Ɓakɔlɔsái 3:24 - Ɔngana á Kɛ̌kɛ

²⁴ Úbáni gea, Mɔkɔta anɔkɔmande na ɓotukɔ nde aebisíí ɓakpa nɛkɛ. Kiísito aámbé ande Mɔkɔta á ɗoni mmbé ɓɔɔmbɛɗaneaga.

Ɓakɔlɔsái 3:24 Iomraidhean Croise

Matáyɔ 10:41

Nkpa nde ansesi mɔtu-nyɔngɔ ndea Mokonga ka nyɔngɔ nde ande mɔtu-nyɔngɔ ndea Mokonga, atɔande ophendɔ nde akenani ka mɔtu-nyɔngɔ ndea Mokonga. Nkpa nde ansesi nto á koɗoni ka nyɔngɔ nde ande nto á koɗoni, atɔande ophendɔ nnde akenani ka nto á koɗoni.

Matáyɔ 5:12

Gúani jaí na maseye, ka nyɔngɔ nde ɛkɔmi nɛnu ángbó ana koba. Nga, ɓondɔ unge ɗáɓáetambisigi ɓaɔtu-nyɔngɔ ndea Mokonga á mosá anu.

Matáyɔ 5:46

Aoɓá na ɓǒkondi tɔ ɓundɔ ɓáonókonda, ɓooɓondea ophendɔ ka Mokonga ka ɓo? Ɓaphendisigi-manjanja ɓá phɔtɔ ogea ɓó.

Matáyɔ 6:16

Aoɓá na ɓoiki kángá á eaga ka nyɔngɔ á mɛma á Mokonga, ɓókóphindɛgɛmbɛ mɔnɔ kiki anu ɓea ɓato á maibe. Nga, ɓɔ, ɓáophindaga kiki aɓɔ ka ubisa ɓakpa gea ɓáiki kángá á eaga ka nyɔngɔ á mɛma á Mokonga. Nenóngoɗi ɗoni gea, ɓá ye tɔi ophendɔ nɛɓɔ.

Matáyɔ 6:5

Mbenɔ nde ɓɔɔmɛma, ɓókoɓɛmbɛ mɔnɔ ɓea ɓato á maibe ɓunde ɓámɔnɔ okonda mɛma na ɓámamege k'éndu á madondanɔ ndea Ɓayúda ka nyɔngɔ á Mokonga na k'aphe ka gea ɓakpa ɓɛ́ɓɔnɛ. Nenóngoɗi ɗoni gea, ɓá ye tɔi ophendɔ nɛɓɔ.

Lóka 14:14

Kaɓondɔ, oɓande na maseye nga, ɓakpa ndɔ ɓáká na kema á sikisia akɔ. Mokonga akosikisiande mbenɔ nde ɓato á koɗoni ɓájujukande ka kukuwa.»

Lóka 6:35

Nna ɓó. Ókondani ndiu ɓaɓíɓia anu. Ógeeani ánjá. Ɔɛkisani kángá á seɓea á jisia anu. Mpɔ, ophendɔ nɛnu áoɓá ángbó. Ɓóoɓá ɓana-Mokonga Mmbé ana kɔkɔta bui. Nga yɛ, aanjánjá ka ɓundɔ ɓáná n'obebɔ na ɓunde ɓá ájeɗe.

Yoáni 12:26

Kaɓɛ nkpa n'akondi bɛɗaneagani ambe ámoɓeɛ. Ɔma nde ne ɓei, aunge mbɛɗanigi nɛmɔ aɓande phɔtɔ. Abɛ anɗokomisande mmbé aɔmɔbɛɗaneaga.

Ekuma á ɓateki 20:32

Kɛ̌kɛnde, nenóbisi ka njaga á Mokonga na mbino á ɓonjánja-ékondi nɛkɛ. Mokonga aámbé ana ɓukpɛkpɛ á gbagisaga anu ka měma na opha ɓotukɔ nde abisi ka ɓakpa nɛkɛ.

Ɓalɔ́ma 1:1

Ka ɓaɓêki ndea ka Lɔ́ma, sambani. Cɔ, eme Pɔ́lɔ mbɛɗanigi ndea Kiísito Yéso aámbé neɗundu ɓaoɓa ndee. Mokonga ɗámɔɔphani ka gea néɓɛ nteki, ɗámɔsɔmbu ka tɔ̌miaga Mbino-Ánjá nɛkɛ.

Ɓalɔ́ma 14:18

Mmbé aɔmbɛɗaneaga Kiísito ɓó, amɓɔngɛi Mokonga na ɓakpa ɓáomɓeekea.

