2 Peter 1:3 - Sa Ugud Apudyus

³ Mipagapu si ḵabooḻan Apudyus, innatodna ḵan ditaḵu da losane ḵasapuḻan taḵu ta unudon taḵu naapudyusane antatagu. Maḵwae unudon taḵu sadi te igammu taḵu we siya namili ḵan ditaḵu mipagapu si mismu we ḵinadayawna ḵan ḵinabaḻuna.

2 Peter 1:3 Iomraidhean Croise

Matthew 28:18

Pune sadi, ummadani'ḵ Jesus ḵan dida woḵ ḵanana, “Losane ḵaḻabbongan ad langit ya sina'd luta naatod ḵan saḵon.

Romans 8:32

Gapu ta adipun aḵ Apudyus nagagae nangidatun si os-ossaane abengna para ḵan ditaḵu losan, adinapun ḵamman os itton da losane ḵasapuḻan taḵu gapu si ḵinabaḻuna?

Romans 9:24

Taḵon ay ditaḵu we pinilinae daḵampun aḵ abus da naḻpu'tta Judyu yaḵon da naḻpu bos atta Gentil.

1 Corinthians 1:9

Mataḻgodan aḵ Apudyus we namili ḵan diḵayu'ḵ maḵabuḻbuḻun atte Abengna we aḵ Jesu Kristu we Apu taḵu.

2 Corinthians 12:9

Yaḵon sa insongbatna ḵan saḵon ḵanana, “Lamog ni ḵinabaḻuḵe bumadang ḵan siḵa'ḵ angan-anusam si sanate ampaḵaḻamam. Te amo mipaila ḵabooḻaḵ nu anḵuyaaḵ.” Pun amod de layadḵu we angiyisḵaḻ si ḵinaḵuyaḵ ta iinggaw ḵabooḻan Kristu ḵan saḵon.

Ephesians 4:1

Pun ḵan saḵone nibabaḻud gapu si anserbiyaḵ ḵan Apu, ḵodawoḵ ud ḵan diḵayu ta ibagayyu antataguyu si planun Apudyus we namili ḵan ditaḵu'ḵ taguna.

Ephesians 4:4

Losan taḵu we niyossaan ḵan Kristu, isu taḵun os-ossaane long-ag ya ossaane Ispiritu. Os-ossaan os namnama taḵu gapu si namiliyan Apudyus ḵan ditaḵu.

Philippians 3:8

Ḵad daḵampun aḵ abus sadi, ibelangḵu we ippun pulus anun da losan nu iyisuḵ si nangigammuwaḵ ḵan Jesu Kristu we Apuḵ te napatpatog aḵ adayu nu da ngaiman. Para ḵan siya, imballuḵ losan da sadi ya ibelangḵu we dimoḵda ta maḵwae ganaboḵ maḵabuḻbuḻunaḵ ḵan Kristu,

Philippians 4:8

Sa anungus ni ibagaḵ ḵan diḵayu we susunudḵu ḵan Kristu, siya oḵyan pasigyu sosomḵon da tuttuwa, ampatog, ustu, ampoḻḵas, ambaḻu ḵan ḵadayawan. Ḵad taḵon ay da udume ambaḻu baḵon nu nanggodonge ugud, sadi oḵyan da imumuḻayu'tta somsomoḵyu.

Colossians 1:16

Te mipagapu ḵan siya nangwaan Apudyus atta losane awad ad langit ya da awad sina'd luta, da maila ḵan adipun maila, midoga da papangate isuna bos atta nankalakalasi ye ispiritu we awad da ḵaḻabbonganda ḵan ḵabooḻanda. Ḵingwana da losane banag mipagapu ḵan Jesu Kristu ya para'tte madayawana.

1 Thessalonians 2:12

Sinoḻgagni ya pinapigsani diḵayu ḵan insassaudni ye matagu ḵayu si biyage mas-oman Apudyus ya mibagay atte namiliyana ḵan diḵayu'ḵ midoga si ampangatana ya sa ḵinangatuna.

1 Thessalonians 4:7

Te adimpun Apudyus ditaḵu pinili ta angwa taḵu'tta ḵaissaw ya ḵababbain yaḵon mitotoḵḵon taḵu'ḵ taguna ta bumaḻu ugali taḵu.

2 Thessalonians 2:14

Pinilina diḵayu'ḵ matagu gapu'tte Ambaḻu we Damag we iwwaḻagawagni ḵan diḵayu ta midoga ḵayu'tte ḵinangatun Jesu Kristu we Apu taḵu.

1 Timothy 4:8

Awad de patogna nu paḵosdoḻon taḵu da long-ag taḵu we angwa'tta ḵoon taḵu. Yaḵon simbumaḻu nu paḵosdoḻon taḵu naapudyusane biyag te sadi gattoḵe naḻpuwan ni maganab taḵu si biyag taḵu sinsadi ya nu awad taḵu pos pagay ad langit.

