Mikeia 7:9 - O Mikanda Ikola

⁹ Kia kà ngi bazela Ngana, nga kà dixibha muene, mukonda nga te kituxi kua muene. Mulonga uami kuila ua u fundisa kiá, muene nʼangi xindila kioso kia ngi tokala, ua kà ngi bheka kua zele, eme anga nga kà mona o kufundisa kuê kua kidi.

Mikeia 7:9 Iomraidhean Croise

II Samuuele 24:17

Davidi anga u ambela Jihova, kia mono o anjo iala kubeta o mundu, uixi: Tala, nga te kituxi eme, eme nga bhange kuthathamana; jimbudi jiji-phe ja bhange kima kiahi? Nga ku diondo, lukuaku lué lu ngi nemene eme, ni dibhata dia tatʼetu.

Jobe 23:10

Maji muene-phe o njila iami ua ijiia; se muene ua ngi lolele, ngeje kutunda utadi ua ulu mukuá.

Jobe 35:14

Né-mbe eie uila, uixi: Ki ngala ku mu mona, hanji-phe, mulonga ué uala bhu pholo iê muène; uila kiki, kinga kua muene.

Jisálamu 119:154

Ngi fundile milonga iami, u ngi kule mu ubhika; u ngi bhane muenhu uobhe, kala ki ua ki tanga.

Jisálamu 37:6

Muene u idikiza o kidi kié kala muanha; kulunga kué ku moneka muene kala kumbi dia mediia.

Jisálamu 43:1

Ngi tetuluile, Ngana Nzambi, u ngi fundile o mulonga uami ni mbutu ia athu a iibha o muẋima; ngi kudile ku kiiala mukua makutu ni mangonha.

Jisálamu 7:6

Balumuka, u Jihova, mu njinda ié; imana mu bateka ió asaluka ni ku ngi seia; phaphumuka mu ku ngi zuelela, kuma mulonga uami eie-muène ua ku tokala.

Jisálamu 94:15

Aiukila mu njila kidi a ki sanga ku pholo; oso emana mixima nzanza, hinu a lungʼâ muene.

Izaía 42:16

Anga ngi batesa o ifofo mu njila kiluua a ijiia, nga kà a bhitisa mu njila ia musanu; o kitombe nga kà ki bilula mukengeji bhu pholo iâ, o njila jala matadi nga ji iukisa. O ima ienhiʼii iene i nga-nda ku a bhanga, ki mungu dingi nga ehelela.

Izaía 42:7

Phala u tonese o mesu a ifofo, ni ku jituna oso a a kuika, ni ku katula muʼaleia oso-a xikama mu kitombe.

Izaía 46:13

Nga kà ku zukamesa o uiukilu uami; ki ua kà sanduka, kana, ni ubhuluilu uami ki ua kà kokoloka; nga kà xikika kubhuluka mu Ziione, ni kizunda kiami mua Izalaiele.

Izaía 51:22

Ngana ié, Jihova dia Nzambi ié, muthu ua-nda kufundila o povo iê, uambe kiki; Eme o dikáu dia kubhendujukʼodio ngi ku tambula-diu kiá, bhu lukuaku lué di tunda-bhu, ni iẋiẋi ia dikáu dia kutema kuami; eie ki mungu dingi u nua-ku.

Izaía 56:1

Jihova, uambe kiki: Kuatenu kilunji, mu bhange ima ia iuka, mbata kubhuluka kuami kua zukama, kufundisa kuami kua-nda kutukuluka kiá.

Jelemiia 10:19

Kokolo diami! Mukonda dia kusekala kuami! O fidila iami ialu ngi bhana misusu iavulu; eme ngambele ngixi: kia kidi kiene, kukata kuku nga-nda soka na-ku.

Jelemiia 14:7

Kia di kalela kiua kuma o ikuma ietu iene ia tu kundula, Jihova tata, bhanga kima, mu henda ia dijina dié; kuma umbalu uetu ua di sokolola; Eie muene tua ku te muene kituxi.

Jelemiia 51:10

O kulunga kuetu, Jihova ua ku bheka mu mukengeji; zenu, nda tu ki tange mu Ziione, o kikalakalu kia Jihova, Nzambi ietu.

Kuditenda 1:18

Jihova ualunguʼê muene; mbata éme-ku, eme nga balukila o ngonge iê; enu-phe, ivenu, mu miji ioso, talenu o kikote kia ngʼiza! Ni ilumba iami ia mizeletete, ni minzangala iami ia mala, ene oso aii-nâ ku ubhika.

Ijila 26:41

Eme uami, mu kuenda-nâ ene, nga a balukila jinga ʼte ki nga a tande mʼoxi ia jinguma jâ; bhenhobho-phe se o muxima uâ ua dibôlo u di tululula, anga o kibetuʼiki kia ikuma iâ a di ẋikina na-kiu, kuamba kia a fuama,

Malakiia 3:18

Bhenhobho bhene bhu mua kà mona dingi o katungu ka muthu uaiuka, ni mukua ituxi ua bhukumuka; ni bhu kaxi ka ió ubheza Nzambi, ni iú ua ditunu ku mu bheza.

I Kolindo 4:5

Uila kiki, kana kuêlesa muthu kiluua a bhixila bhu thembu iê. Kingenu o kufundisa kua kà suka-ku kia kéza Ngana. Muène uà kʼela iosueke mua vundu u i bheka bhua zele, ni ixinganeku iala mu miẋima ia athu u i tukulula. Kiene muthu ni muthu kia ka tambula kua Nzambi o diximanu diê dioso dia mu tokala.

II Timote 4:8

Tundé kiki, kua ngi xikamena kiá kitundu kia kuiuka, Ngana, o Mufundixi uaiuka, ua kà ngi bhana-kiu bhu kizuua kiná; ki eme ngó a ngi bhana, maji ni ene oso kiá a zola o ku di mona mi Muène kià kèza.

Dijingunuinu 18:20

Eie u diulu, mu olele, mukonda dia kusenguluka kuê! Ni enu oso mu akua-Ngana, mu jipoxolo, mu jipolofeta, mu oledienu! Sangulukenu, kuma Nzambi ua batula! Mu ioso ia mi bhange, ua mi bhela-nê kaxtiku!

I Samuuele 24:15

Jihova-phe a batule bhu kaẋi kʼami ni eie, Mufundixi uetu a tale uoso ua bele ni eme ni eie, a ngi fundile mulonga uami, a ngi tambule bhu lukuaku lué.

I Samuuele 25:39

O ki evu Davidi kuila Nabale uafu, u zuela uixi: Nga sakidila Jihova ua ngi fúndila mulonga ua dilebhu diami di nga tambuile kua Nabale, ua ngi fudisa kubhanga kiaiibha eme ngi mubhikʼê. O phulu ia bhangele Nabale, Jihova ua mu vutuila-iu mu mútue uêmuène. Davidi anga u tuma kuta maka kua Abingaíle, phala ku mu sakana, nʼa kale mukajiʼê.

I Samuuele 26:10

Davidi anga u zuela, uixi: Kalé-ku Jihova ku muenhu, kuma muene Johova hinu u mu ta; mba u bhixila bhu kizuua kiê kia kúfua, mba uia mu ita nʼa mu jibhe,

I Samuuele 3:18

Samuuele anga u mu tangela maka moso, ka xi-ku dingi kima. Eli anga u zuela, uixi: Muene Jihova, a bhange kiá kioso kia mono kiauabha ku mesu mê.