တ︀ိမ︀ေႃတ︀ေ ႑ 1:12 - Khamti Shan

¹² ꩡ︀ဝ်ႛယ︀ေꩬ︀ုၵ︀ရ︀ီတ︀်ꩭဝ်း ꩡ︀ဝ်ႛဢ︀ꩫ︀်ႈက︀ဝ်ႈမ︀ႆ︀ႛဢ︀မ︀ူးမ︀ꩫ︀်းꩡ︀ဝ်ႛက︀ဝ်ႈꩭီတ︀်ထႅက︀်ႉဢ︀ူꩫ︀ꩬ︀ီ ပ︀ူင︀်ႈဢ︀ၢပ︀်ႉꩭႂ်ႛမ︀ႃးင︀ႆ︀း ꩭႂ်ႛပ︀ူဝ်းက︀ဝ်ႈꩭီတ︀်ꩫ︀ႆ︀ႇက︀ေႃႇ ꩭႅင︀်းထႅမ︀်ꩭႂ်ႛမ︀ႆ︀ႛက︀ဝ်ႈယ︀ူဝ်းယ︀ွင︀်ႛလ︀ူင︀်ꩫ︀မ︀်။

တ︀ိမ︀ေႃတ︀ေ ႑ 1:12 Iomraidhean Croise

မ︀တ︀်တ︀ႄး 20:4

င︀ႆ︀းꩬ︀ီ ၵ︀ဝ်မ︀ႆ︀ႛက︀ေႃႇ “ꩬ︀ူက︀ေႃႇ ꩬ︀ူꩫ︀်က︀ဝ်ႈမ︀ႆ︀ႛက︀ႃꩭီတ︀်တ︀ႃႉ။ က︀ဝ်ႈလ︀ႅမ︀်းꩬ︀ီꩭႂ်ႛက︀ွတ︀်” ꩫ︀ဢ︀ူ။

ယ︀ေႃးꩭၢꩫ︀် 5:23

က︀ွပ︀်ႉပ︀ိူဝ်ႈꩫ︀ႆ︀ႇꩬ︀ီ က︀ူꩫ︀်းꩫ︀ႆ︀ႇၵ︀ဝ် ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛꩫ︀ၢပ︀်ႉယ︀မ︀်ႈꩫ︀က︀ꩫ︀်ႈ လ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ဝႃႈꩫ︀ၢပ︀်ႉယ︀မ︀်ႈက︀ꩫ︀်ႈꩫ︀မ︀်။ က︀ူဝ်ႇဢ︀ꩫ︀်ႈလ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛ မ︀ဝ်ꩫ︀ၢပ︀်ႉယ︀မ︀်ႈꩫ︀ႆ︀ႇယ︀ႃႇ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛၸ︀ူႛပ︀ွႆ︀ꩡ︀ႂ်ႇလ︀ုက︀်ႉမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ꩵ︀ႈꩫ︀ၢပ︀်ႉယ︀မ︀်ႈ။

ထဝ်ꩡ︀တ︀်ႉၵ︀ဝ် 16:15

င︀ႆ︀းꩬ︀ီ မ︀ꩫ︀်းင︀ႆ︀းက︀ူꩫ︀်းꩭိူꩫ︀်းမ︀ꩫ︀်းတ︀င︀်းꩭိူꩫ︀်း ꩭူမ︀်ႈꩭၢပ︀်ႉမ︀ၢင︀်က︀လ︀ႃꩡ︀ူမ︀်ႈꩫ︀မ︀်ႇဢ︀ူ။ ယ︀ဝ်ႇက︀ီးမ︀ꩫ︀်းယ︀ႃႇ “ꩬ︀င︀်ဝႃႈꩬ︀ူꩡ︀ဝ်ႛ က︀ဝ်ႈၵ︀ႃႛမ︀ႆ︀ႛ မ︀တ︀်ႉၸ︀ူႛယ︀ုမ︀်ယ︀မ︀်ႈတ︀ေႇတ︀ေႇꩫ︀မ︀်ꩫ︀က︀ီး ꩭိူꩫ︀်းတ︀ူႈၵ︀ႃႛမ︀ႆ︀ႛ မ︀ႃးꩬ︀ဝ်းတ︀ီၵ︀ႃႛမ︀ႃးတ︀ႃႉ” ꩫ︀ꩬ︀ီ တ︀ူႈမ︀ႆ︀ႛတ︀င︀်းꩡ︀ႂ်ႈတ︀င︀်းၵ︀ူဝ်းပ︀ၢင︀်းဢ︀ူ။

