Mateus 4:23 - O Novo Testamento na língua Kaingáng

²³ Kỹ Jesus tóg, ga tỹ Galiléia kar mĩ tĩ mũ sir, ag mré. Judeu ag vẽnh kanhrãn jafã krẽm tóg ag kanhrãn mũ. Ag mỹ tóg Topẽ vĩ sér tó mũ, ũ tỹ kanhkã tá nĩ ẽn tỹ tỹ ẽg pã'i nĩ tĩ. Ũn kagyga kar ag hynhan tóg, fag kar ke gé, gĩr kar ke gé.

Mateus 4:23 Iomraidhean Croise

Mateus 11:5

“Tag han inh tĩ, ha mẽ: ũn kyvó ag vỹ, isugrĩn ẽvãnh há nỹtĩ. Ũn kãnhgrĩ ag vỹ mũ há nỹtĩ, ũ tỹ vẽnh kaga kren vãnh han mũ ẽn ag krenkren han inh tĩ. Ũn kutu ag vỹ ẽmẽ há nỹtĩ ha, ũn kãgter mũ ag vỹ rĩnrĩr mãn kỹ nỹtĩ. Ũn jagtar ag vỹ Topẽ vĩ mẽg tĩ, ũ tỹ kanhkã tá nĩ ẽn tỹ tỹ ẽg pã'i nĩnh ke to.

Mateus 12:9

Kỹ tóg ẽmã ẽn tá kutẽ kỹ ẽmã ũ ra tĩ mũ, kỹ tóg vẽnh kanhrãn jafã kã ra rã mũ sir.

Mateus 13:19

Ũ tóg kejẽn, ón kỹ Topẽ vĩ mẽg mũ. Hã ra tóg to jykrén tũ nĩ. Kỹ Nén-Kórég vỹ, ti mỹ tỹ tũ' he mũ sir, ti tỹ mẽ ja ti tỹ. Kã jatu tóg nĩ sir. Nén fy tỹ ẽmĩn kri kutẽ mũ ẽn hã vẽ.

Mateus 13:54

Kỹ tóg ti jamã ra tĩ mũ sir. Tá jun kỹ tóg, vẽnh kanhrãn jafã krẽm ag kanhrãn mũ. Kỹ tóg ag mỹ e tĩ, ti vĩ ti. Kỹ ag tóg ti to vĩ kónãn mũ. “Hẽn tán hỹn ki kanhrãn, vẽjykre tag ki? Ũ nỹ hỹn ti kanhrãn, ti tỹ nén han vãnh tag hynhan jé?

Mateus 14:14

Kỹ Jesus tóg kafã ũ tá vag ke mũ, kỹ tóg tá ũn e ẽn ag vég mũ sir, ti nón kãmũ mũ ẽn ag. Kỹ ag tóg ti mỹ jagtar nỹtĩ. Ag jagãgtãn kỹ tóg, ag kã mĩ ũn kagyga ag tỹ há' he mũ sir.

Mateus 24:14

Kỹ nação kar vỹ, vẽnh vĩ sér ẽn mẽnh mũ, ga kar mĩ hã, kỹ ag tóg, Topẽ tỹ tỹ ẽg pã'i nĩnh ke ẽn mẽnh mũ. Ag tỹ mẽ kãn kỹ kurã tỹ ẽgno vẽ sir,” he tóg, Jesus ti.

Mateus 3:2

“Ãjag jykre pãno tovãnh nĩ, Topẽ tỹ tỹ ãjag pã'i nĩ jé,” he tóg.

Mateus 9:35

Kỹ Jesus tóg ẽmã kar mĩ tĩ mũ, ẽmã kãsir mĩ ke gé. Vẽnh kanhrãn jafã krẽm tóg ag kanhrãn tĩ. Ag mỹ tóg ũ tỹ kanhkã tá nĩ ẽn tỹ tỹ ẽg pã'i nĩ ẽn kãmén tĩ. Kỹ tóg ũn kagyga ag hynhan tĩ gé sir.

Marcos 1:14

Kejẽn ag tóg João ség mũ. Ag tỹ ti se kar kỹ Jesus tóg ga tỹ Galiléia ra tĩ mũ. Tá tóg ag mỹ Topẽ tỹ tỹ ẽg pã'i nĩnh ke kãmén mũ, vẽnh vĩ sér ẽn ti.

Marcos 1:21

Kỹ ag tóg ẽmã tỹ Cafarnaum tá junjun mũ sir. Vẽnhkán ke kurã ki tóg Judeu ag vẽnh kanhrãn jafã kã ra rã mũ, ag kanhrãn jé, Jesus ti.

Marcos 1:39

Kỹ ag tóg ga tỹ Galiléia kar mĩ mũ mũ. Vẽnh kanhrãn jafã krẽm tóg ag mỹ Topẽ vĩ tó mũ sir. Ag jagrẽ kórég pan tóg mũ gé.

