Mateus 6:5 - O Novo Testamento na língua Kaingáng

⁵ “Kỹ ãjag tỹ Topẽ mré vẽmén kỹ ũ tỹ vẽjykre régre han mũ ẽn jykre ri ke han tũg nĩ gé. Ag tỹ ón kỹ Topẽ mré vĩ kỹ ag tóg, igreja krẽm jẽgjẽ kỹ nỹtĩ, ke tũ nĩ kỹ ĩn krẽm. Kỹ vẽnh kar vỹ ón kỹ ag to vĩ há han mũ sir, fag to ke gé. Kanhkã tá tóg ganho ũ ve mãn ke tũ nĩ ha. Ãjag mỹ sóg ki hã tó mũ, ha mẽ.

Mateus 6:5 Iomraidhean Croise

Mateus 21:22

Kỹ ãjag tỹ Topẽ mỹ nén ũ to vĩn kỹ to: “han jé tóg ke mũ,” hem nĩ. Kỹ tóg ãjag mỹ han ke mũ, ha vem nĩ,” he tóg, Jesus ti.

Mateus 23:13

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Jykre régre ãjag nỹtĩ. Topẽ vỹ ãjag ve kónãn,” he tóg. “Ũ ag tóg ũ tỹ kanhkã tá nĩ ẽn tỹ tỹ ẽg pã'i nĩ ve sór nỹtĩ, hã ra ãjag tóg ag mỹ kanhkã ti nenh tĩ. Ag jãvo ãjag tóg, ve sór tũ nĩgtĩ,” he tóg.

Mateus 23:5

Ag tỹ nén ũ há han kỹ ag tóg tỹ ũn mág nỹtĩ sór mũ sir, vẽnh kar tỹ ag ve jé. Ag tỹ Topẽ mré vĩ jé ag tóg, ti vĩ rá tỹ ag nĩgé tógfĩg tĩ, ag kakã ke gé. Vẽsógfĩn ja tãpér tỹ ag tóg vẽsógfĩg tĩ. Topẽ jykre han jé ag tóg kur tóv mág tu tĩ gé.

Mateus 23:6

Fénhta ki ag tóg jẽn vén sór tĩ. Vẽnh kanhrãn jafã krẽm ag tóg vẽnh kãpóv kỹ nỹtĩ.

Mateus 6:1

“Kỹ ãjag tỹ Topẽ jykre han sór kỹ ũ tỹ vẽjykre pãno han mũ ag jykre ri ke han tũg nĩ. Ón kỹ ag tóg, vẽnh kar rĩnve Topẽ jykre han sór tĩ, vẽnh kar tỹ ag ve jé. Kar kỹ ag tóg hã ra, hã tũ han tĩ sir, fag ke gé. Kỹ ag ri ke han tũg nĩ, ke tũ nĩ mũ ra ẽg jóg tỹ kanhkã tá nĩ ẽn vỹ tóg, ãjag mỹ ti kaja ven ke tũ nĩ,” he tóg.

Mateus 6:16

“Kejẽn ãjag tóg vãkrég tĩ. Jẽg tũ ãjag nĩ, Topẽ mỹ há nỹtĩ jé. Kỹ fe ũ nỹtĩ tũg nĩ. Vãkre ki ũ tỹ vẽjykre régre han mũ ag jykre ri ke han tũg nĩ. Ag tỹ ón kỹ vãkre kỹ ag tóg, fe ũ nỹtĩgtĩ sir, vẽnh kar tỹ ag vãkre ve jé. Ag ganho hã vẽ. Kanhkã tá ag tóg, ganho ũ venh ke tũ nĩ ha. Ãjag mỹ sóg ki hã tó mũ, ha mẽ.

Mateus 6:2

“Hã kỹ ãjag tỹ ũn jagtar ag jagãgtãn kỹ ũ mỹ: ag jagãgtãn inh tĩ, he tũg nĩ. Ũ tỹ vẽjykre régre han mũ ag jykre ri ke han tũg nĩ. Vẽnh kar mỹ ag tóg: ag jagãgtãn inh tĩ, fag ke gé, he tĩ. Ag ganho hã vẽ, kỹ ag tóg kanhkã tá ganho ũ ve mãn ke tũ nĩ ha, he tóg.

Mateus 9:38

“Hã kỹ Topẽ mré vĩ, ti tỹ ũ jẽgnẽ jé, ag tỹ ag mỹ ti vĩ tó jé,” he tóg, Jesus ti, ti mré mũ tĩ ag mỹ.