ထဝ်ꩡ︀တ︀်ႉၵ︀ဝ် 9:15

ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ “က︀ႃတ︀ႃႉ။ မ︀ꩫ︀်းယ︀ႃႇ က︀ူဝ်ႇဢ︀ꩫ︀်ႈက︀ဝ်ႈꩡ︀ဝ်ႛလ︀ိူက︀်ႉဝႆ︀ႇ ꩭၢင︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်၊ ꩡ︀ဝ်ႛꩭူဝ်ၵ︀မ︀်းꩫ︀ႆ︀ႇၵ︀ဝ်င︀ႆ︀း ဢ︀ီတ︀်ꩬ︀ြေးꩫ︀ႆ︀ႇၵ︀ဝ်မ︀ႆ︀ႛ ꩭူဝ်းလ︀ွင︀်ႈက︀ဝ်ႈꩫ︀မ︀်။

ထဝ်ꩡ︀တ︀်ႉၵ︀ဝ် 9:22

ꩫ︀ႆ︀ႇꩫ︀က︀ေႃႇꩬ︀ေႃလ︀ုယ︀ႃႇ ꩡ︀ဝ်ႛယ︀ေꩬ︀ုပ︀ီꩫ︀်ႈꩡ︀ဝ်ႛမ︀ေꩬ︀ိယ︀ꩫ︀မ︀်ꩫ︀ꩫ︀ႆ︀ႇ ꩬ︀ၢက︀်ႉꩬ︀ေပ︀ျႃးထုက︀်ꩰꩬ︀ီ ꩭူဝ်းဢ︀ူ။ င︀ႆ︀းꩫ︀ႆ︀ႇꩬ︀ီ က︀ျူးဝီင︀်းတ︀မ︀ႃတ︀ႅတ︀်ꩫ︀ႆ︀ႇၵ︀ဝ်ယ︀ႃႇ မ︀ꩫ︀်းမ︀ႆ︀ႛထီင︀်ꩵ︀ႈပ︀ေႇ။

က︀ေႃရ︀ိꩫ︀်တ︀ု ႑ 15:10

ꩫ︀ႆ︀ႇꩫ︀က︀ေႃႇ လ︀ႆ︀ၢးပ︀ိူဝ်ႈက︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛꩬ︀ီ င︀ႆ︀ႚက︀ဝ်ႈပ︀ီꩫ︀်ႈတ︀မ︀ၢꩫ︀်ꩡ︀ဝ်ႛမ︀ႃးꩫ︀မ︀်။ က︀ျေးꩡ︀ူးမ︀ꩫ︀်းꩡ︀ဝ်ႛမ︀ႆ︀ႛက︀ေႃႇ ꩭႂ်ႛပ︀ူဝ်းမ︀ဝ်ၵ︀ွတ︀်ꩫ︀ႆ︀ၢႈꩫ︀ႆ︀ႇ တ︀မ︀ၢꩫ︀်ꩡ︀ဝ်ႛတ︀င︀်းမ︀ိူင︀်းမ︀ႆ︀ႛꩬ︀ႃꩬ︀ီ က︀ဝ်ႈꩬ︀ေႈꩡ︀ႃႉမ︀ႃးဢ︀ူ။ င︀ႆ︀းꩫ︀က︀ေႃႇ ဢ︀မ︀ႂ်းယ︀ႃႇ ဢ︀ꩫ︀်ႈက︀ဝ်ႈꩬ︀ေႈꩡ︀ႃႉꩵ︀ႈꩡ︀ႂ်ႈ။ က︀ျေးꩡ︀ူးၸ︀ြႃးပ︀ီꩫ︀်ႈꩡ︀ဝ်ႛꩫ︀မ︀် က︀ꩫ︀်ႛꩫ︀ႂ်းက︀ဝ်ႈမ︀ႆ︀ႛ ꩭီတ︀်ဢ︀မ︀ူးဢ︀ူꩫ︀ႆ︀ႇ။

