Ɓalɔ́ma 8:11 - Ɔngana á Kɛ̌kɛ

¹¹ Kaɓɛ Měma á Mokonga mmbé ɗánjujúkisi Yéso sɔsɔɓɛ á ɓasí n'aiki suɓi anu, yɛ mmbé ɗánjujúkisi Kiísito sɔsɔɓɛ á ɓasí tɔndɔ aámbé aendisande nyama anu á kukuwa na Měma akɛ nnde a suɓi anu.

Ɓalɔ́ma 8:11 Iomraidhean Croise

Yoáni 14:17

Ande Měma á ɗoni, mmbé ɓato á ka mokonda ɓánáɔtɔka na ɓámɓeeki nga, ɓákáɔtɔka na ɓámɔni na úba akɛ. Ɓenu gǎkɛ, ɓoomúba nga, yɛ aoika kimoci na ɓenu, aɓande phɔtɔ suɓi anu.

Yoáni 5:21

Nga, a tɔ ɓíndɔ Abɛ aǒjujukisa ɓasí ka kukuwa na endisa aɓɔ goto, a phɔtɔ ɓó unge Anakɛ aonendisa nkpa buakɛ mmbé akondi endisa akɛ.

Ekuma á ɓateki 2:24

Mokonga â gǎkɛ onjujukisa ka kukuwa, áonkoɗaga ka kokae á kukuwa. Nga, kukuwa ɗákátú na ɓukpɛkpɛ á tɔka akɛ.

Ɓalɔ́ma 16:10

Nensambei Apɛ́lɛ mmbé aúbisi base ɓeekea nɛkɛ ka Kiísito. Něsambei ɓato á k'éndu ndea Aiistobúlo.

Ɓalɔ́ma 16:3

Nensambei Pisíla na Akíla, ɓadani ɓabɛɗanigi ndea Yéso.

Ɓalɔ́ma 16:7

Něsambei ɓatia-abɛ na ɓadani Andɔɔníkɔ na Yunía ɓunde ɗétú na ɓɔ suɓi á mekakɔ. Ɓɔ, ɓána ɓoombia phɛɛ sɔsɔɓɛ á ɓateki, ɓɔ, ɗáɓámɓeeki Kiísito mosá ani.

Ɓalɔ́ma 16:9

Nensambei Uubánɔ dani mbɛɗanigi suɓi á Kiísito na dani ékondi Stákisi.

Ɓalɔ́ma 6:12

Cɔ, ɓojeɗe kaɓɛmbɛ ye na kɔkɔta suɓi á nyama ndɔ á kukuwa na ɓókoɓeekeɛmbɛ ye tɔtɔkisa á mɔphɛ ájeɗe á nyama anu.

Ɓalɔ́ma 8:1

Cɔ, kɛ̌kɛnde, ɓakpa nde ɓá suɓi á Kiísito Yéso, ɓákátenɛku ye tanda nyɔngɔ nɛɓɔ akpɛ.

Ɓalɔ́ma 8:12

Cɔ, ɓaya, ɓena nyɔngɔ á phenda í. Nyɔngɔ ndɔ nna gǎkɛ á nyama asu ka ɓeá tambea nɛsu á kokpa.

Ɓalɔ́ma 8:2

Nga, akoɓá nkpa n'asuɓi á Kiísito Yéso, Měma á kanga ɓojeɗe nnde aoendisa, aunge ande ɛɔphi nɛkɛ. Ɛɔphi ndɔ unge ɗámotókisi kusi á kɔkɔta á ɓojeɗe na kukuwa.

Ɓalɔ́ma 8:9

Cɔ, ɓenu, ɓókó ye gǎkɛ oɓea tambea á kokpa, ɓo ndiu oɓea tambea á Měma á Mokonga, ka nyɔngɔ nde aiki suɓi anu. Aoɓá nkpa na nna na Měma á Kiísito, nkpa ndɔ nna nkpa ndea Kiísito.

1 Ɓakɔlítɔ 15:16

Nga, aoɓá ɓasí na ɓákáojujuka ka kukuwa, Kiísito ɗákájujuki gǎkɛ ka kukuwa.

1 Ɓakɔlítɔ 6:14

Mokonga ɗánjujúkisi Mɔkɔta Yéso ka kukuwa, na asójujukisande ka kukuwa ka ɓukpɛkpɛ nɛkɛ phɛɛ.

