Mateus 13:44 - O Novo Testamento na língua Kaingáng

⁴⁴ “Kỹ ẽg tỹ kanhkã tá nĩ ẽn tỹ tỹ ẽg pã'i nĩ venh ke vỹ, tag ri ke nĩ gé, ha mẽ. Ũ tỹ ti patrão japỹ tá jãnkamy ne kunũnh kỹ péju mãn kỹ nĩm ẽn ri ke tóg nĩ. Ti péju mãn kar kỹ tóg, ti tỹ nén kar fón kãn mũ sir, ti kaja to ẽpỹ ẽn vyn jé sir. Ti tỹ ẽpỹ ẽn vyn kar kỹ jãnkamy ẽn vỹ tỹ, ti tũ nĩ sir,” he tóg. Ti tỹ ẽg tỹ ti ki rã há han ke kãmén hã vẽ.

Mateus 13:44 Iomraidhean Croise

Mateus 13:24

Kỹ tóg vãnh to kãmén kỹ: “Nén-Kórég tỹ inh rãnhrãj kókén sór mũ vỹ ge nỹnh mũ, ha mẽ,” he mũ. ”Kejẽn ũ tóg ti japỹ tá nén ũ fy krãn mũ.

Mateus 13:46

Kejẽn tóg ũn hapẽ ũ vég mũ sir, ũn kaja e. Kỹ tóg ti tũ vãm kãn mũ sir, ti tỹ ũn sĩnvĩ pẽ ẽn kũpra he jé,” he tóg, Jesus ti. Ti tỹ ẽg mỹ ẽg tỹ ti ki rã há han ke kãmén mãn hã vẽ gé.

Mateus 13:47

“Ẽg tỹ Topẽ tỹ tỹ ẽg pã'i nĩ venh ke kãme ũ vẽ gé, ha mẽ,” he tóg mũ gé. “Rede ri ke tóg nĩ, ẽg tỹ tỹ pirã kugmĩ jafã ẽn. Ti fón ẽg tóg tĩ, goj kã ki, ẽg tỹ pirã kugmĩ jé, kãkufár ke gé.

Mateus 19:21

Kỹ Jesus tóg: “ã tỹ vẽjykre há han sór kỹ ã tũ vãm kãn tĩg,” he mũ. “Kỹ ũn jagtar ag mỹ vin, jãnkamy ti, kỹ ã tóg kanhkã tá tũ mág nĩ sir. Kar kãtĩg nĩ, ã tỹ inh mré tĩg jé,” he tóg.

Mateus 19:27

Kỹ Pedro tóg ti mỹ: “ha vé, nén kar ré kỹ ẽg mũ mũ, ã mré. Tag to ẽg hỹn ne venh ke mũ?“ he mũ.

Mateus 19:29

“Jó ũ tóg isugrĩn ti jamã ré kỹ tĩ mũ, ti kãke, ti jãvy, ti ve, ti panh, ti mỹnh, ti japỹ ré kỹ tóg tĩ mũ, inh jykre tugrĩn. Ẽn vỹ tóg vẽnh kato ti tỹ ẽprã ré kỹ tĩg ja ẽn e ri ke venh ke mũ, tag ki, ẽprã. Kỹ tóg rĩr krỹg ja tũ ẽn venh ke mũ gé,” he tóg.

Mateus 6:21

Ãjag tỹ ga kri tỹ nén ũ mág nỹtĩn kỹ ãjag tóg, ga kri mũ mág sór mũ. Ãjag tỹ hã ra kanhkã tỹ tỹ nén ũ mág nỹtĩ sór kỹ ãjag tóg, kanhkã ra mũ sór mũ, kỹ tag hã ne há nĩ',” he tóg, Jesus ti.

Lucas 14:33

“Hã kỹ inh mré mũ pẽ han ke to jykrén nĩ. Iso há kãfór nỹtĩm nĩ, ãjag tũ kar kri. Ke tũ nĩ mũ ra ãjag pijé inh mré mũ pẽ han mũ',” he tóg.

João 6:35

Kỹ tóg: “inh hã vỹ tỹ ẽmĩ ẽn ri ke?? nĩ. Inh hã vỹ ãjag rĩnrĩr han ke mũ,” he mũ. “Ũ tỹ iso kãtĩ mũ ẽn vỹ kókĩr mãn ke tũ nĩ. Ũ tỹ inh ke rã mũ vỹ goj kron mãn sór ke tũ nĩ gé,” he tóg.

Roma 15:4

Hã ra Topẽ tóg ẽg kanhrãn sór mũ. Hã kỹ tóg ti vĩ tó tĩ ag mỹ: “ha rán,” he ja nĩgtĩ. Hã kỹ ag tóg ránrán ja nĩgtĩ. Ẽn ve kỹ ẽg tar nỹtĩ, Jesus jykre mĩ mũ to. Kỹ ẽg tỹ prãnh kenh ke tũ nĩ. Kỹ ẽg tóg ẽg tỹ kanhkã tá nén venh ke mũ ẽn kã jatu' henh ke tũ nĩ gé.

Colossos 2:3

Ẽg tỹ ti ki kanhrãn kỹ ẽg tóg Topẽ ki kanhró nỹtĩnh ke mũ gé. Ti pãte ẽg tóg vẽnh vĩ sér ũ ve mãn ke tũ nĩ. Ti hã tugrĩn ẽg tóg Topẽ ki kanhrãn kỹ nỹtĩ.

Colossos 3:16

Cristo vĩ hã tỹ jagnẽ mỹ tóm nĩ, hã ki kanhrãn sórm nĩ. Tag tỹ jagnẽ jyvẽn nĩ, tag hã to krĩ há han nĩ. Ti mỹ jãn nĩ. Ti jé hã tóm nĩ, ti kuprĩg tỹ ãjag mỹ nén tó mũ ti. Ti hã mỹ vĩ há han nĩ. Ti mỹ: “inh mỹ tóg há tĩ, ã tỹ inh mỹ nén han mũ ti,” hem nĩ.

Hebreu 10:34

Kỹ ag tóg ãjag kã ũ sigse ja nĩ gé. Kỹ ãjag tóg ũn sigse kỹ nỹtĩ ẽn ag jagãgtãn ja nĩgtĩ, ag tỹ ãjag mré Jesus ki ge kỹ nỹtĩn kỹ. Pã'i ag tỹ ãjag tỹ nén gég mũ ra tóg ãjag mỹ sér ja nĩgtĩ. Ãjag tỹ kanhkã tá nén ũ há tãvĩ ẽn venh ke hã mĩ ãjag tóg, ẽkrén ja nĩgtĩ. Ãjag tỹ kanhkã tá nén venh ke mũ ẽn vỹ tũ' henh ke tũ pẽ nĩ.

Nén Venh Ke 3:18

Hã kỹ sóg ãjag mỹ: “inh ki ouro há ẽn mãn kãmũ jẽg,” he sór mũ, “ãjag tỹ riko nỹtĩ jé. Kur kupri kajãm nĩ, ãjag tỹ kator nỹtĩ tũ nĩ jé, ãjag mỹ'ãg tũ nĩ jé. Vẽnh kagta kajãm nĩ, ãjag kanẽ mỹ, ãjag tỹ ve há han mãn jé.