Marcos 3:10

Ũ tỹ hẽn ri ke tỹ tóg há' he ja nĩ. Hã kỹ ũn kagyga tỹ hẽn ri ke ag tóg ti pénĩn nỹtĩ. Ag tỹ ag nĩgé tỹ ti mẽ sór vẽ, fag ke gé.

Marcos 6:2

Vẽnhkán ke kurã ki tóg ag vẽnh kanhrãn jafã krẽm ag kanhrãn mũ. Ag tỹ ti vĩ mẽ kỹ tóg ag mỹ e tĩ. “Hẽ tán hỹn ki kanhrãn. Ũ nỹ hỹn ti kanhrãn?“ he ag tóg. “Ẽg tỹ nén han vãnh hynhan tóg tĩgtĩ.

Marcos 6:6

Kỹ tóg ti mỹ e tĩ, ag tỹ ti ki ge tũ nỹtĩn kỹ. Hã kỹ tóg ẽmã kãsir mĩ tĩg kỹ ag kanhrãn tĩ nĩ sir.

Lucas 10:9

Ũn kaga ag tỹ há' hem nĩ. Ag mỹ: “Topẽ vỹ tỹ ãjag pã'i nĩnh mũ, ũri,” hem nĩ.

Lucas 13:10

Kejẽn tóg vẽnh kanhrãn jafã krẽm ag kanhrãn mũ, vẽnhkán ke kurã ki.

Lucas 16:16

“Moisés tỹ ẽg mỹ Topẽ vĩ tó ja ẽn vỹ João tá krỹg, vãsỹ Topẽ vĩ tó tĩ ag tỹ ẽg mỹ nén tó ja kar ẽn ti. João tá jun kỹ vẽjykre tãg vẽ sir, hã vỹ: Topẽ tỹ tỹ ẽg pã'i nĩ, he mũ. Kỹ ũ tỹ hẽn ri ke ag tóg vãsãnsãn tĩ, ag tỹ ve jé.

Lucas 20:1

Kurã kar ki tóg Topẽ vĩ tó jẽ nĩ, vẽnh vĩ sér ẽn, Topẽ ĩn krẽm. Kejẽn Topẽ tũ to pã'i ag tóg ti to kãmũ mũ, kófa ag ke gé.

Lucas 4:14

Kỹ tóg tĩ mũ sir, Topẽ kuprĩg tỹ ti krĩn kỹ. Ga tỹ Galiléia ra tóg tĩ mũ. Kỹ vẽnh kar tóg ti kãme mẽ kãn mũ sir, ga ẽn tá ke kar ag.

Lucas 5:17

Kejẽn tóg ag kanhrãn nĩ nĩ. Pã'i tỹ hẽn ri ke ag tóg ti vĩ mẽg nỹtĩ, Fariseu ag, Topẽ vĩ to ẽg kanhrãn tĩ ag, kuvar há tá ke ag, ga tỹ Galiléia tá ke ag, ga tỹ Judéia tá ke ag, Jerusalém tá ke ag ke gé. Hã ra Topẽ tóg ti tar han, hã kỹ tóg ũn kaga tỹ hẽn ri ke tỹ há' he kãn mũ.

Lucas 6:17

Kỹ Jesus tóg ag mré pãnónh ẽn tá kãtére mũ sir, kỹ tóg kyjer tá jẽ nĩ. Ti mré mũ tĩ tỹ hẽn ri ke ag vỹ tá nỹtĩ gé, fag ke gé. Ũ tỹ hẽn ri ke ag vỹ ti ki junjun ja nĩgtĩ, ga tỹ Judéia tá kãmũ kỹ, ẽmã tỹ Jerusalém tá ke gé, ẽmã tỹ Tiro tá ke gé, Sidom tá, goj kafã tũ fyr tá kãmũ kỹ ke gé. Hã kỹ tóg fór pẽ tãvĩ nĩ.

Lucas 6:6

Vẽnhkán ke kurã ũ ki tóg vẽnh kanhrãn jafã krẽm ag kanhrãn mũ. Tá ũ tóg nĩ. Ti nĩgé vỹ tóg ja nĩ.

Lucas 7:21

Hã ra Jesus tóg ũn kagyga ag tỹ há' he mũ, ag tỹ ti mré vĩnh kãmũ kỹ. Vẽjagrẽ kórég pan tóg mũ gé. Ũn kyvó ag tỹ tóg há' he mũ gé.