က︀ေႃရ︀ိꩫ︀်တ︀ု ႑ 3:5

ꩬ︀ူဝႃႈင︀ႆ︀းက︀ီး ဢ︀ႃပ︀ေႃလ︀ုꩫ︀ꩫ︀ႆ︀ႇၵ︀ꩫ︀်တ︀ႂ်းၸ︀ႂ်ꩫ︀ႆ︀။ ပ︀ေႃလ︀ုꩫ︀ꩫ︀ႆ︀ႇက︀ေႃႇၵ︀ꩫ︀်တ︀ႂ်း ၸ︀ႂ်ꩫ︀ႆ︀။ ꩭၢင︀်းၵ︀ိူဝ်ယ︀ႃႇ ၸ︀ူႛꩡ︀ႂ်ႇၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈꩬ︀ူမ︀ႆ︀ႛꩡ︀ွႆ︀ႈဢ︀ဝ်ႈယ︀ုမ︀်ယ︀မ︀်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩫ︀ႆ︀ၢႈꩬ︀ႃး။ ꩭၢင︀်းၵ︀ိူဝ်ယ︀ႃႇ ဢ︀ꩫ︀်ႈꩫ︀င︀်ၸ︀ြႃးပ︀ီꩫ︀်ႈꩡ︀ဝ်ႛꩡ︀ႂ်ႇꩫ︀ႆ︀ႇ ꩭီတ︀်ꩫ︀ႆ︀ၢႈꩬ︀ႃး။

က︀ေႃရ︀ိꩫ︀်တ︀ု ႑ 7:25

ꩡ︀ႃႇလ︀ိူင︀်ႈ လ︀ွင︀်ႈက︀ူꩫ︀်းလ︀ွတ︀်ႉꩫ︀ႆ︀ႇၵ︀ဝ် ꩬ︀ူတ︀ႅမ︀်ႛမ︀ႃးꩫ︀ႆ︀ႇမ︀ႆ︀ႛ ၵ︀ႂ်ႈတ︀ွပ︀်ꩭႂ်ႛꩫ︀ႆ︀ႇယ︀ႃႇ က︀ဝ်ႈမ︀ႆ︀ႛၸ︀ြႃးပ︀ီꩫ︀်ႈꩡ︀ဝ်ႛꩵ︀ႈꩫ︀ေꩭႂ်ႛဝႆ︀ႇ။ ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛက︀ဝ်ႈမ︀ႆ︀ႛတ︀ၢင︀်းꩭူႇတ︀ွင︀်း ပ︀ူင︀်ႈꩭႂ်ႛမ︀ႃးꩫ︀ႆ︀ႇꩬ︀ီ ꩫ︀င︀်က︀ူဝ်ႇဢ︀ꩫ︀်ႈဢ︀က︀မ︀်ꩫ︀ႆ︀ႛက︀ူဝ်ႇလ︀ိူင︀်ႈꩫ︀က︀ꩫ︀်ႈ ဝႃႈက︀ွတ︀်ꩫ︀က︀ီး

က︀ေႃရ︀ိꩫ︀်တ︀ု ႒ 4:1

င︀ႆ︀းꩫ︀ႆ︀ႇꩬ︀ီ လ︀ႆ︀ၢးပ︀ိူဝ်ႈၸ︀ြႃးပ︀ီꩫ︀်ႈꩡ︀ဝ်ႛ တ︀ူႈမ︀ႆ︀ႛဢ︀ီꩫ︀ူႈင︀ႆ︀း ဢ︀မ︀ူးဢ︀ꩫ︀်ႈꩭူဝ်းလ︀ွင︀်ႈၵ︀ၢမ︀်းၵ︀တ︀်ႉမ︀ႂ်ꩫ︀ႆ︀ႇပ︀ူင︀်ႈꩭႂ်ႛꩫ︀ႆ︀ႇꩬ︀ီ တ︀ူႈယ︀ႃႇ မ︀ိူဝ်ႈလ︀ႂ်ႈက︀ေႃႇ ꩡ︀ႂ်ႈꩵ︀ႈၸ︀ေႛ။

က︀လ︀ႃတ︀ိ 3:26

ꩭလ︀ိုဝ်ꩫ︀ႆ︀ꩫ︀က︀ီး ꩬ︀ူ ꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩬ︀ီ ဢ︀ူက︀ꩫ︀်ႛꩫ︀ႂ်းမ︀ꩫ︀်းꩡ︀ဝ်ႛင︀ႆ︀းꩬ︀ူတ︀င︀်းလ︀ုင︀် ပ︀ီꩫ︀်ႈလ︀ုက︀်ႉၸ︀ြႃးပ︀ီꩫ︀်ႈꩡ︀ဝ်ႛက︀ꩫ︀်ႈယ︀ဝ်ႇ။

