1 Ɓatɛsalɔníka 1:5 - Ɔngana á Kɛ̌kɛ

⁵ A ɓó, ka nyɔngɔ nde, ɓî ɗɛ́ɓɛnɔ́tɔ̌migi Mbino-Ánjá ndea Mokonga, ɗáná tɔndɔ ka yɔnga, ɗátú ndiu ka ɓukpɛkpɛ ndea Měma á kanga ɓojeɗe. Ɗéɓebisi měma asu kau gea, ande ɗoni. Ɓoúbi phɔtɔ tambea asu ɓî ɗéɓeiki sɔsɔɓɛ anu, na ɗátú ánjá ka ɓenu.

1 Ɓatɛsalɔníka 1:5 Iomraidhean Croise

Málikɔ 16:20

Ɓagoigi gǎkɛ, ɓáoga ɔtɔmiaga Mbino-Ánjá k'ɔ́ma bui. Mɔkɔta Yéso áoɓá na ɓɔ k'ékuma bui. Áoɗokomisa ɓɔphɛi nɛɓɔ ka ketangaɔ nde ɗáɓátú ɔtɔtɔkisa.]

Lóka 1:1

Mɔkɔta Tɛɔphílɔ, Ɓakpa ɗanga-ɗanga ɗáɓákengi ɗundua nyɔngɔ á Mɔkɔta, nnde ɗágeani sɔsɔɓɛ asu.

Ekuma á ɓateki 11:21

Mɔkɔta áǒɓopha ɓukpɛkpɛ. Kaɓondɔ, ɓakpa ɓásii ɓáoɓeekea nyɔngɔ á Mɔkɔta na kětia á tambea aɓɔ ájeɗe.

Ekuma á ɓateki 16:14

Ka ɓake ndɔ moci, ina akɛ Lúdia nto á ka Tuatɛ́a, n'ande phɔtɔ nsombisigi ngɔ́mbɛ ánjɛ nnde ana esombi akpɛ, n'ande mɓángi-Mokonga. Mɔkɔta áokoɗa měma akɛ ka ɔ́ka bîbíbí yɔnga ndea Pɔ́lɔ.

Ekuma á ɓateki 2:33

Ɓî Mokonga antáisi na bisa akɛ ka njaga akɛ á mǔku, áoɓá na Měma á kanga ɓojeɗe nnde yɛ abakɛ ɗámɔku. Yéso aámbé aɛmbisi kema nde ɓɔɔ́ka na nnde ɓɔɔna ka ɓesu.

Ɓalɔ́ma 1:16

Cɔ, kéokuwa na soni ka tɔ̌mia Mbino-Ánjá nga, ande ɓukpɛkpɛ nde Mokonga aɔbɛɗaneaga ka amisa nkpa buakɛ mmbé aomɓeekea Yéso. A phɔ́ kǒamisa Ɓayúda, mbusa í, â phɔtɔ ǒamisa ɓunde ɓáná Ɓayúda.

Ɓalɔ́ma 15:13

Ambe Mokonga mɛna-nseɓeɔ ánotúmisɛ na maseye na ɓujɛjɛ phɛɛ suɓi á ɓeekea ka gea ɓótúmɛ na nseɓeɔ ka ɓukpɛkpɛ ndea Měma á kanga ɓojeɗe.

Ɓalɔ́ma 2:16

Ɓondɔ unge aɓande esa nde Mokonga atenande akpɛ nyɔngɔ á ɓɔsɔmɛa ndea ɓakpa k'aphe ndea Yéso Kiísito. A tɔ ɓíndɔ Mbino-Ánjá nde nɛɔtɔmiaga ayɔngi.

1 Ɓakɔlítɔ 1:24

Ka ɓunde gǎkɛ Mokonga ɗáɛ́ɓɔphani, kaɓɛ Ɓayúda, kaɓɛ ɓunde ɓáná Ɓayúda, Kiísito ande ɓukpɛkpɛ ndea Mokonga na kɔɓɔɔngɛ ndea Mokonga.

1 Ɓakɔlítɔ 10:33

Eme Pɔ́lɔ, neókondisaga na ɓakpa ɓɔbu ka nyɔngɔ bui. Kéokáɓa ɓonjánja nɛmɔ sasani, ne ndiu okaɓa ɓonjánja ka ɓakpa ɓɔbu gea te, Mokonga éamisɛ ka měma.

