɔi. Ná vólu, tɛ́i suuwɔlɛ́ mbó ɛ́ɣɛ taa ngáá faa lá mbélaa yaah̃ú.

JIMISÍ 3:17 Iomraidhean Croise

MÁFIYU 23:28

Ngimɔ́ɔ́ nɔ́ɔ wáá bɔ́wɔ ɣɛ́ ngáá tuva velé vánda yelaa nungáitiini ngaah̃ú, kɛ́ wú h̃úú vélei, wá lɔ ngáá Ngala fáá la mbélaa yaah̃ú kɛ́ aa wú líí h̃u ɛ́ɣɛ nyaamái lɔ wú h̃ú.”

MÁFIYU 5:8

Nungái sítii ti liivó fái í ngáá tí Ngalá ndiilɛ́i fáitii kɛ, aá lɔ́ ngáá faa vánda ti haáw̃a, sífaa tiyá lɔɔ vá ɣɛ́ma Ngalá ngéle.

MÁFIYU 5:9

Nungái sítii tíwaa ndowah̃u batɛ́ mbo, aá lɔ́ ngáá faa vánda ti haáw̃a, sífaa Ngalá tɔ́ɔ vá lokohéima tí wu ngáá ngi léngaa.

Keela woó vándai Lúu í pɔ́nɛni kɔwɔ́ato Jísu Kílisitii wa LÚU 21:15

Sífaa nyá bútei ngáá hómbo ngí njɛpɛítii pu wú la, ná vólu, ngí wú gí máá gúla. Wú waahílima yélaitii kéle tɔ tɛ́i hómbo tɔɔ́ ló wú láá wú kɛlaa tɔɔ́ wú w̃ááɣaali.

Keela woó vándai Lúu í pɔ́nɛni kɔwɔ́ato Jísu Kílisitii wa LÚU 6:36

A ɣɛ́ ngáá ngaah̃u w̃ááw̃aanu yelaa kɛ kíya nɔ́ɔ wú Kɛ́ɛ́ɣɛ Ngalá í ngáá ngaah̃u w̃aaw̃aanú má w̃ɔ́ɔ́.”

NJƆÚ 1:14

Lɛ́i vangí taa ɣɛ́ ma Keela Wói, i batɛní ngáá nuu búsa. I ɣɛi mu liiwáá aáva ní ngi yámaloulai lɔní, yamalóulai sí vá aa lɔ na Kɛɛɣɛí Ngalángi H̃íỹɛndou Lou yiláá kpéngi háaw̃a. I tɔɔỹái yakɛ́nga ngáá ni ye kpál̃au kɔwɔ́ato Ngala mba, ɛ́ɣɛ Ngalángi haa bɔwɔ́i mu haáw̃a.

NJƆÚ 1:47

Ná Jísu í Natáániyɔ lɔní áá vá, kɛ Jísu i yɛ́pɛnga kɔwɔ́ato mba, i ɣɛ ta, “Ísulɔ w̃ɔ́i kái káingi lɔ, laá lɔ́ kahá haa fíli áá su.”

TI GƐ́Ɛ́ HAÍTII 11:24

Bánaba i ɣɛi ngáá nuu vánda Hɛ́ɛ́ma Ỹínangi i polú, nda ngí su ngwala. Aáva nuu yambɔ́ɔ́lɔngɔ wala ti vóteni Ndemɔí Jísu wa.

TI GƐ́Ɛ́ HAÍTII 9:36

Táingi ná h̃uu vá, nyah̃ápo yiláá taa ɣɛ́ ma Tabíta, ti mɔ́ɔ́ ɣɛ ma Dɔ́ka Gilísi woí h̃u, ná wúi wáá ngáá ndɔpá í ngáá Jísu volú w̃ɔ́i ta aá lɔ́ ngáá taí sí h̃uu w̃ɔ́ɔ́ taa náá lolí ngáá Jɔ́pa. Nyah̃ápoi sí ɛ́i belé bɔ́lɔ ngáá faa bɔ́wɔ ɣɛndáá, aáva i ɣɛi áá bɔ́ nyaani yélaitii mba.

