Acts 13:43 - Sa Ugud Apudyus

⁴³ Lummawa ḵad da tagu we naḻpu'tte sinagoga, adu da nibuḻun ḵan da Paul ḵan Barnabas we Judyu ya da Gentil we nangunud atta ugalin da Judyu. Naḵaug-uggud da Paul ḵan dida woḵ nandagdaguda ḵan dida ta pagatupandae antaḻgod si ḵinabaḻun Apudyus.

Acts 13:43 Iomraidhean Croise

Matthew 23:15

“Ḵaddagu ḵayu, diḵayu we mimistulun ni lintog ya da Pharisee. Ḵapappaila ḵayu! Te andoḻdoḻmang ḵayu'tta baybaye umoy atta adayu we ili ta awad awisonyu'ḵ taḵon ay ossaan ta ambalin aḵ disipuluyu. Ḵad nu gangputonyu tuttuduwan sadi ye tagu, nambalin aḵ lawwelawweng ḵad amo madusa'd infiernu nu sa madusaanyu.

Acts 11:23

Dummatong ḵad sidi, innilana ḵinabaḻun Apudyus ḵan dida. Nallaylayad woḵ sinoḻgagna dida ta ipapatidae antaḻgod ḵan Apu atte amine somsomoḵda.

Acts 13:50

Yaḵon da Judyu we adipun namati ḵan Jesus, sinubsubda da nangangatu saaddae bubbubai ye nandaydayaw ḵan Apudyus ya da papangat atte sadi ye siyudad. Pun insaḻaddae amaḵaḻam ḵan da Paul ḵan Barnabas woḵ pinaḻyawda dida si ilida.

Acts 14:22

ta papigsaonda pammatin da namati ya soḻgagonda dida ta popotpotanda da pammatida. Ḵananda, “Ḵasapuḻane adu ampaḵaḻaman taḵu si midog-an taḵu si ampangatan Apudyus.”

Acts 14:3

Pun nabayag inninggawan da Paul ḵan Barnabas sidi. Intuḻoddae nantuttudu mipanggob ḵan Apu Jesus. Pun tinaḵdoḻandae tuttuwa mipanggob si ḵinabaḻuna mipagapu si nangittana ḵan dida si ḵabooḻane angwa'tta nakaskasdaaw ḵan sinyal.

Acts 16:14

Osa'tta nandongoḻ ḵan diḵani'ḵ Lydia we iThyatira we allaḵlaḵu'tta nanginginae sinnun ya andaydayaw ḵan Apudyus. Nandodongngoḻ ḵad, sinilawan Apu somsomoḵna woḵ namati.

Acts 17:17

Pun ummoy atte sinagoga naḵasossongbat atta Judyu ya da Gentil we nanaydayaw ḵan Apudyus. Inaḻgaw ose ummoy atta lugar we andaḵdaḵngan da adu we tagu ya naḵasossongbat atta tagu we inggaw sidi.

Acts 17:34

Yaḵon da udum ḵan dida nidogada ḵan siya woḵ namatida ḵan Jesus. Osa ḵan dida'ḵ Dionysius we osa'tta pangat si Areopagus ya aḵ Damaris we bubai ya da udum.

Acts 17:4

Naawis da udume Judyu, pun nidogada ḵan da Paul ḵan Silas. Nidoga bos da adu we Gentil we nandaydayaw ḵan Apudyus ya da mabigbige bubai.

Acts 18:7

Pun tinenan Paul dida sidi woḵ ummoy si boḻoy ni osae Gentil we Titius Justus ngadannae andaydayaw ḵan Apudyus. Sa boḻoyna awad si daḻnig ni sinagoga.

Acts 2:10

Phrygia, Pamphylia, Egypt ya da udume saḵubna'd Libya we dogana'd Cyrene. Ḵad da mangili ye naḻpu'd Rome,

Acts 28:23

Pun imbagada aḻgawe andaḵdaḵnganda. Dummatong ḵad sadi ye aḻgaw, aduadu da tagu we ummoy si inggawan Paul. Pun insaḻadna'tte bigbigat inggana'ḵ lummabi ye nangipaḵaawat ya nangipanoḵnoḵ si mipanggob atte ampangatan Apudyus. Impadasna inawis dida ta amatida ḵan Jesus atte nangiwaḻagawaganna'tte lintog Moses ya da inggilin da udume profetan Apudyus.

Acts 6:5

Nas-om da losane namati si imbagan da apostol woḵ pinilida'ḵ Stephen we ampigsa pammatina ya naittan si ḵabooḻan ni Ispiritu Santu. Da udume napili, aḵ Philip, Prochorus, Nicanor, Timon, Parmenas ya aḵ Nicolaus we osae Gentil we iyAntioch we inunudna ugalin da Judyu.

Romans 11:6

Yaḵon nu gapu'tte ḵinabaḻun Apudyus namiliyana ḵan dida, daḵampun ogon atta ambaḻu we ḵingwada. Te nu gapu'tta ambaḻu we ḵingwada namiliyan Apudyus ḵan dida, daḵampun aḵ mipagapu'tte ḵinabaḻuna.

Romans 3:24

Yaḵon gapu'tte libli ye atod Apudyus ḵan ditaḵu ya gapu'tte ḵinabaḻuna, ḵingwana ditaḵu'ḵ naun-unan mipagapu ḵan Jesu Kristu we nanubut ḵan ditaḵu'tte dusan da basuḻ taḵu.

