Mateus 24:5 - O Novo Testamento na língua Kaingáng

⁵ “Cristo vỹ tỹ inh nĩ,” he jé ag tóg ke mũ, inh jiji tó kỹ, ũ tỹ hẽn ri ke ag. Kỹ ũ tỹ hẽn ri ke ag tóg ag vĩ kri nĩm ke mũ.

Mateus 24:5 Iomraidhean Croise

Mateus 24:11

Ón kỹ inh vĩ tó tĩ ag vỹ junjun ke mũ gé, ag tỹ ũn e krĩn jé sir, ag tỹ isogvãnh jé.

Mateus 24:24

Ón kỹ Cristo ag vỹ vẽnh venven ke mũ, ón kỹ Topẽ vĩ tó tĩ ag ke gé. Ẽn ag vỹ ẽg tỹ nén han vãnh hynhan ke mũ, milagre tỹ hẽn ri ke ti. Ag tỹ vẽnh kar krĩn kónãn sór vẽ, ag tỹ kygnẽ jé, Topẽ tỹ ũn kuprẽg ja ẽn ag mré hã, hẽn ri ke mũn.

João 5:43

Ãjag mỹ sóg: “ẽg jóg mág vỹ inh jẽnẽ,” henh kãtĩg ja nĩ. Hã ra ãjag tóg inh vĩ mẽ sór tũ nỹtĩ. Ũ tóg kejẽn ãjag mré vẽmén kãtĩg ke mũ, Topẽ tỹ ti jẽnẽg tũ (hã) ra. Ẽn vĩ jẽmẽ jé ãjag ke mũ, ha vem nĩ.

João 8:24

“Hã kỹ sóg ãjag mỹ: kãgter jé ãjag tóg ke mũ, kỹ ãjag tỹ Topẽ vĩ mranh ja ẽn vỹ ãjag kã kã nĩnh mũ, he ja nĩ. Ha vé, ãjag tỹ inh ki ge sór tũ nĩn kỹ tóg ãjag kã kã nĩnh mũ, ãjag tỹ Topẽ vĩ mranh ja ẽn ti. Ũ ẽn vỹ tỹ inh nĩ, he ja inh nĩ ãjag mỹ. Kỹ: hỹ, hem nĩ,” he tóg, Jesus ti.

João 8:28

Kỹ tóg ag mỹ tó mãn mũ. “Ãjag tỹ ka to isa kỹ, ẽn kã ãjag tóg inh ki kanhrãn ke mũ,” he tóg. “Tỹ sóg ẽprã ke fi kósin nĩ. Kurã ẽn kã ãjag tóg inh ki kanhró nỹtĩnh ke mũ, isỹ tỹ ũ ẽn nĩ ti. Inh pijé vẽsóg ki nén ũ to jykrén tĩ'. Inh panh tỹ inh mỹ nén tó mũ ẽn hã tó sóg tĩ.

1 João 2:18

Inh krẽ', kurã tỹ ẽgno vỹ kakó tĩ ha. Kurã ẽn kakó nĩn kỹ Cristo kato tẽ pẽ ẽn vỹ vẽnh ven ke mũ. Tag mẽ ãjag huri. Hã ra ag tóg hur vẽnh vinven, ũ tỹ ti kato tẽ mũ tỹ hẽn ri ke ag. Hã ki ẽg tóg ki kanhró nỹtĩ, kurã tỹ ẽgno kakó nĩ ti.

1 João 2:22

Kỹ ũn nỹ hỹn ón tĩ'? Ũ tỹ ge vỹ ón pẽ han tĩ, ha mẽ: ũ tóg Jesus to: “ti pijé tỹ Cristo nĩ',” he tĩ. “Topẽ tỹ ti jẽnẽ pijé', Topẽ kósin pijé',” he ag tóg tĩ gé, Jesus to. Ũ tỹ Cristo kato tẽ mũn hã vẽ. Ẽg jóg to ag tóg ón tĩ, ti kósin to ke gé.

1 João 4:3

Ũ tỹ Jesus to tag tó tũ nĩn kỹ tóg Topẽ kuprĩg tỹ jagrẽ tũ nĩ. Cristo kato tẽ tĩ ẽn kuprĩg tỹ tóg jagrẽ nĩ, ha mẽ. Ẽn vỹ vẽnh ven ke mũ. Tag mẽ ãjag huri. Hã ra tóg hur jun, kỹ tóg mĩ tĩ ha.

Nén Venh Ke 13:8

Ẽprã ke kar ag vỹ ti to: “Topẽ vẽ,” he tĩ. Ag jãvo ũ ag jygji tóg ránrán kỹ nỹtĩ, Topẽ livro ki, ũ tỹ rĩr krỹg ja tũ venh ke mũ ẽn ag. Topẽ tỹ nén ũ kar han ke to hã tóg ag jygji ránrán ja nĩgtĩ, livro ẽn ki. Cordeiro tỹ ũn jagfy ter ja ẽn ag tũ vẽ, livro ẽn ti.