LÓÓMI 12:18

Aáva kɛ ngáá hɛmbɛ́ fíli ngooláma í ɣɛ́ í lówah̃u wáá nuu kpɛ́lɛɛ.

LÓÓMI 12:9

Wálaa ɣɛ́ nɔ́ɔ wáá kpátɛ ngáá wú lóngɔɔ lé ngáá ỹɔw̃ɔ́ ỹɔ́w̃ɔ kɛ́ ɛi ɣɛ wú líí h̃u. A híli ngáá faa ỹɔ́u ɣɛ́ndai, wú ló ngáá faa vándaitii kɛ́ndaa.

LÓÓMI 15:14

Mu mbála Yála fɛ́li mbélai, nyá gítei ndángɔɔ lé lá ngáá wú lúva veléi vangɔ́ɔ́ lé ngwála aáva wú kéle ɣelengí kpɛ́lɛɛ mááhɔlɔnga ngáá áá kɛ wú ɣɛ́ wáá kálambo mbó ngáá ỹɔw̃ɔ́ ỹɔ́w̃ɔ.

KƆ́L̃E HESENDAA GƆLƆÍ 12:8

Hɛ́ɛ́ma Ỹína ngílaa kpéngi aa kɛ ngáá háwu nuí sí áá kele ɣelé kééla wóó le, ná vólu, í kɛ ngáá háwu pekaí áa faa gálangɔ gééla wóo le.

KƆ́L̃E GƆ́LƆI HELE KÉLEI 10:1

Nyɛ́i ngí ngáá Pɔ́ɔ, nyá lɔ́ wú w̃áánɛɛnɛ gíte ngáá wumaá nyɛ́i nungái taá ndé ngáá ná ngáá ɣɛ́ wú lóów̃a ngáá wú nganjéi, kɛ́ ná ngɛ́i ɣɛ́ wú lóów̃a, ngáá faa hóu kpáŋ. Nyá lɔ́ɔ wú w̃áánɛɛnɛ Kílisitii w̃áá véle w̃a lɛ́i ngandɛ́ingɔ kɛngɔ́ lúúỹaa.

KƆ́L̃E GƆ́LƆI HELE KÉLEI 6:6

Ní ngákɛa ngáá niỹá lɔ ngáá Ngalángi yénge mbélaa kɔwɔ́ato ni ɣɛ kíli wa séngei faa ỹɔ́i yaá, ɛ́ɣɛ sí ní kɔ́lɔ kɔwɔ́ato Ngalángi lɔ́ɔ́ỹai wa ɛ́ɣɛ ndiilɔlɔ́i ní su ɛ́ɣɛ ni háá nɛɛ ɣɛndái. Ná vólu, Hɛ́ɛ́ma Ỹínangi í ni vólu ɛ́ɣɛ tɔɔỹaá lóngi ní su

KƆ́L̃E GƆ́LƆI HELE KÉLEI 7:11

Kɛ́ tɔ lɛ́ɛ sí Ngala ngí kɛ́ngɔ ngáá wú w̃ááw̃aanui. Wú w̃ááw̃aanumai i kɛ́a ngáá háwu wú lɔ́wɔbaɣangɔ í ɣɛ́ la wúwaa yákpa ngáá wú ngákɛ ngáá wáá faa ỹɔ́u ɣɛ́ngɔ. Wú lííyaw̃al̃angɔ i ɣɛ́ngɔ la, wáá lúwa. I kɛ́a wú lóngɔ wú tɔ́ ngwala. Wú gúlangɔ kɛlɛma fó fóndei Ngála mbɛ́, wú w̃ááhei wongɔɔ ngwala ngáá núi í faa ỹɔ́i ɣɛngɔ́ wú faa bá nda ma. Faí sí kpɛ́lɛɛ i ngakɛ́a ngáá kɛ faa fíli aa wú wá fái sí h̃u.

