Lukas 4:41 - Abun Scripture

⁴¹ Yé mwa gato semda ben ne dom, semda gane titi wé kadit yé mwa ne. Semda ne titi wé saresa, semda saiye do, ”Nan anato Yefun Allah bi Gan.” Sarewo Yefun Yesus ndantom semda ne. Yefun Yesus duyawa semda ne do, ”Nin du o nde,” we semda ne jam do, Yefun Yesus anato Yekwesu gato Yefun Allah syogat ma mo bur ré wa nai men yetu kadit sukye ete jowa men.

Lukas 4:41 Iomraidhean Croise

Matius 26:63

Sarewo Yefun Yesus not sor. Yekwesu ne ki nai Yefun Yesus o do, ”Ji syogat Nan ki suk gato sangge tepsu Nan ki mo Yefun Allah gato gesyos ne gwem. Nan ki rer nai men jam et, Nan anato Yekwesu gato Yefun Allah syogat ma mo bur ré wa nai men yetu kadit sukye ete jowa men, bado? Te nan anato Yefun Allah bi Gan ne bado?”

Matius 4:3

Sugane biris bi yekwesu ne ma ku Yefun Yesus, ete ki nai do, ”Nan tepsu Yefun Allah bi Gan sangge it yo, Nan syogat jok mwa ré tepsu roti wa Nan git et.”

Matius 8:16

Kam bok, ndendu, yé gwat yé mwa gato semda ben ne ma. Yefun Yesus ki sukdu kwa dik yo, kwa we yo sor re, ete An syun semda mwa ne titi wé, ete An ben yé mwa gato i ne ge sino.

Matius 8:29

Semda ben ye we ne saiye ket Yefun Yesus do, ”Yefun Allah bi Gan, Nan ma ku men wa suma ne? Men yo kom mo kam gato Yefun Allah ma ndobot men yetu nde tó, ete Nan ma wa ben sukye nai men su mit ré bado?”

Matius 8:4

Orete Yefun Yesus ki nai ye ne do, ”Nan jammo suk gato Ji ki ré et. Nan mu nan nuk sukdu subot suk gato Ji ben ne nai ye yi daret nde, wo nan mu kadum nan nggwa nai yesu gato ben suk mo Yefun Allah bi nu subere an watbot nan. An watbot nan, ete yesu ne ki do, sangge, nan ge it, sane yo nan gwat suge sato Musa ki ne ma tepsu suksom. Nan syo nai yesu ne gre mo bot subere ye jam do, nan ge it anare.”

Markus 1:25

Sane Yefun Yesus ndantom semda ne do, ”Nan not se! Nan titi wé kadit ye ne tom!”

Markus 1:32

Kam bok or, ndendu re, yé mwa ma mo Simon bi nu. Yé gwat ye gato i si ye gato semda ben ne ma mo Yefun Yesus.

Markus 1:34

Orge yé mwa gato i su suki mwa ne, Yefun Yesus ben yé mwa ne ge wé kadit án bi suki ne or re. Yefun Yesus syun semda titi wé kadit yé mwa gato semda ben ne. Semda ne jam do, Yefun Yesus ma kadit Yefun Allah. Sane Yefun Yesus duyawa semda ne subere semda yo ki napyo nai nje mone jam nde.

Markus 3:11

Wo ye gato semda ben ne me Yefun Yesus it yo, án nyuwa, án bare án nggwa mo Yefun Yesus gwem, ete semda ne saiye do, ”Nan anato Yefun Allah bi Gan!”

Lukas 4:39

Sane Yefun Yesus mu me nggongras mo pe gato mom sem mone. Yefun Yesus tibot nggongras ne, ete Yefun Yesus syogat suki ne sombok wé kadit nggongras. Yefun Yesus ki bi sukdu-i sa, nggongras kaim dek satu re. Nggongras ne ge re, sane mom sun, mom gwat sugit si syur wa nje mone git.

Yohanes 20:31

Sarewo ji krom suk bok gare subere nin jam do, sangge, Yefun Yesus anato Ye gato Yefun Allah syogat ma mo bur ré wa kak os ndo wa men yetu ete jom men, subere nin jam do, sangge, Yefun Yesus anato Yefun Allah bi Gan. Sane dom, ji krom sukdu bok gare subere nin jam do, nin nai sukjimnut dik do, nin onyar kem mo An it yo, bere nin kem ndo to kapyo mato kapyo it anane.

Yakobus 2:19

Nin onyar kem mo sukdu do, Yefun Allah ne ka dik sor re, bado? Sangge! Sarewo yerom e, aboksye e, semda e ne sino onyar kem mo sukdu ne dom, ete án sino tetet mone, án nyuwa Yefun Allah ndo nde.