Lukas 10:2 - Abun Scripture

² Pakon ne yo mu nde tó, Yefun Yesus ki nai án do, ”Yé mwa ne tepsu sugit mwa gato kri mo nggwe, sarewo ye gato fro wa nai sugit ne yo tep nde. Sane nin ki suk su ye gato bi nggwe ne subere An syogat yé bok yo o waii mu nai sugit ne. {Yetu mwa fro ndek wa jammo Ji, sarewo ye gato mu ki Ji bi sukdu-i nai yé mwa ne yo tep nde. Sane nin ki suk su Yefun Allah subere Yefun syogat yé bok yo o waii mu kibot Ji bi sukdu-i subere kar yé mwa ne sok mo Yefun bi rus-i et.}

Lukas 10:2 Iomraidhean Croise

Matius 20:1

”Yefun Allah nai yetu sok mo An bi rus-i ne yo, bere tepsu sukamno ré. Su nyotkwo gan, yetu ge dik yo gato bi nggwe anggur mu kendo yé bok yo ma wa ben suk mo an bi nggwe ne.

Markus 13:34

Kam gato Ji ma su ne tepsu sukdu subot yenggras dik yo gato mu mo os syu mo bur yi. Yenggras ne syogat an bi pakwerut mewa an bi nu ne. An fro suk wa pa gedik-gedik ben mo an bi nu ne, ete an ki nai pakwerut gato mewa nusyo ne do, ’Nin kem su nin fra sor ji satu ma et.’

Markus 16:15

Orete Yefun Yesus ki nai An bi pakon do, ”Nin mu mo yewis mwa ne sino mo bur ré iwedewe. Nin mu ki sukdu subot os ndo gato Yefun Allah fro wa yetu subere yé ku os wa yé gum sok mo Yefun Allah bi rus-i.

Markus 16:20

Sane Yefun Yesus bi pakon mu ki sukdu subot os ndo gato Yefun Allah fro ne mo peyo-peyo. Yefun Yesus syo An bi suktinggi nai An bi pakon ne. Yefun Yesus yo misyar An bi pakon nde anato An bi pakon ben suk mwa gato ben nje yeket. Yefun Yesus bi pakon ben suk mwa gato ben nje yeket ne anato yé jam do, sukdu gato An bi pakon ki ne sangge anane.] Markus bi sukdu-i gato ye ku mo buku rok deyo o, ye krom sare: [

Lukas 9:1

Yefun Yesus kendo An bi pakon ge musyu dik sop we ne ma, orete Yefun Yesus syo suktinggi nai An bi pakon subere án nggiwa syun semda wé kadit ye gato semda ben ne, ete Yefun Yesus syo suktinggi nai An bi pakon subere án ben ye gato i ne ge re.

Suk Gato Yerasul Ben Ne 11:19

Ye gu Stefanus kwop wé, orete ye ben sukye nai ye gato onyar kem mo Yefun Yesus. Sane án syo yu, deyo mu kom mo bur Fenisia, deyo mu mo bur Siprus, deyo mu mo kota Antiokhia. Mo bur gato án mu kom mone, án ki sukdu subot Yefun Yesus nai yewis ye Yahudi sor re.

Suk Gato Yerasul Ben Ne 13:2

Ye gato onyar kem mo Yefun Yesus mo kota Antiokhia sum wa som Yefun Allah. Án mewa án nggwa kadit sugit yei subere án ki suk su Yefun. Án ki suk su Yefun saresa, Yefun Allah Gen ki nai án do, ”Nin bes Barnabas si Saulus wa an we ben suk gato Ji iwa an we ben ne et.”

Suk Gato Yerasul Ben Ne 13:4

Yefun Allah Gen bes ye we wa mu ki sukdu subot Yesus Kristus, sane ye we mu mo kota Seleukia. Kadit ne o, ye we simo kapal dik yo mu mo ef Siprus.

