Vhagi Buni 1:9 - Fhe Bakɨmen Kaman Kameŋ

⁹ Gu Zon, gu nde phorga guigira Zisas khothɨgi guma ma. Gu nde phorgap, nza Zisas ntɨɨri ma. Gu khurkhum nde khuav, simtɨgi gu zaagi ndi. Gu nde phorgap, nza Fhe Bakɨme wo gumgi gu mbigi garim, nza ana piin ki. Nza za wari tɨga thivgia havhargiap, simtɨgi ndi. Gu Fhe Bakɨmen buna vhuueŋ bun nzuav, gu khaŋ nzuai, “Gu Zisas khothɨgi.” Maaŋ muuŋgiap, mbe panan na kegap, na ndi kha rɨgɨkɨrige tɨgi, mba rɨgɨkɨrige, mbe kha zɨn niŋge rɨgi, Patmos.

Vhagi Buni 1:9 Iomraidhean Croise

Matiu 20:23

Mani ne nzuaim, Zisas ne mbararagiap, khaŋ mani ga nzuai, “Ŋko guigira gu mbɨrga mbɨ khɨnigen mbɨrga. Ŋko mba the nan guva haren pigɨrga, the nan ŋkɨn haren pigɨrga ne, ne na bigeŋ fhuvara. Gu mba ŋanenin pigɨrga gumgi ndi fɨrga tuktɨgi fhuvara. Mba mpirmpirɨganin pigɨrga gumgi, nan Ndia mba gumgi kaŋgiap, ana mbe ndi fegi mpirmpirɨgani ma.”

Mak Khergi Kaman Vhuuŋ 10:39

Mani ana ŋgarkarav khaŋ nzuai, “Ahaŋ, ŋka tuktɨgi.” Mani maaŋ nzuaim, Zisas mbaram khaŋ mani ga nzuai, “Ŋko gu mbɨrga mbɨ khɨnigeŋ, ŋko niŋgen mbɨrga. Ŋko gu ruarga mbɨ shirɨ, ŋko vhɨra ana ruarga.

Zon Khergi Kaman Vhuuŋ 16:33

Gu khueŋ vuzvugi, nde na phorgɨrga, nde ndavi mbɨrarga. Gu maaŋ muuŋgiap kha kamen nde nzuai. Nde kha nuianan ki tugen simtɨgi nden hɨrga, nde wari won ndavi havhargip wari kɨri. Gu kha nuianan ŋkasŋka, gu ana kambarigi.”

Farasegi Gumgi 1:15

Mba tugen, guigira Zisasan buni vhuuiŋ khothɨgap, ana zɨn vui gumgi gu mbigi, mben vhɨrve khaŋ muuŋgi, 120. Mba gumgi gu mbigir vhɨrve kim, Pita khavgiap mben rɨga thɨgap khaŋ nzuai,

Farasegi Gumgi 14:22

Mani vergap, mani mba Zisas khothɨgap ana zɨn vui gumgi gu mbigi, mani maam mbe ndavi khavav, mbe ndavi havhari buni mbe nzuai. Mani mbe nzuav kama havharar khaŋ mbe nzuai, “Nde Zisas khothɨgap ana zɨn vui tɨv, nde guigira ana suirav, havhargiri. Nza Fhe Bakɨme won gumgi gu mbigi ganɨrim, mbe ana piin kɨrga ŋgun ŋgirɨ saŋv, nza fharav simtɨgi vhɨrve ki tuav, nza ana ŋgɨgɨrga.”

Khe Por Romiŋ Ndi Khergi Gap 8:17

Nza Fhe Bakɨmen tari ki. Maaŋ muuŋgiap, nza zumgum Fhe Bakɨme nzan nɨɨn za suaŋgi bigir vhuuiŋ, nza Krais phorgɨp nta ndirga. Nza ntigem maaŋ muuŋgip ana ndigi zaagi, nza nta ndirga, nza zumgum zɨ bakɨme ndiv, ana phorgɨp mpirmpirɨga vhuun muuŋgirga.

