1 Деед Эзн Мошед келнә:
Эврәннь ах Ахаронд болн терүнә көвүдт эн хувцд өмск. Ахаронд болн терүнә көвүдт оливин тос түрк. Тедниг гелңгин номд орулад әрүсл. Тедн Мини гелңгүд болх.
Мини гелң болхин төлә тедниг әрүсләд иим юм күцәх кергтә. Эрмдг уга бүрү болн хойр хуц йилһҗ ав.
Ахаронд болн терүнә көвүдт бүс бүслһ, дәкәд теднә толһаст боодһа бо. Эн өдрәс болн мөңкинд гелң гисн нерн Ахаронд болн терүнә көвүдт өггдҗәнә. Тиигҗ чи теднәр гелң кеҗәнәч.
Дәкәд Харһлтын Шатрин үүдн тал Ахарониг көвүдтәһинь авч ирәд тедниг усар уһа.
Энүг цугтаһинь Деед Эзн Синай уул деер Мошед соңсхад келсмн. Синайин көдә һазрт Израилин улс Деед Эзнд бәрц бәртхә гиҗ заксна цагт тиим болҗана.
– Ахарониг көвүдтәһинь дахулад авч ир. Хувцдынь ав, түркх олив тосинь ав, килнцәс цеврллһнә бәрц гиҗ бүрү, 2 хуц болн эс искәсн һуйрар болһсн өдмгтә зембль авч ир.
Израилин улсас эврәннь ах Ахарониг болн терүнә көвүдиг дууд. Тедн Мини шаҗна гелңгүд болтха – Ахарон болн терүнә көвүд Надав, Авиуд, Элиезер, Итамар.
Ахарона әрүлгдсн хувцд терүнә хөөт үйнрт өггдх: теднд тос түркәд, гелңд орулсн цагт тер хувцсиг өмсх.
Тегәд өргә гер бәрлһнә көдлмш төгсв – Харһлтын Шатр бәргдв. Израилин улс Мошед Деед Эзнә заксар цугинь дигтә кевәр күцәв.
Эдн Ахарона көвүд, эдн гелңгин нер зүүһәд тосар түркгдсмн, гелңгин номд орулгдсмн.
