PÍTƐ GƆ́LƆI HELE KÉLEI 3:2 - Kɛ́lɛ Niinaí

² Kɛ́ ndóngɔ gíte lé wú gísei faí sítiini ma Ngalángi hɛ́ɛ́ma láa háá le mbélai tí ndéni, ná vólu, wú ɣɛ́ wáá giséi sí w̃a Ndemɔí Jísu lɛ́i mɔ́ɔ í ngáá mu Wúmaawo Mɔ́i í ndéni, niỹɛ́i ni ngáá ngí gééla hiya mbélaitii ni vái ní ndéni wú w̃a.

PÍTƐ GƆ́LƆI HELE KÉLEI 3:2 Iomraidhean Croise

Keela woó vándai Lúu í pɔ́nɛni kɔwɔ́ato Jísu Kílisitii wa LÚU 1:70

I púni ngi hɛ́ɛ́ma láá háá le mbélaitii nda wɔ́lɔ ngáá sí í ndéni

Keela woó vándai Lúu í pɔ́nɛni kɔwɔ́ato Jísu Kílisitii wa LÚU 24:27

Kɛ Jísu í sítii kínɛi súúɣɛnga ngáá ti ye Muusé í pɔnɛní í fólo sí kínɛi má Ngalá ndaa háá le mbélaitii tí pɔ́nɛni kɔwɔ́ato mba.

Keela woó vándai Lúu í pɔ́nɛni kɔwɔ́ato Jísu Kílisitii wa LÚU 24:44

Kɛ i ɣɛa ti w̃a, “Sí lɔ ngí ndéni wú w̃a ná h̃u ngí ɣɛ́i wú lííwaa ngáá kɛ sí kpɛ́lɛɛ pɔnɛngɔ́ kɔwɔ́ato mbá Ngala Kɔ́lɔi h̃u Muusé í pɔ́nɛni ɛ́ɣɛ sí Ngalá ndaa háá lé mbélaitii tí pɔnɛní i hítɛ nga. Ná vólu, ɛ́ɣɛ sí pɔnɛngɔ́i kɔlɔí sí h̃u taá tolí ngáá Ngala Fɛ́li Ngúle Gɔlɔí.”

TI GƐ́Ɛ́ HAÍTII 10:43

Ngalá ndaa háá lé mbélai kpɛ́lɛɛ ti yɛ́pɛni kɔwɔ́ato Jísu wa ngáá nuí fíli áá lá la, ngi háá ỹɔítii suuhaa áá lo ndaahéingi h̃u.”

TI GƐ́Ɛ́ HAÍTII 28:23

Tí kuu láni ma náa ngáá folói tɔ́ɔ́ w̃ɛ́ɛ́ múl̃ɔ Pɔ́ɔ w̃áála. Ná naa hɔwɔ́ í hítini, ti yangí ɣɛ́i wɔɔlɔ í lɔ́ve sítii mba ti vááni maipángi w̃a. Ti vááni mbéi Pɔ́ɔ laaw̃áá vɛ́lɛngɔ i ɣɛi lá na. Í sei ngelendái w̃a í fólo kpɔkɔ́ w̃a, Pɔ́ɔ i ɣɛi áá yɛ́pɛ ti yelé kɔwɔ́ato Ngalángi w̃ásandai wá, ná vólu, íwaa yákpa ngáá í ti lii vóte, ti lá ngáá Jísu. I ɣɛi áá maa hái yakɛ́ ngáá tí ye áá gúla Ngala sávai h̃u í féni Muusé yáá ɛ́ɣɛ fái Ngalá ndaa háá lé mbélai ti pɔnɛní.

TI GƐ́Ɛ́ HAÍTII 3:18

Kɛ maa hái hítɛ gilíi lɔ ngáá sí nga Ngalá mbɛ, ngáá sí í ndení wɔ́lɔ laa háá lé mbélaitii kpɛ́lɛɛ ma ngáá kɛ ngi Lókolo Mbá W̃ɔ́i í w̃áánɔw̃ɔ.

TI GƐ́Ɛ́ HAÍTII 3:21

Aáva kɛ í lo ngelegóóh̃u í ló su kpóloo maa gúi í gúla Ngalá ngeyá ngáá í ŋani kpɛ́lɛɛ kɛ́ kíli batɛ́ múl̃ɔ volú kíya nɔ́ɔ wɔ́lɔ í maa gúúlongi wóni ngi hɛ́ɛ́ma láá haa le mbeláitii maa véle w̃á.

GALÉSIYA 6:2

A waayaa bɔ́ ỹɔw̃ɔ́ ỹɔ́w̃ɔ wá wú háa bɔlundáitii su. Ná wáá ɣɛ́ wáá sí ɣɛ, kɛ wá lɔɔ gólo Kílisitii hávaitii mbu.

Ɛ́FƐSƆ 2:20

Mu kpɛ́lɛɛ nɔ́ɔ mu gúlangɔɔ lé ngáá pɛlɛ́ aáva Ngalángi géélaitii ɛ́ɣɛ Ngalá ndaa háá lé mbélaitii tí gúlangɔɔ lé ngáá maa vɛ́lɛi gɔ́wɔi. Jísu Kílisitii lɔ áá pɛ́lɛ gɔ́wɔi ná h̃úúba.