Khe Por Romiŋ Ndi Khergi Gap 8:25

Nza kaŋgi, nza mba rarga ki bigi, nza nta gangi fhup, nza maaŋ muuŋgiap, nza wari won ndavi havhargiap mba bigir, rarga ki.

2 Korin 1:7

Ŋka guigira khueŋ khothɨga havhargi, nde thɨgɨ havhargirga. Ŋka kaŋgi, nde ŋka phorgap mba simtɨgi ndi, nde vhɨra ŋka phorgɨv ndava mɨɨtɨga ndirga.

Firipai 1:7

Nde nan gori ma. Maaŋ muuŋgiap, gu nzerara kha ndɨkndɨga vhuuŋ nden ki. Gu bɨnan ki o, gu Zisasan buna vhuueŋ kurkurav ne havhari, nde za na khuav, mba Fhe Bakɨme na kora muuŋgiap na nɨɨŋgi ŋaara mbui.

Firipai 4:14

Gu khaŋ nzuai, nde nan kurkurav na muuŋgi bigi, nta nzerigi. Ne khaŋ muuŋgi, nde na khuuav gu ndi simtɨgi ndirgane ndɨkndɨgap, nde nan kurkurav, mba tɨvar vhuun na muuŋgi.

2 Tesaronaika 3:5

Nza khueŋ vuzvugi, Guma Bakɨme ndɨkndɨgar nden nɨɨŋrim, nde ndɨkndɨgi nzerara kɨv, nde Fhe Bakɨme guigira won ndavar kha gumgi gu mbigi ga ndɨɨi tɨv, nde guigira ana kaŋgip, nde vhɨra Krais thɨga havhargiap simtɨgi ndigine, nde vhɨra ne kaŋgirga.

2 Timoti 1:8

Maaŋ muuŋgiap, ndu nza wo Bakɨme buna vhuueŋ bun suangen mberɨ thari. Ndu vhɨra nan mberɨ thari, gu ana khuav bɨnan ki guma ma. Ndu Fhe Bakɨme han ŋkasŋka ndigip, na phorgɨp Fhe Bakɨme buna vhuueŋ bun nzuai nen simtɨga ndiri.

Hibru 10:36

Nde khaŋ tɨgɨp havhargip Fhe Bakɨmen rargɨp, nde Fhe Bakɨme vuzvugi zɨn ŋgɨri. Nde maaŋ muunga, Fhe Bakɨme fhum nden nɨɨn zav suaŋgi bigir vhuuiŋ, nde nta ndigirga.

1 Pita 5:1

Gu ntigem nde sios gari gumgir pani, gu nde suan za mbui. Gu vhɨra nde mbui ŋaarara mbui. Gu vhɨra won rɨmanira, gu Krais garim, ana zaa ndigi. Gu zumgum nza zam wari tɨgɨra mba Fhe Bakɨme nzan nɨɨn za suaŋgi bigir vhuuiŋ, Krais ŋkasŋka bakɨme gu zɨ bakɨme zumgum za kɨrar hɨgɨrga, nza mba bigi ndirga. Maaŋ muuŋgiap, nde sios gari gumgir pani, gu maaŋ muun zav nde nzuai.

Vhagi Buni 1:1

Fhum kha buni zorga kim, Zisas Krais nta ndi hiaŋ tɨgi. Fhe Bakɨme maaŋ muuŋgiap, kha bunin Zisas ga nɨɨŋgim, ana ntan won ŋaara gumgi khɨvɨrga. Mba bigi, nta vhemkora hɨgɨrga. Maaŋ muuŋgiap, Zisas won enser ga sarigim, ana za mba bigi bun, gu Zon anan ŋaara guma, ana nta bun na suaŋgi. Gu mba buni bun ana ŋaara gumgi ga suanga.