Suk Gato Yerasul Ben Ne 20:28

Nin mewa nin nggwa subere nin jom sukdu ne petok sor. Nin mewa yé gato onyar kem mo Yefun Yesus. Nin mewa yé gato Yefun Allah Gen bes nin gum yekwesu wa ne sor. Nin mewa yé gato gum sok mo Yefun Allah bi rus-i ne sisu ri-roi tepsu ye gato mewa suksi ne mewa bi suksi sisu ri-roi ne sor. Ye gato gum sok mo Yefun Allah bi rus-i, Yefun Yesus bi nggwa kwop wa, Yefun Yesus dé sye wa anato ye ne gum sok mo Yefun Allah bi nje-i, sane nin mewa sisu ndo sor.

Suk Gato Yerasul Ben Ne 22:21

Orge Yefun Yesus ki nai ji do, ’Nan mu sor, Ji syogat nan mu kadit ré, nan mu mo os syu kadit ré, nan mu mo yewis yi neya bi bur-i. Nan mu ki sukdu subot Ji nai yewis yi ne.’ ”

Suk Gato Yerasul Ben Ne 8:4

Ye gato titi mu rut ne, án duno nje subot os ndo gato Yefun Allah fro wa men yetu ne mo pe mwa gato án mu mone.

1 Korintus 12:28

Sane mo nu ari, Yefun Allah fro nje sato ré do: ketke yerasul; kedowe o, yenabi gato ki Yefun Allah bi suktaru nai nje jam; kedogri o, yeguru gato duno nje su Yefun Allah bi sukdu; or o ye gato ben suk gato ben ye yi yeket sato syun semda e ne; or o ye gato ben ye gato i ne ge kadit bi suki ne; or o ye gato ós ye yi mo sukye gato ye ne ku ne; or o ye gato fro nu ari bi suki; or o ye gato ki suk su a yi neya gato an jam nde.

1 Korintus 15:10

Sarewo Yefun Allah bi sukjimnut sye kas subot ji dakai yi anato An bes ji gum yerasul. Yefun Allah ben An bi suk-i ndo su ji yi anato su ré ji samok wa ben suk mwa ne ndo sino wai kadit yerasul yi neya. Ji samok wa ben suk tepsu yerasul kadit ji dakai bi suktinggi-i nde, wo kadit Yefun Allah dakai ben sukndo su ji yi, anato ji samok wa ben Yefun Allah bi suk-i.

2 Korintus 6:1

Men anato ye gato ben Yefun Allah bi suk-i, sane men ki nai nin do, nin kamo su os ndo gato Yefun Allah dakai fro yi wa nin nde. Yefun Allah dakai fro os ne wa nin, nin yo ben suk yo nyim wa An nde, sane nin misyar os ndo ne nde, wo nin simo os ne sisu sangge sor.

Filipi 2:21

Sarewo yé mwa gato kem more meret suk wa án dakai sor re, án yo nutbot Yesus Kristus bi suk-i nde.

Filipi 2:25

Sarewo ji nut do, ndo sa, ji syokom Epafroditus satu ba ku nin. Epafroditus ré, an tepsu ji bi yesyim, ji si an ben suk wa Yefun Yesus sino. Men ka we tepsu Yesus Kristus bi yesukmise gato ben An bi suk-i. Nin dakai syokom Epafroditus ma ku ji more wa ós ji mo suk gato ji yéwa,

Filipi 2:30

We Epafroditus ré, an iwa ben Yesus Kristus bi suk-i sor. An yo nutbot an dakai nde, anato an ma ós ji more, ete an ku suki ne, bergan an kwop rok mone. An ma win nin yé mwa gato kem mone, we nin yo ku os wa nin ma ós ji more nde.

Kolose 1:29

Ji samok, ji wergat ji dakai su suktinggi gato ma kadit Kristus ne. Kristus ben ji nggiwa ji benbot suk bok yo gato ji kibot ré kas sisu ndo.

