Revelation 3:4 - Sa Ugud Apudyus

⁴ “ ‘Yaḵon annat da aḵit ḵan diḵayu'd Sardis we adipun nangwa'ḵ lawwenge isun di adipun naḵaissawan silupda. Sa umali ye aḻgaw, dida da maḵataddaḻan ḵan saḵone ansilup aḵ itaḵ te labbongda.

Revelation 3:4 Iomraidhean Croise

Matthew 10:11

“Ḵad ngaimane ili ye ayanyu, singtonyu tagu we ḵamamangili ta siya dawosonyu ḵan inggawanyu inggana'ḵ tenanyu sadi ye ili.

Mark 16:5

Nillumnoḵda ḵad atte liyange libon, nataagdae nangila si babaḻu we tutuḵdu si madawinane nansilup aḵ itaḵ.

Luke 20:35

Yaḵon da tagu we ibelang Apudyus we labbongnae umuli ya midoga ḵan siya'd langit si umali ye timpu, adidapun an-as-asawa.

Luke 21:36

Ansasaggana ḵayu ya alluwaḻu ḵayu ta pumigsa ḵayu ḵan tumuḻod ḵayu we angiyattom atta annae maḵmaḵwa ta maḵwae sumangu ḵayu ḵan saḵone Abeng Di Tagu.”

Acts 1:15

Sin-aḻgawan ḵad, nandatdatong da namati ḵan Jesus we batug di naḻpaan aḵ duwampuḻu belangda. Pun summiḵad aḵ Peter woḵ ḵanana,

2 Thessalonians 1:5

Sadi angipaila si gattoḵe naun-unane anḵuḵuwis Apudyus atta tagu. Te mipagapu'tte ampaḵaḻamane inan-anusanyu sinsana, nipailae mibagay ḵayu we midoga si ampangatana.

Jude 1:23

Ḵad taguwonyu da udume adipun namati ye isun di lapsutonyu dida si apuy ad infiernu. Ḵadaguwanyu bos da ḵabasbassuḻan yaḵon ummanyu ta adi ḵayu mamansaan atte lawwenge ḵoonda.

Revelation 1:11

Ḵanana, “Igilim atte iblu da ilam ta idagasnu'tta pitu we gimung da namati'd Ephesus, Smyrna, Pergamum, Thyatira, Sardis, Philadelphia ya ad Laodicea.”

Revelation 11:13

Sa sadi ye oras, inggaw os ummamdane lunige anadail atte ḵasimpuḻun ni sadi ye siyudad woḵ sadi nanḵaḵatoyan da pitullibu we tagu. Pun ummogyat da nabun-an woḵ andayawda'tte ḵinangatun Apudyus we awad ad langit.

Revelation 14:4

Dida bos da adipun naḵabasuḻ mipanggob atta bubai te pasigda ampoḻḵas. Siya inunudda Ubbu we Karnero taḵon ay dinu ayana. Dida da nasubut ta misinada'tta udume tagu ta midatunda ḵan Apudyus ya sa Ubbu we Karnero we isun di umunae maapit ya midatun ḵan Apudyus.

Revelation 19:14

Da ummamdane suḻdadu'd langit, nituntun-udda ḵan siya. Nangabayuda bos atta itaḵe ḵabayu ya nampassilupda'ḵ itaḵe ampatog ḵan ampoḻḵase silup ya ippun paat mansada.

Revelation 19:8

te niyunude iḵabotna ampatoge silupe itaḵe sumilisiling ya ampoḻḵapoḻḵas.” Sa pion ni itaḵe silup ḵanan, da naun-unane ḵingwan da tagun Apudyus.

Revelation 3:18

Pun bagbagaaḵ diḵayu we ngumina ḵayu si buḻawan ḵan saḵone naḻunag ḵan pinapoḻḵas ni apuy ta bumaḵnang ḵayu we tuttuwa. Ngumina ḵayu bos si itaḵe silupe iḵabotyu ta adi ḵayu mabainan gapu ta amboboddang ḵayu. Ngumina ḵayu bos si agase iyagasyu'tta atayu ta pumadda ilanyu.

Revelation 3:5

Da tagu we angngog atte lawweng, ansilupda si itaḵ ya adiḵpun paat ḵaanon ngadanda si iblu we nigiliyan da ngadan da awad de biyagda'ḵ inggana. Ibabaggaḵ si sinagung Amaḵ ya da anghelnae dida da taguḵ.

Revelation 4:4

Sa nampaliḵwos atte trono, inggaw os da duwampuḻu ya opate trono we tummutuḵduwan da duwampuḻu ya opate angipangpangu. Nampassilupda'ḵ itaḵe silup ya nakoronaanda'ḵ buḻawan.

Revelation 6:11

Pun naittan da sadi ye ḵalidodwa si itaḵe langgoyode silup. Ḵad nibaga ḵan didae an-illongda yan aḵ sin-aḵitan inggana'ḵ maganggangput belang da susunudda ḵan Kristu we anserbi ḵan Apudyus we patoyon da tagu we isun os ni napatoyanda.

Revelation 7:9

Naabus ḵad sadi, innilaḵ os da amoamode tagu we adidapun mabelange naḻpu'tta losane ili ya da losane tribu ya da tagu we nansabasabali gingada ḵan naḻpuwanda. Sumisiḵadda'tte sinagung ni trono ya sa Ubbu we Karnero. Nampassilupda'ḵ itaḵe langgoyod ya nampaḵ-odonda'ḵ tubu we isun di baing ta angipail-anda si layadda.