Matyiw 6:9 - Kalam Minimib

⁹ Nɨb ak, God nop sobok gɨnɨg, agnɨmɨb, ‘Bapi cɨn seb kab ar alaŋ mɨdeban; yɨb nak i ar alaŋ mɨdeb.

Kalam

⁹ Nup aŋgniŋniŋg, kun giy aŋgnimimb: ‘Bapiy yomb semb biyoŋ; yimb nand yiy ar biyoŋ mindip.

Matyiw 6:9 Iomraidhean Croise

Matyiw 10:29

Yakɨr sɨkol okok, tap yokop. Kab magɨl lakañ nokɨm nep yokɨl, yakɨr omal dɨpal. Tap yokop ak pen, God kɨrop nɨŋ mɨdeb rek, alap yokop ma yap paknɨgab.

Matyiw 23:9

Lɨm dai wagɨn aul bɨ alap, ‘Bapi bɨ kɨb yad,’ agɨl ma agnɨmɨb. Nap nɨbi nokɨm alap nep mɨdeb karɨp lɨm seb kab ar alaŋ sɨŋak.

Matyiw 26:29

Nɨb agɨl agak, “Yad nɨbep agebin, ñɨg wain aul mɨñi ognap sek ma ñɨŋnɨgain. Kɨsen, God bin bɨ dɨl seb kab ar alaŋ sɨŋak kod mɨdenɨgab ñɨn ak nep, yad nɨbep eip ñɨg wain kɨsen ñɨŋnɨgain,” agak.

Matyiw 26:42

Jisas nɨb agɨl, kauyaŋ am Nap nop sobok gɨl agak, “Tap yɨp gɨnɨg geb yur dɨnɨg gebin ak, kɨrɨg gep rek ma mɨdeb ak, abramek gaŋ; gos nak ke nɨpan ar ak rek gɨnɨmɨn,” agak.

Matyiw 5:16

Nɨb ak rek, nɨbi bin bɨ okok kɨrop gɨ tep gem, bin bɨ okok nɨbep nɨŋɨl, Nap nɨbi seb kab ar alaŋ mɨdeb yɨb nop nep agel ar amnɨgab.

Matyiw 5:48

“Nɨb ak, Nap seb kab ar alaŋ gɨ tep yɨb geb rek, nɨbi ak rek nep gɨ tep yɨb gɨnɨmɨb.

Matyiw 6:14

“Bin bɨ ognap nɨbep gɨ tɨmel gel nɨŋɨl kɨrɨg gɨnɨgabɨm ak, Nap nɨbi seb kab ar alaŋ mɨdeb ak tap si tap tɨmel nɨbi gɨnɨgabɨm ak, ak rek nep nɨŋɨl, kɨrɨg gɨnɨgab.

Matyiw 6:6

Nɨb ak, nɨbi God nop sobok gɨnɨg, karɨp magɨl ñɨlɨk mɨgan nɨbi ak amɨl, kɨjoŋ gɨ ñɨl, Bapi cɨn udɨn ma nɨŋobɨn ak nop sobok gɨnɨmɨb. Tap tari kapkap gɨpɨm ak, Nap nɨbi magɨlsek nɨŋeb rek, tari tari gɨnɨgabɨm nɨŋɨl, mɨnɨm nɨbep nɨŋɨl, nɨbep pen tap tep ñɨnɨgab.

Matyiw 7:11

Nɨbi bin bɨ tep mer ak pen ñɨ pai nɨbi okok, tap tep okok nep ñɨnɨgabɨm. Nap nɨbi seb kab ar alaŋ Bɨ tep yɨb ak, esek ma agnɨgab; nɨbi ag nɨŋnɨgabɨm ak, ne nɨbep tap tep ñɨnɨgab.

Jisas Krais Mɨnɨm Tep ak Luk ñu kɨl tɨkak 15:18

Nɨb ak, yad karɨp lɨm aul kɨrɨg gɨl, bapi mɨdeb sɨŋak kauyaŋ adɨk gɨ amɨl, nop agnɨgain, “God udɨn yɨrɨk ar ne ak gɨ tɨmel gɨl, udɨn yɨrɨk ar nep ak gɨ tɨmel gɨl, gɨpin rek,

Jisas Krais Mɨnɨm Tep ak Luk ñu kɨl tɨkak 15:21

Nap nɨg gek, ñɨ agnɨgab, ‘Bapi, God udɨn yɨrɨk ar ne ak gɨ tɨmel gɨl, udɨn yɨrɨk ar nep ak gɨ tɨmel gɨl, gɨpin rek, nak yɨp ñɨ yad ma agnɨmɨn,’ agnɨgab.

Jisas Krais Mɨnɨm Tep ak Luk ñu kɨl tɨkak 2:14

“God yɨb ne i ar oklaŋ mɨdeb; ne bin bɨ an an cɨb nɨŋɨl dɨ tep gɨnɨgab okok, cɨbur sain sain gos mɨdmagɨl ar nokɨm lep magɨl ak kɨri eip mɨdenɨgab,” aglak.

