1 Jon 2:13 - Kalam Minimib

¹³ Nɨbi bɨ kɨb okok, Jisas Krais bɨrarɨk ped okok mɨdɨl mɨñi mɨdeb ak, nop bɨr nɨpɨm ak me, yad nɨbep bɨ kɨb mɨnɨm nɨbaul ñu kɨl tɨkebin. Nɨbi bɨ praj okok, Seten, Bɨ Tɨmel Yɨb ak, nop tob nɨbi mok okok bɨr lɨpɨm ak me, yad nɨbep bɨ praj mɨnɨm nɨbaul ñu kɨl tɨkebin. Nɨbi ñɨ pai mɨdmagɨl yad okok Bapi nop bɨr nɨpɨm ak me, yad nɨbep ñɨ pai mɨdmagɨl yad mɨnɨm nɨbaul ñu kɨl tɨkebin.

Kalam

¹³ Nimb biyomb gok; Bi nind kiñiŋ giy mindek ak nup niŋbim rek, nimbip minj tiksipiyn. Nimb bi paranj gok; Gor minim ak diy, bi timey ak yip penpen gi wiyniym giy mindpim rek, nimbip minj tiksipiyn. Nimb ñapan gok; Bapiy Gor nup niŋbim ak mey, nimbip minj tiksipiyn.

1 Jon 2:13 Iomraidhean Croise

Matyiw 11:27

Jisas nɨb agɨl agak, “Bapi kɨlɨs ne mɨdeb rek, yɨp ñɨb. Bin bɨ ognap yɨp nɨŋ tep ma gɨpal; Bapi nep yɨp nɨŋɨp. Yad nep Bapi nop nɨŋ tep gɨpin. Pen bin bɨ gos tep ñɨnɨm ag gos nɨŋnɨgain okok, kɨrop gos tep ñen, Bapi nop nɨŋnɨgal,” agak.

Matyiw 13:19

“Wid magɨl ognap kanɨb ar sɨŋak yapek, yakɨr okok apɨl ñɨŋnɨgal agesin ak, bin bɨ okok, God bin bɨ dɨl kod mɨdenɨgab mɨnɨm tep ak nɨŋnɨgal ak pen wagɨn ak ma nɨŋnɨgal nɨŋɨl Seten ne gek pɨs nep saköl gɨnɨgal, agɨl agesin.

Matyiw 13:38

Wög dai apin ak, lɨm dai wagɨn aul magɨlsek. Tap yɨŋ tep apin ak, bin bɨ God kɨrop dɨl kod mɨdenɨgab bin bɨ okok. Bɨ tap yɨŋ tɨmel dap yokek tanɨb apin ak, bɨ yɨp nɨŋek mɨlɨk yowɨp Seten nop nep apin. Tap yɨŋ tɨmel tanɨb apin ak, Seten bin bɨ ne okok kɨrop apin. Pen wid magɨl pok gɨnɨgab ñɨn apin ak, ñɨn karɨp lɨm wagɨn aul kɨr gɨnɨgab ñɨn nɨbak apin. Bɨ tɨk dowep apin ak, ejol okok kɨrop apin.

Matyiw 5:37

Nɨb ak, ‘Gɨnɨgain’ agɨl, ‘Gɨnɨgain’ nep agnɨmɨb; pen ‘Ma gɨnɨgain’ agɨl, ‘Ma gɨnɨgain’ nep agnɨmɨb. Mɨnɨm kauyaŋ lɨl agɨl, lɨl agnɨgabɨm ak, Seten nɨbep gos ñek, nɨb agnɨgabɨm.

Jisas Krais Mɨnɨm Tep ak Luk ñu kɨl tɨkak 10:22

Jisas nɨb agɨl agak, “Bin bɨ ognap yad bɨ tigep bɨ rek mɨdebin ak ma nɨpal; Bapi ne nep yɨp nɨŋɨp. Pen Bapi ne bɨ tigep bɨ rek mɨdeb ak, bin bɨ ognap ma nɨpal; yad ke nep nɨpin. Ne yɨp kɨlɨs tap ne okok magɨlsek ñɨb rek, bin bɨ kɨrop yomnɨm agnɨgain bin bɨ okok nep, Bapi kɨrop yomen nop nɨŋnɨgal. Bin bɨ ognap sek Bapi nop ma nɨŋnɨgal,” agak.

Jisas Krais Mɨnɨm Tep ak Jon ñu kɨl tɨkak 14:7

Yɨp nɨŋ tep gɨpkep, Bapi yad ak rek nep nɨŋ tep gɨpkep. Pen mɨñi nɨbi Bapi bɨr nɨpɨm; udɨn magɨl nɨbi ke Bapi bɨr nɨpɨm.