က︀လ︀ႃတ︀ိ 3:28

င︀ႆ︀းꩫ︀ႆ︀ႇꩬ︀ီ ၸ︀ꩫ︀်းက︀ျူး၊ ၸ︀ꩫ︀်းဢ︀ꩫ︀်ႈက︀ျူးမ︀ဝ်ꩡ︀ႂ်ႈ၊ ၵ︀ႃႛ၊ က︀ူꩫ︀်းလ︀ွတ︀်ႉ၊ ၸ︀ူႛယ︀ိင︀်း၊ ၸ︀ူႛꩡ︀ႆ︀ၢးꩫ︀ꩬ︀ီ ဢ︀ꩫ︀်ႈက︀ၢက︀်ႉက︀ꩫ︀်ႈꩵ︀ႈယ︀င︀်းယ︀ဝ်ႇ။ က︀ွပ︀်ႉပ︀ိူဝ်ႈက︀ꩬ︀င︀်ꩫ︀ႆ︀ꩫ︀က︀ီး ꩬ︀ူတ︀င︀်းမ︀ိူင︀်း က︀ꩫ︀်ႛꩫ︀ႂ်းꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ႆ︀ႛ ပ︀ီꩫ︀်ႈက︀ူဝ်ႇလ︀ိဝ်ႈယ︀ဝ်ႇ။

ၸ︀ိလ︀ိပ︀်ပ︀ၢႆ︀ 2:11

ꩡ︀ဝ်ယ︀ေꩬ︀ုၵ︀ရ︀ီတ︀်ယ︀ႃႇ ꩡ︀ဝ်ႛꩫ︀မ︀်ꩫ︀ꩬ︀ီ က︀ူꩫ︀်းက︀ူႈက︀ူဝ်ႇꩭၢပ︀်ႉက︀ွမ︀်းက︀ꩫ︀်ႈင︀ႆ︀း ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛက︀ေႃႇ တ︀ီယ︀ူဝ်းယ︀ွင︀်ႛက︀ꩫ︀်ႈꩫ︀မ︀်။

ၸ︀ိလ︀ိပ︀်ပ︀ၢႆ︀ 4:13

က︀ဝ်ႈမ︀ႆ︀ႛ ꩡ︀ဝ်ႛယ︀ေꩬ︀ုၵ︀ရ︀ီတ︀်တ︀ꩫ︀်းၵ︀ူဝ်းꩭႂ်ႛꩫ︀ႆ︀ႇꩬ︀ီ ဢ︀ꩫ︀်ႈမ︀ꩫ︀်းꩡ︀ဝ်ႛꩭႂ်ႛꩭီတ︀်ꩫ︀ႆ︀ႇတ︀င︀်းလ︀ုင︀် က︀ဝ်ႈꩭီတ︀်ပ︀ီꩫ︀်ႈဢ︀ူ

က︀ေႃလ︀ေႃတ︀ႄ 1:25

ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ဝ်ႈမ︀ႆ︀ႛဢ︀မ︀ူးဢ︀ꩫ︀်ႈ ꩬ︀ူမ︀ႆ︀ႛ ဝႃႈꩭူဝ်းၵ︀ၢဝ်ႈၵ︀ၢမ︀်းꩫ︀ီႈမ︀ူတ︀်ꩰꩫ︀ႆ︀ႇပ︀ူင︀်ႈꩭႂ်ႛꩬ︀ီ ꩭႂ်ႛꩡ︀ွႆ︀ႈꩡ︀ိူဝ်းမ︀ꩫ︀်းꩡ︀ဝ်ႛဢ︀ူ။

တ︀ိမ︀ေႃတ︀ေ ႑ 1:1

တ︀ိမ︀ေႃတ︀ေꩴ︀း မ︀ႂ်းၸ︀ြႃးပ︀ီꩫ︀်ႈꩡ︀ဝ်ႛမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇꩬ︀ီ မ︀ႂ်းမ︀ႆ︀ႛ ꩫ︀င︀်လ︀ုက︀်ႉက︀ဝ်ႈꩡ︀ဝ်ႛꩫ︀က︀ꩫ︀်ႈမ︀တ︀်ႉꩬ︀ီ က︀ဝ်ႈပ︀ေႃလ︀ုတ︀မ︀ၢꩫ︀်ꩡ︀ဝ်ႛꩡ︀ဝ်ႛယ︀ေꩬ︀ုၵ︀ရ︀ီတ︀် လ︀ိက︀်ႉတ︀ႅမ︀်ႛမ︀ႃးယ︀ဝ်ႇ။ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛၵ︀ေꩬ︀ေꩭဝ်း ꩫ︀ၵ︀ႃ ꩡ︀ဝ်ႛယ︀ေꩬ︀ုၵ︀ရ︀ီတ︀်ဢ︀ꩫ︀်ႈꩭဝ်းတ︀ႂ်းထႃႛꩫ︀ႆ︀ႇ မ︀ႂ်းမ︀ႆ︀ႛ ဢ︀ီꩫ︀ူႈꩭၢက︀်ႉꩭွမ︀်ꩬ︀ီ ꩭႂ်ႛဢ︀ဝ်ႈက︀တ︀်ယ︀ီꩫ︀်ႈၵ︀ႅမ︀်းꩬ︀ႃက︀ႃတ︀ႃႉ။

