James 1:21 - Sa Ugud Apudyus

²¹ Pun an-awidanyu da losane ḵababbaine ugaliyu ya da amode ḵoḵoḵḵonyu. Ḵad ampakumbaba ḵayu ya awatonyu Ugude immuḻana'tta somsomoḵyu we maḵwae anagu ḵan diḵayu.

James 1:21 Iomraidhean Croise

Matthew 5:5

Pian da angipakumbaba'tta long-agda te dida angilaḵsun si lutae inkarin Apudyus.

John 6:63

Sa angitod atte biyag, sa Ispiritu Santu. Naippun lamog ni long-ag itton. Ḵad da inugudḵu ḵan diḵayu, naḻpuda'tte Ispiritu ḵad siya angitod si biyag aḵ inggana.

John 6:68

Ḵanan Simon Peter we summongbat, “Apu, ngai unudonni nu? Annat ḵan siḵa da ugude angitod atte biyag aḵ inggana.

Acts 10:33

Sana gapunae impaayagḵu siḵae dagus, ḵad ambaḻu ta annae ummaliḵa. Pun sinsadi anna ḵani si sinagung Apudyus ta andongoḻ ḵani'tta losane imbilin Apu ḵan siḵae paibagana.”

Acts 13:26

“Susunudḵu we ganaḵ Abraham ya diḵayu we Gentil we angisipog ḵan Apudyus, ditaḵu nangittan Apudyus si ugudnae mipanggob si anaguwana ḵan ditaḵu.

Romans 1:16

Adiḵpun ibaine angiwaḻagawag atte Ambaḻu we Damag te siya Ugud Apudyus we maḵabooḻ anagu'tta losane amati, umuna'tta Judyu ya asiyot da Gentil.

Romans 11:17

Da Judyu mipanida'tte ḵayu we olive we immuḻan Apudyus. Yaḵon simpaḵ Apudyus da udume pangana. Diḵayu we Gentil, mipani ḵayu'tta pangan ni ḵayu we olive we naippun nangimuḻa. Sa ḵingwan Apudyus, impasanina diḵayu'tta pangan ni ḵayu we immuḻana. Ḵad sinsana, midoga ḵayu maḵabillay atte lutae naḻpu'tte lamut ni sadi ye ḵayu we olive.

Romans 6:17

Yaḵon anggappiyaaḵ ḵan Apudyus te taḵon ay nu musassun ni basuḻ diḵayu'tte awe, sinsana tuttuwae insisimoḵyu tuttuwaon ḵatuttuwaane nituttudu ḵan diḵayu.

1 Corinthians 15:2

Ḵad sadi bos damage mataguwanyu nu popotpotanyu da pammatiyu nu tuttuwae mibatay pammatiyu si intuttuduḵ ḵan diḵayu.

2 Corinthians 7:1

Susunudḵu ḵan Kristu we ay-ayatoḵ, gapu'tta sanae inkarin Apudyus ḵan ditaḵu, iginoḵ taḵu we angwa'ḵ lawweng ya iginoḵ taḵu we ansomsomoḵ aḵ lawweng. Sa matattaguwan taḵu, isipog taḵu'ḵ Apudyus ta bumaḻubaḻu naapudyusane antatagu taḵu.

Ephesians 1:13

Ḵad diḵayu bose niyossaan ḵan Kristu, dingngoḻyu ḵad ḵatuttuwaane Ugudna we sa Ambaḻu we Damag mipanggob atte mataguwanyu, namati ḵayu ḵan Kristu woḵ namaḻḵaan ḵayu si Ispiritu Santu we inkarina.

Ephesians 4:22

Pun ḵasapuḻane ḵaanonyu da dadaane ugaliyu we nangidaḻan atte biyagyu we angwa'tte pinion ni long-ag. Sanat dadaane ugaliyu we angallelaw ya anadail ḵan diḵayu.

Ephesians 4:25

Pun adi ḵayu ogon antultulli, abus ḵatuttuwaan aḵ ibagayu'tta buḻunyu te nidoga taḵu losan atte long-ag Kristu.