Romans 5:2

Gapu si pammati taḵu ḵan siya, nidoga taḵu si ḵinabaḻun Apudyus we laḵlaḵ-amon taḵu sinsana ḵad allaylayad taḵu te namnamaon taḵu we midoga taḵu si ḵinangatun Apudyus.

Romans 5:21

Yaḵon naḵabasuḻ da losane tagu ḵad sa ambanaganda matoyda ya misinada ḵan Apudyus aḵ inggana. Sinsadi gapu'tte ḵinabaḻuna'tta tagu ya mipagapu'tte ḵingwan Jesu Kristu we Apu taḵu, aḵ Apudyus angwa si maun-unan da tagu ta mataguda'ḵ inggana.

2 Corinthians 5:11

Pun gapu ta igammuni ye angisipog ḵan Apu, padasonni awison da tagu ta amatida ḵan siya. Yaḵon iniiggammun Apudyus diḵani ye naippun lawweng aḵ panggobni ya namnamaoḵe isuna bose iniiggammuyu diḵani.

2 Corinthians 6:1

Pun diḵani ye maḵaḵewaaḻ ḵan Apudyus, ḵodawonni ḵan diḵayu ta sa ḵinabaḻun Apudyus we inawatyu, awad oḵyan ustu'ḵ ambanagana si antataguyu.

Galatians 5:1

Pun tuttuwae pinuḵayan Kristu ditaḵu! Piona ugudone napuḵayan taḵu. Pun gogomgomanyu oḵyan ya adiyu ogon iyunude ambalin ḵayu'ḵ musassu.

Galatians 5:4

Pun diḵayu we amappadas anuttuwa'tte lintog ta maun-unan ḵayu, naabuse nisina ḵayu ḵan Kristu ḵad nan-awidanyu ḵinabaḻun Apudyus.

Ephesians 2:8

Gapu'tte ḵinabaḻun Apudyus natagu taḵu mipagapu si pammati taḵu ḵan Kristu. Daḵampun atta ḵingwa taḵu yaḵon sa atod Apudyus.

Philippians 3:16

Yaḵon taḵon ay nu ḵatti, ḵasapuḻane pagapagatupan taḵu tuttuwaon da impaigammun Apudyus ḵan ditaḵu.

Philippians 4:1

Pun diḵayu we susunudḵu ḵan Kristu, ipapatiyu we amati ḵan Apu. Ay-ayatoḵ ya amod ayuḵ ḵan diḵayu te diḵayu da amalayad ḵan saḵon ya diḵayu da isun di gungunaḵ atte ḵewaaḻḵu.

Colossians 1:23

Yaḵon ḵasapuḻane pagatupanyu we amapigsa'tta pammatiyu ya adiyu ipyode mayugayug namnamayu we ginanabyu si nandongoḻanyu si Ambaḻu we Damag we niwaḻagawag si intero we lubung. Ḵad sana gapunae saḵon aḵ Paul, nambalinaḵ aḵ anserbi ḵan Kristu.

Colossians 1:28

Iwaḻagawagni'ḵ Kristu atta losane tagu we usaronni losane laingni ye amagbaga ya angituttudu'tta losane tagu ta da pammatida ippun oḵyan kurangna'tte antotollong Apudyus yaḵon amo maangsanda'tte niyossaananda ḵan Kristu.

Titus 2:11

Ḵaḵna oḵyan ugalin da namati te impailan Apudyus ḵinabaḻuna mipagapu'tte nangibuunana ḵan Jesus si annae luta ta taguwona oḵyan da losane tagu'tte madusaanda'tte basuḻ.

Hebrews 12:15

Ḵasapuḻane ilanyu ta naippun oḵyan osa ḵan diḵayu'ḵ an-awidana ḵinabaḻun Apudyus gapu'tte angiyagayanae amati ḵan siya. Te ngaimane angwa ḵan diḵayu'tte ḵaḵnat isuna ampaite muḻae tumubu'ḵ madadailan da adu.

Hebrews 13:9

Pun ilanyu ta adi ḵayu paallelaw atta sabali ya da tinutuli ye tuttudu. Te sa ḵinabaḻun Apudyus amapigsa si somsomoḵ taḵu, daḵampun si angunudan taḵu'tta bilin mipanggob atta maḵan. Te da angunud atta sana naippun maganabda.

1 Peter 5:12

Inggiliḵ anna gapu si badang Silas we imbelangḵu'ḵ mataḻgodane sunud taḵu ḵan Kristu. Inggiliḵ annae abobbae suḻat ḵan diḵayu ta papigsaoḵ pammatiyu ḵan panoḵnoḵaḵ ḵan diḵayu annae tuttuwae ḵinabaḻun Apudyus. Sosomḵonyu we ustu sadi ye ḵinabaḻuna ta adiyu an-awidan.

2 Peter 3:14

Pun ay-ayatoḵe buḻbuḻun, gapu ta sana uuwayon taḵu, igga taḵu ḵabooḻan taḵu ta pumoḻḵas taḵu ya ippun ḵadellawan taḵu'tte antotollong Apudyus ya allin-awa maḵabuḻbuḻunan taḵu ḵan siya.

1 John 2:28

Pun sinsadi, diḵayu we aabengḵu, iinggaw ḵayu ḵan siya ta ippun umogyatan taḵu ḵan mabainan taḵu nu ḵasin umali.

2 John 1:9

Ngaimane tagu we adinapun pagatupane angunud atta tuttudun Kristu yaḵon amo dog-ana, adinapun igammu'ḵ Apudyus. Yaḵon sa tagu we pagapagatupanae angunud atta tuttudun Kristu, iinggaw aḵ Apudyus we Ama ya sa Abengna ḵan siya.