Lucas 7:22

Kỹ tóg ag mỹ: “João mỹ ãjag tỹ nén vég mũ tag tónh mũ jẽg,” he mũ. “Tag han inh tĩ, ha mẽ: ũn kyvó ag vỹ isugrĩn ẽvãnh há nỹtĩ ha. Ũn kãnhgrĩ ag vỹ mũ há han mũ ha, ũ tỹ lepra han mũ ag vỹ há nỹtĩ. Ũn kutu ag vỹ ẽmẽ há nỹtĩ ha. Ũn kãgter mũ ag vỹ rĩnrĩr mãn gé. Ũn jagtar e ja ag vỹ Topẽ vĩ sér mẽg mũ ha ke gé, Topẽ tỹ tỹ ẽg pã'i nĩnh ke to.

Lucas 8:1

Tag pãte Jesus vỹ ẽmã kar mĩ tĩg kãn mũ, ẽmã kãsir mĩ hã ke gé. Topẽ vĩ tó tóg tĩ mũ. Ag mỹ tóg: “Topẽ tỹ tỹ ãjag pã'i nĩ sór vẽ,” he mũ. Kỹ ũ tỹ 12 (ke) ag tóg ti mré mũ mũ.

Lucas 9:11

Hã ra ũn e ẽn ag tóg mẽg mũ, kỹ ag tóg ti nón mũ mũ. Ag tỹ ti pétẽm kỹ tóg ag mỹ vĩ há han mũ. Ag mỹ tóg Topẽ tỹ tỹ ẽg pã'i nĩnh ke kãmén mũ. Kỹ tóg ag kã mĩ ũn kagyga tỹ há' he mũ gé, fag mré hã.

Lucas 9:60

Hã ra Jesus tóg ti mỹ: “vó, inh ki ge tũ ag vỹ ã panh kej han mũnh mũ. Hã kỹ tóg ã tỹ inh mré tĩg há tĩ, ã tỹ Topẽ tỹ tỹ ẽg pã'i nĩnh ke ẽn kãmén jé,” he mũ.

João 18:20

Kỹ tóg: “vẽnh kar mỹ sóg jamã há ra tó tĩ,” he mũ. “Vẽnh kanhrãn jafã krẽm sóg tó tĩ, Topẽ ĩn krẽm ke gé. Judeu kar tỹ vẽnhmãn kỹ nỹtĩn kỹ sóg ag mỹ kãmén tĩ. Inh pijé vẽnh péju kỹ tó tĩ'.

João 6:59

Cafarnaum tá tóg ag kanhrãn mũ, ag tỹ vẽnh kanhrãn jafã ẽn krẽm.

João 7:1

Tag pãte Jesus tóg Galiléia mĩ tĩ mũ. Judéia ra tĩg sór tũ tóg nĩ ver, ag tỹ tá ti tén sór kỹ, Judeu ag pã'i ag.

Han Kãme 10:38

Kỹ Topẽ tóg Jesus mỹ ti kuprĩg jẽnẽ ja nĩ. Kỹ tóg ti mỹ vẽjykre nĩm ja nĩ. Ga kar mĩ tóg tĩg ja nĩgtĩ. Nén há kar han ja tóg nĩgtĩ. Japo tỹ ũn vóg kónãn mũ ag tỹ tóg há' he ja nĩgtĩ gé. Topẽ hã ne ti mré han ja nĩgtĩ hã ra'.

Han Kãme 18:4

Kỹ tóg vẽnhkán ke kurã kar ki ag mỹ Topẽ vĩ tó mũ, Judeu ag vẽnh kanhrãn jafã krẽm.

Han Kãme 20:25

“Ha vé, inh ve mãn ke tũ ãjag tóg nĩ ha, ki kanhró sóg nĩ. Ũ tỹ hẽn ri ke ag mỹ sóg Topẽ tỹ tỹ ẽg pã'i nĩ tó ja nĩgtĩ. Hã ra ag kar ẽn tóg inh ve mãn ke tũ nĩ ha.

Han Kãme 28:31

Vẽnh kar mỹ tóg Topẽ tỹ tỹ ẽg pã'i nĩ kãmén mũ sir, fe tar han kỹ. Ẽg Senhor tỹ Jesus Cristo kãmén tóg mũ sir. Ũ tóg ti mỹ: “vĩ tũg ra,” he tũ nĩ, ti se kỹ nĩ hã ra.

Roma 10:15

Topẽ tỹ ag jẽgnẽg tũ nĩ ra ag tóg ẽg mỹ ti vĩ tónh ke tũ nĩ vẽ. Hã kỹ tag tóg rán kỹ nĩ, ha mẽ. “Ũ tỹ ẽg mỹ Topẽ vĩ sér ma kãmũ mũ ag junjun kỹ tóg ẽg mỹ sér pẽ tĩ,” he ja tóg nĩ, Topẽ vĩ tỹ rán kỹ nĩ ki. Topẽ tỹ ti vĩ tó tĩ ag jẽgnẽ to ken hã vẽ.