Dijingunuinu 3:8 - O Mikanda Ikola

⁸ Nga ku ijiia ima i uene kubhanga. Ngejiia kuma uala ni kanguzu kofèle. Maji o maka mami ua ma aiuka, o dijina diami kua ditunu-diu. Talesa, nga ku bhana muelu ua jikuka, kana muthu u tena ku u jika.

Dijingunuinu 3:8 Iomraidhean Croise

Jisabhu 30:9

Nga lengesa kuila o ki ngizala, ni jimbote ja ndumba, nga vula ku ku dituna kiá eie, hé ngiia, ngixi: O Jihova muene nanhi? O ki ngi kala ngi ngadiama ia ngadiádia, ngavula kunhana, kifua nga lebhukisa o dijina dia Nzambi.

Daniiele 11:34

O kia kà laúka kienhiki, bhua-ndu kala o ku a bhetula ni kadikuatekesu kòfele ngó; athu àvula a kà zuama ku mbandu iâ, maji enhá a kʼèza ni miẋima iiadi.

Luka 12:9

Maji uoso-phe u ngi di tuna bhu pholo ia athu, Monʼa Muthu ue ua kà mu di tuna bhu pholo ia ji-anju ja Nzambi.

Nzuá 15:20

Lembalalenu o maka u nga mi ambela, ngixi: Mubhika ka tundu ngana iê. Se a ngi zukutisa eme, enu uenu a mi zukutisa; se aiuka maka mami, enu a mi aiuka ue o maka menu.

Nzuá 17:6

Eme nga tukulula o dijina dié ku athu u ua ngi bhana-nâ mu ʼaxaxe ka mundu. Ene a kexile é, eie ua ngi bhana-nâ. Ene a bhake o maka mé;

Jipoxolo 14:27

O kia zubha kutula ni kubhongolola o Ngeleja, a a kunda ima ioso ia bhange Nzambi ni ene. A a kunda ue kioso Nzambi o njila ia kuxikana, kia i jikuila o matumbu.

I Kolindo 16:9

Kuma kunu nga sange-ku kua ngi jikukila muelu ua dikota, ua nguzu ua kubhanga kikalakalu kiambote, suke o jinguma ue ja vulu-ku.

II Kolindo 2:12

Kioso ki nga bhixidile-phe mu mbonge ia Tolouade mu ku kola o Njimbu Iambote ia Kristu, nga muene kuila Ngana ua ngi jikuila njila phala kubhanga-bhu o kikalakalu.

Filipe 4:13

Ima ioso nga soko na-iu mua Kristu ió mukua ku ngi bhana o kutena.

Kolose 4:3

Ki mu kambe ue ku tu sambela etu, phala Nzambi a tu jikuile dibhitu dia kutanga o maka mê, ni dia kutangela o mundu o kijinganu kia Kristu. Mukonda o kijinganu kia Kristu, kiene kia ngi bhekela o ku ngi kuika ni kukala ku malubhambu.

I Timote 5:8

Maji muthu-phe kia kamba kutambula konda ia ene a mu tokala, kota-kota dingi o dianda diê-muène, muthu muenhó ua ditunu o kuxikana, ua tûndu mu kuiibha, ió kiluua a xikana uala ndenge.

II Timote 4:7

Ngalu ita iambote, dikanga dia ngi xindile nga di zubha, o kuxikana ki nga ku eha.

Juda 1:4

Kuma sai-ku athu a kambe o kuxikana, a mi zombela mudienu ni ku dʼimbikisa, ene tunde ukulu a a xindi o kuêla, athu abhumu, o kiadi kia Nzambi ietu a ki kitula uhabhu, o Mesene ietu imoxi, ni Ngana Jezú Kristu, a ditunu-nê.

Dijingunuinu 2:13

Nga ku ijiia bhu ua tungu. Bhene bhuala o kiandu kia Satana. Eie-phe dijina diami ua di jijila, kua ngi di tunu o kixikanu kiami, né mu izuua ia Antipa mbangi iami, fiiele iami, a mu jibhila muʼaxaxe kenu bhenhobho bhua tungu Satana.

Dijingunuinu 2:2

Nga ku ijiia ima i uene kubhanga. Nga ku ijiia ue o kukalakala kué ni kukolokota kué ku uene na-ku. Ngejiia ue kuma akua phulu kutena ku a ehela, o ió a dʼixana jipoxolo, manhi ene ki jipoxolo, eie ua a lola, ua a mono makutu.

Dijingunuinu 22:7

Jezú uixi: Bhulakanenu! Eme ngi lenguluka kuiza! A zediua ió oso aiuka o maka ma upolofeta mu divulu didi!

Dijingunuinu 3:1

O anjo ia Ngeleja ia Salade, mu sonekene kiki: Eme ió uala ni sambuadi dia Nzumbi ia Nzambi, ni sambuadi dia théthembua, uambe kiki: Eme nga ku ijiia o ima ioso i uene kubhanga. Ngejiia ue kuma uala ni fuma ia kukala u muthu ua muenhu, manhi uafu!

Dijingunuinu 3:10

Mukonda eie ua bhake o maka mami, kioso ki nga ku ambela kukala ni muanu, eme uami ngi ku bhaka mu kithangana kia phaxi, hinu ki tukulukila mundu uoso, mu kulola ene oso a tungu mu ngongo.

Dijingunuinu 3:15

Nga ku ijiia o ima i uene kubhanga. Ngejiia kuma eie kua talala, kua tema. Nginda-phe u talala, mba u tema!

Dijingunuinu 3:7

O Anjo ia Ngeleja ia Filadélfia, mu sonekene kiki: Eme ió ukôla, mukua kidi, uala ni sabhi ia kexile ia Davidi, uila kia jikula kana muthu u jika, o kia jika kana muthu u jikula, ua-mbe kiki: