Ɓaphilípi 3:14 - Ɔngana á Kɛ̌kɛ

¹⁴ Cɔ, neoga mbangɔ na ka ɓî nejúande na nsungɔ ka gea, nɛ́tɔɛ ɛkɔmi nde Mokonga asɔɔphanei na koba k'aphe ndea Kiísito Yéso.

Ɓaphilípi 3:14 Iomraidhean Croise

Lóka 16:16

Matú ɛ́ɔphi ndea Mósa na ɓuku á ɓaɔtu-nyɔngɔ ndea Mokonga ɗáge osungiaga ka saga ndea Yoáni-Mɓatisi. Kpangea esa ndɔ unge Mbino-Ánjá á koɓoamɛ ndea Mokonga aúbikani, mpɔ nkpa buakɛ a tɔ ǒkukumisa ka gea ángiɛ kau.

Ɓalɔ́ma 11:29

Nga, Mokonga nna tanda ɔtɔka na anganisi mɔphɛ akɛ k'égabɔ na ka mɔphani nɛkɛ ka ɓakpa.

1 Ɓakɔlítɔ 9:24

Ɓókóoúba gea te, ɓo ɓea ɓato á njoko á gǎ á mbangɔ ɓásii? Nkpa moci tɔ ámbé ɓáɔnkɔma. Cɔ, ɓáni ɓea nkpa ndɔɔ.

2 Ɓakɔlítɔ 4:17

Tambaga nesu á kɛ̌kɛnde nna akpɛ na káiphiɛku. A ndiu osóɓɔngisia ɓophómbia ángbó phɛɛ. Ɓophómbia kau aɓande mɔɛnda na aángbó phɛɛ, kɔnyɛ́nya tambaga nde ɓe kau.

Ɓaphilípi 3:3

Ɓesu ndiu ɓáunge ɓende ɓagu-ganja á ɗoni nga, ɓeonɗokomisa Mokonga ka Měma akɛ. Ɓeǒbeɓa ka nyɔngɔ á Kiísito Yéso. Nseɓeɔ nɛsu nna ka ɓesu sisasu.

Ɓakɔlɔsái 2:18

Ɓókǒɗeketeɛmbɛ ka gea, nkpa buakɛ átenɛ nyɔngɔ nɛnu akpɛ, mmbé aǒdemisaga gea ana měma édidisa na beba á ɓamalaéka. Ɓábisi phɔtɔ měma aɓɔ ka kema nde ɓáɔɔna ka mphaniɔ. Kanisia aɓɔ a tɔ á kokpa, nndɔ aǒɓopha ɓemboko.

1 Ɓatɛsalɔníka 2:12

Nga ɗéɓenógbagisigi ka měma, na phɔngisa anu, na phɛá anu gea, ɓótambeɛ ɓíndɔ amɓɔngɛi Mokonga. Yɛ aámbé anɔɔphani gea, ɓóɓɛ ɓato á ka koɓoamɛ á ɓoombia nɛkɛ.

2 Timɔtɛ́ɔ 1:9

Yɛ aámbé, ɗásóamisi ka měma, áɔsɔ́ɔphana gea, ɓéɓɛ ɓakpa nɛkɛ, nna ka nyɔngɔ á ekuma nɛsu, a ndiu tɔ ka nyɔngɔ á moangɔ nɛkɛ sasakɛ na ɓonjánjá-ékondi nɛkɛ. Nndɔ bui, ɗásóphi kimoci na Kiísito Yéso, mosá á conjá á mokonda.

Ɓaɛbulanía 3:1

Ɓadasu ɓato á Mokonga, ɓî a ɓó, ɓe tɔ na ɓenu ka mɔphani nde Mokonga asɔɔphani. Cɔ, ntúmiani Yéso n'íso nga, yɛ aámbé Mokonga anteki, a phɔtɔ ngbɛga á ɓatoɓeigi-phɛ́a mosá á Mokonga ka ɓeekea nɛsu nde ɓɛɔtɔmiaga ú.

Ɓaɛbulanía 6:1

Cɔ, ɓî a ɓó, ɓéɗeketɛni goisaga mɔ̌ á nyɔngɔ nde ɗáɓekpangi goisaga í ka nyɔngɔ á Kiísito. Ɓétútuisɛni ye tɔ goisaga k'ététe á ɓakpa nde ɓámɔti. Ɓékécumɛku ye goto goisaga á mɔ̌ á nyɔngɔ ndee: Á kětia tambea ájeɗe na ɓeekea á Mokonga,

1 Pɛ́tɛɛ 1:13

Kaɓondɔ, ɓɔngisiagani měma anu k'ékuma. Ɛ́ngɛphani, seɓeani ɓonjánja-ékondi nde ɓánophande k'ésa á sɛnɛka á Yéso.

1 Pɛ́tɛɛ 5:10

Mokonga mɛna-ɓonjánja-ékondi bui, ɗánɔɔphani ka gea te ɓóɓɛ kimoci na yɛ ka ɓoombia mɛyɔ ka jukana anu na Kiísito. Cɔ, mbusa á tambaga anu ka mbenɔ ábɔa, anóconjande goto, anóphande ɓukpɛkpɛ, anógbagisagande ka měma, áonópha ésimbia.

2 Pɛ́tɛɛ 1:3

Ka ɓukpɛkpɛ nɛkɛ, Mokonga asophi kema bui nde akeni ka enda asu. Ɗágeani ɓó ka gea, ɓéjukanɛ ka beba akɛ, na ka úbisa asu mmbé ɗásɔɔphani ka ɓá na ɓoombia na ɓonjánja nɛkɛ sasakɛ.

Mphaniɔ 3:21

Mmbé akíndande, neɓeekeande áikɛ kimoci n'eme ka kankaanga á koɓoamɛ nɛmɔ, ɓíndɔ eme ɗékíndi, néoika kimoci n'Abɛ ka kankaanga á koɓoamɛ nɛkɛ.