KƆ́L̃E GƆ́LƆI HELE KÉLEI 9:10

Ngalá tɔ áá ŋani huwúi he sí mɔ́i yaá ɛ́ɣɛ mɛɛní mɛ fááw̃a. Faalɔ, Ngalá ngáá wú wɔ́ ngáá sí fíli wáá sí ngí húwui í kɛ ngáá háwu ti bátɛ tí wá ngwala kɛinɔɔ́ wú hómbo wú sítii kɔ ngwala taa ɣɛ́ kpéɣe su.

Ɛ́FƐSƆ 5:9

A yakpá wú sí ɣɛ Ndemɔí Ngalá ndóngɔ wú kɛ. Sífaa, ná nuu áá ɣɛ́ kala kala ma í gɛ́ɛ́ haítii taá ɣɛ́ ngáá faa vánda ɣɛ́ndai ɛ́ɣɛ telembongí ɛ́ɣɛ tɔɔỹái.

FÉLEPA 1:11

Wú gɛ́ɛ́ hái i ɣɛ́ nɔ́ɔ fɔ́ ngáá faa vándaitii kɛndáá Jísu Kílisitii yílaa kpé áá kɛ ngáá háwu wáa hómbo wáa ti ɣɛ́ kɛinɔɔ́ ngúfema í ɣɛ́ Ngála mbɛ ná vólu, ndaaw̃áá í lɛ́.

FÉLEPA 4:8

Mu mbála Yalá fɛ́li mbélai, ngapúmaa haí wáa ngáá wú gí máa háitii ti ɣɛ́ ngáá fái sítii ti ngáá tɔɔỹaá ɔɔ ngufema háá ɛ́ɣɛ sítii tí péle w̃a ɔɔ maa w̃úỹangɔ, ná vólu, sítii nuu áá kɛ ndo mááh̃u ɔɔ sí fíli áá ɣɛ́ ngáá ngaah̃u w̃aahou háa ɛ́ɣɛ faa fíli nɔ́ɔ taá nuu lɛ́ su ɔɔ sí fíli í ngáá faa yááh̃u bétevengɔ.

KƆLƆ́SE 1:10

Ná ná áá ɣɛ́, wáá hómbo náa wú ɣɛ́ kíya Ndemɔí lóngɔ wú ɣɛ́ na, wúwaa sítii kɛ hɔ́wɔ fíli táá ndiilɛ́i. Wáá ɣɛ́ náa wáá faa vánda bih̃íw̃aa ɣɛ́ wú lɛ́ɛ́h̃uitii suuhíya kílii h̃u aáva wáá ɣɛ́ Ngalá kɔ́lɔ ngáá ele gíte waa ngáá laá ngáá pangɔ́.

TƐSALÓNIKA HESENDAA GƆLƆÍ 2:7

Ní ndái ɔ́ɔ́ ɣɛ́ tɔɔỹaá w̃a ná wɔ́lii nɔ́ɔ ni beɣéma wɔ́lingaitii fɛ́li wú w̃a bɔw̃álale niỹá lɔ ngáá Kílisitii géélaitii. Kɛ́ ní wú h̃úúhouni lɛ́ɣɛ lɛɣɛ ná h̃u ni ɣɛ́i wú lóów̃a kɛ kíya nɔ́ɔ ndoú njéi áá ngí léngaitii suuhóu ngáá pangɔ́.

TÍMOTI HESENDAA GƆLƆÍ 5:21

Ngaláni ngáá Jísu Kílisitii ɛ́ɣɛ hɛ́ɛ́ma w̃álekaitii tiyá lɔ́ ti ngáá ní hééleaitii ngáá ngí fái sí léa í w̃a kpáŋ kpáŋ ngáá yí híya ngáá ti ye. Yálaa suuwɔlɛ́ mbo kɛlaa yɔ́ɔ́ tó polú wó ngáá nuu fíli í híyalai h̃u ngáá fái sítii.