Vhagi Buni 1:2

Gu Zon, gu mba bigi gangiap, gu Zisas Krais Fhe Bakɨme bunin na suaŋgim, gu nta bun nzuai. Gu nta bun nzuav, gu khaŋ nzuai, mba buni, nta guigira buni guari ma.

Vhagi Buni 1:4

Gu Zon, gu kha gava khergiap, nde mba Esia ŋgu bakɨme fhain ki harathɨgi siosir ki gumgi gu mbigi, gu anan nde ndi mbai. Ntige khar ki Fhe Bakɨme, ana fhum guarara ki Fhe Bakɨme ma. Ana vhɨra zumgum taagi zirɨrga. Ana fhura nden korar muuŋv, nden ndavir muuŋrim, nde ndavi mbɨrav wari kɨri. Mba harathɨgi ŋiniŋgi, mbe Fhe Bakɨmen ŋgui vhɨrve gari guman pan pigi mpirmpirɨga nɨma thivgiap ki. Mbe vhɨra fhura nden korar muuŋv, nden ndavir muuŋrim, nde ndavi mbɨrav wari kɨri.

Vhagi Buni 1:6

Ana nza muuŋgim, nza anan Ndia Fhe Bakɨme piin ki gumgi gu mbigi ki. Nza kav, Fhe Bakɨmen rotu garim, nza za kha bigi ga suaŋv ara han ŋgɨp, nza zazera harigi gumgi gu mbigir kurkurigi. Mba Fhe Bakɨme, ana Zisasan Ndia ma. Zisas Krais, ana zazera guigira zɨ bakɨme kav, ana ŋkasŋka ki. Ne guigi guarara.

Vhagi Buni 11:7

Mani Fhe Bakɨme buni vhuuiŋ bun suanga ŋaarar muuŋgi thugɨrga, mba ruaŋruaŋgi sɨk mba khɨn kɨ kakagi mbok thav, kɨrar hɨrga. Ana kɨrar hɨgɨp, mani phorgɨp shogɨrga. Ana mani phorgɨp shogɨp, mani kambarav, mani shogirim, mani rimgirga.

Vhagi Buni 12:11

Nza phorgap guigira Zisas khothɨgi gumgi gu mbigi, mbe ntara mbuav, wari won pana guma kambarav, ana mbevigi. Mbe Sipsiva Ŋguga vɨzɨn gum mbe Fhe Bakɨme buna vhuueŋ bun nzuai, nen panan ana mbevigi. Mben pana guma mbe shogim, mbe vhɨzi, mbe nen rɨvi fhu. Mbe nzerara kha nuianan kɨrga ndɨkndɨk havhargi fhuvara. Mbe guigira Zisas khothɨgav, ana zɨn ŋgɨp, rɨmɨn zavra ki.

Vhagi Buni 12:17

Maaŋ muuŋgiap, mba kuruk, ana guigira mba mbiga nzuav ndav shigi. Ana maaŋ muuŋgiap vov, ana mba ki tari gu nzɨgi, ana mbe shogɨr za mbui. Mba gumgi gu mbigi, mbe Fhe Bakɨme nzuai tɨvi zɨn vov, Zisasan buna vhuueŋ bun nzuav, ana zɨn vui.

Vhagi Buni 13:10

Fhe Bakɨme bɨnan kɨr saŋv guma the farasararga mba guma bɨnan kɨrga. Ana maaŋ muuŋgip ntari ga mbui kozan shogirim, rɨmɨn zav farasarigi guma, mbe ntari ga mbui kozan ana shogirim, ana rimgirga. Mba khesharigi tɨvi nden hɨrim, nde guigira Zisas khothɨgi gumgi gu mbigi, nde khaŋ thɨgɨp havhargip, ana khothɨgi ndɨkndɨga suirav havhargiri.

Vhagi Buni 14:12

Mba khesharigi tɨvi khuen nza khɨvi, nza guigira Zisas khothɨgi gumgi gu mbigi, nza thɨgɨ havhargip kɨri. Nza mba gumgi gu mbigi, nza Fhe Bakɨmen tɨvi zɨn vov, nza guigira Zisas khothɨgi ndɨkndɨk, nza ana suirigi.

