Ɓalɔ́ma 12:12 - Ɔngana á Kɛ̌kɛ

¹² Ɓáni na maseye ka nyɔngɔ nde ɓoseɓei, ɓáni na měma áɗokǒ suɓi á tambaga. Mɛmani na moíngi ka koɗoni.

Ɓalɔ́ma 12:12 Iomraidhean Croise

Matáyɔ 5:12

Gúani jaí na maseye, ka nyɔngɔ nde ɛkɔmi nɛnu ángbó ana koba. Nga, ɓondɔ unge ɗáɓáetambisigi ɓaɔtu-nyɔngɔ ndea Mokonga á mosá anu.

Lóka 10:20

Ɓî aɓó, ɓókóɓɛmbɛ na maseye ka nyɔngɔ á ɓeaga á ɓansombo. Ɓáni ndiu na maseye ka nyɔngɔ nde ɓáɗundu ina anu na koba.»

Lóka 21:19

Cɔ, bisani měma anu, nga ka gea anu ɓó aunge ɓoamisande měma anu.»

Lóka 8:15

Nndɔ agu gǎkɛ ka oɗo ánjá, a ɓea mbenɔ nde ɓakpa ɓáɔɔ́ka Nyɔngɔ á Mokonga, ɓáoamba nyɔngɔ kau ka měma ánjá na měma á ɗoni. Ɓɔ gǎkɛ, ɓáoamba Nyɔngɔ ndɔ k'ésa ásii na gɔmbisa á mbuka.

Ekuma á ɓateki 1:14

Ɓɔbu, na měma moci, ɗáɓá na moíngi á dondanaga k'ɛ́mɛmi. Ɗáɓáɔmɛma kimoci na Malía amakɛ na Yéso, ɓana-amakɛ na Yéso, na ɓake ɓuangbo.

Ekuma á ɓateki 12:5

Kaɓondɔ, ɓáonamba Pɛ́tɛɛ ka mekakɔ. Ɓato á ka kanisa ɗáɓá gǎkɛ ɔmɛma Mokonga ka nyɔngɔ akɛ phɛɛ.

Ekuma á ɓateki 2:42

Ɓaɓêki ndɔ ɗáɓátú na moíngi ka ɔ́ka ɓɔphɛi ndea ɓateki, ɓáoika ka komunamema, ɓáoeaga kimoci, na mɛma á Mokonga phɔtɔ kimoci.

Ekuma á ɓateki 6:4

Ɓesu gǎkɛ, ɓeikande nɛsu k'ékuma á ɛmɛmi na phɛá á ɓakpa nyɔngɔ á Mokonga.»

Ɓalɔ́ma 15:13

Ambe Mokonga mɛna-nseɓeɔ ánotúmisɛ na maseye na ɓujɛjɛ phɛɛ suɓi á ɓeekea ka gea ɓótúmɛ na nseɓeɔ ka ɓukpɛkpɛ ndea Měma á kanga ɓojeɗe.

Ɓalɔ́ma 15:4

Nyɔngɔ bui nde ɗáɓáɗundu kala suɓi á ɓuku ndea Mokonga, ɗáɓáɗundu ú ka phɛá asu ně, ka opha asu nténdé na měma á phiphia ka gea, ɓéɓɛ na nseɓeɔ ɓíndɔ ɓáosogoisaga suɓi á Ɓuku á Mokonga.

Ɓalɔ́ma 2:7

Mokonga aeɓophande enda á mɛyɔ, ɓakpa nde ɓásui bɛɗaneaga akɛ na kaɓa obebɔ, ɓokutú na kema nde nna na sungiaga.

Ɓalɔ́ma 8:25

Cɔ, kaɓɛ na ɓeseɓei kema nde ɓékékɔɔna, ɓe gǎkɛ oɓondea ú na měma á phiphia.

1 Ɓakɔlítɔ 13:13

Kɛ̌kɛnde, kema isaɔ nde aunge aikande: ɓeekea, nseɓeɔ na ekondi. Nnde anyɛ́nyi gǎkɛ bui ande ekondi.

2 Ɓakɔlítɔ 12:8

Ɗɛ́mɛmi Mɔkɔta mɔngɔ isaɔ gea, ámoamisɛ ka kenkumbɔ ndɔɔ.

Ɓaphilípi 3:1

Cɔ, ɓaya, ɓáni na maseye ka nyɔngɔ á ɔngana anu na Mɔkɔta. Nna kema k'éme aoɓá na nesikíígi kema nde ɗéneɗundu mosá nga, nndɔ akeni ka ɓenu.