Marcos 11:25

“Ãjag tỹ kejẽn Topẽ mré vĩ kỹ, ãjag tỹ ũ to jũ mũ mĩ ẽkrén kỹ, ti mỹ vẽnh pãte fón nĩ. Ãjag tỹ gen kỹ tóg vẽnh kato ãjag mỹ vẽnh pãte fón ke mũ gé, ẽg jóg mág tỹ kanhkã tá nĩ ti.

Marcos 12:38

Kỹ tóg: “ón kỹ Topẽ vĩ to ẽg kanhrãn tĩ ag kamẽg nĩ,” he mũ. “Kur kaja e rĩnh (ka)mẽ ag nỹtĩ. Kỹ tóg vẽnh kar tỹ ag to: pã'i mág ag vẽ, hen kỹ ag mỹ sér tĩgtĩ,” he tóg.

Lucas 11:43

“Fariseu', Topẽ vỹ ãjag ve kónãn. Vẽnh kanhrãn jafã krẽm ãjag tóg vẽnh kãpãm kỹ nỹtĩ, vẽnh kar tỹ ãjag to: ũn mãg ag vẽ, he jé. Ẽmã kuju tá ãjag tóg mũgtĩ, kỹ tóg vẽnh kar tỹ ãjag mỹ: “Ẽg kanhrãn tĩ, ã mỹ há?” hen kỹ ãjag mỹ sér tĩ.

Lucas 18:1

Kỹ tóg ag kanhrãn mũ, ag tỹ kurã kar ki Topẽ mré vẽmén jé, to krónh ke tũ nĩ jé. Kỹ tóg:

Lucas 18:13

Hã ra governo mỹ jãnkamy mãg tĩ ẽn tóg kuvar há tá jẽ nĩ, mỹ'ãg kỹ. Kỹ tóg kanhkã ki ẽvãnh tũ nĩ gé. Ti fe kri tóg kãgmĩg mũ, kỹ tóg: “Topẽ,” he mũ gé. “Ã vĩ mranh inh mỹr. Ã mỹ inh jagãgtãn ke tũ hã ra?“ he tóg.

Lucas 20:47

“Hã ra ag tóg ũn mén ter ja fag tũ mãn kãn tĩ. Kar kỹ ag tóg ón kỹ Topẽ mré vĩ mág han mũgtĩ, ẽg tỹ ag to: “ũn há vỹ tỹ ag nỹtĩ,” he jé. Hã to ag vẽsỹrénh mág tãvĩ han ke mũ,” he tóg, Jesus ti.

Lucas 6:24

“Hã ra Topẽ vỹ ãjag ve kónãn mũ, ãjag tỹ: “há ẽg tóg nỹtĩ,” hen kỹ. Ga kri mũn kỹ ãjag tóg nén ũ há vég tĩ, kỹ ãjag tóg kanhkã tá jun ke tũ nĩ,” he tóg.

João 16:24

Ver ãjag tóg ti mỹ nén ũ to vĩ ja tũ nĩ, ãjag tỹ ti mỹ: “ti mré ke vỹ tỹ ẽg nỹtĩ,” he mũ ra. Ti mỹ nén ũ to vĩm nĩ, kỹ tóg ãjag mỹ hynhan kãn ke mũ, ãjag tỹ nén to vĩ mũ ẽn ti. Kỹ tóg ãjag mỹ sér tãvĩ tĩnh mũ,” he tóg.

Éfeso 6:18

Kỹ Topẽ mré vẽmén nĩ gé. Ti mỹ nén kar to vĩm nĩ. Ti kuprĩg vỹ ẽg jagfy vĩ tĩ gé. Topẽ mré vĩ to krónh ke tũg nĩ. Ẽg tỹ to krónh ken kỹ tóg ẽg nũr ri ke nĩ sir. Ke tũg nĩ. Ẽg mré ti ki ge kỹ nỹtĩ kar to vĩm nĩ.

1 Tessalônica 5:17

Kurã kar ki ẽg jóg mág mré vĩm nĩ, ãjag tỹ ti to krónh ke tũ nĩn jé.

Tiago 4:6

Hã ra Topẽ kuprĩg tóg ẽg tar han tĩ, ẽg tỹ nén ũ vẽnhmỹ han sór tũ nĩ jé. Kỹ tóg tag tó mũ sir, ha mẽ: “Topẽ vỹ ũ tỹ: “ũn mág vỹ tỹ inh nĩ,” he mũ ẽn ag to kórég nĩ, hã ra tóg ũ tỹ: “nén ũ tũ vỹ tỹ inh nĩ,” he mũ ẽn ag jagãgtãn tĩ,” he tóg, ti vĩ rá ki.