Mateus 5:16 - O Novo Testamento na língua Kaingáng

¹⁶ Gem nĩ, néj gru ri ke nỹtĩm nĩ. Topẽ jykre han nĩ, vẽnh kar tỹ ãjag jykre há ve jé. Kỹ ag tóg, Topẽ mỹ vĩ há han ke mũ, ẽg jóg tỹ kanhkã tá nĩ ẽn mỹ,” he tóg, Jesus ti.

Mateus 5:16 Iomraidhean Croise

Mateus 23:5

Ag tỹ nén ũ há han kỹ ag tóg tỹ ũn mág nỹtĩ sór mũ sir, vẽnh kar tỹ ag ve jé. Ag tỹ Topẽ mré vĩ jé ag tóg, ti vĩ rá tỹ ag nĩgé tógfĩg tĩ, ag kakã ke gé. Vẽsógfĩn ja tãpér tỹ ag tóg vẽsógfĩg tĩ. Topẽ jykre han jé ag tóg kur tóv mág tu tĩ gé.

Mateus 23:9

Kỹ ũ mỹ: “ẽg jóg,” he tũg nĩ gé, ẽprã. Ũn pir vỹ tỹ ãjag jóg nĩ, hã vỹ: Topẽ, he mũ, kanhkã tá nĩ ẽn ti.

Mateus 5:45

Kỹ ãjag tóg tỹ Topẽ krẽ nỹtĩ, ãjag tỹ ẽg jóg tỹ kanhkã tá nĩ ẽn ri ke han kỹ. Ti hã ne tóg rã han', ti tỹ vẽnh kar kri jẽngrẽg kỹ san jé, ũn jykre kuryj ag kri, ũn jykre pãno ag kri ke gé, fag kri ke gé. Ta han ti ke gé, ti tỹ vẽnh kar há han jé, ũn jykre kuryj ag, ũn jykre pãno ag ke gé, fag ke gé. Ver tóg vẽnh kar to há nĩ, Topẽ ti,” he tóg.

Mateus 6:16

“Kejẽn ãjag tóg vãkrég tĩ. Jẽg tũ ãjag nĩ, Topẽ mỹ há nỹtĩ jé. Kỹ fe ũ nỹtĩ tũg nĩ. Vãkre ki ũ tỹ vẽjykre régre han mũ ag jykre ri ke han tũg nĩ. Ag tỹ ón kỹ vãkre kỹ ag tóg, fe ũ nỹtĩgtĩ sir, vẽnh kar tỹ ag vãkre ve jé. Ag ganho hã vẽ. Kanhkã tá ag tóg, ganho ũ venh ke tũ nĩ ha. Ãjag mỹ sóg ki hã tó mũ, ha mẽ.

Mateus 6:9

“Ãjag tỹ Topẽ mré vĩ kỹ tag tóm nĩ, ha mẽ: “Ẽg jóg mág, kanhkã tá ã tóg nĩ nĩ. Ã jiji tó ẽg tóg tĩ, kỹ vẽnh kar jé ã tỹ tỹ ũn mág nĩ vé.

Mateus 9:8

Kỹ vẽnh kar ẽn ag tóg vég mũ. Kỹ tóg ag mỹ e tãvĩ tĩ. Topẽ mỹ ag tóg vĩ há han mũ, ti tỹ Jesus mỹ vẽjykre há nĩm kỹ, ti tỹ tỹ ẽprã ke nĩ ra.

Lucas 11:2

Kỹ tóg ag mỹ: “Topẽ mré vĩ kỹ tag tóm nĩ, ha mẽ,” he mũ. “Ẽg jóg mág, ã jiji tó ẽg tóg tĩ. Kỹ vẽnh kar jé ã tỹ tỹ ũn mág nĩ vé. Ẽg jé kãnhmar ã tỹ tỹ ẽg pã'i nĩ vé.

João 15:8

Ãjag tỹ vẽjykre há han kỹ tóg uva pẽ tỹ kanẽ e han ri ke nĩ. Kỹ vẽnh kar tóg ãjag jykre ve kỹ Topẽ to: “ũn há vỹ tỹ ti nĩ,” henh ke mũ. Hã ki ag tóg ki kanhró nỹtĩnh mũ, ãjag tỹ tỹ inh mré ke nỹtĩ ti.