တ︀ိမ︀ေႃတ︀ေ ႑ 1:11

တ︀ြႃးꩫ︀ႆ︀ႇယ︀ႃႇ ဢ︀ꩫ︀်ႈၵ︀ၢဝ်ႈၵ︀ၢမ︀်းꩫ︀ီႈ လ︀ွင︀်ႈꩡ︀ဝ်ႛယ︀ေꩬ︀ုမ︀ႆ︀ႛယ︀င︀်း ဢ︀ꩫ︀်ႈက︀ဝ်ႈမ︀ႆ︀ႛ ၸ︀ြႃးဢ︀ꩫ︀်ႈမ︀ူꩫ︀်ႈၸ︀ုင︀်းယ︀ႂ်ပ︀ူင︀်ႈဢ︀ၢပ︀်ႉꩬ︀ီ ꩭႂ်ႛꩭူဝ်းမ︀ႃးꩫ︀ႆ︀ႇꩫ︀မ︀်။

တ︀ိမ︀ေႃတ︀ေ ႑ 6:13

ပ︀ၢင︀်ႈꩫ︀ႃႛၸ︀ြႃးပ︀ီꩫ︀်ႈꩡ︀ဝ်ႛ ဢ︀ꩫ︀်ႈတ︀င︀်းမ︀ိူင︀်းမ︀ႆ︀ႛ ꩭႂ်ႛဢ︀ꩬ︀ၢက︀်ႉမ︀ႆ︀ႛတ︀မ︀ိူင︀်း၊ ပ︀ၢင︀်ႈꩫ︀ႃႛꩡ︀ဝ်ႛယ︀ေꩬ︀ုၵ︀ရ︀ီတ︀် ဢ︀ꩫ︀်ႈပ︀ၢင︀်ႈꩫ︀ႃႛၵ︀ုꩫ︀်ပ︀ုင︀်တ︀ိပ︀ိလ︀ၢတ︀်မ︀ႆ︀ႛ မ︀ဝ်က︀ူဝ်ႈမ︀ဝ်ꩬ︀ွင︀်ꩬ︀ီ လ︀ွင︀်ႈꩬ︀မ︀်မ︀ႃတ︀ြႃးꩭီတ︀်ꩬ︀ၢက︀်ႉꩬ︀ေမ︀ႃးမ︀ႆ︀ႛတ︀မ︀ိူင︀်း မ︀ႂ်းမ︀ႆ︀ႛ က︀ဝ်ႈဝႃႈက︀ွတ︀်၊ ဢ︀မ︀ူးဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ မ︀ႂ်းမ︀ႆ︀ႛ ပ︀ူင︀်ႈꩭႂ်ႛꩫ︀ႆ︀ႇၵ︀ဝ် က︀ႃႈꩡ︀ဝ်ႛယ︀ေꩬ︀ုၵ︀ရ︀ီတ︀်မ︀ဝ်က︀ျွႃးမ︀ႃးꩫ︀ႆ︀ႇ ꩬ︀ႅတ︀်ႉꩡ︀ႃယ︀င︀်းꩬ︀ီꩭီတ︀်တ︀ႃႉ။

တ︀ိမ︀ေႃတ︀ေ ႒ 2:2

တ︀ြႃးဢ︀ꩫ︀်ႈက︀ဝ်ႈ မ︀ႂ်းမ︀ႆ︀ႛ ပ︀ၢင︀်ႈꩫ︀ႃႛက︀ူꩫ︀်းꩬ︀ၢက︀်ႉꩬ︀ေဢ︀ၢꩫ︀်တ︀ၢꩫ︀်မ︀ႆ︀ႛ ꩬ︀ွꩫ︀်ꩭႂ်ႛမ︀ႃးꩫ︀ႆ︀ႇ က︀ူꩫ︀်းဢ︀ꩫ︀်ႈဢ︀က︀မ︀်ꩫ︀ႆ︀ႛ၊ ဢ︀ꩫ︀်ႈပ︀ိူꩫ︀်ႈမ︀ႆ︀ႛ ꩬ︀ွꩫ︀်ꩭႂ်ႛပ︀ွက︀်ႉပ︀ီꩫ︀်ႈꩫ︀ႆ︀ႇၵ︀ဝ်မ︀ႆ︀ႛ က︀ၢပ︀်ꩬ︀ီꩬ︀ွꩫ︀်ꩭႂ်ႛတ︀ႃႉ။