TÍMOTI GƆ́LƆI HELE KÉLEI 2:24

Nuí fíli aá ɣɛ́ ngáá Ndemɔí Ngalángi yénge mɔɔ álaa ɣɛ́ kpɔɔlɔ́ ya, kɛ́ í ɣɛ́ ngáá nuu vánda nuu kpɛ́lɛɛ fááw̃a. Í ɣɛ́ ngáá nuu ngáá áá hómbo í kálambo mbó, í liilɔlɔ́ maanɔw̃ɔ́i ya mbaahílima yélaitii taa ndá ma.

TÁITƆ 1:15

Faa kpɛ́lɛɛ áá ɣɛ́ ngáá faa w̃ááw̃uỹangɔ nungaí sítii mbɛ ti liiwólengɔ áá ɣɛ lá faa kpɛ́lɛɛ sú. Kɛ́ nungaí sítii ti liibɔ́lɔngɔ áá ɣɛ lá aáva tɛi ɣɛ́ lái ngáá tɔɔỹái, faa kpɛ́lɛɛ aa ɣɛ́ ti yaá ngáá faa ỹɔ́u. Maa yélai ti gi mái ɛ́ɣɛ ti liítii súúlaahengɔ aa ɣɛ lá ngáá faa ỹɔ́u léé lée.

TÁITƆ 3:2

Tálaa ndɛɛ vɛlɛ nuu fíli mbá, tálaa ɣɛ́ táa w̃ááɣaali. Kɛ́ láá ɣéle, ti ɣɛ lúúỹaa, tí ɣɛ́ ngáá mbɛlɛheí yélaa nuu kpɛ́lɛɛ fááw̃a.

HÍBULU 12:11

Ná táa maakɛ pánda vu mu h̃u, a maa w̃ááw̃aanu. Mu góóh̃unɛɛngɔ ɛi ɣɛ lá táingi ná h̃u, kɛ́ naa wútuwɔ véle muỹɛ́i maakɛ́ngi áá ɣɛ náá mu h̃u faa bámai w̃aa véle w̃á maa ɣɛ́ náá híyani su, ndiihéi ɛ́ɣɛ telembongí tiyá lɔ taá ɣɛ ngáá maa gúlasuunumai.

HÍBULU 12:14

A yakpá kɛ́ŋɛ wú ɣɛ́ ndiiheí h̃ú wáá núngaa vékaitii kpɛ́lɛɛ, wálaa ɣɛ́ faa ỹɔ́u ɣɛ́ndaa h̃u bɔw̃álale, nuu fíli áá ná ɣɛ́, ɛi ɣɛ Ndemɔí Ngála ngéle.

JIMISÍ 1:17

Faa vándai fíli a maá maahɔ́lɔ aáva tɔmbema w̃áá fíli ɛ́i ɣɛ́ mba, kɛ ná i gulangɔ́ ngelegóóh̃u. Ngalá pá tɔ áá ɣɛ́ féi a mu yaá, lɛ́i í ŋániaitii kpɛ́lɛɛ kpátɛngɔ tí ngeleya táá hólo, lɛ́i nɔ́ɔ́ mɔ́ɔ́ ɛ́i faa lé ɔ́ɔ́ síɣe ma ngáá volú yáfendaa kɛ kíya folói áá vólu yáfe kpindíí áá vɛ́lɛ.

JIMISÍ 1:5

Ná wú tá fíli áá ɣɛ́ na kele ɣelé ngɛ́i ɣɛ́ mbɛ, í Ngála fɛ́li ngáá Ngalá ngí kɔ ngáá kele ɣelé. Ngalá pa, lɛ́i áá ŋáni he nuu kpɛ́lɛɛ ngéya ngáá ndiiwolé ɛ́i bóɣi kpoɣí, aa fé maa w̃ɔ́i yaá.

JIMISÍ 2:13

sífaa nuí sí ɛ́i nungáá yaah̃ú w̃ááw̃aanu hóu, ná Ngalá ngáá ɣɛ́ ngáá maa w̃ɔ́i gɔ́sɔ ɛi ngaah̃ú w̃ááw̃aanu hóu laá bɛ́lɛ. Kɛ́ núi sí áá nuu yááh̃u w̃ááw̃aanu hóu, Ngala ngáá maa w̃ɔ́i yaah̃ú w̃ááw̃aanu hóu kɔsɔ́ su.