Ɓaphilípi 4:4

Cɔ, ɓáni na maseye mbenɔ bui, ka nyɔngɔ á ɔngana anu na Mɔkɔta. Nesikíí goto: Ɓáni na maseye.

Ɓakɔlɔsái 1:11

Ambe Mokonga ánóphɛ ɓukpɛkpɛ bui, měma á kinia á kema na měma á phiphia.

Ɓakɔlɔsái 1:27

Ka nyɔngɔ nde Mokonga ɗákondi phangia á ɓakpa ndɔ base, moangɔ nɛkɛ á ɓɔsɔmɛa nde ana ɛtɔi ásii á ɓoombia, nnde ɗági ka phɔa ɓato á ekuna bui. Ketangaɔ ndɔ ande gea, Kiísito aiki ka měma anu, mpɔ ɓóoɓá na nseɓeɔ á ika kimoci na yɛ k'ɔ́ma á ɓoombia ndea Mokonga.

Ɓakɔlɔsái 4:12

Epáphaa mmbé a phɔtɔ ɓ'anu, anósesi. Ande mbɛɗanigi nde ɓa Kiísito Yéso. Yɛ, aopúa na mɛma á Mokonga na moíngí ka nyɔngɔ anu gea te, ɓókakamanɛ na mɔtaga ka měma, ɓósuiɛ gea kema bubui ka mɔphɛ ndea Mokonga.

Ɓakɔlɔsái 4:2

Suiani ɛmɛmi, ɛ́ngɛphani k'ɛ́mɛmi kau, ɓáni phɔtɔ na měma á ɓosegi ka Mokonga.

1 Ɓatɛsalɔníka 1:3

K'ɛ́mɛmi kau, ɓeonókanisia mosá á Abasu Mokonga. Nga, ɓeoúba ɓî ɓɔtɔtɔkisi ekuma ásii ka nyɔngɔ nde, ɓomɓeeki, ɓóonkonda. Ɓo phɔtɔ na ɓukpɛkpɛ phɛɛ ɓî ɓonseɓei Mɔkɔta nɛsu Yéso Kiísito.

1 Ɓatɛsalɔníka 5:8

Ɓesu gǎkɛ, ɓende ɓato á sɔmani. Kaɓondɔ, ɓékéyengiɛmbɛ. Ande gea te, ɓeekea n'ekondani nɛsu ákengeanɛ na ngɔ́mbɛ á k'égogo ndea nto-émani, nnde ɓáɓɔngisigi na ngɔa. Nseɓeɔ nɛsu á ɓoamia á ka měma, áɓɛ phɔtɔ ɓea kúku á ngɔa nɛkɛ.

2 Ɓatɛsalɔníka 1:4

Kaɓondɔ unge, ɓeǒbeba ka phɔanu mosá á ɓato á kanisa ndea Mokonga ka nyɔngɔ á moíngí nɛnu na ɓeekea nɛnu suɓi á tambaga bui na kema ájeɗe phɛɛ nde ɓosuɓi í.

2 Ɓatɛsalɔníka 3:5

Ambe Mɔkɔta ánɔsɔndɔɛ ka měma k'ékondi nde ɓoně ka Mokonga na ka phiphia nde Kiísito aosópha.

1 Timɔtɛ́ɔ 6:11

Oɓɛ gǎkɛ, nkpa ndea Mokonga, ɓánga kema ndɔ bui. Káɓa ndiu koɗoni, tambea ánjá mosá á Mokonga, ɓeekea á Mokonga, ekondi, phiphia na ɓɔphɔngɔ.

2 Timɔtɛ́ɔ 3:10

Oɓɛ gǎkɛ, ɗómoɓi bîbíbí ka ɓɔphɛi nɛmɔ, tambea ani, mɔphɛ nɛmɔ, ɓeekea nɛmɔ, phiphia nɛmɔ, ekondi nɛmɔ, phiphia á tambaga nɛmɔ.

Títɔ 2:13

Ɓeogea ɓó, ka ɓondea á maseye nde ɓeseɓei, na ɔna á ɓoombia ndea Mokonga nɛsu angbóngbó na Namisi nɛsu Yéso Kiísito mbenɔ nde asɛnɛkande.