Han Kãme 9:36

Ẽmã tỹ Jope tá ũ fi tóg nĩ nĩ, Jesus mré ke ũ fi, fi jiji hã vỹ: Tabita, he mũ, hã vỹ: Dorcas, he mũ, fóg tỹ Grego vĩn ki. Ẽn fi hã vỹ nén há kar han mũ. Ũn jagtar fag mỹ fi tóg nén ũ vin tĩ.

1 Corinto 14:25

Ti tỹ nén ũ to jykrén mũ vỹ vẽnh ven kãn ke mũ. Kỹ tóg ti mỹ e tĩnh mũ sir. “Topẽ vỹ tỹ ũn mág nĩ,” he jé tóg ke mũ. Kỹ tóg ki kanhró nĩnh mũ. Tó jé tóg ke mũ sir, Topẽ tỹ ãjag mré nĩ ti.

2 Corinto 9:13

Hã ki ag tóg ãjag tỹ Topẽ vĩ kri fig mũ vég mũ. Kỹ ag tóg tag to Topẽ to vĩ há han ke mũ gé sir, ha vem nĩ, ãjag tỹ ag jagãgtãn mág kỹ.

Galácia 1:24

Kỹ ag tóg isugrĩn Topẽ to vĩ há han ja nĩgtĩ, ag tỹ mẽ kỹ.

Éfeso 2:10

Ti hã ne ẽg han mãn ja nĩgtĩ'. Jesus Cristo tỹ tóg ẽg han ja nĩgtĩ, ẽg tỹ vẽjykre há han jé. Topẽ vỹ ẽg mỹ vẽjykre há tag nĩm kãn, ẽg tỹ hã jagma mũ jé.

Éfeso 5:8

Vãsỹ ãjag tóg vẽjykre ki kuty hã han ja nĩgtĩ gé. Hã ra Topẽ tóg ãjag mỹ vẽjykre ki kurã ẽn nĩm, ãjag tỹ ti ki gen kỹ. Kỹ vẽjykre ki kurã tag hã han sórm nĩ.

1 Tessalônica 2:12

Hã kỹ sóg ãjag fe tar han. Ãjag jyvẽn ja sóg nĩgtĩ, kỹ sóg ãjag jyvẽn tar han ja nĩgtĩ gé kejẽn, ãjag tỹ Topẽ jykre ki króm jé. Ti hã ne ãjag kuprẽg', ãjag tỹ ti tỹ tỹ ẽg pã'i nĩ ve jé, ãjag tỹ ti jykre mág ve jé, ti jykre tỹ ẽg kãfór nĩ ẽn ti.

1 Timóteo 2:10

Fag tỹ kur tỹ jagnẽ kãfór han sór mũ pijé há nĩ', fag gãnh tỹ ke gé. Fag jé vẽjykre kuryj hã tỹ vẽnh sĩnvĩ han.

1 Timóteo 5:10

à tỹ ũn jiji rán ke mũ fi jykren hã vẽ, ha mẽ. Fi mỹ fi krẽ ki rĩr há han ja nĩ'? Fi mỹ fi ĩn krẽm Topẽ tũ ag ki rĩr há han ja nĩ'? Fi mỹ ũn vẽsỹrénh mũ fag jagãgtãn ja nĩ'? Fi mỹ nén ũ há kar to tar nĩ?' Kỹ fi jiji rán nĩ.

1 Timóteo 5:25

Ge ti nĩ gé, vẽjykre há mré. Vẽnh kar vỹ vég mũ, ũ tỹ vẽjykre há han mũ ti. Kejẽn ũ tóg nén ũ há han tĩ, hã ra tóg vẽnh péju kỹ han tĩ. Vẽnh ven jé tóg ke mũ gé, ti tỹ Topẽ vĩ mranh ja ti.

1 Timóteo 6:18

Ũn riko ag jé vẽjykre kuryj han. Ag jé ag tũ tỹ vẽnh kãpãm. Ag jé ũn jagãgtar ag jagãgtãn to krónh ke tũg.

Tito 2:14

Ẽg jagfy tóg ter ja nĩ, ti tỹ ẽg jykre kórég ẽn tỹ tũ' he jé. Kỹ tóg ẽg kykũg mũ, ẽg jãnhkri nỹtĩ jé. Kỹ ẽg tóg tỹ ti tũ nỹtĩ sir, vyr mỹ. Ẽg pijé tỹ ũ tũ nỹtĩ ha'.

Tito 2:7

Tag han nĩ gé, Tito', vẽnh kar tỹ ã jykre há tag ve kỹ ã kóm vẽjykre há han sór jé gé. Ã tỹ ag kanhrãn kỹ ki hã tóm nĩ. Kanhir kỹ vĩ tũg nĩ.

