Mateus 5:10 - O Novo Testamento na língua Kaingáng

¹⁰ “Topẽ vỹ ãjag ve há han mũ, ag tỹ vẽjykre kuryj to ãjag vóg kónãn mũ ra. Kỹ ãjag tóg kanhkã tá jun ke mũ,” he tóg.

Mateus 5:10 Iomraidhean Croise

Mateus 10:23

“Ag tỹ ẽmã ũ tá ãjag vóg kónãn kỹ ẽmã ũ ra pétẽm nĩ. Ki hã sóg tó mũ, ha mẽ. Israel ag jamã fĩn rãm kãn ke tũ ãjag tóg nĩ, kurã ẽn kã. Sĩ ti nĩ, ag tỹ ãjag vóg kónãn ke kurã ẽn ti. Kãtĩg jé sóg ke mũ, ag tỹ gen kỹ ãjag vóg mũ ra. Tỹ sóg ẽprã ke fi kósin nĩ, mỹr, ha mẽ.

Mateus 19:14

Hã ra Jesus tóg ag mỹ: “vĩ tũg nĩ, gĩr ag mỹ. Gĩr fag tỹ iso kãmũ kamẽg tũg nĩ,” he mũ. “Ũ tỹ ge hã vỹ ũ tỹ kanhkã tá nĩ ẽn tỹ tỹ pã'i nĩ ẽn krẽm nỹtĩ nĩ,” he tóg.

Mateus 25:34

Tỹ sóg vẽnh kar kri pã'i mág nĩnh mũ, kurã ẽn kã. Kỹ sóg inh pẽgja tá nỹtĩnh ke mũ ag mỹ: inh panh vỹ ãjag mỹ vĩ há han ke mũ. Topẽ tỹ ga tãg mré kanhkã tãg venh kãmũ jẽg. Ti tỹ ga si han kurã ẽn kã tóg ãjag hã kuprẽg ja nĩ.

Mateus 5:3

“Topẽ vỹ ãjag ve há han mũ, ãjag tỹ: “kórég inh nĩ,” hen kỹ. “Sỹ Topẽ kuprĩg tỹ jagrẽn kỹ nĩ tũ nĩ ra sóg tỹ, ũn kórég nĩnh mũ vẽ,” hem nĩ. Kỹ ãjag tóg, ti tỹ tỹ ẽg pã'i nĩ venh ke mũ, kanhkã tá,” he tóg.

Marcos 10:14

Kỹ tóg vég mũ, kỹ tóg ti mré mũ tĩ ag to jũ mũ. “Vĩ tũg nĩ, gĩr ag mỹ. Gĩr fag tỹ iso kãmũ kamẽg tũg nĩ. Ũ tỹ ge hã vỹ Topẽ krẽm nỹtĩ nĩ, ti tũ vỹ tỹ fag nỹtĩ',” he tóg.

Marcos 10:30

“Ẽn vỹ tóg sir vẽnh kato ũ tỹ 100 (ke) venh ke mũ, ũri hã ra, hã vỹ: ẽmã kar, jãvy kar, kãke kar, ve kar, mỹnh kar, ẽpỹ kar ve jé tóg ke mũ. Hã ra ag tóg ti vóg kónãn ke mũ gé. Kar kỹ tóg vãhã sir rĩr krỹg ja tũ venh ke mũ gé,” he tóg.

Lucas 21:12

“Tag to hã ag tóg ãjag sigsenh ke mũ gé. Ãjag vóg kónãn jé ag tóg ke mũ gé. Vẽnh kanhrãn jafã krẽm ag tóg ãjag jykre vigvenh ke mũ gé. Pã'i mág ag mỹ ag tóg ãjag venven ke mũ, pã'i tỹ governador ag mỹ ke gé, ãjag tỹ ijiji tó ja tugrĩn.

Lucas 22:29

Inh panh vỹ isỹ pã'i han ke mũ, kỹ sóg ãjag tỹ pã'i han ke mũ gé, ti kóm,

Lucas 6:20

Kỹ tóg ti mré mũ tĩ ag ki ẽvãnh mũ, kỹ tóg ag mỹ: “Topẽ vỹ ãjag ve há han mũ, ãjag tỹ: “kórég ẽg tóg nỹtĩ,” hen kỹ,” he mũ. “Kỹ ãjag tóg Topẽ tỹ tỹ ẽg pã'i nĩ venh ke mũ,” he tóg.

Lucas 6:22

“Topẽ vỹ ãjag ve há han mũ, ag tỹ isugrĩn ãjag to kórég nỹtĩn kỹ, ãjag mỹ: “ha mũ jẽg, hen kỹ. Ag tỹ isugrĩn ãjag mỹ vĩ kónãn kỹ tóg há tĩ, ag tỹ ón kỹ ãjag jykre kórég tó kỹ. Tỹ sóg ẽprã ke fi kósin nĩ mỹr,” he tóg.

João 15:20

Vãsỹ sóg ãjag mỹ: “ãjag pijé inh kãfór nỹtĩ',” he ja nĩgtĩ. Tag mĩ ẽkrén nĩ. Inh camarada ri ke ãjag nỹtĩ, jãvo sóg tỹ ãjag patrão ri ke nĩ. Ag kã mĩ ũ tóg inh vóg kónãn ke mũ. Ẽn vỹ ãjag vóg kónãn ke mũ gé. Ag kã mĩ ũ tóg inh vĩ ki króm tĩ. Ẽn ag vỹ ãjag vĩ ki króm ke mũ gé.