Kolose 4:12

Epafras ki ndo mo nin. An ré, nin dakai bi ye-i. An ré tepsu Yesus Kristus bi pakwerut. An ki suk su Yefun sisu an mit dik si an onyar dik sisu sangge wa nin petok sor. An ndek mo Yefun Allah wa nin subere nin bi sukjimnut kem pe mo Yefun, tepsu yenggras gato bi sukjimnut kak, subere nin bi sukjimnut brek wokgan kadit Yefun Allah dom nde, ete nin benbot suk mwa ne sino gato Yefun iwa ne.

1 Tesalonika 2:9

Men bi nji, men bi nyanggon, men ki Yefun Allah bi sukdu subot os ndo gato Yesus Kristus kak ne nai nin sa, men yo ndek suk kadit nin nde, wo men samok, men wergat men nggwa wa men ben suk mwa noru nombrak subere men ku suk gato men yewa ne, subere men syogat nin syo suk nai men nde, nin dakai napawa suk mwa gato men ben ne re.

1 Tesalonika 5:12

Men bi nji, men bi nyanggon, men kiwa nin jammo ye gato samok wa duno nin. Nin jammo ye gato men bi Yekwesu Yefun Yesus bes tepsu yekwesu wa kadum os gato ndo wa nin.

2 Tesalonika 3:1

Men bi nji, men bi nyanggon, men bi sukdu gato wari mo surat ré wa nin anare, nin ki suk su Yefun Allah wa men subere men ku os wa men mu ki sukdu subot men bi Yekwesu Yefun Yesus ne nai yé mwa mo peyo-peyo. Nin ki suk su Yefun subere sukdu frekbot yé mwa ne kekro. Nin ki suk su Yefun subere yé mwa ne mit iwa sukdu ne, tepsu tomgatu nin iwa sukdu ne.

1 Timotius 4:10

Sane men samok, men wergat men dakai, men ben Yefun bi suk-i ne, we men kwabom kam mo Yefun Allah gato gesyos ne do, bere An nai men wé kadit sukye, bere An kak os wa men kem ndo to kapyo mato kapyo. Yefun Allah kak os ne wa yetu mwa ne sino mo bur ré. Wo ye gato onyar kem mo An anato ye gato kem ndo si An mo An bi nat-i ne.

2 Timotius 4:5

Án do bariwa sukduno gato sangge yo, nan mewa nan nggwa subere nan bi sukjimnut kak mo suk mwa petok sor. Kapre nan ku sukye o, nan misyar Yefun nde, wo nan simo Yefun pe sor. Nan ki sukdu subot os ndo gato Yesus Kristus kak ne nai ye gato jam nde Yefun. Nan ben Yefun Allah bi suk-i mwa ne sino sor kom mo pe gato or mó, nan misyar kwa dik yo dom nde.

Filemon 1:1

Ji gato gum do Paulus, gato ye rai ete bok mo sel mo gato ji ben Yesus Kristus bi suk-i ne, ji si men bi nji, gato gum do Timotius, men ka we anato krom surat ré wa nan. Men ka we krom sukdu ré wa nan, Filemon, men bi yesyim gato men jimnotku, gato si men ka we ben Kristus bi suk-i sino.

Ibrani 3:6

Sarewo Kristus, An tepsu pakwerut sato Musa nde, wo An ben suk tepsu Yefun Allah dakai bi Gan. An ben An bi suk-i mo Yefun Allah bi nu sisu ri-roi sor. Kristus jom suk mwa mo nu ne tepsu Yefun Allah mit. Men anato tepsu yé gato Kristus jom mo Yefun Allah bi nu, wo men bi sukjimnut kem krat mo An, men jammo An su men mit dik si men onyar dik sor.

Wahyu 2:1

Yefun Allah bi Gan ki nai ji do, ”Nan krom sukdu wa malaikat gato mewa yé gato onyar kem mo Yefun Yesus mo nu ari mo kota Efesus sare do: Ji gato jom bí mufit mo Ji syim ge, ete mubot suk gato ka sa dem sor gato ye dum sukru bo mufit mone, Ji bi sukdu-i sare do: