Matáyɔ 22:16 - Ɔngana á Kɛ̌kɛ

¹⁶ Ɓáǒteka ka ɓagoigi nɛɓɔ kimoci na ɓakpa ndea moamɛ Ɛlɔ́dɛ. Ɓáongoɗea Yéso te: «Ngoisigi, ɓeoúba gea onde nto á ɗoni na ǒphangiaga ɓakpa nyɔngɔ á ɗoni ka ɓeá á Mokonga. Kóna kɔɓɔɓɔkɔ á mɔphɛ á ɓakpa na kóoɓongeaga kɔkɔta á ɓakpa.

Matáyɔ 22:16 Iomraidhean Croise

Matáyɔ 22:24

«Ngoisigi, ɛɔphi ndea Mósa agi te: ‹Aoɓá mǒko n'aku kángá á ɓɔkɔta, muna-amakɛ angííande nke á kekusa ndɔ ka gea, ámɓɔkɔteɛ nkú ɓaniki.

Matáyɔ 22:26

Ɗátú tɔ ɓó ka mmbé ɓa ko baɓɛ, ɓa ko ɓasaɔ, na gǎ jua ka mmbé á ko ngianjaga iɓɛ (7), ɓɔbu ɓáokuwa kángá ɓɔkɔta.

Matáyɔ 26:18

Yéso áǒngoɗea te: «Gǎni ka ntanga-nji, nkpa moci anódondande kó, ɓóngoɗeɛ gea, Mɔkɔta agi te: ‹Mbenɔ nɛmɔ akpeengeani ye tɔ. Mɔtɛ-akɔ unge ɓeguande jaí á Pasáka kimoci na ɓagoigi nɛmɔ.›»

Matáyɔ 26:49

Cɔ, mɔngɔ moci, Yúda áombîmisia Yéso, áongea te: «Ngoisigi samba!» Mpɔ, áomumbia.

Málikɔ 10:17

Mbenɔ nde Yéso ɗámɛi tamba nɛkɛ, nkpa moci áombikia mbangɔ, áongbukia muanku, áomúsia: «Ngoisigi anjánjá, négeɛ ɓo, néɓɛ na enda á mɛyɔ?»

Málikɔ 12:13

Ɓáǒteka ka Ɓaphaisáyɔ na ka ɓakpa ndea Moamɛ Ɛlɔ́dɛ kuɓî Yéso aɔ, ka gea ɓánkongoɛ ka ɓoabi nɛkɛ.

Málikɔ 12:14

Ɓondɔ unge ɓáombikia, ɓáomúsia: «Ngoisigi, ɓeoúba gea, onde nto á ɗoni, kóomɓánga nkpa. Kó phɔtɔ oenga keongi á ɓakpa. O ndiu ǒphangiaga ɓakpa, nyɔngɔ á ɗoni ndea Mokonga. Cɔ, ósongoɗea: Aánjá ka ɓesu phenda á manjanja ka Moamɛ Kaisáa? Ɓéphendɛ? Ɓékephendɛmbɛ?»

Málikɔ 3:6

Kɛ̌kɛndɔ, Ɓaphaisáyɔ ɓáojuana, ɓáoga odondana na ɓakpa ndea Moamɛ Ɛlɔ́dɛ ka maca. Ɓáokaɓa moangɔ á kusisa á Yéso.

Málikɔ 8:15

Yéso â gǎkɛ ɔ̌phɛá te: «Ɛ́ngɛphani! Óɓangisani na cacu ndea Ɓaphaisáyɔ n'índe á Ɛlɔ́dɛ.»

Lóka 20:21

Ɓato á ɓɔgɔmɛaga ɓáomúsia Yéso: «Ngoisigi, ɓeoúba nyɔngɔ nde ɔɔyɔnga n'índe oogoisaga ande ɗoni. Kóotena nyɔngɔ ndea nkpa ka ɓeá keongi akɛ. O ndiu ogoisaga aphe á Mokonga ka koɗoni.

Lóka 7:40

Yéso â gǎkɛ ongoɗea: «Simɔ́ni, neogea néongoɗeɛ mɛní moci.» Simɔ́ni áogea: «Ngoisigi, yɔnga pɛ!»

Yoáni 14:6

Yéso áonsikisia gea: «Nende aphe, ɗoni, na enda. Nkpa nnaobika mɔtɛ á Abɛ, na kányɛ́nyi k'eme.

