Mateus 16:3 - O Novo Testamento na língua Kaingáng

³ Kỹ ãjag tóg kusãg ki kanhkã ki ẽvãnh tĩ gé. Kanhkã pũr kỹ ãjag tóg sir: “ta vỹ kutẽnh mũ, kanhkã vỹ pũr mũ“ he tĩ. Tó há han ãjag tóg tĩ, rãre ve kỹ, kanhkã pũr ve kỹ ke gé. Hã ra ãjag tóg inh ki kagtĩg nỹtĩ, ãjag tỹ sỹ nén han mũ vég mũ ra. Hã kỹ ãjag tóg: “Topẽ jykre mỹ vỹ?“ he tĩ.

Mateus 16:3 Iomraidhean Croise

Mateus 11:5

“Tag han inh tĩ, ha mẽ: ũn kyvó ag vỹ, isugrĩn ẽvãnh há nỹtĩ. Ũn kãnhgrĩ ag vỹ mũ há nỹtĩ, ũ tỹ vẽnh kaga kren vãnh han mũ ẽn ag krenkren han inh tĩ. Ũn kutu ag vỹ ẽmẽ há nỹtĩ ha, ũn kãgter mũ ag vỹ rĩnrĩr mãn kỹ nỹtĩ. Ũn jagtar ag vỹ Topẽ vĩ mẽg tĩ, ũ tỹ kanhkã tá nĩ ẽn tỹ tỹ ẽg pã'i nĩnh ke to.

Mateus 15:7

“Jykre régre ãjag nỹtĩ, ha mẽ. Hã kỹ Isaías vỹ ãjag to vĩ ja nĩgtĩ, ti tỹ tag tó kỹ, ha mẽ.

Mateus 22:18

Hã ra Jesus tóg ag jykre pãno ki kanhró nĩ. Hã kỹ tóg ag mỹ: “ãjag ne tóg ón kỹ inh ki jẽmẽ sór mũ',” he mũ. “Jykre régre ãjag nỹtĩ mỹr.

Mateus 23:13

“Ón kỹ Topẽ vĩ to ẽg kanhrãn tĩ',” he tóg. “Fariseu',” he tóg. “Jykre régre ãjag nỹtĩ. Topẽ vỹ ãjag ve kónãn,” he tóg. “Ũ ag tóg ũ tỹ kanhkã tá nĩ ẽn tỹ tỹ ẽg pã'i nĩ ve sór nỹtĩ, hã ra ãjag tóg ag mỹ kanhkã ti nenh tĩ. Ag jãvo ãjag tóg, ve sór tũ nĩgtĩ,” he tóg.

Mateus 4:23

Kỹ Jesus tóg, ga tỹ Galiléia kar mĩ tĩ mũ sir, ag mré. Judeu ag vẽnh kanhrãn jafã krẽm tóg ag kanhrãn mũ. Ag mỹ tóg Topẽ vĩ sér tó mũ, ũ tỹ kanhkã tá nĩ ẽn tỹ tỹ ẽg pã'i nĩ tĩ. Ũn kagyga kar ag hynhan tóg, fag kar ke gé, gĩr kar ke gé.

Mateus 7:5

Ke tũg nĩ. Ke tũ nĩ mũ ra ã tóg jykre régre nĩ. Kỹ ã jykre kurynh vén nĩ. Kar kỹ ã tóg sir ã régre jykre kurynh há han ke mũ,” he tóg.

Lucas 11:44

Topẽ vỹ ãjag ve kónãn mỹr. Vẽnh kej si ri ke ãjag nỹtĩ, vẽnh kej to ró tũ ri ke. Vẽnh kar tóg kri mũ tĩ, kỹ ag tóg vẽnh vatánh tá vẽnh kavénh tĩ. Tag ri ke ãjag tóg nỹtĩ,” he tóg,

Lucas 12:56

Ki kanhró ãjag tóg nỹtĩ, ta jykre ti, kãka jykre ti. Hã ra ãjag tóg inh jykre ki kanhrãnrãn sór tũ nĩ, sỹ ũri ãjag mỹ tó mũ tag ti. Kutu ãjag nỹtĩ,” he tóg.

Lucas 13:15

Hã ra Jesus tóg ti vĩ kãfãn kỹ: “jykre régre ã nĩ mỹr,” he mũ. “Vẽnhkán ke kurã ki ãjag tóg ãjag mẽg ki rĩr tĩ gé, monh ki, kãvãru ki ke gé, ha mẽ. Ãjag mẽg kygvãg ãjag tóg tĩ, ag tỹ goj kron mũn jé, ti tỹ ĩn kã kã se kỹ jẽ kỹ, cocho to.

Hebreu 5:14

Ẽg tỹ to jykrén há han kỹ ẽg tóg ũn sanh há ri ke nỹtĩ. “Tag vỹ há nĩ, tag vỹ há tũ nĩ. Tag vỹ kuryj nĩ, jãvo tag vỹ kygnẽ kỹ nĩ,” he jé ẽg tóg ke mũ, ẽg tỹ ki kanhrãn há han kỹ.