Dijingunuinu 20:2 - O Mikanda Ikola

² Anga u kuata mudikixi, na kinhoka kiòkulu-ô, muène Diabhu, mba Satana, anga u mu kuta phala a bhange midi ia muvu bhu lubhambu.

Dijingunuinu 20:2 Iomraidhean Croise

Dimatekenu 3:1

Tala, o nhoka-phe i beta kudimuka, jixitu joso ja iangu ndenge, ja bhanga Jihova Nzambi. Nhoka anga i ambela muhatu, ixi: Kifua Nzambi ua mi kidika kudia ku miẋi ioso ia díbhia?

Dimatekenu 3:15

Nga-nda kuta unguma bhu kaẋi ké eie ni muhatu, ni bhu kaẋi ka mbutu ié-eie ni mbutu iê-muène; muene ua kà ku bula o mutue, eie ua kà mu numata o kasende.

Jobe 1:7

Bheneʼobho Jihova uibhula Satana uixi: Ua tundu kuebhi? Satana u vutuila Jihova, uixi: Mu ku kondoloka o ngongo ni kunhunga-mu.

Izaía 24:22

Anga ene-oso a kà a lunjika mu ngenda kala jipelezo, à kala ku upelezo mu katutu; o ki bhita dingi nzungule ia izuua, a kà a zungila luamukuá.

Izaía 27:1

Mu kizuua kienhókio, Jihova ua kà sunga xibhata iê ia kolo, iónene, ia nguzu, iene ia kà bhana na-iu o njumbu kua Leviatane, o kinhoka ki lenga lusolo, ni kua Leviatane, muene kinhoka kia di jinga lukata, anga o mudikixi uene muʼalunga ue, nʼa u jibhe.

Izekiiele 47:5

O kia zonga dingi midi, mueza kiá ngiji i nga lémbua o ikuzáuka, mukonda o menha mê ma zongo kiá, a fuama kiá ngoho ku a zauka ni kuzoua, kuma ngiji kiá ki i xikina dingi ku i bhita.

Matesu 19:29

Uoso ue u-xa jinzu, mba jiphange ja mala, mba jiphange ja ahatu, mba tata, mba mama, mba muhatu, mba ana, mba jixi, mu henda ia dijina diami, ioso ia-xi i mu vutukila luhâma, hé ua kà lundula ue ni muenhu ki uàbhua.

Matesu 8:29

Talesa-phe, ene a di kola, exi: Eie tua kukala nʼ ihi, u Monʼ a Nzambi? Kífua ueza kunu mu ku tu talesa hadi, o thembu kiluua ngó i bhiẋila?

Marku 4:15

Oso-phe a a kuua bhu mbanduʼa njila, enhá, kia zubha kuívua maka, kithanganʼokio Satana uiza, u katula o maka oso a kuuile ku miẋima ia.

Marku 5:7

anga u di kola ni dízui dia suina, uixi: Eme nga kuata-hi ni eie, u Jezú, u Monʼa Nzambi, ua suka ku ukota? Nga ku bhingi mu dijina dia Nzambi, kana ku ngi talesa hadi.

Nzuá 12:31

O kithangana kia kufundisa o mundu iú, kieza-bhu kiá. O sobha ia mundu iú a-nda ku mu kaia.

Nzuá 16:11

A bhambuka mù kuijiia ki kala o kufundisa, mukonda o sobha ia mundu iú a mu êlesa kiá.

Loma 16:20

O Nzambi, otho ia paze ietu, kindala uanda ku titidila Satana bhoxi dia inama ienu. O kiadi kia ngana ietu Jezú Kristu, ki kale ni enu oso.

Jihebeleu 2:14

O ana-phe, kala kia exana muène, a kala athu a nomona ku xitu ni manhinga. Uila kiki, Jezú muène ua di bhange kala ene, mu kutambula o kidifuanganu kia muthu, phala mu kubhita ni kalunga a tene kutolola ió uoso ua kuata o nguzu ia kalunga, muène Diabhu.