Vhagi Buni 19:10

Gu mbara wo thɨpanani phɨrgiap, mba enser nɨman fav, gu ana rotur muun za mbui. Ana mbara khaŋ na nzuai, “Ndu maaŋ muuŋ thari! Gu ndu phorgap guigira Zisas khothɨgi gumgi gu mbigi, gu vhɨra nde phorga Fhe Bakɨmen ŋgari guma mbe ma. Nde Zisas nzuai buni guari, nde guigira nta khothɨgi ntɨɨri ma. Nde Fhe Bakɨmera rotur muuŋri. Nza kaŋgi, Zisas nzuai buni guari, ntara gumgi ndavi vheri khavav, ŋkasŋka mbe nɨɨŋgim, mbe Fhe Bakɨme buni bun nzuai.”

Vhagi Buni 20:4

Gu mbaram garav, gu ŋgui vhɨrve gari gumgir pani piigi mpirmpirɨgi mbari garim, nta Hevenan ki. Gu gumgir ntuu mbari garim, mbe nta piigiap ki. Mba gumgi, mbe vhɨra guigira Zisas khothɨgap ana nzuai buni guari bun nzuav, khaŋ tɨgap havhargiap, Fhe Bakɨme buni vhuuiŋ bun nzuaim, mben pana gumgi ne nzuav mbe fhɨri gorgim, mbe vhɨzgi gumgi gu mbigi ma. Mbe vhɨra mba ruaŋruaŋgi sɨga rotu muuŋgi fhu. Mbe vhɨra anan tuma kargi bigɨna rotu muuŋgi fhu. Mbe vhɨra anan tum gum anan zɨ mben ŋivkɨri gu farir ki fhuv gumgi gu mbigi ma. Mbe taagia khavgiap, zazera mbara muuŋgiap ki bɨɨŋbɨɨŋ ndigi. Fhe Bakɨme kha nuianan ki gumgi gu mbigi muuŋgi tɨvi mbatɨgi ga suaŋv mbe suanga ŋkasŋka gum ŋaarar mbe nɨɨŋgim, mbe mba ŋaara mbui. Mbe vhɨra Krais phorgɨp ŋgui vhɨrve gari gumgir pani kɨv kɨrim, mba 1,000 mpari vhɨzgirga.

Vhagi Buni 3:10

Nde na kameŋ zɨn vov, nde hi simtɨgi, nde za thɨga havhargiap, nta ndi. Maaŋ muuŋgiap, gu nde ganɨnga, mba za kha nuianan ki gumgi gu mbigir hɨv mben panɨnga mparmpare gum mba zaagi, nta nden hɨgɨrga tuktɨgi fhuvara.

Vhagi Buni 6:9

Gu mbaram gari, mba Sipsiva Ŋguk mba gava mpɨrigi meeŋthɨgi kendorar vhera daaŋgi. Gu garav, gu fhum vhɨzgi gumgir ntuu garim, mbe Fhe Bakɨme nzuav ofa mbui artara piin ki. Mba gumgi, mbe fhum Fhe Bakɨmen buna vhuueŋ suira havhargiap, ne bun nzuaim, mbe mbe shogim, mbe vhɨzgi gumgi ma.

Vhagi Buni 7:14

Gu ana ŋgarkarav khaŋ nzuai, “Gu kaŋgi fhu, guman rum, ndu mbe kaŋgi.” Ana khaŋ na nzuai, “Mba gumgi, mbe fhum mba simtɨgi gum zaagi mbatɨgi guarira hi tugir, mbe thɨga havhargiap, mbara muuŋgia kegi gumgi ma. Mbe mba Sipsiva Ŋgugar vɨzɨna wari won shagi huri mpeeiŋ ruagim, nta guigira hurgi.