Mateus 10:6 - O Novo Testamento na língua Kaingáng

⁶ “Israel ag tãvĩ mỹ tóm nĩ ver. Topẽ mỹ ag tóg tỹ carneiro vãgfor mũ ri ke nỹtĩ, kỹ ag hã mỹ tóm nĩ ver,” he tóg.

Mateus 10:6 Iomraidhean Croise

Mateus 18:10

“Hã kỹ gĩr to é he tũg nĩ. Ũ tỹ ag ki rĩr mũ ag vỹ kanhkã tá nỹtĩ, mỹr, ha mẽ. Topẽ tỹ jẽgnẽ jafã ũ ag vẽ. Inh jóg mré ag tóg nỹtĩ, ti vég ag tóg nỹtĩ.

Mateus 18:11

Tỹ sóg ẽprã ke fi kósin nĩ. Ũn vãgfor mũ ẽn ag krenkren han hã jé sóg jun ja nĩ, mỹr, ha mẽ,” he tóg.

Lucas 24:47

“Kỹ ũ ag tỹ vẽnh kar mỹ inh kãmén ke vẽ. Ijiji tó jé ag tóg ke mũ. Vẽnh kar mỹ ag tóg: “ãjag jykre pãno tovãnh ra. Kỹ Topẽ vỹ ãjag mỹ vẽnh pãte fón ke mũ, ãjag tỹ ti vĩ mranh ja ti,” henh ke mũ. Povo kar mỹ ag tóg tónh ke mũ, hã ra ag tóg tag ki tó vén ke mũ, Jerusalém ki.

Han Kãme 13:46

Hã ra Paulo ag tóg ag kamẽg tũ nĩ. Ag mỹ ag tóg: “ãjag hã mỹ ẽg tóg tó vén, Topẽ vĩ ti,” he mũ, “ti tỹ ẽg mỹ: Judeu ag mỹ tó vén, hen kỹ. Hã ra ãjag tóg mẽ jãvãnh nỹtĩ, kỹ ãjag tóg ẽg rĩr krỹg ja tũ venh ke tũ nĩ. Hã kỹ ẽg tóg sir fóg ag hã mỹ tónh ke mũ, Topẽ vĩ ti,” he ag tóg.

Han Kãme 18:6

Hã ra ag tóg ti kato vĩ mũ. Kỹ ag tóg Jesus to é he mũ. Kỹ Paulo tóg ti kur rũmrũm mũ, ag mỹ: “vẽnh hã ki ãjag tóg vãgfor ke mũ, nũgme ki vár kỹ,” he jé. “Ãjag mỹ sóg Jesus tó, hã ra ãjag tóg mẽ jãvãnh nỹtĩ. Kỹ ãjag tỹ vẽsóg ki vẽsỹrénh ke vẽ. Kỹ sóg fóg ag kar hã mỹ tónh tĩg ha, kanhgág ag kar mỹ ke gé,” he tóg mũ.

Han Kãme 26:20

Damasco tá ke ag mỹ sóg tó vén, kar Jerusalém tá ke ag mỹ ke gé, ga tỹ Judéia tá ke kar ag mỹ ke gé. Judeu kar ag mỹ sóg tó mũ. Kar sóg fóg ag mỹ tó mũ gé sir, kanhgág ag mỹ ke gé, ag tỹ ag jykre pãno tovãnh jé, ag tỹ Topẽ jykre han jé sir, vẽnh kar tỹ ag jykre há ve jé,” he tóg.

Han Kãme 3:26

Ãjag hã mỹ tóg ti kósin jẽnẽ, ti rĩn mãn kỹ. Ãjag hã mỹ tóg tó vén, ãjag tỹ tỹ Judeu nỹtĩn kỹ. Ãjag tỹ ãjag jykre pãno tovãnh jé,” he tóg, Pedro ti, João mré.

1 Pedro 2:25

Vãsỹ ẽg tóg vẽnh mẽg tỹ carneiro vãgfor ri ke nỹtĩ ja nĩgtĩ. Hã ra tóg hur ẽg tatĩ kãtĩg, ẽg vãgfor ja ra, Jesus ti. Kỹ ẽg tóg ti mré mũ mũ sir, carneiro fag tỹ ag ki rĩr tĩ mré mũ ri ke. Ti hã ne ẽg ki rĩr nĩ ha'.