I Phetele 5:8

Kalenu ku mesu azele, mu di lange! Kuma o nguma, Diabhu, ua di bhange, mukuâ ni hoji iala mu zuma, u nhunga jinga mu jimbamndu jenu mu kusota uoso a mu dia.

II Phetele 2:4

Kuma Nzambi kia kambele kuehela ji-anju ja tele kituxi, maji ua ji kaiesa katé mu ifernu, iú ua ji kuikila ku malubhambu mu makungu ma usuku katé bhu kizuua kia kufundisa.

Juda 1:6

Xinganekenu ue kuila ni ji-anju ja kambele kubhaka o ukota uâ, ja xi o kididi kia a tokala, Nzambi ua ji kuika bhoxi dia usuku, ku malubhambu ma kolela-ku katé bhu kufundisa kua Kizuua kiná kia dikota.

Dijingunuinu 12:13

Mudikixi kia mono a mu lundumuina bhoxi, u kuata kulandameka o muhatu ua vuala monʼa diiala.

Dijingunuinu 12:15

Kinhoka anga ki lukula mu kanu diê menha ma kaiela muhatu mukuâ ni ngiji, phala a mu kungulule ni menha.

Dijingunuinu 12:17

Mudikixi anga u kuatela muhatu njinda iavulu, u tunda-bhu bhenhobho, hé uia mu kùlua ita ni iá a subhuka ku luvualu lua muhatu, ió oso ene mu bhaka o ijila ia Nzambi, hé a jijila o umbangi ua kidi kia Jezú Kristu.

Dijingunuinu 12:3

Anga ku moneka kijimbuete kiamukuá ku diulu. Kimudikixi kia dikota, kikusuka, kiala ni sambuadi dia mítue ni kuinhi dia lumbinga, o ku mítue iê ku kala sambuadi dia kitundu.

Dijingunuinu 12:4

Ni mbônde iê, anga u koka mbandu ia katatu ia jithéthembua ku diulu, hé u ji lauila mu ngongo. Mudikixi anga uimana bhu pholo ia muhatu ua-nda kudisanza, phala kia zubha kudisanza, monʼê a mu die.

Dijingunuinu 12:9

Kimudikixi kia dikota anga a mu takuila ku kanga! A mu kaia, na Kinhoka Kiokulu, a mu ila Diabhu, a mu ila Satana, mukua kunganala o mundu uoso. A mu lundumuina mu ngongo, ni ji-anju jê a ji lundumuina-nê kumoxi.

Dijingunuinu 13:2

Kiama ki nga mono, kidifua kiê kala ongo, o inama iê kala kitôto, o dikanu diê kala dikanu dia hoji. O mudikixi muène ua bhana o kiamʼiki o kutena kuê, ni kiandu kiê, ni ungana uavulu.

Dijingunuinu 13:4

Ene oso anga a bheza o mudikixi, mukonda muène ua bhana o kijingo kiê ku kiama. Anga a bheza ue o kiama, exi: Nanhi ua soko ni kiama mu nguzu? Ua tena kùlua-nê, mukuahi?

Dijingunuinu 20:10

Bhenhobho, o Diabhu ua a bhombo, a mu takuila ue mu kizanga kia túbhia ni xofidi, mu ala kiá o kiama a mu takuila momo kumoxi ni polofeta ia makutu. Enhá à kala muenhomo, mu ku a tatesa usuku ni muanha, mu mivu ni mivu sè dizubhilu.

Dijingunuinu 20:7

O midi ia mivu ki ia kà zubha kubhita, Satana a mu jituna muʼaleia kê.

Dijingunuinu 9:11

O sobha iâ, aia-nê mu ku a tumina, muène o anjo ia dikungu ki di moneka hole. Muenhú, o ʼjina diê mu Hebeleu a mu ila Abadoni, o mu Ngelèku exi Apoliioni. (Kifua-phe ambe exi muène Nguma-Ngonga-Kihuènde; Na Zanga-Ioso).