Jisas Krais Mɨnɨm Tep ak Jon ñu kɨl tɨkak 14:9

Agek, Jisas agak, “Pilip. Yad nɨbep eip mɨlek padek mɨdenek ak, yɨp ma nɨŋɨl nɨb ageban ar? Bin bɨ yɨp udɨn nɨpal okok, Bapi abe bɨr udɨn nɨpal. Nɨb ak, nak tari gɨnɨg ageban, ‘Bapi cɨnop yomek nɨŋɨn,’ ageban?

Jisas Krais Mɨnɨm Tep ak Jon ñu kɨl tɨkak 16:3

Nɨg gɨnɨgal ak, Bapi cɨrop apɨl ma nɨpal rek, nɨg gɨnɨgal.

Jisas Krais Mɨnɨm Tep ak Jon ñu kɨl tɨkak 16:33

“Pen nɨbep mɨnɨm ag ñesin nɨbaul, yɨp nab adaŋ nep mɨdɨl, kapkap mɨd tep gɨnɨmɨb, agɨl, ag ñesin. Lɨm dai ar wagɨn aul mɨdebɨm rek, nɨbep mɨker ñɨnɨgal. Pen gos sek mɨdenɨmɨb, tap tari tari lɨm dai ar wagɨn aul nɨbep gɨnɨgab ak, yad kɨlɨs nɨbak magɨlsek dɨ talak mɨgan yad ak bɨr lɨpin,” agak.

Jisas Krais Mɨnɨm Tep ak Jon ñu kɨl tɨkak 17:21

Bapi, nak yɨp nab adaŋ mɨdeban, yad nep nab adaŋ mɨdebin. Cɨr apɨl jɨm ñɨl mɨdobɨr rek, kɨri magɨlsek nɨb aknɨb rek nep cɨr apɨl eip jɨm ñɨl mɨdenɨmel. Nɨg gɨnɨgab ak, nak nep yɨp ag yokek onek ak, bin bɨ lɨm dai ar wagɨn aul mɨdebal okok nɨŋ dɨnɨmel.

Jisas Krais Mɨnɨm Tep ak Jon ñu kɨl tɨkak 17:3

Bin bɨ kɨri, nak God nɨŋɨd nokɨm nep mɨdeban ak nɨŋɨl, yɨp Jisas Krais ag yoknak ak nɨŋnɨgal bin bɨ okok, per per nep komɨŋ mɨdenɨgal.

Jisas Krais Mɨnɨm Tep ak Jon ñu kɨl tɨkak 8:19

Nɨb agek, nop aglak, “Nap nak me akal?” aglak. Agelak, Jisas pen agak, “Nɨbi yɨp ma nɨpɨm rek, Bapi yad nop ak rek nep ma nɨpɨm. Yɨp nɨpkep rek, Bapi yad ak rek nep nɨpkep,” agak.

2 Korid 4:6

God ned “Kɨslɨm nab eyaŋ melɨk gaŋ,” agak. God nokɨm nɨbak nep melɨk ne mɨdmagɨl nab cɨnop adaŋ ñɨ leb. Nɨb ak, God melɨk tep ne ak Krais mɨlɨk jo mɨlɨk melɨk geb ak bɨr nɨpɨn.

1 Timoti 5:1

Bɨ nap sɨkop ognap kɨrop ma ag gɨnɨmɨn; nap nak ke ag ñɨ tep gɨpan rek ak, kɨrop ak rek nep ag ñɨnɨmɨn. Bɨ praj okok, namam nak ke gɨ tep gɨpan rek ak, kɨrop ak rek nep gɨnɨmɨn.

Taitas 2:6

Pen bɨ praj okok kɨrop mɨnɨm kɨlɨs agnɨmɨn, kɨri mɨb goŋ kɨri ke gos gɨp rek nep ma gɨnɨmel.

1 Jon 1:1

Karɨp lɨm bɨrarɨk ped okok ma gɨ lak ñɨn ak, Mɨnɨm Komɨŋ ak mɨdolɨgɨp. Pen ne ke kɨsen ñɨn aul nep apɨl mɨnɨm agek, cɨn mɨnɨm ne peyɨg nɨŋɨl, nop udɨn nɨŋɨl, ñɨnmagɨl lɨ nɨŋnok. Yad Mɨnɨm Komɨŋ nɨbak nep agnɨg gebin.