Yoáni 18:37

Mpɔ, Pilátɔ áomúsia: «Ande gea te, opɛ moamɛ?» Yéso áonsikisia: «A ɓíndɔ otóki ka yɔnga í gea, nende moamɛ. Ɗébiki ka mokonda, nɛ́ɔɓɔkɔtɛana ka gea, nɛ́tɔ̌miɛ nyɔngɔ ɗoni. Nto á ɗoni buakɛ áɔ́kɛ ɛsɔ ani.»

Yoáni 7:18

Mmbé aɔyɔnga nyɔngɔ nɛkɛ sasakɛ, a tɔ okaɓa ɓoombia nɛkɛ sasakɛ. Mmbé a ndiu okaɓa ɓoombia á mmbé anteki, ande nto á ɗoni. Nna na ɓojeɗe suɓi akɛ.

2 Ɓakɔlítɔ 2:17

Nga, ɓéké ɓea ɓakpa ɓásii ɓunde ɓáɔtɔmiaga nyɔngɔ á Mokonga na phendisa í. Ka nyɔngɔ nde Mokonga ɗásóteki, ɓesu ɓe ndiu ɔyɔnga ɗoni mosá á Mokonga ka ɔngana na Kiísito.

2 Ɓakɔlítɔ 4:2

Ɓeyé ɓɔphɛi ódemayɔ na nnde á soni. Ɓékéɔsɔmɛa nyɔngɔ moci. Ɓékéokaɓa dema á ɓakpa. Ɓékéodaɗoa nyɔngɔ á Mokonga na mbɛa. Ɓe ndiu ɔyɔnga ɗoni na base, k'ína á Mokonga. Eya, ɓekondi úbisa á ɓakpa suɓi aɓɔ gea, ɓende ɓato á ɗoni.

2 Ɓakɔlítɔ 5:16

Kaɓondɔ unge ɓéké ye ɔmbɛɗa nkpa n'etéte á kokpa akɛ. Nanga ɓî ɗéɓɛmbɛɗi Kiísito kala n'etéte á kokpa, kɛ̌kɛnde ɓéké ye ɔmbɛɗa n'etéte ɓíndɔ.

Ɓagalatía 1:10

Cɔ, ka yɔnga ani kɛ̌kɛnde ɓó, ande gea te neokáɓa gea, ɓakpa ɓámoɓeekeɛ? Ɓɛɛndɔ! Ne ndiu okáɓa gea Mokonga ámbé ámoɓeekeɛ. Ande gea te, neokáɓa ékondisaga na ɓakpa? Atú oɓá na neokáɓa ékondisaga na ɓakpa, ámbé kétóɓɛku mbɛɗanigi ndea Kiísito.

Ɓagalatía 2:6

Ɓakɔta á kanisa ɗáɓákáyamei gǎkɛ ka kema ka ɓɔphɛi nɛmɔ. Nanga ɓáɓá ɓakɔta, nndɔ nna kema k'éme nga, Mokonga nna n'oɓayɔ. Ɓakɔta ndɔ, ɗáɓákámososi gǎkɛ moangɔ á kɛ̌kɛ.

1 Ɓatɛsalɔníka 2:4

Ɓe ndiu ɔphɛa ɓíndɔ Mokonga akondi. Nga, ɗásɔɔphani, áosópha Mbino-Ánjá nɛkɛ. Ɓéké phɔtɔ okáɓa ékondisaga na ɓakpa, ɓe ndiu ǒkondisaga na Mokonga, mmbé aoengekisa měma asu.

Yakɔ́ɓɔ 3:17

Kɔɓɔɔngɛ nde atóki gǎkɛ na koba, ande phɔ́ á ɗoni, a phɔtɔ na ɓujɛjɛ, ɓɔphɔngɔ, á ɔ́ka mɔphɛ á ɓakpa, atúmi na ngomi, aɔtɔtɔkisa ɓonjánja, nna n'oɓayɔ na maibe.

1 Yoáni 5:20

Ɓeoúba gea, Miki-mǒko ndea Mokonga ɗábiki, áosópha úbapha nde aosóúbisa Mokonga á ɗoni. Ɓɛɔngani na Mokonga á ɗoni ka nyɔngɔ á Miki-mǒko nɛkɛ Yéso Kiísito mmbé ɓa Mokonga á ɗoni, mmbé ande enda á mɛyɔ.