1 Ɓakɔlítɔ 11:23

Cɔ, nnde ande ɓɔphɛi nde ɗɛ́tɔi ka Mɔkɔta, na a tɔ unge ɗɛ́nɔtɔ̌mi. Kǐpha ndɔ, ɗáɓántɔgi Mɔkɔta Yéso, ɗábɛɗi mokati,

1 Ɓakɔlítɔ 3:8

Nkonanigi na nɗuki-iɓo, ɓá tɔ kímoci. Mokonga amphendande nkpa na nkpa ɓíndɔ abɛɗanigi ekuma nɛkɛ.

1 Ɓakɔlítɔ 7:22

Nga, nkpa nde Mɔkɔta ɗámɔphani n'ande nkɔɓɛ, atóki ye tɔ ka kɔkɔɓɛ ɓî a ye nkpa ndea Mɔkɔta. Nkpa nde Mɔkɔta ɗámɔphani na nna nkɔɓɛ, a ye gǎkɛ nkɔɓɛ ndea Kiísito.

Ɓagalatía 1:10

Cɔ, ka yɔnga ani kɛ̌kɛnde ɓó, ande gea te neokáɓa gea, ɓakpa ɓámoɓeekeɛ? Ɓɛɛndɔ! Ne ndiu okáɓa gea Mokonga ámbé ámoɓeekeɛ. Ande gea te, neokáɓa ékondisaga na ɓakpa? Atú oɓá na neokáɓa ékondisaga na ɓakpa, ámbé kétóɓɛku mbɛɗanigi ndea Kiísito.

Ɓaɛphɛ́sɔ 6:6

Ɓókóɓɛmbɛ tɔ ɔbɛɗanaga ámbé ɓánómamei ka ékondisaga na ɓɔ. Tɔtɔkisani ndiu mɔphɛ á Mokonga na měma mo, ɓea ɓakɔɓɛ á Kiísito.

Ɓaɛphɛ́sɔ 6:8

Kanisiani gea, nkpa na nkpa mmbé aogea ɓonjánja, nanga áɓá nkɔɓɛ, káɓi nkɔɓɛ, Mɔkɔta amphendande ka ɓeana na ɓonjánja nde ɗági.

Ɓakɔlɔsái 2:18

Ɓókǒɗeketeɛmbɛ ka gea, nkpa buakɛ átenɛ nyɔngɔ nɛnu akpɛ, mmbé aǒdemisaga gea ana měma édidisa na beba á ɓamalaéka. Ɓábisi phɔtɔ měma aɓɔ ka kema nde ɓáɔɔna ka mphaniɔ. Kanisia aɓɔ a tɔ á kokpa, nndɔ aǒɓopha ɓemboko.

Ɓaɛbulanía 10:35

Ɓókoɗeketɛmbɛ nseɓeɔ nɛnu nga, ka nyɔngɔ índɔ unge ɓɔtɔande ophendɔ ángbó.

Ɓaɛbulanía 11:6

Cɔ, kángá á ɓeekea nna na nkpa nde aɔtɔka n'ěkondisigi na Mokonga. Nkpa nde áombîmisia akeni áɓeekeɛ gea te, Mokonga a ɓei. A phɔtɔ ǒphenda ɓundɔ ɓáonkáɓa.

Ɓaɛbulanía 9:15

Ka nyɔngɔ índɔ unge Kiísito ande mɔɔnganisi á ɔngana á kɛ̌kɛ. Ɗákú ka tokisa á ɓakpa ka ɓojeɗe nde ɗáɓáogea ú ka mbenɔ á ɔngana á kala. Kaɓondɔ, ɓunde Mokonga ɛ̌ɓɔphani ɓáɔtɔka na ɓatɔi nkumba nde ɗɛ́ɔku nnde káujukanɛeka.

1 Pɛ́tɛɛ 1:4

na ɓondea á ɓotukɔ nde Mokonga anóbisíí na koba nnde nnaoújukana, nnaɔjɔɔkana, nnaoɓuɓia.

2 Pɛ́tɛɛ 1:1

Eme Simɔ́ni Pɛ́tɛɛ, mbɛɗanigi na nteki nde ɓa Yéso Kiísito, aámbé neɗundu ɓaoɓa ndee. Nenóɗundui ɓenu íɓunde ɓona ɓeekea ángbó ɓea ɓesu, ka nyɔngɔ á koɗoni ndea Mokonga na Namisi nɛsu Yéso Kiísito.

Yúda 1:1

Eme Yúda nende muna-amakɛ na Yakɔ́ɓɔ, nende mbɛɗanigi nde ɓa Yéso Kiísito. Nenóɗundui ɓenu íɓunde Abɛ Mokonga anɔɔphani, áonókonda na amba anu ka phɔa Yéso Kíisito.