Tito 3:14

Kỹ, ẽg mré ke kar ag jyvẽn há han nĩ, ag tỹ vẽnh rãnhrãj há to tar nỹtĩ jé. Kỹ ag tóg ũn jagtar ag mỹ vin ke mũ gé, ag tỹ nén ũ vẽnh kãpãm kỹ. Tag ne há nỹnh mũ'. Ẽg tỹ Topẽ jykre han to ken hã vẽ.

Tito 3:4

Vãhã ẽg tóg ki kanhró nỹtĩ, Topẽ tỹ ẽg jagãgtãn kỹ, ẽg kren han tĩ ti. Ti tỹ ẽg to há nĩ mẽ ẽg tóg vãhã.

Hebreu 10:24

Jagnẽ mĩ ẽkrén nĩ, ãjag tỹ jagnẽ jyvẽn jé. “Vẽnh kar to há nĩm nĩ,” hem nĩ jagnẽ mỹ. “Nén ũ há kar han nĩ,” hem nĩ gé jagnẽ mỹ.

1 Pedro 2:12

Jesus ki ge tũ ag kã mĩ ãjag tóg nỹtĩ. Hã kỹ vẽjykre há tãvĩ han nĩ. Ãjag to ón sór ag tóg tĩ. Ãjag to ag tóg: “jykre pãno ag nỹtĩ,” he sór tĩ. Kỹ vẽnh kar tỹ ãjag jykre há ve kỹ ag ón ẽn tóg ve há tĩnh mũ. Kỹ ag tóg: “Topẽ jykre vỹ há nĩ,” henh ke mũ, hẽn ri ke mũn, Topẽ tỹ ag kutãn kỹ.

1 Pedro 2:9

Ãjag hã kuprẽg tóg, ãjag tỹ tỹ ti tũ to pã'i mág nỹtĩ jé, ãjag tỹ tỹ ti povo nỹtĩ jé, vyr mỹ. Ãjag kuprẽg tóg, ãjag tỹ ti tỹ nén han mũ kãmén jé, ti jykre tar ti. Vãsỹ ãjag tóg kuty mĩ mũ ja nĩgtĩ. Hã ra tóg ãjag tatĩ kãtĩg, ãjag tỹ ũri kurã mĩ mũ jé, jẽngrẽ mĩ.

1 Pedro 3:1

Sỹ ũn tỹtá fag jyvẽn hã vẽ, ha mẽ. Ãjag mén jykre mĩ mũm nĩ. Hã ra ãjag kã mĩ ũ fi mén vỹ hẽn ri ke mũn Topẽ ki rã tũ nĩ ver.

1 Pedro 3:16

Ũ tỹ ge mỹ komẽr hã vĩm nĩ. Topẽ vỹ vég nĩ nĩ, ãjag tỹ ti mỹ nén tó mũ ẽn ti. Fe kavéj nỹtĩ sór tũg nĩ. Kỹ ãjag tóg ũ tỹ Cristo jykre to vĩ kónãn sór mũ ag vĩ tỹ tũ' henh ke mũ, ha vem nĩ.

1 Pedro 4:11

Ãjag vẽmén kỹ Topẽ vĩ hã tỹ vẽmén nĩ. Ũ tóg Topẽ tũ ag ki rĩr tĩgtĩ. Kỹ ti jé Topẽ mỹ to vĩ, ti tỹ to ti tar han jé. Ãjag tỹ ãjag rãnhrãj tag ki rĩr há han kỹ Jesus ki ge kỹ nỹtĩ kar ag vỹ Topẽ mỹ vĩ há han ke mũ. Jesus Cristo hã vỹ tỹ ũn mág nĩ. Ti hã vỹ tar nĩ. Kỹ tóg tũ' henh ke tũ pẽ nĩ. Hã vẽ.

1 Pedro 4:14

Hỹ, tá tóg ãjag mỹ sér tãvĩ tĩnh mũ, ag tỹ ũri ãjag mỹ vĩ kónãn mũ ra, ãjag tỹ Cristo ki ge kỹ nỹtĩ tugrĩn. Kỹ ãjag tóg ki kanhró nỹtĩnh ke mũ, Topẽ kuprĩg tỹ tỹ ãjag jagrẽ nĩ ti. Ti kuprĩg vỹ ãjag tỹ ũn mág han ke mũ, Topẽ tỹ tỹ ũn mág nĩ ẽn ri ke.