2 Ɓakɔlítɔ 4:11

Nanga ɓî ɓe phɔ́tɔ oenda, ɓe bíbí á kukuwa ka nyɔngɔ á Yéso, ka gea enda akɛ áɔnɛkanɛ ka nyama á kukuwa nde ɓeně.

2 Ɓakɔlítɔ 4:14

Ɓeoúba gea, Mokonga ɗánjujúkisi Mɔkɔta Yéso ka kukuwa. Asójujukisaeka phɔtɔ kimoci na Yéso, áosóbisa kimoci na ɓenu bíbí akɛ.

2 Ɓakɔlítɔ 5:4

Ɓî ɓe phɔ́tɔ koenda suɓi á ɛma ndɔ á ka mokonda, ɓeoɓénga ɓea nkpa n'akúmbi nkumba áɗoko phɛɛ. Nna gea te, ɓekondi gea, Mokonga átokisɛ nyama á ka mokonda ndee. Ɓekondi ndiu gea, ásóphɛ nyama á na koba ka gea, nnde aoenda mɛyɔ ámiɛ nnde aokuwa.

Ɓagalatía 6:8

Aoɓá nkpa n'akonanigi ka ɓeana na mɔphɛ ájeɗe nɛkɛ, aɗunguande kukuwa. A gǎkɛ okonanaga ka ɓeana na Měma á Mokonga, aɗunguande enda á mɛyɔ.

Ɓaɛphɛ́sɔ 2:5

Ɓî ɗéɓeku ye ka měma, ka nyɔngɔ á ɓojeɗe nɛsu, áosójujukisa ka kukuwa kimoci na Kiísito. Ɓoamia ndɔ ɗátú ka nyɔngɔ á ɓonjánja-ékondi ndea Mokonga.

Ɓaphilípi 3:21

Yɛ, aketiande nyama asu á ɔlɔmana na á kukuwa, áobisa ú ɓea nɛkɛ á ɓoombia. Atɔtɔkisande nndɔ ka ɓeana na ɓukpɛkpɛ nde ɗátɔtɔkisi ka bisa kema bui kusi akɛ.

Ɓaɛbulanía 13:20

Cɔ, Mokonga mɛna ɓujɛjɛ, ɗánjujúkisi Mɔkɔta nɛsu Yéso Kiísito sɔsɔɓɛ á ɓasí. Yéso aámbé ande nambi angbónbgó á ɓamɔgɔgɔ. Magia akɛ asɔ́tɔisi ɔngana á mɛyɔ.

1 Pɛ́tɛɛ 1:21

Ka nyɔngɔ á Kiísito unge ɓomɓeeki Mokonga, mmbé ɗánjujúkisi ka kukuwa sɔsɔɓɛ á ɓasí na áomopha ɓoombia. Ka nyɔngɔ índɔ unge mɓeekeani Mokonga na bisa á nseɓeɔ nɛnu ka yɛ.

1 Pɛ́tɛɛ 3:18

Cɔ, Kiísito yɛ sasakɛ, ɗátambigi phɔtɔ mɔngɔ ímoci tɔ ka nyɔngɔ á ɓojeɗe nɛsu. Yɛ, nto á koɗoni, ɗáku ka nyɔngɔ á ɓunde ɓáná ɓato á koɗoni ka gea, ánophangiɛ aphe á gǎ mɔtɛ á Mokonga. Ɗáku kukuwa á ka nyama, Měma á kanga ɓojeɗe â gǎkɛ onjujukisa ka kukuwa.

Mphaniɔ 1:18

Nende nkpa nde neoenda. Ɗéku, cɔ, kɛ̌kɛnde ne gǎkɛ oenda ka saga na saga. Nɛbɛɗi phembekete á kukuwa na nnde á nji á ɓasí.

Mphaniɔ 11:11

Mbusa á esa isaɔ na gbútuka ndɔ, mpophɛ áotóka mɔtɛ á Mokonga, áongia suɓi á mǒnda á ɓaɔtu-nyɔngɔ nɛkɛ ndɔɔ, ɓâ goto omama. Ɓakpa ɓɔbu ɓunde ɗáɓɛ̌ɓɔni, ɓáoɓá na kɔɓɔɓɔkɔ phɛɛ.