2 Timɔtɛ́ɔ 4:1 - Ɔngana á Kɛ̌kɛ

¹ Cɔ, Timɔtɛ́ɔ, nekososi base mosá á Mokonga na Kiísito Yéso, mmbé atenaeka nyɔngɔ ndea ɓakpa nde ɓáku na ɓunde ɓáoenda, ka sɛnɛka akɛ ka koɓoamɛ nɛkɛ:

2 Timɔtɛ́ɔ 4:1 Iomraidhean Croise

Matáyɔ 16:27

Cɔ, Muna-Nkpa, abikande ka ɓophombia ndea Abɛ, kimoci na ɓamalaéka nɛkɛ. Mpɔ, amphendande nkpa na nkpa ka ɓeana na tambea akɛ.

Lóka 19:12

Cɔ, mɛní kau ungee: «Nkpa moci, k'ékombo á ɓakɔta, ɗáge ka nji á ɗanga. Áogea, ɓámophɛ motumbɔ á koɓoamɛ mpɔ ájɛ.

Lóka 19:15

Nanga ɓó, ɗáɓámophi motumbɔ a koɓoamɛ, áoja. Ajú ye, áɔ̌ɓɔphana ɓabɛɗanigi ndɔ mɔci-mɔci, ɓundɔ ɗéɓophi imɔna, áúbɛ ɛtɔi ángaáni nde ɗáɓátɔi.

Lóka 23:42

Mpɔ áongoɗea Yéso te: «Ómokanisiambɛ ka koɓoamɛ nɛkɔ mbenɔ nde obikaeka.»

Ekuma á ɓateki 10:42

Ɗásososi tɔ̌mia á Mbino-Ánjá ka ɓakpa na engekisa gea, ande mmbɔ aámbé Mokonga amamisi ka tena á nyɔngɔ ndea ɓakpa nde ɓaoenda na ɓunde ɓasí.

Ekuma á ɓateki 17:31

Mokonga a ye bisi esa nde atenaeka nyɔngɔ á ɓato á ka mokonda bui ka koɗoni, na ka njaga á nkpa nde ansɔmbu. Ɗánengekisi nkpa kayɛ mosá á ɓakpa ɓɔbu ka jujúkisa akɛ ka kukuwa.»

Ɓalɔ́ma 2:16

Ɓondɔ unge aɓande esa nde Mokonga atenande akpɛ nyɔngɔ á ɓɔsɔmɛa ndea ɓakpa k'aphe ndea Yéso Kiísito. A tɔ ɓíndɔ Mbino-Ánjá nde nɛɔtɔmiaga ayɔngi.

Ɓakɔlɔsái 3:4

Cɔ, ɓî Kiísito ande enda anu á ɗoni, ka sɛnɛka akɛ, ɓɔsɛnɛkaeka na yɛ ka ɓoombia nɛkɛ.

2 Ɓatɛsalɔníka 2:8

Mpɔ, Nto á otúkɔtúkɔ áɔɔnɛkana base. Mɔkɔta Yéso ammowande na ɛphɛu á k'aphenɔkɔ akɛ, ka ɓukpɛkpɛ á ɓoombia nɛkɛ aunge antúkatúkande mɓiɓia ndɔ, ka mbenɔ nde yɛ Yéso abikande.

1 Timɔtɛ́ɔ 5:21

Nekososi base mosá á Mokonga na mosá á Kiísito Yéso, na ɓamalaéka á kanga ɓojeɗe gea, amba ɓɔphɛi ndee: Mbenɔ nde ɔɔbɛɗanaga, bɛɗanaga kángá oɓayɔ, phɔtɔ kángá egami ka nkpa.

2 Timɔtɛ́ɔ 1:10

Kɛ̌kɛnde, ɓonjánja-ékondi ndɔ aúbikani base ka kiɗia á Namisi nɛsu Kiísito Yéso. Yɛ aámbé agɔɓi ɓukpɛkpɛ á kukuwa, áosóphangia base enda á mɛyɔ ka Mbino-Ánjá nɛkɛ.