2 Timothy 1:9

Tinaguna ya pinilina ditaḵu ta ditaḵu da taguna. Sa nangwaana si sadi, daḵampun aḵ gapu'tte ḵingwa taḵu yaḵon gapu si panggobna ya ḵinabaḻuna ḵan ditaḵu. Sa daan ni lubung maḵwaan, inggallapun Apudyus simsimmoḵe ipailana ḵinabaḻuna ḵan ditaḵu mipagapu ḵan Jesu Kristu.

Hebrews 1:3

Sa Abeng angil-an taḵu si ḵadayawan Apudyus ya miyiissu ḵinaapudyusna. Ḵad siya amagatup atta losane mipagapu si ḵabooḻan ni ugudna. Ginangputna ḵad pinapoḻḵas da tagu'tta basuḻda, nipauli'd langit woḵ tutuḵdu si madawinan Apudyus we ḵangatuwan ya maḵapangat ḵan siya.

1 Peter 1:15

Yaḵon unudonyu oḵyan naapudyusane antatagu te nasantuwan aḵ Apudyus we namili ḵan diḵayu.

1 Peter 1:5

Gapu'tte ḵabooḻan Apudyus, ayyuwanana diḵayu mipagapu'tte pammatiyu ḵan siya inggana'ḵ mituttuwa anaguwana ḵan diḵayu. Inabusna insagana sanate mataguwane ipailana nu anungus ni timpu.

1 Peter 2:21

Te pinilin Apudyus diḵayu ta siya unudonyu ḵaḵnate antatagu. Te nampaḵaḻam os aḵ Kristu para ḵan diḵayu ḵad impailana antatagu we unudonyu oḵyan.

1 Peter 2:9

Yaḵon diḵayu pinilin Apudyus aḵ ḵabaḻyanna ya isuyu da padi ye anserbi ḵan Apudyus we Ari taḵu. Diḵayu ilin da tagu we nitotoḵḵon para ḵan siya ya ampatoge tagunae ḵinuḵuwwana ta ipaigammuyu nakaskasdaawe ḵingwana. Pinilina bos diḵayu ta tenanyu giḵbot ya inggaw ḵayu si nakaskasdaawe paddana.

1 Peter 3:9

Nu awad angwa ḵan diḵayu'ḵ lawweng, adiyu ibaḻos. Nu awad os an-ugud aḵ lawweng, adiyu songbatan aḵ lawweng yaḵon iluwaḻuyu ḵan Apudyus ta bindisyunana dida. Te pinilin Apudyus diḵayu'ḵ mismu we taguna ta maḵatawid ḵayu si bindisyun.

1 Peter 5:10

Nu maabus sin-aḵitane ampaḵaḻamanyu, aḵ Apudyus we naḻpuwan ni losane ḵinabaḻu, pabaruwona biyagyu ya papigsaona pammatiyu ta adi mayugayug. Siya namili ḵan diḵayu we midoga si ḵabaḻuwane antatagu ḵan Apudyus ad langite ippun anungusna mipagapu si niyossaananyu ḵan Kristu.

2 Peter 1:10

Pun susunudḵu ḵan Kristu, ipapatiyu we angunud si ambaḻu we antatagu ta amanoḵnoḵe inayagan ḵan pinilin diḵayu ḵan Apudyus. Te nu ḵoonyu da sana, adiḵayupun paat maottag si pammatiyu.

2 Peter 1:2

Awad oḵyan ḵan diḵayu amode ḵinabaḻu ḵan lin-awae maḻpu ḵan Apudyus mipagapu si ustu we angigammuwanyu ḵan Apudyus ya aḵ Jesu Kristu we Apu taḵu.

2 Peter 1:5

Ḵad gapu'tte sana, iggayu ḵabooḻanyu ta idogayu si pammatiyu ambaḻu we ugali ḵad sa ambaḻu we ugali, dog-anyu si angigammuwanyu si mipanggob ḵan Apudyus.

2 Peter 1:6

Sa angigammuwanyu, ḵasapuḻane tupodonyu da long-agyu ya ḵasapuḻane attomanyu nu magulugulu ḵayu. Ḵad dog-anyu bos atte naapudyusane antatagu.

2 Peter 1:8

Te nu wadawad da anna ḵan diḵayu ya madog-adog-an, ambanag si amunga'ḵ adu gapu'tte angigammuwanyu ḵan Jesu Kristu we Apu taḵu.

2 Peter 2:20

Nu maabuse miligsida'tte ḵinalawenge antatagun da tagu we adipun amati mipagapu si nangigammuwanda ḵan Jesu Kristu we Apu taḵu ya Anagu ḵan ditaḵu ya mipaulida bose ambalin aḵ musassu ḵan maabaḵ atta gagangaye basuḻda, sillumaweng anungus ni ḵasasaadda nu sa damu.

2 Peter 3:18

yaḵon pagatupanyu oḵyan padason amode ḵinabaḻun Jesu Kristu we Apu taḵu ya Anagu ḵan ditaḵu ḵad dogdog-anyu bos inigammuyu ḵan siya. Madaydayaw oḵyan aḵ Kristu sinsana ya aḵ inggainggana. Amen.