Tito 1:3 - O Novo Testamento na língua Kaingáng

³ Vãhã tóg ẽg mỹ ti vĩ tag jẽnẽ ja nĩ, ti tỹ ẽg mỹ jẽnẽnh ke kurã ki. Jesus tỹ tóg ẽg mỹ jẽnẽ ja nĩ. Hã to Topẽ tóg inh mỹ: “ha vẽnh kar mỹ tónh tĩg,” he ja nĩ, ẽg kren han tĩ ẽn ti.

Tito 1:3 Iomraidhean Croise

Marcos 1:15

Kỹ tóg: “Pétẽm ti huri, ẽg tỹ Topẽ tỹ tỹ ẽg pã'i nĩ venh ke ti,” he mũ. “Kỹ ãjag jykre kórég tovãnh nĩ. Ti vĩ kri fim nĩ, ãjag tỹ ti tỹ tỹ ẽg pã'i nĩ ẽn ve jé,” he tóg.

Marcos 13:10

Kỹ inh kãtĩg ke to hã povo kar vỹ inh vĩ sér mẽnh ke mũ,” he tóg.

Marcos 16:15

Kỹ tóg ag mỹ: “ga kri mũ kỹ ẽmã kar mĩ vẽnh vĩ sér kãmén nĩ, Topẽ tỹ há kar ag mỹ,” he mũ.

Lucas 1:47

Kỹ inh fe tóg mrin ke mũ, isỹ tỹ Topẽ tũ nĩn kỹ, isỹ tỹ ẽg kren han tĩ ẽn tũ nĩn kỹ.

Han Kãme 10:36

Povo tỹ Israel ag mỹ tóg ti vĩ ẽn jẽnẽ ja nĩ. Ẽg mỹ tóg tó, ẽg tỹ jatu nỹtĩ jé, ti tỹ Jesus Cristo tugrĩn ẽg to há nĩn kỹ. Jesus ẽn vỹ tỹ vẽnh kar Senhor nĩ.

Han Kãme 17:26

Kỹ tóg vẽnh kyvénh pir tỹ ẽprã ke kar hynhan, nação kar, ga kar mĩ mũ ag. Tỹ ẽg vẽnh kyvénh pir nỹtĩ. Kỹ tóg ẽg mỹ ẽg mur ke kurã nĩm mũ gé, ẽg ter ke kurã ti ke gé. Ẽg mỹ tóg ẽg jamã nĩm mũ gé, Topẽ ti.

Roma 15:19

Nén ve vãnh han sóg tĩ gé, Topẽ tỹ isar han kỹ. Ti kuprĩg tỹ inh krĩn kỹ sóg han tĩ. Kỹ sóg vẽnh kar mỹ ti vĩ tó ja nĩgtĩ, Jerusalém tá. Tá kãkutẽ kỹ sóg ga kar mĩ tĩg ja nĩgtĩ gé, ga tỹ Ilíria mĩ hã. Vẽnh kar mỹ sóg Cristo kãme sér tó ja nĩgtĩ.

Roma 16:25

Ha mẽ, ẽg jé Topẽ mỹ vĩ há han. Ẽg tar han ki kanhró tóg nĩ, ẽg tỹ ti ki rã kar krónh ke tũ nĩn jé. Sỹ ãjag mỹ Topẽ vĩ sér tó mũn hã vẽ, Jesus Cristo kãmén kỹ. Vãsỹ ẽg tóg mẽ ja tũ nĩ, ti vĩ sér tag ti. Ẽg tỹ vãhã mẽ vẽ, Topẽ tỹ ẽg mỹ to vẽjykre nĩm kỹ. Prỹg tỹ hẽn ri ke ki ag tóg mẽ ja tũ nĩ, ẽg jo ke ag.

Roma 16:26

Ũri hã ẽg tóg mẽg mũ. Vãsỹ Topẽ vĩ rán tĩ ag vỹ ẽg tỹ ũri mẽg mũ tag tó ja nĩgtĩ. Kỹ Topẽ tóg tag to: “povo kar mỹ kãmén nĩ, fóg ag mỹ, kanhgág ag mỹ, Judeu ag mré hã,” he ja nĩ, ẽg tỹ ti vĩ mẽ kỹ ti ki ge jé, ti vĩ kri fi jé, ti tỹ tỹ ẽg Senhor kar jẽ jé. Ti tỹ nén kar han tũg ki tóg nĩ nĩ, Topẽ ti, ũ tỹ ti han ja tũ ra. Kỹ tóg tũ' henh ke tũ nĩ gé. Gen kỹ tóg nĩnh mũ.

Roma 5:6

Jykre pãno ẽg nỹtĩ. Krój ẽg nỹtĩ. Hã ra Cristo ne ẽg jagfy ter ja nĩgtĩ'.

1 Corinto 9:17

Topẽ tỹ inh mỹ: “ha kãmén,” he tũ nĩ ra sóg kanhkã tá to gỹj venh ke tũ nĩ vẽ. Hã ra tóg inh mỹ: “ha kãmén,” he ja nĩ, kỹ tóg sỹ ti rãnhrãj ki rĩr há han mũ ve sór mũ sir inh ki, Topẽ ti.

Galácia 4:4

Ti kurã tá krỹg kỹ Topẽ tóg ti kósin jẽnẽ. Ẽprã ke fi ki tóg mur. Moisés tỹ ẽg jyvẽn ja ẽn ki króm kãn ja tóg nĩgtĩ.

Éfeso 1:10

Cristo tỹ tóg ũn mág han mũ, kanhkã tãn ag kri, ga kri mũ ag kri ke gé. Kỹ ẽg kar vỹ tỹ ti krẽm ke nỹtĩnh mũ. Povo pir ri ke ẽg nỹtĩnh mũ, kurã ẽn kã.

