Luke 18:13 - Sa Ugud Apudyus

¹³ “Sa andadagup ḵad atta bugis, summiḵad atte battawa woḵ adipun nantangad ad langit te mabain atta basuḻna yaḵon ḵinabḵabna baḻuḵungna te nambabawi'tta basuḻna woḵ ḵanana, ‘Apudyus, ḵadaguwanaḵ ḵappose ḵabasbassuḻan.’ ”

Luke 18:13 Iomraidhean Croise

Matthew 10:3

da Philip, Bartholomew, Thomas, aḵ Matthew we andadagup atta bugis, aḵ James we abeng Alphaeus, aḵ Thaddaeus,

Matthew 6:5

Pinagatupan Jesus woḵ ḵanana, “Ḵad nu alluwaḻu ḵayu, adi ḵayu oḵyan miyisu'tta ḵapappaila te pipiondae sumisiḵade alluwaḻu'tta sinagoga ya da ḵaḻsa ta ilan da tagu dida. Ibagaḵ ḵan diḵayu ḵatuttuwaan, nagagangpute inawatda da gungunada.

Matthew 9:13

Te adiyaḵpun ummali ta ayagaḵ da naun-unane tagu yaḵon ummaliyaḵ ta ayagaḵ da ḵabasbassuḻan ta ambabawida'tta basuḻda ta ansinagungda ḵan Apudyus. Pun inḵayu adaḻon nigili ye Ugud Apudyus we ḵanana, ‘Ḵan saḵon, napatpatog ḵumadagu ḵayu'tta asintataguyu nu sa angidatun ḵayu'ḵ ayam ya da udume datun ḵan saḵon.’ ”

Mark 11:25

Ḵad nu alluwaḻu ḵayu ya awad sasangngaanyu'tta asintataguyu te naḵabasuḻda ḵan diḵayu, pakawanonyu ta aḵ Apudyus we Amayu'd langit pakawanona bos da basuḻyu.”

Luke 17:12

Dummatongda ḵad atte osae ili, inabotda da simpuḻu we laḻaḵi ye naleprosy. Summiḵadda'tte battawa,

Luke 22:41

Pun bummattawa'ḵ Jesus ḵan dida si isun ni tayud ni mibintuge batu, nanalluḵu woḵ nalluwaḻu.

Luke 23:48

Da adu we tagu we nadagupe namubuya, innilada ḵad da naḵwa ḵesandae ḵinabḵabḵabda da baḻuḵungda te andomdomda.

Luke 5:8

Innilan ḵad Simon Peter naḵwa, nanalluḵu'tte sinagung Jesus woḵ ḵanana, “Apu tenam saḵon te ḵabasbassuḻanaḵ!”

Acts 2:37

Dingngoḻ ḵad da adu we tagu imbagan Peter, amod de babawida woḵ ḵananda ḵan Peter ya da udume apostol, “Susunude ganaḵ Israel, ngai ḵoonni?”

Romans 5:8

Yaḵon aḵ Apudyus impailana amode ayatna ḵan ditaḵu si sissiyae ḵabasbassuḻan taḵu, natoy aḵ Kristu para ḵan ditaḵu.

2 Corinthians 7:11

Te ilanyu ḵad ḵabaḻun ni ḵingwan Apudyus gapu'tte nandadauyan ni somsomoḵyu. Sinsadi, ibungana ayatyu we angwa'tta ambaḻu ya ipapatiyu ipailae ustu da ḵoonyu. Summanga ḵayu gapu'tte naḵwa ḵan diḵayu ya maḵimut ḵayu'ḵ dusaon Apudyus diḵayu gapu'tta basuḻyu. Pionyu pagay os ilan saḵon ya allaylayad ḵayu bose angwa'tta imbagaḵ. Pionyu bose anusa'tte tagu we naḵabasuḻ. Gapu'tta losane ḵingwayu, nipailae ippun mipabasuḻ ḵan diḵayu gapu'tte naḵabasuḻan da sadi ye tagu.

1 Timothy 1:15

Sana tuttuwae tuttudu ya labbongnae patiyon da losane tagu: Ummali'ḵ Jesu Kristu atte lubung ta taguwona da ḵabasbassuḻan. Saḵon ḵapaatan ḵan dida.

Hebrews 4:16

Ḵad antaḻgod taḵu we umadani alluwaḻu ḵan Apudyus we ampangat ad langit gapu'tte ḵinabaḻuna ta awaton taḵu ḵadagu ḵan ḵinabaḻu ḵan siyae bumadang ḵan ditaḵu si timpu we anḵasapuḻ taḵu.

Hebrews 8:12

Te pakawanoḵ da basuḻda ya adiḵpun ogon sosomḵon.”