Ephesians 5:4

Adipun os mibagay ḵan diḵayu ḵaissaw an-uugudyu ya dinodong-og an-uugudyu we ippun anuna yaḵon siya oḵyan ḵoonyu anggappiya ḵayu ḵan Apudyus.

1 Thessalonians 1:5

Te indatongni ḵad ḵan diḵayu Ambaḻu we Damag, daḵampun aḵ abuse ugud yaḵon nidoga bos ḵabooḻan ni Ispiritu Santu ḵan napanoḵnoḵane ḵatuttuwaan Ugud Apudyus. Igammuyu bos nantataguni si inninggawanni ḵan diḵayu sinat ḵan inonni ye bummadang ḵan diḵayu sinat.

1 Thessalonians 2:13

Susunudḵu ḵan Kristu, pasig ḵani anggappiya ḵan Apudyus te dingngoḻyu ḵad ugudnae imbagani, namati ḵayu we daḵampun aḵ naḻpu'tta tagu yaḵon tuttuwae naḻpu ḵan Apudyus. Ḵad sa Ugud Apudyus, siya anḵewaaḻ atta biyagyu we namati.

Titus 2:11

Ḵaḵna oḵyan ugalin da namati te impailan Apudyus ḵinabaḻuna mipagapu'tte nangibuunana ḵan Jesus si annae luta ta taguwona oḵyan da losane tagu'tte madusaanda'tte basuḻ.

Hebrews 12:1

Ditaḵu ḵad, naliḵwos taḵu'tta aduadu we anaḵdoḻ atte pammatida. Pun ḵasapuḻane ḵaanon taḵu da losane maḵatupod atte amatiyan taḵu amod ay basuḻe allaḵod ḵan ditaḵu, we isun di maḵatodtoddaḵe iggana ḵabooḻanae anoddaḵ.

Hebrews 2:3

Pun ngai inon taḵu we angiligsi'tte madusaan taḵu nu adi taḵu patgan sanae nakaskasdaawe inonae anagu ḵan ditaḵu? Aḵ Apu Jesus we mismu ummunae nangipaigammu si mipanggob atte mataguwan taḵu. Ḵad da nangngoḻ atta tuttuduna, dida nangipaigammu ḵan ditaḵu'tta dingngoḻdae ḵatuttuwaan.

Hebrews 4:2

Dingngoḻ taḵu Ambaḻu we Damag we niwaḻagawage isun os ni dingngoḻ da danaḵḵoḻ taḵu si awe. Yaḵon ippun anun ni dingngoḻda te adidapun nan-ossaane namati'tta udume nandongoḻ.

James 4:8

Umadani ḵayu ḵan Apudyus woḵ umadani bos ḵan diḵayu. Diḵayu we ḵabasbassuḻan, papoḻḵasonyu da antataguyu ya diḵayu bose anduwaduwa, isisimoḵyu we angunud ḵan Apudyus.

James 5:20

Sosomḵonyu we nu ipauliyu osae ḵabasbassuḻan, taguwonyu'tte ḵatoy ya mapakawan da adu we basuḻna.

1 Peter 1:22

Te pummoḻḵas ḵayu we ustu si tummuttuwaanyu gapu si namatiyanyu'tte ḵatuttuwaan, gattoḵe ayatonyu da susunudyu ḵan Kristu we namati. Pun pagapagatupanyu we an-asiayat atta losane somsomoḵyu.

1 Peter 1:9

Te awatonyu ambanagan ni pammatiyu we siya mataguwan da ḵalidodwayu.

1 Peter 2:1

Pun an-awidanyu da losane ḵoḵoḵḵon. Ippun oḵyan tinutuli, apos, ḵapappaila ḵan diḵayu ya adiḵayu oḵyan an-ugud aḵ lawweng si mipanggob atta asintataguyu.

1 Peter 2:11

Susunud ḵan Kristu we ay-ayatoḵ, gapu ta isu taḵun ḵaili si annae lubung ya sin-aḵitane abus inggawan taḵu sina, an-awidanyu ḵappos pipion ni long-agyu we angubagubat ḵan diḵayu.