Mateus 23:13 - O Novo Testamento na língua Kaingáng

¹³ “Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Jykre régre ãjag nỹtĩ. Topẽ vỹ ãjag ve kónãn,” he tóg. “Ũ ag tóg ũ tỹ kanhkã tá nĩ ẽn tỹ tỹ ẽg pã'i nĩ ve sór nỹtĩ, hã ra ãjag tóg ag mỹ kanhkã ti nenh tĩ. Ag jãvo ãjag tóg, ve sór tũ nĩgtĩ,” he tóg.

Mateus 23:13 Iomraidhean Croise

Mateus 23:16

“Topẽ vỹ ãjag ve kónãn mỹr,” he tóg. “Kyvó ãjag nỹtĩ, hã ra ãjag tóg ũ tỹ ki kagtĩg ag tatĩn sór mũ. Kỹ ãjag tóg ag kanhrãn kónãn tĩ. “Ẽg tỹ ón kỹ: tag han jé sóg ke mũ, he sór kỹ ẽg tóg: Topẽ ĩn krẽm nĩ ẽn vỹ ki kanhró nĩ, henh ke mũ,” he ãjag tóg tĩ. “Ẽg tỹ hã ra: Topẽ ĩn krẽm ouro tãn ẽn vỹ ki kanhró nĩ, hen kỹ ẽg tóg ón ke tũ nĩ,” he ãjag tóg tĩ gé.

Mateus 23:23

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Krĩ régre ãjag nỹtĩ, kỹ Topẽ vỹ ãjag ve kónãn,” he tóg. “Ón kỹ ãjag tóg, Topẽ mỹ ãjag jakré ki dízimo vin tĩ. Ãjag jakré tỹ hortelã tỹ 10 (ke) nỹtĩn kỹ ãjag tóg Topẽ mỹ ũn pir nĩm tĩ, ãjag jakré tỹ erva doce tỹ ke gé, ãjag jakré tỹ cominho tỹ ke gé. Há ti nĩ vẽ. Hã ra ãjag tóg, ti tỹ ẽg jyvẽn mũ ẽn han tũ nĩgtĩ. Vẽjykre kuryj han tũ ãjag tóg nĩgtĩ. Ũn jagtar ag jagãgtãn tũ ãjag tóg nĩgtĩ. Topẽ vĩ kri fig tũ ãjag tóg nĩgtĩ. Ãjag tỹ ti vĩ ki króm mré hã ãjag jakré ki dízimo vin ra tóg, há tĩ vẽ, ha mẽ. Hã ra ãjag tóg ki króm sór tũ nĩgtĩ.

Mateus 23:25

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Krĩ régre ãjag nỹtĩ, kỹ Topẽ vỹ ãjag ve kónãn,” he tóg. “Kópa venja kupég ãjag tóg tĩ, pénky venja, hã ra tóg kã tá kavéj nĩ. Kỹ ãjag ge nỹgtĩ gé. Jykre há nỹtĩ ve ãjag tóg nỹtĩ gé, hã ra ãjag tóg vẽjykre pãno han tĩ, hã vỹ: jãnkamy to ag lograr he tĩ, he mũ, ãjag prũ tũ fag mré nỹ tĩ, he mũ gé.

Mateus 23:27

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Krĩ régre ãjag nỹtĩ, kỹ Topẽ vỹ, ãjag ve kónãn,” he tóg. “Vẽnh kej sĩnvĩ ri ke ãjag nỹtĩ. Sĩnvĩ nĩ ve ti nĩ, vẽnh kej ti, ẽg tỹ pó tỹ kri tam kỹ, kar tinta tỹ to tĩn kỹ. Ti sĩnvĩ nĩ ve ra tóg ti kã tá kórég nĩ. Vẽser vỹ krẽm nỹ nĩ, vẽser vag mũ ti, ti kuka.

Mateus 23:29

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Krĩ régre ãjag nỹtĩ, kỹ Topẽ vỹ ãjag ve kónãn,” he tóg. “Ãjag jógjóg ag vỹ Topẽ vĩ tó tĩ ag kãgtén ja nĩgtĩ. Jãvo ãjag tóg ag kej sĩnvĩ han tĩ, ũn jykre kuryj ja ag kej ti.