1 Jon 2:1

Ñɨ pai yad okok. Nɨbi tap si tap tɨmel ma gɨnɨmɨb, agɨl, nɨbep mɨnɨm nɨbaul ñu kɨl tɨkebin. Pen tap si tap tɨmel genɨgabɨm ak, Jisas Krais per per yɨpɨd gɨl nep gɨp ak, ne cɨnop gɨ ñɨl Nap nop agɨl, tap si tap tɨmel gɨpal ak nɨŋɨl kɨrɨg gɨnɨmɨn, agɨp.

1 Jon 2:12

Jisas Krais ne kɨmak ak me, God tap si tap tɨmel gɨpɨm ak nɨŋɨl kɨrɨg gɨp. Nɨbak, yad nɨbep ñɨ pai mɨdmagɨl yad okok mɨnɨm nɨbaul ñu kɨl tɨkebin.

1 Jon 2:14

Nɨbi bɨ kɨb okok, Jisas Krais bɨrarɨk ped okok mɨdɨl mɨñi mɨdeb ak, nop bɨr nɨpɨm ak me, yad nɨbep bɨ kɨb mɨnɨm nɨbaul ñu kɨl tɨkebin. Nɨbi bɨ praj okok, God Mɨnɨm komɨŋ ak mɨdmagɨl nab nɨbep adaŋ komɨŋ mɨdek, nɨbi kɨlɨs gɨl, Seten, Bɨ Tɨmel Yɨb ak, nop tob nɨbi mok okok bɨr lɨpɨm ak me, yad nɨbep bɨ praj mɨnɨm nɨbaul ñu kɨl tɨkebin.

1 Jon 3:12

Adam ñɨ ne Ken gak rek ma gɨnɨmɨb. Ne Seten, Bɨ Tɨmel Yɨb ak, ñɨ ne mɨdɨl, nɨmam kɨsen nop ñag pak lak. Ne nɨmam nop ñag pak lak ak, tari gɨnɨg ñag pak lak? Ne ke gɨ tɨmel gak pen nɨmam Ebol ne gɨ tep gak ak nɨŋɨl nop ñag pak lak.

1 Jon 4:4

Ñɨ pai mɨdmagɨl yad okok. God ne nɨbep nab adaŋ mɨdeb; ne Bɨ kɨlɨs yɨb. Pen Seten ne bin bɨ karɨp lɨm ar wagɨn aul mɨdebal okok kɨrop nab adaŋ mɨdeb; ne bɨ kɨlɨs yɨb mer. God Bɨ kɨlɨs yɨb ak, ne nɨbep nab adaŋ mɨdeb ak me, bin bɨ mɨnɨm tom apal okok gos nɨbep lɨp gɨ dad amnɨmel rek ma lɨp.

1 Jon 5:18

Cɨn nɨpɨn, bin bɨ God ñɨ pai ne mɨdebal okok, tap si tap tɨmel ma gɨnɨgal; God Ñɨ ne kɨrop kod mɨdek, Seten kɨrop gɨ tɨmel gɨnɨmɨŋ rek ma lɨp.

1 Jon 5:20

Cɨn nɨpɨn, God Ñɨ ne apɨl gos tep cɨnop ñek, God per yɨpɨd gɨl agɨp ak nop nɨŋnɨgabɨn. Ñɨ ne Jisas Krais eip jɨm ñɨl mɨdobɨn ak me, Nap God Bɨ yɨpɨd gɨl ak eip jɨm ñɨl mɨdobɨn. Jisas Krais ne God yɨpɨd gɨl ak me. Ne komɨŋ per mɨdeb Bɨ ak.

Repelesin 12:11

Pen ai mam cɨn okok, Sipsip Ñɨlɨk lakañ ne ak abe, Krais mɨnɨm nɨŋɨd ne ak mɨseŋ ag ñölɨgɨpal ak abe gek, Seten nop dɨ mok kɨrop okok lɨlak. Bin bɨ ne nep mɨdobɨn, agɨl, ma pɨrɨk gɨl, cɨnop ñag pak lɨnɨg ñag pak lɨlaŋ, ag gos nɨŋlak.

Repelesin 2:7

“Nɨbi bin bɨ gos tɨmɨd mɨdonɨmɨŋ okok, God Kaun ne Krais bin bɨ ne mɨdebal karɨp lɨm ke ke okok kɨrop mɨnɨm ageb ak nɨŋ tep gɨnɨmɨb. Bin bɨ mɨker apek, gos par ma nɨŋɨl, yɨp cɨg gɨlɨg gɨ nep mɨdenɨgal okok, ñɨn kɨsen onɨgab ak kɨrop agen, per komɨŋ mɨdep mab magɨl God wög dai tep ne ar alaŋ tanɨb ak dɨl ñɨŋnɨgal,” agɨp,’ agnɨmɨn.