James 3:6 - Sa Ugud Apudyus

⁶ Sa dela taḵu isunan apuye sumgob ya dumadail atta losane nampaliḵwos. Te nu an-ugud taḵu'ḵ lawweng, ipailanae amod de lawwenge awad ḵan ditaḵu, siya gapun ni angwaan taḵu'ḵ lawweng ya ansomsomḵan taḵu'ḵ lawweng ya lumawengan os da adu we tagu. Sa annae lawweng naḻpu ḵan Satan ḵad dadailona losane ḵinatatagu taḵu.

James 3:6 Iomraidhean Croise

Matthew 12:24

Yaḵon dingngoḻ ḵad da Pharisee ḵananda, “Abus aḵ Beelzebul we pangat da aḻan aḵ nangitod atte ḵabooḻanae amaḻyaw atta aḻan.”

Matthew 5:22

Yaḵon sa ibagaḵ ḵan diḵayu, ngaimane sumasanga si asintataguna maḵuwis ḵan maḵoddongan aḵ madusa. Ngai ḵad ose angibabbain atte asintatagunae ḵanana, ‘Ippun paat silbim,’ midaḻum atta ḵuḵunsisaḻ. Isun os da ḵanandae, ‘Dong-ogḵa,’ inḵa si apuy ad infiernu.

Mark 7:15

Sa mibelang aḵ angaissaw atte tagu si antotollong Apudyus, daḵampun atte ngaimane lumnoḵ si sungadna yaḵon sa tumoḵwaḻ atte sungadna.

Luke 16:24

Pune sadi nampoḵaw woḵ ḵanana, ‘Ama Abraham, ḵadaguwanaḵ ḵappos ta ibuunnu'ḵ Lazarus ta ilinongna tammuduna'tte danum ta itodtodna si delaḵ ta matungninan. Te annan ummamdan ampaḵaḻamaḵ si apuy.’

Acts 20:30

Awad da udum ḵan diḵayu we mismu we asi umali ye ambalinonda ḵatuttuwaan aḵ tinutuli ta awisonda da namati ta mitun-udda ḵan dida.

Acts 5:3

Yaḵon ḵanan Peter, “Ananias, ngaipam iyunude aḵ Satan anḵewaaḻ atte somsomoḵnu ya nantultulliḵa si Ispiritu Santu atte nangitaḻuwam si udume bayad ni lutayu?

Acts 6:13

Nan-ayagda'ḵ tagu'ḵ anaḵdoḻ ya an-ugudonda'ḵ tuli si mipanggob ḵan siya woḵ ḵananda, “Sa annae tagu adinapun paat agaye an-ugud si misullagi si annae templo ya sa lintog Moses.

Titus 1:11

Ḵasapuḻane paginḵona dida te dumadailda'tta pammatin da amode baḻyan, gapu si angituttuduwanda'tta daḵampun oḵyan aḵ mituttudu. Sa panggobdae angwa'tte ḵaḵna, ampabain te sa pilaḵe abus gagamgamanda.

James 2:7

Daḵampun ḵamman aḵ dida da an-ugud atta misullagi si madaydayawe ngadan Jesus we nidog-an taḵu?

James 3:7

Lamog da tagu we ampaingsa ḵad paingsaonda da losane kalasin da tanane ayam, da tumayap, da ḵumayam ya da losane matattagu si baybay.

2 Peter 3:3

Sosomḵonyu anna te gattoḵe ampatog: Nu dumatong anungus ni aḻgaw, tumoḵwaḻ da umang-angyage siya unudonda pipion da long-agda. Ḵad ḵanandae angang-angyag ḵan diḵayu,

3 John 1:10

Pun nu umaliyaḵ sinat, ibagaḵ ḵan diḵayu da ḵingwana ya da ibagabagana mipanggob ḵan diḵani te ippun ḵinatuttuwaan ni ipappabasuḻna ḵan ditaḵu. Ḵad daḵampune abus da sanae banag aḵ dam-ona ḵingwa te adinapun os mangiliyon da susunud taḵu ḵan Kristu we umoy si iliyu. Ḵad iyadina bos da ammangili ḵan dida ya paḻyawona dida'tta namati ye magimugimung.

Revelation 12:9

Ḵad niballu'd luta daḵoḻe dragone nidoga da anghelna. Aḵ Satan sanae nampailae uḻog si awe. Siya nangallelaw atta tagu si intero we lubung.

Revelation 13:14

Pun inallelawna da adipun namati'd luta gapu'tta nakaskasdaawe sinyale niyunude ḵingwana si nanserserbiyana si ummunae ḵaog-ogyate ayam. Pun imbagana ḵan dida ta angwada'ḵ sinan-ayame dayawondae isun ni ummunae ayame nasugat atte ispada yaḵon sissiyae natagu.

Revelation 18:23

Ḵad naippun os ogon da matonggane silaw ya naippun ogon ankasar. Sanat da dusan ni Babylon te da allaḵlaḵu si sadi ye siyudad, ansosoḵaḻ da somsomoḵda ya ngannonda dida ḵabaḵnangan ad luta. Ḵad da ummili sidi, inallelawda da tagu'd luta'tta tulidae isun da buyun.

Revelation 19:20

Yaḵon nadoḵmaan ḵaog-ogyate ayam ya sa sinan profeta we nangipaila'tta nakaskasdaawe sinyal si nanserserbiyana si annae ayam. Da annae sinyal, dida da inusarnae nangallelaw atta tagu we namaḻḵaan atte maḻḵan ni ḵaog-ogyate ayam ya da nandaydayaw atte naḵwae ḵais-isuna. Da annae duwae sissiyae matattagu, niballuda si igaw ni gumilgillayabe apuy ḵan sulfur.