2 Timɔtɛ́ɔ 2:14

Ókanisia ɓakpa nyɔngɔ ndɔ bui, ɔ́phɛ̌ base mosá á Mokonga gea, ɓákasanɛ mɔnɔ ka nyɔngɔ á kampápa nga, sani nna na kantíti, a ndiu ǒɓúngisaga ɓunde ɓáɔɔ́ka.

2 Timɔtɛ́ɔ 4:18

Amoamisande ka ɓojeɗe bui á ɓaɓiɓia ani. Amoamisande ka ɓojeɗe bui, áomoenga ka ngisa ani ka koɓoamɛ nɛkɛ na koba. Cɔ, obebɔ áɓɛ ka yɛ ka saga na saga! Áɓɛ ɓó.

2 Timɔtɛ́ɔ 4:8

Kpangá á Kɛ̌kɛnde, Mokonga amobisíí kekombó á koɗoni, nnde Mɔkɔta mmbé ande nteni nyɔngɔ á ɗoni amopande esa nde abikande goto. Nna tɔndɔ eme, a ndiu phɔtɔ ka ɓakpa ɓɔbu íɓunde ɓákondi ɔna akɛ esa nde asɛnɛkande.

Títɔ 2:13

Ɓeogea ɓó, ka ɓondea á maseye nde ɓeseɓei, na ɔna á ɓoombia ndea Mokonga nɛsu angbóngbó na Namisi nɛsu Yéso Kiísito mbenɔ nde asɛnɛkande.

1 Pɛ́tɛɛ 1:7

Tombaga ndɔ ande ka gea, ɓáengekisɛ ɓeekea nɛnu ka gea áúbikanɛ gea, ande á ɗoni. Láté ande kema nde aoújukana, ɓá gǎkɛ otoɓoa ú ka engekisa ɓonjánja í. Ɓeekea nɛnu a phɔtɔ ɓó. Ana kantíti kɔnyɛ́nya láté, akeni gǎkɛ ɓáengekisɛ ú. Ka nyɔngɔ índɔ unge ɓeɓande n'obebɔ, ɓoombia na ɓokutú mbenɔ nde Yéso Kiísito asɛnɛkaeka.

1 Pɛ́tɛɛ 4:5

Ɓɔ, ɓáyɔngande gǎkɛ nyɔngɔ nɛɓɔ mosá á Mokonga, mmbé a ye n'ɛ̌ɓɔngisigi ka tena nyɔngɔ á ɓakpa nde ɓáku na ɓunde ɓáoenda.

1 Pɛ́tɛɛ 5:4

Mbenɔ ndɔ Mɔkɔta á ɓaambi-etuge asɛnɛkande, ɓɔtɔande kuku á ɓoombia nde ɓonjánja í nna osía.

2 Pɛ́tɛɛ 1:11

Kaɓondɔ, ɓánokoɗeande phɛɛ aphe á ngia ka koɓoamɛ á mɛyɔ ndea Mɔkɔta na Namisi nɛsu Yéso Kiísito.

2 Pɛ́tɛɛ 1:17

Nga, Abɛ Mokonga ɗámophi ɓokutú na ɓoombia, mbenɔ nde ɛsɔ á Mokonga mɛna-ɓoombia ɗáyɔngi gea: «Mmbé ande Miki nɛmɔ ékondi. Yɛ, amɔɓɔngɛi phɛɛ.»

1 Yoáni 2:28

Cɔ, ɓaniki amɔ! Kɛ̌kɛnde ikani suɓi á ɔngana na Kiísito ka gea te, esa nde asɛnɛkaeka, ɓéoɓá na nseɓeɔ kángá á kuwa na soni mosá akɛ ka bika akɛ.

Mphaniɔ 1:7

Éngani, Yéso Kiísito aobika k'égugu. Ɓakpa ɓɔbu ɓámɔnande. Ɓunde ɗáɓántúmi n'ekonga, ɓámɔnande phɔtɔ. Ɓato á k'ekuna bui á ka mokonda ɓátaɓokanagande ka nyɔngɔ akɛ. Eya! Áɓɛ ɓó.