Mikeia 3:7 - O Mikanda Ikola

⁷ Akua lumono lua kumona ima kiluua imoneka, sonhi ja kà a kuata; o akua kuzambula a kà tandanganha; xi, ene oso muene a kà jika ku makanu, mukonda kua Jihova Nzambi ki ku tundu njimbu ioso-ioso.

Mikeia 3:7 Iomraidhean Croise

Jisálamu 74:9

Ki bhuala dingi ijimbuete ietu, kana-bhu dingi musèsedi; kana muthu mu dietu uejiia o uíndua iú, mba ua kà suka bhebhi.

Makatukilu 9:11

Anga o imbanda ia akua Ijitu a lémbua kuimana bhu pholo ia Mozé, mukonda dia maveve; kuma a fuluka ni ku imbanda ni ku akua Ijito oso.

Izaía 44:25

Ngi mukua ku tungununa o iphata ia akua kuzambula o makutu, akua kusuma ngó a kituka maioua; jinjimu ngʼa vutula kuema, unjimu uâ ngi u kitula uôua-mu-uôua.

Jelemiia 18:18

Bhenhobho ene exi; Izenu tu di kunde kioso ki tu bhanga mu kununguna Jelemiia; kuma-phe o ngonge ia nganga mba kaiula ka ngambi, mba kizuelu kia musesedi ki iene kufula: izenu tu mu kuame ni dimi, maka mê oso-oso, kana dingi kua evua.

Izekiiele 24:17

Mikemu ié suikika-iu; o athu a fu ku a zuatele ndombe; kutila o dizamba dié ku mútue, o inama ié tá na-iu mu jisabhatu; o pholo ié kana ku i sueka, kua kà die ue o mbolo i ku tumikisa o athu.

Izekiiele 24:22

Anga mua kà bhanga uila ki nga bhange eme: Ki mua kà di vunga jipholo mba mua kà dia mbolo i mi tumikisa athu.

Ijila 13:45

Izuatu ia mukua-dibhute, ua tambula dibhebhu, tandulenu-iu, o kindemba kiê mu mútue kile ni kiene fuandu-fuandu, a mu vungine o muzumbu ua thunda ni kithethele, ende ni ku di kola, uixi: Nga xidi! Nga xidi!

Amoji 8:11

Jihova Nzambi ua tange, uixi: Tala-ze, izuua i iza, nga-nda ku mi tumikisa nzala mu ngongo; ki nzala ia kudia kúdia, mba dinhota dia kunua menha, maji nzala ia kuívua maka ma Jihova.

Mikeia 3:4

Ene a kà di kola kua Jihova, maji muene-phe kʼanda kua evua; kumbi dienhódio ua kà a suekela o pholo iê, mukonda ikalakalu iâ ia bhange a i ibhisa kiavulu.

Mikeia 7:16

O miji iengi a kà ki mona, mesu, jisonhi anga ja kà a kuata, kia kà mona o kutena kué eie; ene, mu ku di uana, maku mâ a kà ma xita ku makanu mâ, anga kua kà eza uxilu mu mátui.

Zakadiia 13:4

Mu kizuuʼomo-phe jipolofeta ja kà kala ni sonhi ia kutanga kisukila kioso kia mono mu uanji ua upolofeta; ene uâ ka kà zuata dingi mandu ia kindemba, phala nʼa kuata kutanga makutu.

I Samuuele 14:37

Saúlo anga u ibhula kua Nzambi, uixi: Ngi kulumuka mu kaiela akua Fidíxia-â? U a telekala lelu bhu maku mami? Muene-phe ka mu vutuila kuala Jihova kizuua kienʼokio.

I Samuuele 28:15

Samuuele anga u ambela Saúlo, uixi: Ua ngi fudisila-hi kunhoha kuami, o ku ngi fukununa kiki eme ngeza bhabha? Saúlo anga u vutuila Samuuele, uixi: Nga tate kiavulu; kuma akua Fidíxia eza ku ngi lua ita, Nzambi phe ua ngi xi, kala ku ngi vutuila dingi, né ku jipolofeta, né ku jinzoji. Kiene ki nga ku ixanena eie, phala u ngʼijidise kioso ki ngi bhanga.

I Samuuele 28:6

Saúlo-phe ki ebhula kua Jihova, Jihova ka mu vutuila, né ku nzoji, né ku Udimi, né ku jipolofeta.

I Samuuele 9:9

Mʼokulu-phe mu Izalaiele, muthu se uedi uia kuzambula kua Nzambi, uila uixi: Tuie ku mumoni; kuma uoso kiki a mu ixana Polofeta, mʼokulu a kexe ku mu ila Mukua kumona.