Jisas Krais Mɨnɨm Tep ak Jon ñu kɨl tɨkak 20:17

Agek, Jisas agak, “Yad karɨp lɨm wagɨn aul kɨrɨg gɨl, Bapi ker adɨk gɨ sɨŋ alaŋ ma ambin rek, yɨp ma dan. Pen nak amɨl, mam sɨkop kɨrop agnɨmɨn, ‘Jisas agɨp, “Yad Bapi yad, Nap nɨbi, God yad, God nɨbi mɨdeb sɨŋak adɨk gɨ amebin,” agɨp,’ agnɨmɨn,” agak.

Pol Rom bin bɨ kɨrop mɨj ñu kɨl tɨkak 1:7

Nɨb ak, nɨbep Rom kai, God, bin bɨ yad mɨdelaŋ, agɨl, dɨ mɨdmagɨl yɨb lɨp okok, nɨbep mɨj aul ñu kɨl tɨkebin. Bapi God, Bɨ Kɨb Jisas Krais, nɨbep dɨ tep gɨl, kod mɨd tep ger me, nɨbi kapkap mɨd tep gɨnɨmɨb.

Pol Rom bin bɨ kɨrop mɨj ñu kɨl tɨkak 8:15

Kaun nɨbi dɨpɨm ak, nɨbep lɨp gɨ dad amek, nɨbi ned pɨrɨkölɨgɨpɨm rek kauyaŋ pɨrɨkɨl, mɨñ wög gep bin bɨ rek ma mɨdenɨgabɨm. Kaun nɨbi dɨpɨm ak, ne gek, God ñɨ pai ne mɨdebɨm. Nɨb ak nɨŋɨl cɨn nop “Aba! Bapi!” apɨn.

Galesia 1:1

Yad Pol, bɨ Jisas mɨnɨm dad ameb alap mɨdebin. Pen wög gɨpin nɨbak, bin bɨ ognap agel aka gos yad ke nɨŋɨl ma gɨpin; Jisas Krais abe, Nap nop gek warɨkak ak abe, kɨri apɨl mal nep ager gɨpin.

Galesia 4:6

Nɨbi ñɨ pai ne yɨb mɨdebɨm rek, God ne Ñɨ ne Kaun ne ak ag yokek, Kaun ak apɨl cɨnop bak goŋ lɨp ak me, God nop “Aba, Bapi,” apɨn.

1 Timoti 6:16

Pen ne nokɨm nep kɨmnɨmɨŋ rek ma lɨp; ne per per nep mɨdenɨgab. Melɨk tep ne ak ke yɨb mɨdeb. Bin bɨ ognap nop udɨn ma nɨpal yɨb; bin bɨ ognap nop udɨn nɨŋnɨmel rek ma lɨp. Bin bɨ alap ne mɨdeb maŋ sɨŋak amnɨmel rek ma lɨp. Ne God Bɨ kɨlɨs yɨb aknɨb ke ak, bin bɨ magɨlsek nɨŋɨl, yɨb ne ak per per nep agel ar amnaŋ. Nɨb aknɨb rek tep.

1 Pita 1:17

God ne bin bɨ okok kɨrop nonɨm lɨl, abramek ma gɨp; gɨpal gɨpal rek nep nɨŋɨl nonɨm lɨp. God nɨg gɨp nɨbak, Bapi cɨn apɨm ak, karɨp ne seb kab ar alaŋ ma ambɨm ñɨn aul, ne Bɨ kɨb aknɨb ke, agɨl, ageb ageb rek nep gɨnɨmɨb.

Repelesin 4:11

“God Bɨ Kɨb cɨn! Bin bɨ magɨlsek okok, nak Bɨ kɨb ke yɨb, agɨl, yɨb nep agel ar amnaŋ. Bin bɨ magɨlsek okok, nak Bɨ tep ke yɨb, agɨl, yɨb nep agel ar amnaŋ. Bin bɨ magɨlsek okok, nak Bɨ kɨlɨs ke yɨb, agɨl, yɨb nep agel ar amnaŋ. Nak tap okok magɨlsek gɨ lɨnak. Nak nep agek, bin bɨ mɨdɨl, tap okok magɨlsek mɨdeb,” agebal.

Repelesin 5:12

Pen meg mɨgan dap ranɨl kɨmep aglɨg gɨ aglak, “Sipsip Ñɨlɨk ñag pak lɨlak ak, ne tep yɨb. Ne tap okok magɨlsek gɨ lak, agɨl, yɨb ne agon ar amnaŋ. Ne tap alap ulep ma gɨp, agɨl, yɨb ne agon ar amnaŋ. Ne gos tep ke yɨb mɨdeb, agɨl, yɨb ne agon ar amnaŋ. Ne kɨlɨs ke yɨb mɨdeb, agɨl, yɨb ne agon ar amnaŋ. Ne tep ke yɨb mɨdeb, agɨl, yɨb ne agon ar amnaŋ. Ne melɨk tep ke sek mɨdeb, agɨl, yɨb ne agon ar amnaŋ. Ne yɨb ke sek mɨdeb, agɨl, yɨb ne agon ar amnaŋ,” aglak.