Mateus 23:16 - O Novo Testamento na língua Kaingáng

¹⁶ “Topẽ vỹ ãjag ve kónãn mỹr,” he tóg. “Kyvó ãjag nỹtĩ, hã ra ãjag tóg ũ tỹ ki kagtĩg ag tatĩn sór mũ. Kỹ ãjag tóg ag kanhrãn kónãn tĩ. “Ẽg tỹ ón kỹ: tag han jé sóg ke mũ, he sór kỹ ẽg tóg: Topẽ ĩn krẽm nĩ ẽn vỹ ki kanhró nĩ, henh ke mũ,” he ãjag tóg tĩ. “Ẽg tỹ hã ra: Topẽ ĩn krẽm ouro tãn ẽn vỹ ki kanhró nĩ, hen kỹ ẽg tóg ón ke tũ nĩ,” he ãjag tóg tĩ gé.

Mateus 23:16 Iomraidhean Croise

Mateus 15:14

“Hã kỹ ag to jykrén tũg nĩ. Ũn kyvó ag mỹ ag tóg: “sỹ ã jãmĩ tĩg ke vẽ,” he tĩ, hã ra ag tóg ag kóm kyvó nỹtĩ gé, kỹ ũn kyvó tỹ ũn kyvó jãmĩ tĩg kỹ ag tóg kãgnó ki vár kãn ke mũ, ha vem nĩ,” he tóg. Ag tỹ nũgme ki vár ke to ken hã vẽ, hã vỹ: kãgnó ki vár, he mũ.

Mateus 23:13

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Jykre régre ãjag nỹtĩ. Topẽ vỹ ãjag ve kónãn,” he tóg. “Ũ ag tóg ũ tỹ kanhkã tá nĩ ẽn tỹ tỹ ẽg pã'i nĩ ve sór nỹtĩ, hã ra ãjag tóg ag mỹ kanhkã ti nenh tĩ. Ag jãvo ãjag tóg, ve sór tũ nĩgtĩ,” he tóg.

Mateus 23:17

Vẽnh mỹ ti nĩ, ãjag vĩ tag. Krĩ tũ ãjag tóg nỹtĩ, kyvó ãjag tóg nỹtĩ. Ouro mỹ Topẽ ĩn kãfór nĩ'? Vó'. Ouro vỹ tỹ Topẽ tũ nĩ, ti tỹ Topẽ ĩn krẽm nĩn kỹ. Hã kỹ tóg tỹ, Topẽ tũ kar nĩ sir, ouro ti, ti ĩn ti ke gé. Ón kỹ: “Topẽ hã vỹ ki kanhró nĩ,” he tũg nĩ,” he tóg.

Mateus 23:19

Vẽnh mỹ ti nĩ gé, ãjag vĩ tag ti. Kyvó ãjag nỹtĩ mỹr. Ẽg tỹ Topẽ mỹ ẽg mẽg pũn mũ mỹ mesa kãfór nĩ'? Vó'. Topẽ ĩn krẽm mesa kri ẽg tóg ẽg mẽg ti pũn tĩ, hã kỹ tóg Topẽ mỹ há tĩ, ẽg mẽg ti, ẽg tỹ ti ĩn tá ti mỹ mesa kri pũn tugrĩn.

Mateus 23:24

Kyvó ãjag nỹtĩ, hã ra ãjag tóg ag tatĩn mũ sór mũ. Topẽ vĩ ũ ki króm sór ãjag tóg tĩ, ti tỹ Topẽ mỹ tỹ nén ũ sĩ hã ra, kỹ ãjag tóg ti vĩ ũ mranh tĩ, ti tỹ Topẽ mỹ kórég pẽ hã ra. Kỹ tóg goj ki ka ri ke nĩ. Ãjag tỹ ka gón tũ nĩ jé ãjag tóg kur ki kujẽg tĩ, kỹ tóg pa tĩ, goj ti. Hã ra ãjag tóg kãvãru tỹ goj ki ter mũ ra goj kórég ẽn kron tĩ,” he tóg.

Mateus 23:26

Kyvó ãjag nỹtĩ, ãjag tỹ tỹ Fariseu nỹtĩ ra. Ãjag jykre pãno tovãnh nĩ, ãjag jãnhkri nỹtĩ jé. Kỹ vãhã vẽnh kar vỹ, ãjag jykre há venh mũ,” he tóg.

Galácia 5:3

Ha vé, sỹ tag tó mãn ke vẽ gé, ha mẽ. Ãjag tỹ ãjag fár kym kỹ ãjag tóg Moisés jykre si ẽn ki króm kãn ke mũ gé sir.

Tiago 5:12

Inh kanhkã', ón kỹ vĩ tũg nĩ. Ón kỹ: “he,” he tũg nĩ. Ki hã tóm nĩ, Topẽ tỹ ãjag vóg kónãn tũ nĩ jé. Kỹ ón kỹ: “Topẽ vỹ ki kanhró nĩ,” he tũg nĩ gé. Ón kỹ: “ũ tỹ ga kri nĩ ẽn vỹ ki kanhró nĩ,” he tũg nĩ gé. Ki hã tóm nĩ. Ón tũg nĩ, jagnẽ mỹ.