1 Ɓakɔlítɔ 3:16

Cɔ, ɓókóoúba gea, ɓonde endu ndea Mokonga, na Měma á Mokonga a suɓi anu?

1 Ɓakɔlítɔ 3:6

Eme, ɗékoni mbó, Apɔ́lɔ áoɗukia iɓo, Mokonga â gǎkɛ ɔtɛisa ú.

1 Ɓakɔlítɔ 4:20

Koɓoamɛ ndea Mokonga nna tɔ ka yɔngaga, a ndiu ka ɓukpɛkpɛ.

1 Ɓakɔlítɔ 9:14

A ɓíndɔ Mɔkɔta ɗásosi gea, ɓakpa nde ɓáɔtɔmiaga Mbino-Ánjá, ɓáendɛ k'ékuma á tɔ̌miaga á Mbino-Ánjá.

2 Ɓakɔlítɔ 3:6

Yɛ aámbé ɗásóphi ɓukpɛkpɛ á ɓá ɓabɛɗanigi á ɔngana á kɛ̌kɛ. Ɔngana kau nna á ɓaoɓa, a ndiu á Měma á kanga ɓojeɗe. Nga, ɓaoɓa aokusa, Měma a gǎkɛ oendisa.

Ɓagalatía 2:2

Ɗége ko nga, Mokonga aámbé ɗámɔɔphani. Suɓi á madondanɔ ka mpɛphɛ na ɓakɔta á kanisa aunge ɗéněgoisigi Mbino-Ánjá nde nɛɔtɔmiaga sɔsɔɓɛ á ɓunde ɓáná Ɓayúda. Nga, ɗékéokonda gea, ekuma nɛmɔ á kala n'índe á kɛ̌kɛ áɓɛ kángá kantíti.

Ɓagalatía 5:5

Ɓesu gǎkɛ, nseɓeɔ nɛsu ande gea Mokonga aámbé asóngoɗande ɓato á koɗoni mosá akɛ ka nyɔngɔ á ɓeekea. Nndɔ ungɔ ɓeoɓondea ka ɓukpɛkpɛ á Měma á kanga ɓojeɗe nnde a suɓi asu.

Ɓaɛphɛ́sɔ 2:10

Ɓende ekuma á ka njaga á Mokonga. Ande gea te, ɗásóconji ka ɔngana asu na Kiísito Yéso ka gea te, ɓéendɛ suɓi á ɛtɔi k'ékuma ánjá nde ɗásóbisíí gea, ɓɛtɔtɔkisɛ ú.

Ɓaɛphɛ́sɔ 3:20

Cɔ, ka Mokonga, mmbé abisi ɓukpɛkpɛ ka měma asu, Yɛ aɔtɔka tɔtɔkisa nyɔngɔ nde anyɛ́nyi ɛmɛmi nɛsu, na úbapha asu!

Ɓaphilípi 2:13

Ande gea, Mokonga aámbé aɔbɛɗanaga ka měma anu, n'aonópha mɔphɛ na ɓukpɛkpɛ á tɔtɔkisa á moangɔ nɛkɛ nnde áɔmɓɔngɛa.

Ɓaphilípi 4:9

Tɔtɔkisani kema nde ɗénóphi na goisaga anu, nnde ɗɔɓɔɔ́ki na nɛɔyɔnga na nnde ɗɔ́ɓɔɔni na neogea. Mpɔ, Mokonga, mɛna-ɓujɛjɛ, aɓande kimoci na ɓenu.

Ɓakɔlɔsái 2:2

Neokonda gbagisaga á měma aɓɔ na ɓukpɛkpɛ, ɓájukanɛ k'ékondani, ɓáúbɛ oengekisa kema ka ɓeana na úbapha ánjá. Mpɔ, ɓáúbande nyɔngɔ á ɓɔsɔmɛa ndea Mokonga, ande gea Kiísito tɔndɔ.

