Mikeia 1:8 - O Mikanda Ikola

⁸ Mukonda dia kiki nga kà di ta mutendu, nga kà buza, nga kʼenda kala muthu a mu bhûndu, ua xala tuẋi; nga kà di ta mutendu kala ki bhanga o jimbulu, nga kà dikola kala kihendembumba.

Mikeia 1:8 Iomraidhean Croise

II Jisobha 18:13

Maji ue, ku tula mu muvu ua kuinhi ni kiuana ua utuminu ua sobha Ezekiia, o Senakedibe, sobha ia Asídia, ua bande mu kúlua ni jimbonge ja nguzu, ja di xitila imbaka mua Juda, ií ua ji tolola.

Estere 4:1

Kiki-phe Moledekai kioso kia zubha ku kʼijiia kioso kia bhiti, ua tandujula izuatu iê, u di ta mu kidinhaji ni utôkua, anga u bhita mu nzunga ia mbonge ni kudikola ni jingololo.

Jobe 30:29

Nga di bhange ngi ndandu ia jimbulu, o injila ia lebha jixingu ni mikoto, ene akuetu u nga di bundu-nâ.

Jisálamu 102:6

Nga soko ni kingungu-a-xitu ku mukáu; nga di bhange kala kihutukudia mu jingûndu.

Izaía 13:21

Maji o iama ia mikáu ia kukuta, muene mu ia kà bhanga kibuta kiâ kia kunhohena; o jinzu jâ ja kèzala ni iama ia temanana; mueneʼomo o iminzoue ionéne, muene mu ia kà tunga; ni imbiámbidi ia kà tuka-tuka jinga mueneʼomo.

Izaía 13:22

O iama ia makanda, idila kala imbùngu, ia kènda ni ku di-handekela nʼakuá mu mazemba mâ ma xiala ngó jingundu, o mabheku ue ma kà nanga jinga mu mazemba ma matonokenu mâ; kuma-phe o kithangana kiâ kia zukama kiá ni izuua iâ ue ki ia kà vula dingi.

Izaía 16:9

Kienhiki ngi dila kiá ni udidilu ua Jazele, mukonda dia muvide ua Sibama; nʼeie Hexebone, nʼeie Eleiale, ngi mi tekele kiá ni masoxi mami, mbata o kusangulukila ibundu ié ia kudinji, ni kumuna kué, kuabhu-ku kiá.

Izaía 21:3

Kienhiki miongo ia ngi kate kiavulu muene; kua ngʼiza misusu kala misusu ia ió uala ku isenda; lamba dia ngi kondo ni kuívua nga lémbua; nga iokojoka katé nga lémbua kumona.

Izaía 22:4

Kala kiki, ngixi: Lungenu o pholo kuengi, eme nga-nda kuẋikujuka ni kudila, ki mu tale hadi ia ku ngi dixibhisa, nga bhondalala mukonda dia kibuika kia mona-kilumba, dia mundu uami.

Izaía 32:11

Teketenu, enu mu ahatu mua di landuka, mu akua usudi; salumukenu, enu mu ana-ilumba, mua tunga mua soma; zulenu mu ende tuẋi-a-thakala, di-ẋiẋikienu kidinhaji mu inhonga.

Jelemiia 4:19

Uá! Vumu diami, vumu diami, tata! A ngi kuama ku muẋima uami! muẋima uami iú lunguta! ku di xibha nga lembua; mukonda o muenhu uami koloneta ua ivué ni milolo ia ita.

Jelemiia 9:1

Tamanu mútue uami ua bilukile menha, o mesu mami ma bilukile fiẋi ia masoxi! Kienhokio ngeju dila imbi ia kilumba kia mundu uami, muanha ni usuku.

Jelemiia 9:10

Ku milundu ngi tela-ku nzongo ia ku dila, mu ididi i dila o ibhaku mu kikangalakata ngi tela-mu jingololo; kuma mua jikata kiá, u bhita-mu ka moneka dingi; ki muala dingi ku tunda kukoma kua ibhaku; tundé ku jinjila ja bhulu, tulé ku iama, edi o bunganʼéel … ia a lenge-mu!

Jelemiia 9:19

Kuma ku Ziione evu-ku dizui dia kudila: Etu tua sengulukʼó! Sonhi ja tu kuata kiavulu, mukonda ixi tua i xi, o ene mabhata metu iá a tu senguluila-nâ.

Izekiiele 32:18

ʼE monʼa diiala, o mundu ua Ijitu tela-u jingololo, u u bhangese o kutuluka, ni uene ni anʼa ilumba ia akua jixi ja makembu, aie mu ixi iala bhoxi kinéne, kua ió ene mu kutuluka mu kina.

Mikeia 2:4

Mu kizuuʼokio a ka mi tela kixanga ni ngololo ia kudila, exi: Tua kakuka, tua suku! Ua mono ni mbandu ia tokala akua muiji uami, muene iú u i lungulula! Tala kia ngi bomona! mikáu ietu ua tu tambula-iu, iu uala ku i uanena athu engi!

I Samuuele 19:24

Anga u zula ue izuatu iê, u ximana ni kutanga uanji ua upolofeta bhu pholo ia Samuuele, hé u zeka ni tuẋi kumbi diosuʼodio ni usuku uê. Mukonda dia kiki a ki ta dingi ku mukûmbi, exi: Saúlo manhi ua di bundu ué mu jipolofeta?