JIMISÍ 2:4

kɛ ndowah̃u kɔlɛ́ wúl̃a áá ɣɛ́ wú h̃u, wú gísiyaitii pa wáá ɣɛ́ wáá ỹɔw̃ɔ́ ỹɔ́w̃ɔ yéɣe su, tɛ́i ɣɛ́ pele w̃a.

JIMISÍ 3:15

Kele ɣelé táálii ná ɛi gula Ngalá ngeyá kɛ́ aa ɣɛ ngáá ngetéyangi sí h̃uu géle ɣelengí sí Hɛ́ɛ́ma Ỹínangi ndá ɛ́i ɣɛ́ mba, kɛ́ aa ɣɛ gulaí ỹína nyɔítii ngeyá.

JIMISÍ 4:8

A vuuva Ngalá mba laá bɛ́lɛ aa vuuva wú wa, a yáa wúya wɛ́i wú ngáá faa ỹɔ́u yélaitii, ná vólu, wú lííwolengɔ í ɣɛ́ la fó wɛ́i wú gí má haa áá yíla.

PÍTƐ HESENDAA GƆLƆÍ 1:22

Ná naá wú gólongɔ Ngalá mbɛ wúwaa híya ngáá tɔɔỹaá gééla wói, ná lɔ náa i kɛ́a wú w̃ááw̃uỹangɔ fó faa ỹɔ́i yaá, ná vólu, i mɔɔ kɛ́a wú lóngɔ ngáá wú mbála Yalá fɛ́li mbélaitii ngáá tɔɔỹaá. Faale, ná naá maa hái í h̃íí na, a ló ngáá ỹɔw̃ɔ́ ỹɔ́w̃ɔ ngáá lií kpɛ́lɛɛ álaa ɣɛ́ nɔ́ɔ ngáá wɔ́ɔ́ ndá yaah̃ú.

PÍTƐ HESENDAA GƆLƆÍ 2:1

Ná ná áá ɣɛ, a bé naá nyaama haa ɣɛndái kpɛ́lɛɛ mbá ɛ́ɣɛ ndɛɛ gɔ́ɔ́landaitii ɛ́ɣɛ fáa lándai wa yaah̃ú kɛ́ ɛi ɣɛ wú líí h̃u. Ná vólu, a bé náa tólomai wa ɛ́ɣɛ ngoo ỹɔ́u léndai nungáá vékaa w̃a.

PÍTƐ HESENDAA GƆLƆÍ 2:18

Wɛ́i wú ngáá ngenge mbélaitii a bɔwɔ́ gúla kɛlɛ́ma, wú ngúfema hé sítii mbɛ taa ɣɛ́ wú w̃ááh̃u. Wálaa ná ɣɛ́ nɔ́ɔ́ sítii mbɛ ti ngáá wú w̃ááh̃u yélai taa wú h̃úúhou ngáá pangɔ́, kɛ́ wú kɛ sítii kele tɔ mbɛ taá bándi bándi héi wú w̃a.

NJƆÚ HESENDAA GƆLƆÍ 3:18

Wɛ́i wú ngáá ní léngaa Ngala fái h̃u, nyá lɔ́ɔ nde wú w̃á ngáá a mú lóngi ỹɔw̃ɔ́ ỹɔ́w̃ɔ hááw̃a álaa ɣɛ́ nɔ́ɔ a mu laa wóó h̃u. Kule lɔ́ mú w̃a mú ndó kítei sí yákɛ kpál̃au áá gúla a mu lúva velé h̃u.

NJƆÚ HESENDAA GƆLƆÍ 3:3

Nuí fíli kitomái sí áá ɣɛ́ mbɛ Jísu Kílisitii h̃u, maa w̃ɔ́i aa bɔwɔ́ h̃uuhóu w̃a, nguyangɔ́ í ɣɛ lá fó faa ỹɔí yaá kíya nɔ́ɔ Jísu Kílisitii í na faa ỹɔ́u fíli áá su.