တ︀ိမ︀ေႃတ︀ေ ႒ 4:17

ꩫ︀ႆ︀ႇꩫ︀က︀ေႃႇ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ တ︀င︀်းက︀ဝ်ႈၵ︀ိင︀်းလ︀ွေႛင︀ႆ︀း က︀ဝ်ႈမ︀ႆ︀ႛထႅမ︀်ꩭႅင︀်းꩭႂ်ႛမ︀ႃးꩫ︀ႆ︀ႇꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်ဢ︀ၢꩫ︀်တ︀ၢꩫ︀်မ︀ႆ︀ႛ ၵ︀ၢဝ်ႈၵ︀ၢမ︀်းꩫ︀ီႈ ꩫ︀ႆ︀ႛꩭူဝ်းမ︀ူတ︀်ꩰမ︀ႃးယ︀ဝ်ႇ။ လ︀ုက︀်ႉတ︀ၢမ︀်တ︀ႆ︀ၢႈမ︀ႆ︀ႛတ︀မ︀ိူင︀်း မ︀ꩫ︀်းꩡ︀ဝ်ႛၵ︀ေꩬ︀ေꩭႂ်ႛမ︀ႃးယ︀ဝ်ႇ။

တ︀ိတ︀ု 1:4

တ︀ိတ︀ုꩴ︀း ꩭႃးꩡ︀ဝ်ႛယ︀ေꩬ︀ုမ︀ႆ︀ႛ ယ︀ုမ︀်ယ︀မ︀်ႈပ︀ိုင︀်ႈဢ︀ိင︀်ႈꩫ︀ႆ︀ႇꩬ︀ီ မ︀ႂ်းယ︀ႃႇလ︀ုက︀်ႉက︀ဝ်ႈꩫ︀က︀ꩫ︀်ႈꩫ︀မ︀်။ ပ︀ူဝ်ၸ︀ြႃးပ︀ီꩫ︀်ႈꩡ︀ဝ်ႛꩭဝ်းꩫ︀ၵ︀ႃ ꩡ︀ဝ်ႛယ︀ေꩬ︀ုၵ︀ရ︀ီတ︀်ꩡ︀ဝ်ႛၵ︀ေꩬ︀ေꩭဝ်း မ︀ႂ်းမ︀ႆ︀ႛဢ︀ီꩫ︀ူႈꩭၢက︀်ႉꩭွမ︀်ꩬ︀ီ ꩭႂ်ႛဢ︀ဝ်ႈက︀တ︀်ယ︀ီꩫ︀်ႈၵ︀ျမ︀်းꩬ︀ႃက︀ႃတ︀ႃႉ။

ၸ︀ိလ︀ေမ︀ုꩫ︀် 1:9

ꩫ︀ႆ︀ႇꩫ︀က︀ေႃႇ က︀ဝ်ႈပ︀ီꩫ︀်ႈၸ︀ူႛတ︀ၢင︀်ႈတ︀ူဝ်ႈꩡ︀ဝ်ႛယ︀ေꩬ︀ုၵ︀ရ︀ီတ︀်ꩬ︀ေႇမ︀ဝ်က︀ႃး ꩭူဝ်းလ︀ွင︀်ႈမ︀ꩫ︀်းꩡ︀ဝ်ႛꩫ︀ႆ︀ႇꩬ︀ီ တ︀ူက︀်ထွင︀်ꩬ︀ီဢ︀ူꩫ︀က︀ေႃႇ ꩭႃးꩡ︀ဝ်ႛပ︀ီꩫ︀်ႈတ︀ႆ︀းက︀ူဝ်ႇက︀ꩫ︀်ႈꩫ︀ႆ︀ႇꩬ︀ီ မ︀ႂ်းမ︀ႆ︀ႛ က︀ဝ်ႈဝွꩫ︀်းၵ︀ႅꩫ︀်းဢ︀ဝ်ႈꩫ︀ႆ︀ၢႈက︀ွတ︀်။