Daniiele 9:21 - O Mikanda Ikola

²¹ O ki nga kuata o kuzuela kiki ni kusamba, o dikuenze Ngabidiiele, nga mu muene mu kisuma kiami kia kuandekela, ueza ni kutuka malusolo, bhu kumbi dia sata ia ngoloxi, ua bhiẋila, u ngi kuata lukuaku.

Daniiele 9:21 Iomraidhean Croise

I Jisobha 18:29

Anga ki bhita-phe kuma, kia bhiti kaxaxi ka kizuua, kumbi ku mediia dia sembuluka-ku kiá, ene a kuata kuzambula katé mu ola ia kubhana mubhaku ua musa ku ngoloxi, hanji-phe ki kuene dízui, ki kuene kuitaia mba ngó ku a suua.

I Jisobha 18:36

Hé ki bhita-phe kuila ki a zubha kubhikila o kithangana kia kubhana o mubhaku ua musa, polofeta Elija u zukama, anga u zuela, uixi: Eie u Jihova, Nzambi ia Mbalahamu, ni Izake, ni Izalaiele, di tukulule mbé lelu a kʼijiie kuma eie-muène u Nzambi mu Izalaiele, ni kuila ue kuma eme ngi ngunza ié, o ima ioso iii nga i bhange mu kizuelu kié.

Jisálamu 103:20

Tanesenu Jihova, mu ji-anjo jê; mu mazonda, mua xikamena muene ku mi tuma, muène mu tumaka izuua ioso o dízui diê.

Jisálamu 104:4

Muene, jiphunga jê ja katula, o milenge; o makuenze mê, milengo ia túbhia.

Jisálamu 141:2

Musambu uami u bande ko kué, kala uasu ua dizumba; o makuʼami, kia sununuka, a kale kala sata ia ngoloxi.

Makatukilu 29:39

Mbudi imoxi u i sata mu kimene, o mbudi iamuká mu ngoloxi, kuila mixinda ia maku ia jimi kiá.

Izaía 6:2

O Jiselafí ji mu zenzamena ku thandu; kala selafí ia kexi ni mabhabha masamanu; Maiadi ma futile-nâ o jipholo jâ, maiadi ma futile-nâ o inama, maiadi mamukuá ma kutukila.

Izekiiele 1:11

O jipholo jâ ni mabhabha mâ, ku thandu, ja di kexidila; kala xelubini o mabhabha mê a di-kexidila kiiadi-kiiadi kumoxi, o aiadi a mukuá ene a di vungu na-u o mikutu iâ.

Izekiiele 1:14

O iama iia anga iza ni kulenga, ita tuhonda mukua ni ki teleka jinzaji.

Izekiiele 14:14

Né-mbe hanji mu kaxi kâ mu kala kitatu kiki: Noué, Daniiele ni Jobe, ene ngoho mu kuiuka kuâ eji kubhulula o mienhu iâ—Jihova Nzambi ua ki tange.

Daniiele 10:10

Talesa-phe, bhu kala lukuaku lua ngi tuta, anga lu ngi bhetula, anga ngi kala ku jiphuna ni mâkanda a maku.

Daniiele 10:16

Talesa-phe, kua tukuluka muthu, ua di-fuangana ni anʼathu, iu ua ngi tuta ku mizumbu; dikanu-phe dia ngi jikuka kiua, anga ngi zuela, hé ngʼambela ió ua ngʼimanena ku pholo ngixi: Muadiʼami, tata, kisuma kieniki kia ngi bhekela misusu, ki ngala ni nguzu mu mukutu.

Daniiele 10:18

Ió mukua kidifua kia muthu-phe, ua ngi babata dingi luamukuá, iú ua ngi bhangesa kukala dingi ni nguzu iengi.

Daniiele 8:16

O ku kibumu kia ngiji ia Utai, ngevu-ku dízui dia muthu, dia dikola, diexi: Ngabidiiele, o iú mu ijidise kioso kia jimbula o kisuma!

Daniiele 8:18

O muene kia kexe ku ngi zuelesa kiki, nga dibhale ni pholo bhoxi, eme ngʼambuka. Maji o muene-phe ua ngi babata, iú ua ngi imika nzànza bhene bhua ngi sangeʼabha.

Matesu 27:46

Ku bhixila mu ola ia kàvua, Jezú u di kola ni dízui dia suina, uixi: Eli, Eli, lama sabachthani? Ku ki jimbulula, uedi: Nzambi iami, Nzambi iami, ua ngʼ ehelela-hiʼá?

Luka 1:19

Mukunji anga u mu tambuijila, uixi: Eme Ngabidiiele, ngene kuimana bhu pholo ia Nzambi. Muène iu ua ngi tumu ku ku zuelesa, ku ku tudila o njimbu iíi iambote.

Luka 1:26

Nzebele mu kuimita kuê, kia bhixila mu mbeji ia kasamanu, mukunji Ngabidiiele anga a mu tuma kuala Nzambi, ku sanzala ia Ngalileia, a ixana Nazalé.

Jipoxolo 10:3

Muene u mona kisuma ku mesu mazele, mu ola ia kàvua ku kizuua, (o ola ia katatu ku kiemba) anju ia Nzambi ia mu tukulukila, uixi: Koloneliu!

Jipoxolo 10:9

Kukia ni kimene-phe, kioso ki ala mu njila, a zukama kiá mu mbonge ia Jopa, Phetele u banda ku thandu dia ʼnzo mu kusamba mu ola ia mediia.

Jipoxolo 12:7

Talesa-phe, bhu mbandu iê bhu imana anju ia Ngana, mu kaleia mu di muika mukengeji. Anju anga i bhana Phetele huxi mu jimbanji, u mu phaphumuna, uixi: Lenguluka, u balumuke! Malubhambu mê anga ma mu zuluka mu maku.

Jipoxolo 3:1

Kiki-phe, mu ola ia katatu ku kièmba, kizuua kimoxi Phetele ni Nzuá a kala mu banda mu Tembulu mu ola ia kusamba.

Jihebeleu 1:14

O kiki-phe, ji-anju kima kiahi bhu pholo iê? Ene oso ala jinzumbi ji sedivila, a a tumu ku sedivisu mukonda dia ibhinganu ia tokala o kubhuluka.

Jihebeleu 1:7

O mu ku tanga o ji-anju-phe, Nzambi, uixi: Nzambi ua bhangesa ji-anju jê kubiluka kitembu, o akua-mbele iê, mulengu ua tubhia.

Dijingunuinu 9:17

O mu kisuma kiami, nga mono kienhiki o jikabalu ni athu a ji mondala. A zakela ivunga-thulu ia di fuangana kala túbhia mu kukusuka, ni ku tadi dia azulu, ni kuzeluluka kala xofidi. O mítue ia jikabalu iedi kala mítue ia jihoji, o mu kanu diâ mu fuafua túbhia, ni dixi ni xofidi.