Mateus 3:7

Kỹ pã'i tỹ Fariseu ag vỹ ti tá junjun mũ gé sir, pã'i tỹ Saduceu ag ke gé. Ón kỹ ag tóg ti to kãmũ mũ, ti tỹ ag kygpe jé. Kỹ tóg ag jyvẽn tar han mũ sir. “Pỹn ri ke ãjag nỹtĩ, ãjag jykre pãno nỹtĩn kỹ,” he tóg ag mỹ. “Ũ nỹ ãjag mỹ: Topẽ vỹ ãjag to jũnh ke tũ nĩ, he tĩ'?

Lucas 11:52

“Ón kỹ Topẽ vĩ to ẽg kanhrãn tĩ', Topẽ vỹ ãjag vóg kónãn ke mũ. Ũ tỹ Topẽ ki rã sór mũ ra ãjag tóg, ti mỹ tó há han tũ nĩgtĩ, ti tỹ ki rã tũ nĩn jé. Kỹ tóg, ẽg tỹ ũ jo ĩn nĩfénh ẽn ri ke nĩ,” he tóg.

João 9:22

Hã ra fag tóg pã'i ag kamẽg mũ, hã kỹ fag tóg: “ti ki jẽmẽm nĩ,” he mũ. Pã'i ag tóg Jesus to: “ãjag kã mĩ ũ tỹ ti to: Cristo vỹ tỹ ti nĩ, hen kỹ ẽg ti kutẽm ke mũ, ti tỹ tỹ ẽg mré ke tũ nĩ jé, ti tỹ ẽg mré vẽnhmãn tũ nĩ jé, ẽg vẽnh kanhrãn jafã krẽm,” he ja nĩgtĩ.

João 9:24

Kỹ ag tóg ũn kyvó ja ẽn jé ke mãn mũ. Kỹ ag tóg ti mỹ: “ker ón hẽ', Topẽ vỹ ã vĩ mẽg mũ,” he mũ. “Ũ tỹ ã tỹ há' he mũ ẽn vỹ kórég nĩ. Topẽ vĩ mranh ti tĩ,” he ag tóg mũ ti mỹ.

João 9:34

Kỹ ag tóg ti to jũ mũ. “Topẽ vĩ mranh kỹ ã tóg mur, hã ra ã tóg ẽg kanhrãn sór mũ',” he ag tóg. Kỹ ag tóg ti kutẽm mũ, vẽnh kanhrãn jafã krẽm.

Han Kãme 13:8

Kỹ kujá ẽn tóg ag vĩ kato tẽ mũ, ti tỹ Topẽ vĩ kri fig tũ nĩ jé. Kujá ẽn jiji ũ hã vỹ: Elimas, he mũ.

Han Kãme 5:28

“ãjag mỹ ẽg tóg: ker ẽn jiji tó mãn hẽ', he ja nĩgtĩ',” he mũ. “Ge ra ãjag tóg Jerusalém tá ke kar ag mỹ tugtó ja nĩgtĩ. Ãjag hỹn ti ter to ẽg jagtar han sór mũ,” he tóg.

Han Kãme 5:40

Kỹ ag tóg ti mỹ: “he,” he mũ. Kỹ ag tóg Jesus tỹ ũn vin mũ ag jé prẽr mãn mũ. Ag mrãnmrãn ag tóg mũ. Kỹ ag tóg: “ker Jesus tó mãn hẽ',” he mãn mũ, “ha mũ jẽg,” he ag tóg, ag mỹ.

Han Kãme 8:1

Jãvo tóg Saulo ẽn mỹ há tĩ, ag tỹ ti tén kỹ. Kurã ẽn kã ag tóg Jesus ki ge kỹ nỹtĩ kar vóg kónãn jagy han mũ, Jerusalém tá. Kỹ ag tóg jagtar tãvĩ nỹtĩ. Kỹ ag tóg vẽnh kãpugpóv kãn mũ sir. Ga tỹ Judéia kar mĩ ag tóg mũ mũ, ga tỹ Samaria mĩ ke gé.

2 Timóteo 3:8

Ũ tỹ fag mré vẽmén mũ ẽn ag vỹ Topẽ vĩ kato tẽ nỹtĩ, vẽnh vĩ há ẽn kato. Vãsỹ Janes vỹ Moisés vĩ kato tẽ ja nĩgtĩ, Jambres ti ke gé. Ẽn ag ri ke ag nỹtĩ. Topẽ vĩ kato tẽ ag tóg tĩ. Ón kỹ ag tóg Jesus ki ge kỹ nỹtĩ ve nĩ, ag tỹ ón kỹ ti vĩ tón kỹ.

2 Timóteo 4:15

Ti kamẽg ra. Inh vĩ kato tẽ mág han tóg.