2Tim 4:3 - ÎVUKU RÎA ÛVORO MWARO

³ Mavinda nîmagaûka rîrîa andû makaarega kûthomithua maûndû marîa magîrîrîte. Nwatî nîmakeyûnganîria arimû ao kûringana na merirîria mao. Arimû acio nîmakaamakenia, nîûndû makaaragia maûndû marîa matû mao mendete kwîgua.

2Tim 4:3 Iomraidhean Croise

1Atha 18:22

Elija nîwacokire akîra andû atîrî, “Nînie tu ndigarîte nîrî mûrathi wa Ngai-Mûnene nwatî arathi a Baali nî magana mana ma mîrongo îtano (450).

1Atha 22:18

Ahabu, mûthamaki wa Isiraeli nîwerire Jehoshafati atîrî, “Kinthî ndikwîrire, atî ndandathagîra wanarî ûndû mwaro? Arathaga ûndû ûyû mûcûku tu vîndî cionthe!”

1Atha 22:8

Ahabu, mûthamaki wa Isiraeli nîwacokirie atîrî, “Kûrî na mûrathi wa Ngai-Mûnene ûmwe ûtigarîte, Mikaia, mûvîcî wa Imula. Nwatî ndimwendete nîûndû ndaanaratha wanarî ûndû mwaro ûmbîgiî; vîndî cionthe andathagîra maûndû mama macûku.” Jehoshafati nîwamûcokerie atîrî, “Mûthamaki, ndwagîrîrwe nî kuga ûguo!”

Ntha 32:33

Ngai-Mûnene nîwacokerie Musa atîrî, “Andû arîa meevirie nîo ngaavuta marîîtwa mao îvukuurî rîakwa.

Isaia 28:12

Kûnarî ûguo, nîwerîrîte andû aya atîrî, “Ûyû nîguo ûvurûko; nîngûva arîa anogu ûvurûko. Ava nîvo varî ûvurûko,” nwatî nîmaaregire kûnthikîrîria.

Isaia 30:10

Meraga oni maûndû atîrî, ‘Tigani kwona maûndû.’ Na makeera arathi atîrî, ‘Mûtigatûrathîre maûndû marîa magîrîru, twaragîrieni maûndû marîa maro, na mûrathage maûndû ma maveeni.

Jeremia 18:18

Nao andû nîmaacokire makiuga atîrî, “Ûkani tûvange ûrîa tûkûraga Jeremia. Tûtigatura athînjîri-Ngai a gûtûthomithia kana andû aûgî a gûtûtaara na arathi a kwanîrîra ndûmîrîri ya Ngai-Mûnene. Ûkani tûmûthitange na ciugo ciake ke mwene na tûtikathikîrîrie ûrîa arauga.”

Jeremia 27:9

Kwoguo mûtikathikîrîrie arathi enyu, aringi a mbûgû enyu, aroti enyu kana arogi enyu. Andû aya onthe mamwîraga mûtigatungatîre mûthamaki wa Babuloni.

Jeremia 29:8

Nîûndû Ngai-Mûnene mwene vinya wonthe, Ngai wa Isiraeli arauga atî mûtigetîkîre kûveenua nî arathi na aragûri arîa marî gatagatîrî kenyu na mûtikathikîrîrie iroto ciao.

Jeremia 5:31

arathi methîrîtwe makîruta ûrathi wa maveeni, na athînjîri-Ngai makathana wa ûrîa makwenda. Andû akwa makona ûndû ûcio ûrî mwagîrîru. Nwatî maûndû mama makinya mûthiia mûgeka atîa?”

Mika 2:11

Ethîrwa mûndû nwa athiî akîaragia maveeni, akiugaga atî, ‘Nîmûrathagîra atî ndivei na njovi nîciîthîrwa irî nyîngî,’ mûvunjia ta ûcio nîke andû aya mangîenda.

Luka 20:19

Vîndî wa îo, arimû a Watho na anene a athînjîri-Ngai nîmaageririe kûnyita Jesû nîûndû nîmaaicî atî aavecanire ngerekano îo nîûndû wao. Nwatî nao nîmeetigîre andû.

Luka 6:26

Na kaî mue andû arîa mûkumagua nî andû onthe mûrî na thîna-î! Nîûndû ûguo nwaguo methe ma andû acio meekire arathi a maveeni.”

Johana 8:45

Nwatî nie mbaragia ûvoro wa ma na nîkîo mûrarega kûmbîtîkia.

Ciîko 17:21

(Andû onthe a Athene na arîa engî maatûûraga kuo maumîte mavûrûrirî mageni nîmeendete mûno gûtûmîra mavinda mao monthe kûvecana na kûthikîrîria ûndû wa wonthe mûgeni.)

1Akor 2:1

Ariû na aarî a îthe wetû, rîrîa naûkire kûrî mue kûmûvunjîria ndûmîrîri îgiî nthitho ya Ngai ndiatûmîra ciugo ndito kana ûûgî mûnene.

1Akor 2:4

Ngîthomithia na ngîvunjia ndiatûmîra ciugo irî na ûûgî wa kîûmûndû irîa igucagîrîria andû, nwatî natûmîre ciugo cionanagia vinya ûrîa ûvecanagwa nî Roho wa Ngai.

Agal 4:16

Nîkwa rîu nduîkîte nthû yenyu nîûndû wa kûmwîra ûma?

1Tim 1:10

Watho watuirwe nî ûndû wa imaramari, arûme arîa mamenyanaga kîîmwîrî na arûme arîa engî, andû arîa mendagia andû arîa engî, arîa maveenanagia na makaruta ûira wa maveeni kana andû arîa mekaga maûndû marîa mataringanîte na kîrîra kîrîa Kîam ma.

2Tim 1:13

Rûmagîrîra waro maûndû marîa wîguîte maumîte kûrî nie marî kîonereria kûrî we ûrî na wîtîkio na wendo irîa tûgwataga kuuma kûrî Jesû Kristû.

Juda 1:18

O maamwîrire atîrî, “Vîndî îrîa mavinda ma mûthiia magaakinya, nîgûkaumîra andû makaamûnyûrûria, na marûmagîrîra merirîria mao matarî ma ûngai.”