Mateus 11:23 - O Novo Testamento na língua Kaingáng

²³ “Sỹ ẽmã tỹ Cafarnaum tá ke ag mỹ tag tó sór vẽ gé, ha mẽ. Ũri tóg ãjag mỹ sér tĩ. Kanhkã ra ẽg mũnh mũ, he ãjag tóg tĩ, to jykrén kỹ. Hã ra ãjag tóg nũgme ki vár kãn ke mũ, ha vem nĩ. Ẽmã tỹ Sodoma tá ke ag vỹ, ag jykre pãno to kãgter. Ag tỹ sỹ nén han mũ ve ra ag vãsỹ to jykrén mũ vẽ, kỹ ag kãgter ke tũ nĩ vẽ. Kỹ ag ũri ẽg mré nỹtĩnh mũ vẽ.

Mateus 11:23 Iomraidhean Croise

Mateus 10:15

Ha mẽ, ki hã sóg tó mũ. Kurã tỹ ẽgno kã, isỹ vẽnh kar jykre tugnỹm ke kurã ẽn kã ag tóg, jagtar nỹtĩnh mũ sir, ag tỹ ãjag vĩ mẽ jãvãnh nỹtĩn kỹ. Ẽmã tỹ Sodoma mré ẽmã tỹ Gomorra tá ke ag tóg jykre pãno nỹtĩ ja nĩgtĩ. Kỹ ag tóg jagtar nỹtĩnh ke mũ gé. Hã ra ũn tỹ ãjag vĩ jẽmẽ jãvãnh ẽn ag tóg ag jagtar kãfór han ke mũ mỹr, ha vem nĩ,” he tóg.

Mateus 16:18

“Ha mẽ, tỹ ã Pedro nĩ, hã vỹ: pó, he mũ. Pó tag kri sóg isũ han mũ, tỹ ĩn ri ke ẽn, hã vỹ: “ã tỹ ag mỹ inh vĩ tó tugrĩn ag tóg inh ki genh ke mũ,” he mũ. Kỹ ũ tỹ inh ki ge kỹ nỹtĩ ag vỹ tỹ Topẽ ĩn ri ke nỹtĩ. Ag fár tỹ tũ' he mũ ra ag tóg rĩnrĩr mãn ke mũ. Tũ' henh ke tũ ag tóg nĩ.

Mateus 17:24

Kỹ ag tóg mũ mãn kỹ ẽmã tỹ Cafarnaum tá junjun mũ sir. Kỹ imposto kaja mãg tĩ ag tóg Pedro mỹ vĩ mũ, Topẽ ĩn jé imposto mãg tĩ ag. Imposto ẽn kaja hã vỹ: jãnkamy régre, he mũ. Pedro mỹ ag tóg: “ãjag Senhor mỹ kajãm tũ nĩgtĩ'?“ he mũ.

Mateus 4:13

Ẽmã tỹ Nazaré tá kãkutẽ kỹ tóg, ẽmã tỹ Cafarnaum ra tĩ mũ, tá nĩ jé, goj nig mág ẽn tá, Zebulom ag jamã tá, Naftali ag jamã tá.

Mateus 8:5

Kỹ Jesus tóg kejẽn ẽmã tỹ Cafarnaum tá jun mũ. Kỹ fóg tỹ capitão tóg, ti venh kãtĩ mũ.

Lucas 10:15

Kỹ tóg: “sỹ ẽmã tỹ Cafarnaum ki ke ag mỹ tag tó sór vẽ gé, ha mẽ,” he mũ. “Ũri tóg ver ãjag mỹ sér tĩ. “Kanhkã ve jé ẽg tóg ke mũ,” he ãjag tóg tĩ, ón kỹ. Hã ra ãjag tóg nũgme ki vár ke mũ,” he tóg.

Lucas 14:11

“Hã kỹ tóg ũ tỹ ag kãfór nĩ sór mũ térem ke mũ, vẽsỹkã, Topẽ ti, ha vem nĩ. Jãvo tóg ũ tỹ: “tỹ inh ũn sĩ nĩ,” he mũ ẽn jãnfyn ke mũ, ha vem nĩ,” he tóg, Jesus ti.