1 Ɓatɛsalɔníka 2:13

Ɓe phɔtɔ onsega Mokonga esa bui, ka nyɔngɔ nde, ɓî ɗéɓenɔ́tɔ̌migi Mbino-Ánjá ndea Mokonga, ɓɔ́ɔɔ́ka, ɓóoɓeekea gea: «Ande nyɔngɔ á Mokonga. Nna nyɔngɔ á kokpa.» Cɔ, ande ɗoni anu. Nga, nyɔngɔ á Mokonga angí ka mɛngɛ anu, ɓenu ɓaɓêki.

2 Ɓatɛsalɔníka 2:14

Mokonga ɗánɔɔphani ka ɓoamia ndɔ k'aphe á Mbino-Ánjá nde ɗéɓenɔ́phɛí, ka gea, ɓóɓɛ na ɓoombia ndea Mɔkɔta nɛsu Yéso Kiísito.

2 Timɔtɛ́ɔ 2:10

Kaɓondɔ unge, nephiphíí tambaga bui ka nyɔngɔ á ɓakpa nde Mokonga ɛ̌sɔmbu ka gea, Yéso Kiísito éamisɛ phɔtɔ ɓɔ ka měma na tɔá á ɓoombia á mɛyɔ.

2 Timɔtɛ́ɔ 2:8

Cɔ, nkanisia Yéso Kiísito, mosuko á moamɛ Daúdi, mmbɔ ɗájujúki ka kukuwa ɓíndɔ Mbino-Ánjá nde nɛɔphɛa ayɔngi.

Ɓaɛbulanía 10:22

Kaɓondɔ, ɓémbǐmisiɛni Mokonga na měma á koɗoni nnde atúmi na ɓeekea, phɔtɔ na nyama nde ɓesokosi ú na iɓo nde aánjá.

Ɓaɛbulanía 6:11

Cɔ, mɔphɛ asu ande gea te, nkpa buakɛ sɔsɔɓɛ anu átetemisɛ ekuma na ka sungiaga ka gea te, nseɓeɔ nɛnu atɔtɔkɛanɛ.

1 Pɛ́tɛɛ 1:12

Mokonga ɗéúbisi gea te, mbino ndɔ ɗákátú ka phɔaɓɔ sasaɓɔ, ɗátú ndiu ka phɔanu. Cɔ, kɛ̌kɛnde, ɓatɔmi Mbino-Ánjá ɗáɓánɔ́tɔ̌mi mbino ndɔ na ɓukpɛkpɛ á Měma á kanga ɓojeɗe, mmbé Mokonga ɗánteki ka toka na koba. Ɓamalaéka ɓɔ sasaɓɔ ɓákondi phɔtɔ úba á mbino ndɔɔ.

1 Pɛ́tɛɛ 1:3

Ɓémbebɛni Mokonga, Aba-Mɔkɔta nɛsu Yéso Kiísito! Ka nyɔngɔ á ɓongbóngbó á ngomi nɛkɛ aunge ɓɛɓɔkɔtɛani goto mɔngɔ á koiɓɛ, ka jujúkisa á Yéso Kiísito ka kukuwa sɔsɔɓɛ á ɓasí. Kaɓondɔ unge ɓena nseɓeɔ nde ana enda,

1 Pɛ́tɛɛ 5:3

Ɓókobɛɗaneɛgɛmbɛ kɔkɔta gǔ á ɓunde Mokonga ɗánóphi ka amba aɓɔ, ɓáni ndiu mphangiɔ ka ɓɔ.

2 Pɛ́tɛɛ 1:10

Cɔ, ɓaya, geani ɓukpɛkpɛ anu phɛɛ ka bisa á měma anu ka Mokonga mmbé ɗánɔɔphani na ɗánɔsɔmbu. Ɓo ye ogea ɓó, ɓókóngiɛku tanda ka ɓojeɗe.

2 Pɛ́tɛɛ 1:19

Ɓeɓeeki phɔtɔ phɛɛ nyɔngɔ nde ɓaɔtu-nyɔngɔ ndea Mokonga ɗáɓátɔ̌migi. Ɓenu ɓogi phɔtɔ ánjá nga, ɓoambi nyɔngɔ nɛɓɔ. Mbino ndɔ a ɓea ɔbɛa n'aɔbɛnya ka keiphe, na ka ɓî esa agande kosa na mbenɔ nde sɛɛngɔa á kamɓimba abɛnyande ka měma anu.