Títɔ 3:7

Mokonga agi ɓó ka ɓonjánja-ékondi nɛkɛ, ka gea, ɓéɓɛ ɓato á koɗoni mosá akɛ, ka tɔá enda á mɛyɔ nde ɓeseɓei.

Ɓaɛbulanía 10:32

Kanisiani phɔ́ kema nde ɗátɔtɔkɛani ka ɓenu mbenɔ nde ɗóɓotɔi owanga ndea Mokonga. Mbusa índɔ ábɔa ɓôtambaga akpɛ phɛɛ, ɓô gǎkɛ ophiphia ú.

Ɓaɛbulanía 10:36

Cɔ, akeni ɓóɓɛ na moíngí mpɔ ɓɔ́tɔtɔkisɛ kema nde Mokonga akondi ka ɓondɔ unge ɓɔtɔande kema nde ɗánɔɔku.

Ɓaɛbulanía 12:1

Cɔ, ɓesu phɔtɔ, usɛsɛ á ɓaɗigimisi ndɔ asotimbi ka ɛnjia asu ka njoko á mbangɔ. Kaɓondɔ ɓémakɛni ɗanga nnde aosóɗokomisa na ɓojeɗe nde ɓékéoiphia na tá kau. Ɓéɓɛni na moíngí ka mbagɔ kau.

Ɓaɛbulanía 3:6

Kiísito aámbé a ndiu nto á ɗoni ɓea ánge k'éndu ndea Abakɛ. Ande gea te, endu ndɔ ande ɓesu, kaɓɛ na ɓena inyamɛ na ɓeoamba nseɓeɔ nde ɓeǒbeba ně.

Ɓaɛbulanía 5:7

Mbenɔ nde Yéso ɗátú ka mokonda, ɗáonɗengemisaga Mokonga k'ɛ́mɛmi n'ɛsɔ akpɛ n'aogáma nga, Mokonga aámbé ɗáɔtɔka amisa akɛ ka kukuwa. Ka nyɔngɔ á édidisa akɛ unge Mokonga ɗáɔ́ki ɛmɛmi ndɔɔ.

Ɓaɛbulanía 6:12

Ɓî a ɓó, ɓókoɓɛmbɛ ɓakusi. Ɓeani ndiu nyɔngɔ á ɓakpa nde ɓátétemisi ɓeekea nga, ɓundɔ ɓáunge ɓátɔande ɓotukɔ á mɔkɔ nde Mokonga ɗáɔku.

Ɓaɛbulanía 6:15

Ɓî Abalaámu ɗábisi měma akɛ ka mɔkɔ ndɔ kángá ɛla, mɔkɔ nde Mokonga ɗáɔku ka phɔakɛ áɔtɔtɔkɛana ka yɛ.

Yakɔ́ɓɔ 5:7

Cɔ, ɓaya, phiphiani na ka ɓî Mɔkɔta abikande. Bisani kanisia anu ka ngubi ɓî aɔɔ́kanɛaga ɗúngú á mbó á ka ciko nɛkɛ. Yɛ aɔɔ́kanea ɔká á mbua á k'ama mosá-mosá na nnde á ka sungiaga.

1 Pɛ́tɛɛ 4:13

Cɔ, ɓáni ndiu na maseye ka ɓá anu na ka gbútuka á tambaga ndea Kiísito, ka gea, ɓenu phɔtɔ ɓótúmɛ na maseye phɛɛ mbenɔ nde aphangiande ɓoombia nɛkɛ base ka nkpa buakɛ.

1 Pɛ́tɛɛ 4:7

Cɔ, sungiaga á kema bui a ye tɔ bíbí. Kaɓondɔ, koɗani iso na ɓáni na kɔɓɔɔngɛ ka gea, ɓóɓɛ na ɓukpɛkpɛ á mɛma á Mokonga.

2 Pɛ́tɛɛ 1:6

na gǔ á úba á Mokonga, ɓóyameɛ ɛngɛpha na gǔ á ɛngɛpha, ɓóyameɛ moíngí na gǔ á moíngí, ɓóyameɛ tambea ánjá mosá á Mokonga,

Mphaniɔ 13:10

Kaɓɛ nkpa n'akeni ngia ka mekakɔ, angiande ka mekakɔ. Kaɓɛ nkpa n'akeni kuwa na mɓɛngɛ, akuwande na mɓɛngɛ. Ɓɔndɔ unge akeni ɓato á Mokonga ɓáɓɛ na měma á phiphia á tambaga na ɓeekea.