Lucas 16:23

Hã ra tóg nũgme ki kutẽ mũ, ti kuprĩg ti. Inferno tá ti vẽsỹrénh jagy han mũ sir. Kejẽn tóg kanhkã ki ẽvãnh mũ, kỹ tóg tá Abraão vég mũ, Lázaro ke gé, kuvar há tá.

Lucas 4:23

Kỹ Jesus tóg ag mỹ: “ãjag hỹn iso jykrén kónãn sór mũ,” he mũ. “Médico mỹ ẽg tóg: kur vẽsỹ há' hé,” he tũ nĩgtĩ. Ãjag hỹn inh mỹ: ẽmã tỹ Cafarnaum tá ã tóg ũn kagyga ag tỹ há' hé, kỹ kur tag ki ẽg tỹ há' he gé, ã tỹ vẽnh kar tỹ há' he sór nĩn kỹ, he sór mũ,” he tóg.

Han Kãme 2:27

Inh kuprĩg vỹ vẽnh kuprĩg jamã tá nĩg mág han ke tũ nĩ. Inh fár vỹ vag ke tũ nĩ gé, sỹ tỹ ã tỹ kuprẽg ja nĩn kỹ.

Han Kãme 2:31

Hã kỹ tóg Cristo rĩr mãn ke tó ja nĩgtĩ gé, ti tỹ: inh fár vỹ vag ke tũ nĩ, hen kỹ. Cristo pijé vẽser jamã tá nĩg mág han', kỹ ti fár vỹ vag ja tũ nĩ gé,” he tóg, Pedro ti.

Judas 1:7

Kar kỹ ẽmã tỹ Sodoma mĩ ẽkrén nĩ gé, ẽmã tỹ Gomorra mĩ ke gé, ti pénĩn ẽmã kãsir mĩ ke gé. Ẽn tá ke ag ne vẽjykre pãno tãvĩ han mũ ja nĩgtĩ', kanhkã tãn ag ri ke. Jagnẽ mré nỹ kónãn tãvĩ han ja ag tóg nĩgtĩ. Kỹ ag tóg ũ ag to én ja nĩgtĩ gé, ag mré ke tũ ag, ũn gré tỹ ũn gré ũ mré nỹ sór kỹ. Kỹ Topẽ vỹ pĩ nhyr vãnh ki ag vãm ja nĩgtĩ, ẽg tỹ ag to jykrén kỹ to ki kanhró nỹtĩ jé.

Nén Venh Ke 1:18

Rĩr inh jẽ nĩ. Ter ja inh nĩ, hã ra sóg rĩr jẽ nĩ, kỹ sóg ter mãn ke tũ pẽ nĩ. Isỹ ũ mỹ: “ter jé ã tóg ke mũ,” hen kỹ tóg ter ke mũ. Isỹ ũ mỹ: “ter ke tũ ã tóg nĩ,” hen kỹ tóg ter ke tũ nĩ gé,“ he tóg.

Nén Venh Ke 11:8

Ag kãgter kỹ ag tóg ẽmã kuju tá vár kỹ nỹtĩ nĩ, ẽg Senhor tỹ ẽmã tá ka to sa ja ẽn tá. Ẽmã ẽn tá ke ag jykre tóg ẽmã tỹ Sodoma tá ke ag jykre ri ke nĩ, ga tỹ Egito tá ke ag jykre ri ke ti nĩ gé.

Nén Venh Ke 20:13

Ũ tỹ goj ki kãgter mũ ag vỹ tá nỹtĩ gé, ũ tỹ vẽser jamã tá nỹtĩ ag kar ti. Vẽnh kar vỹ tá nỹtĩ. Ag tỹ nén han mũ kar kajãm kãn jé ag tóg ke mũ ha.

Nén Venh Ke 6:8

Kỹ sóg kãvãru ũ vég mũ. Hã ra tóg vẽser jógtánh ẽn ri ke nĩ. Ũ tỹ kri nĩ ẽn tóg ẽg tén tĩ. Kỹ vẽnh kuprĩg ag vỹ ti nón kãmũ mũ gé. Ag tỹ ẽprã ke ag vẽnh kãpóv tỹ 4 (ke) ag kã ti vẽnh kãpóv pir ag kãgtén ke vẽ, rógro tỹ, ag kókĩr tỹ ke gé, vẽnh kaga tỹ ke gé, mĩg tỹ ke gé.