Han Kãme 5:40

Kỹ ag tóg ti mỹ: “he,” he mũ. Kỹ ag tóg Jesus tỹ ũn vin mũ ag jé prẽr mãn mũ. Ag mrãnmrãn ag tóg mũ. Kỹ ag tóg: “ker Jesus tó mãn hẽ',” he mãn mũ, “ha mũ jẽg,” he ag tóg, ag mỹ.

Han Kãme 8:1

Jãvo tóg Saulo ẽn mỹ há tĩ, ag tỹ ti tén kỹ. Kurã ẽn kã ag tóg Jesus ki ge kỹ nỹtĩ kar vóg kónãn jagy han mũ, Jerusalém tá. Kỹ ag tóg jagtar tãvĩ nỹtĩ. Kỹ ag tóg vẽnh kãpugpóv kãn mũ sir. Ga tỹ Judéia kar mĩ ag tóg mũ mũ, ga tỹ Samaria mĩ ke gé.

2 Corinto 4:17

Tag ki sóg ti jagy vég tĩ, hã ra tóg inh mỹ kãnhvy nĩ. Tũ' he jé tóg ke mũ. Tá ẽg tóg nén ũ há tãvĩ venh ke mũ, ẽg tỹ tag ki ti jagy ve ja tugrĩn. Ki kagtĩg ẽg nĩ ver, hã ra tóg há tãvĩ nĩnh mũ.

Filipos 1:28

Ũ tỹ ẽg kato vãsãnsãn mũ ag kamẽg tũg nĩ. Hã tugnĩn ag tóg ag tỹ nũgme ki vár ke ki kanhró nỹtĩ. Hã tugnĩn ãjag tóg ãjag krenkren ke ẽn ki kanhró nỹtĩ gé sir. Topẽ vỹ ẽg tar han ke mũ, ẽg tỹ ag tỹ hẽn ri ke jé gé.

2 Timóteo 2:12

Ẽg tỹ ti tugrĩn nén ũ jagy kar to tar nỹtĩn kỹ ẽg tóg ti mré tỹ ũn mág nỹtĩnh ke mũ gé. Ẽg tỹ ti tovãnh kỹ tóg ẽg tovãnh ke mũ gé.

2 Timóteo 3:11

Ag tỹ inh vóg kónãn ve ja ã nĩ gé, isỹ nén ũ jagy vég tĩ ẽn ti. Inh vóg kónãn tỹ hẽn ri ke han ja ag tóg nĩ, Antioquia tá, Icônio tá, Listra tá ke gé. Ter kren pẽ han inh, tá. Hã ra ẽg Senhor tóg ijy nĩgãn.

Tiago 1:12

Kejẽn ũ tóg Jesus tugrĩn ẽg to jũ nĩ. Ẽg tỹ hã ra Topẽ tovãnh tũ nĩn kỹ tóg há tĩ. Kỹ ẽg Senhor tóg ẽg mỹ ẽg rĩr krỹg ja tũ ven ke mũ. Kỹ tóg ũ tỹ carreira ki ka féj tỹ coroa gỹjỹ he mũ ẽn ri ke nĩ sir. Ẽg Senhor vỹ ẽg mỹ: “rĩr krỹg ja tũ ve jé ãjag tóg ke mũ, ãjag tỹ iso há nỹtĩn kỹ,” he ja nĩgtĩ.

Tiago 5:11

Ag jykre to jykrén nĩ. Ag jagtar nỹtĩ ra ag tóg to krónh ke ja tũ nĩgtĩ gé. Hã kỹ Topẽ tóg ag mỹ vĩ há han mũ sir, ti vĩ tó tĩ ag mỹ. Topẽ mré ke tỹ Jó kãme mẽ ãjag huri. Ti jagtar ra tóg to krónh ke ja tũ nĩ gé. Kỹ vãhã Topẽ tóg ti ki rĩr há han mũ, ti jagtar kỹ. Hã ki ãjag tóg ẽg Senhor jykre vég mũ sir. Ẽg jagãgtãn tóg mũ, ti tỹ ẽg jagtar nỹtĩ ven kỹ. Kỹ tóg sir ẽg jagãgtãn tovãnh tũ nĩgtĩ.

1 João 3:12

Ẽg pijé Caim jykre han ke mũ'. Satanás mré ke ja vẽ, Caim ti, hã kỹ tóg ti jãvy tén. Ne nỹ hỹn ti jũ han, kỹ tóg ti tãnh? Jykre kórég ja ti nĩ. Jãvo ti jãvy vỹ jykre há ja nĩ. Hã kỹ tóg ti tãnh, ti jykre há ẽn to. Hã kỹ jagnẽ jykre vég mũ ra jagnẽ to jũ tũg nĩ.

Nén Venh Ke 2:10

Ãjag jagtar han jé ag tóg ke mũ, isugrĩn. Mũmẽg tũg nĩ hã ra. Japo vỹ ãjag kato vãsãn ke mũ. Kỹ ag tóg vẽseja kã tá ãjag vãm ke mũ. Kurã tỹ 10 (ke) ki ke vẽ, ag tỹ ãjag vóg kónãn ke ti. Isovãnh tũg nĩ. Kỹ ãjag tóg rĩr krỹg ja tũ venh ke mũ. Kỹ tóg ãjag mỹ sér tĩnh mũ, he tóg,” hem nĩ, vẽnh rán ki,” he tóg inh mỹ.