Éfeso 2:17

Jesus tỹ nén han jan hã vẽ. Kỹ tóg Topẽ tỹ ẽg to há nĩ tag tó ja nĩ, ãjag mỹ, ãjag tỹ tỹ Judeu tũ ra, ẽg mỹ ke gé, ẽg tỹ tỹ Judeu nỹtĩ ra.

Filipos 1:13

Vẽnh kar tóg mẽ kãn, ti vĩ ti, porisa ag mré hã, ũ tỹ palácio ki rĩr tĩ ag mré hã. Cristo tugrĩn sóg se kỹ jẽ, hã vég ag tóg mũ.

Colossos 1:23

Hã kỹ ti ki ge tovãnh tũg nĩ. Tar nỹtĩm nĩ, ti to krónh ke tũg nĩ. Ãjag tỹ Jesus kãme sér ẽn mẽ kỹ ãjag tóg Topẽ tỹ ẽg mỹ nén ũ vin ke mũ ẽn kãme mẽ ja nĩgtĩ gé. Ga kri mũ kar ag vỹ mẽg mũ ha, Jesus kãme sér ẽn. Inh rãnhrãj hã vẽ, sỹ ag mỹ tónh ke ti, inh, hã vỹ: Paulo, he mũ.

Colossos 1:6

Ga kar mĩ tóg tĩ ha, vẽnh vĩ há tag. Hã kỹ tóg ãjag ki jun ja nĩ gé. Vẽnh vĩ há tag tóg Topẽ mỹ ẽkré kanẽn ri ke nĩ, vẽnh kar tỹ ti ki ge kỹ. Hã kỹ ãjag tóg ti ki ge gé, ãjag tỹ ti vĩ mẽ vén kỹ. Ẽn kã ãjag tóg Topẽ tỹ ẽg jagãgtãn ki kanhrãn ja nĩ. Kỹ ãjag tóg ki kanhró nỹtĩ ha.

1 Tessalônica 2:4

Topẽ hã ne inh jykre ve kỹ inh mỹ: “ha inh vĩ tó,” he ja nĩ'. Hã kỹ sóg tó mũ sir. Ẽprã ke ag tỹ iso vĩ há han tũ ra tóg inh mỹ tỹ nén ũ tũ nỹ. Topẽ tỹ iso vĩ há han ke tag hã tóg inh mỹ há nĩ'. Hã jé sóg ti vĩ hã ki króm sór mũ. Ti hã ne ẽg jykre ve kỹ ẽg ki kanhró nĩ', Topẽ ti.

1 Timóteo 1:1

Paulo tỹ rá vẽ. Topẽ ne inh kuprẽg ja nĩ', ẽg kren han tĩ ti. Isỹ tỹ Jesus Cristo apóstolo jẽ jé tóg inh fẽg ja nĩ. Ti hã ve sór ẽg tóg mũ, Jesus Cristo ti.

1 Timóteo 1:11

Ũ tỹ tag han mũ tũgrĩn tóg ẽg jyvẽn ja nĩ, ẽg tỹ han tũg jé. Ti hã vỹ ẽg mỹ vẽnh vĩ sér tó ja nĩgtĩ'. Ti hã vỹ inh mỹ: “ha vẽnh kar mỹ tónh tĩg,” he ja nĩ'. Topẽ hã ne ti pir mỹ há nĩ'. Jãvo ag tóg ti vĩ tag kato tẽ tĩ.

1 Timóteo 2:3

Topẽ mỹ tóg sér nĩ, tag ti, ũ tỹ ẽg kren han tĩ ẽn mỹ.

1 Timóteo 4:10

Vẽjykre kuryj ẽn ve jé sóg inh rãnhrãj to vãsãn mũ. Topẽ hã ki ẽg tóg nén ũ kar vég tĩ. Hã kỹ sóg ti hã to vãsãn mũ. Rĩr ti nĩ, ẽg jóg tỹ Topẽ ti. Ti hã ne ẽg kren han tĩ', vẽnh kar ag, ũ tỹ ti ki ge kỹ nỹtĩ ag, fag mré hã.

2 Timóteo 4:17

Ag jãvo ẽg Senhor vỹ isar han, ti tỹ inh mré tag kã jẽn kỹ. Hã kỹ vẽnh kar vỹ ti vĩ mẽ huri, isỹ ag mỹ kãmén kỹ. Povo kar ag vỹ hur mẽ kãn. Kỹ ẽg Senhor tóg ijy nĩgãn, ag tỹ mĩg mỹ inh fón tũ nĩ jé.

Tito 2:10

Ti tũ péju tũg nĩ. Ti tũ ki rĩr há han nĩ, ti tỹ ã to vĩ kónãn tũ nĩ jé. Ã tỹ ti tũ ki rĩr há han kỹ tóg Topẽ vĩ to vĩ há han ke mũ, ã patrão ti, ti tỹ Topẽ vĩ mẽ kỹ,” hem nĩ, ũ mỹ rãnhrãj tĩ ag mỹ.

Tito 2:13

Ti kãtĩg ve sór ẽg nỹtĩ, hã kỹ tóg ẽg mỹ sér tĩ. Tỹ ti pã'i mág tãvĩ nĩ, Topẽ ti. Tar tãvĩ ti nĩ, ẽg kren han tĩ tỹ Jesus Cristo ti ke gé. Ti ve jé ẽg tóg ke mũ. Kỹ tóg sér tãvĩ tĩnh mũ.

Nén Venh Ke 14:16

Kỹ ũ tỹ kanhkã góg kri nĩ ẽn tóg trigo kre jafã ẽn tỹ krenh tĩ mũ.