Ɛ́FƐSƆ 3:5

Hése wɔ́lɔ nungáá taá ɣɛ́i ndɔɔwu h̃ú hái sí wɔ́lɔ, kɛ́ Ngalá ngí kɛngá ngáá háwu Hɛ́ɛ́ma Ỹínangi í ndɔ́ɔ́wu h̃ú hái sí ɣɛ́nga ngáá Ngalángi hɛ́ɛ́ma géélaitii ɛ́ɣɛ ndaa háá lé mbélaitii.

TÍMOTI HESENDAA GƆLƆÍ 6:14

Maa háitii mbaa ngáá, yí fái sítii kɛ ngáá pangɔ́ ɛ́ɣɛ tɔmbema w̃áá fíli álaa ɣɛ í wá faa fíli su í ló su bɛ́lɛ a mu Lemɔ́i Jísu Kílisitii í va.

PÍTƐ GƆ́LƆI HELE KÉLEI 2:21

Kɛ maa ɔ́ɔ́ ɣɛ́ nɛ́ɛ́ni tɛ́i belé ɣɛ́ hɔ́ɔ́ Ngalángi lélembo peleí sí wɔ́lɔni, í lɔ́ve sí wa taa ɣɛ́ náá kɔ́lɔ kɛ́ tí mɔ́ɔ volú yáfe Ngala kééla woo vandaí wa tí ndéni ti w̃a.

PÍTƐ GƆ́LƆI HELE KÉLEI 3:15

Wú hómbo wú gísei ma gíte ngáá Ndemɔí Jísu liilɔlɔí áá mbo a mu yaá aá lɔ́ nɔ́ɔ na ngáa a mu bɔwɔ́ wúmaawongi hááw̃a kíya nɔ́ɔ a mu mbála Yála fɛ́li mɔ́i Pɔ́ɔ lɛ́i a mu longɔ́ lá laá bɛ́lɛ í kɔ́lɔ vɔ́nɛngɔ wú yéle ngáá kele ɣeléngi sí Ngala ngí féngɔ ngéya í púngɔ su.

PÍTƐ GƆ́LƆI HELE KÉLEI 3:16

Faí sítii tɔ́ nɔ́ɔ jɔ́ í pɔ́nɛni ngí gɔ́lɔitii kpɛ́lɛɛ sú ná í kɔlɔ vɔ́nɛi kɔwɔ́ato ti wa. Faa lɛ́ingaani taá ɣɛ́ ngi gɔ́lɔi nátii sú ti yatɔ́ndai mba kpangɔ́ ngwala. Maa hái nátii pá tɔ sítiini taá faa gíte yakɔ́lɔ aáva taa lóóni kpáŋ kpáŋ Ngala fái h̃u taá maa vóte ngáá bɔwɔ́ liivó péle kíya nɔ́ɔ taá kɛ ngáá faa vékaitii ti vɔ́nɛngɔi Ngala Kɔ́lɔi h̃u. Ná vá tiwáá kɛ, tiyá lɔɔ vá ngáá kɛ kíli ỹáánii bɔwɔ́ w̃ááh̃u.

NJƆÚ HESENDAA GƆLƆÍ 4:6

Kɛ́ muỹá laá muỹá lɔ́ Ngalá fááw̃a. Nuí fíli pa í Ngála kɔ́lɔ ngáá ele gíte waa ngáá laá, maa w̃ɔ́i aa wolílo mu w̃a. Kɛ́ nuí fíli pa ɛ́i ɣɛ Ngalá fááw̃a, maa w̃ɔ́i ɛi wolílo mu w̃a. Ná va tɔ áá kɛ maa ɣɛ́ ndowah̃úngi wɔ́lɔ tɔɔỹaá Ỹínangi wa ɛ́ɣɛ ndɛɛ ỹínangi.

Kɔlɔí Júu í pɔ́nɛni Ngala fɛ́li mbélaitii ngelé JÚU 1:17

Kɛ́ wɛ́i wú ngáá mu mbála vandáitii, a gísei sí w̃a mu Lemɔ́i Jísu Kílisitii géélaitii tí ndéni wú w̃a wɔ́lɔ ngáá áá lɔ́ɔ́ va ɣɛ́ma.

FAA YÁKƐ KƆ́LƆI 19:10

Ngí hítɛi wumbú yá malékai gakála ngáá ngí fɛ́li, kɛ́ i ɣɛi má, “Yaa ná ɣɛ́! Ngalá tɔ́ nɔ́ɔ yáá fɛ́li. Nyá bɛ́lɛ nyá lɔ́ nɔ́ɔ ngáá Ngalá ngénge mɔ́ɔ kíya nɔ́ɔ yí ná ɛ́ɣɛ í mbála Yála fɛ́li mbélaa, ná wáá ngáá, sítii kpɛ́lɛɛ ti langɔ́ ngáá tɔɔỹaá woí Jísu í ndéni.” Tɔɔỹaá woí Jísu í ndéni áá lɔ́ɔ í ngáá Ngalángi gééla woí wúngi Ngala ndaa háá lé mbélai taa nde.